«Kepiasü taya suluʼu wanee mma Sierra Leona sünülia», müsü wanee wayuu kanüliasü Dauda. «Jintuluiwaʼaya taya atkaashii na tapüshikana namaa wanee wayuuinnua saaʼujee wanee mma. Süpüla sütüjaanüin aaʼu jaralüin kakoroloin tü mmakat nounejirüin wanee outshi. Chi outshikai niʼitaain wanee rouya najapuluʼu wanee wayuu otta nukoʼoyoluin nia süka wanee kuluulu kasuutalü. Niirakaapa chi wayuukai suluʼu tü rouyakat, kutkuttushi sümaa kerain nia, nümaka: ‹¡Iraa teʼrüin arütkaain wanee wayuu laülaa! Kasuusü nüsheʼin, nuʼwala sümaa jutpünain nia›.

»¡Chi niʼrakai nia chi tatuushikai! Süchikijee nuʼwaataka sümaa kutkuttuin nia: ‹¡Nnojorüle junoujuin tü teʼrakat jalaina jiʼraiwa!›, shiasaʼa, nnojotka jaralüin oʼunuin nünainmüin. Niimaleʼennaka nutuma chi outshikai süka wüin süpanamaajatü wunuʼu suluʼujatü wanee aliita.

»Wakorolo tü mmakat otta apünajüinjatü tü toushukot suluʼu naashin chi ‹tatuushikai›. Sutuma tia atüjaanüipa aaʼu jaralüin kakoroloin tü mmakat».

 Maʼaka chaaʼaya África otta suluʼupünaa tü mmakat süpüshuaʼa watta maʼin saalii wayuu anoujaka noʼunuin na ouktushiikana eemüin saaʼinpülee tü ouktusükalüirua, eejeere jülüjüin naaʼin na yaakana saaʼu tü Mmakat süpüla naainjüin kasa namüin. ¿Shiimain tia? ¿Shiimainche katüin noʼu na ouktushiikana? Nnojorüle müin shia, ¿jaralii na ashatakana nakuwaʼipa? Anasü maʼin atüjawaa saaʼu nakuwaʼipa na ouktushiikana süka eein süpüla katüin woʼu jee ouktuin waya sünainjee.