Süka tü karaloʼuta kanüliakat Pütchi suluʼujeejatka tü Bibliakalü aneetka atuma nakuwaʼipa na anoujashiikana mapüleejeerü anta sünain tü wetsiikulokalüirua nuunteetkalü akajee wanee anoujashi nülatüin süchikumüin tü kasa alatakat nümüin. Aneeria shia süpüla nüntüin sünain wanee wetsiikulo akatchinreetka naaʼin na nuwalayuukana jee aneekeechi nia wanee kasa kojutukat atuma Jehová. Püchajaa tü pütchi pikirajaweekalü anain, pünteetka sünain tü waneirua pütchi asakinnaka anain jee aküjünüsü motsomüin jamaluʼuluin wanee wetsiikulo (paashajeʼera tü pütchikat « Sukuwaʼipainjatka watuma süpüla wekirajaain sünain karaloʼutakat tüü»). Püntamaateerü anain pütchi suluʼujeejatü tü Bibliakat akatchinraka paaʼin oʼuniraka pukuwaʼipa jee achiaanaka aka pia. Eejeeria pütchi aneetka atuma pukuwaʼipa jee aneetka atuma nakuwaʼipa na wawalayuukana.

Suluʼu karaloʼutakat tüü nnojoleerü wantüin anain süpüshuaʼa tü wetsiikulo wekirajaweekalü achiirua, eepejeʼe süpüla woʼttirüin sünainjee tü watüjaweekalü aaʼu jee wachajaain sooʼomüin choʼujaale shia (Pr 2:1-6). Süpüla pütüjain sooʼomüin, eeshi süpüla pikirajaain sükajee Nachajaayainjatü pütchi na aküjaliikana pütchi nüchiki Jehová jee suluʼu tia püchajaa tü kanüliakat «Ekirajawaa sünain tü pütchi Ashajuushikat» jee shiale suluʼu Índice de las publicaciones Watch Tower. Paaʼinrüle tia, pütüjaajeerü aaʼu jamaluʼuluin wanee wetsiikulo jee tü paaʼinrajatkat süpüla poonooin sümaa sünüiki. Shia pikirajaa anain tü karaloʼuta jeketükat ojuʼitüin süpüla pütüjaain saaʼu nnojoluin kakaliairüin tü pütchi pikirajaakalü anain.

Kasataalejeseʼe pütüjain sünainjee karaloʼutakat tüü, piyaawatüin saaʼu Nünüiki Maleiwa jee kekiin pia sutuma. Sümaʼainruʼu pikirajaain sünain piyaawateerü aaʼu müin «katakai soʼu tü nünüikikat Maleiwa jee pülasü shia» (Heb 4:12).