1, 2. ¿Jaralii na naʼaleewainkana maʼin Maleiwa aküjünaka achiki yaaya?

¿JARA püneeküinjachika süpüla paʼaleewain? Eeshi püchajaale wayuu eeka wanaawain naaʼin otta nukuwaʼipa pümaa. Pücheküin wayuu eeka kamaneein otta anain nukuwaʼipa.

² Nüneeküin Maleiwa wanee wayuuinnua sümaiwa süpüla naʼaleewain maʼin naya. Müshi nia nüchiki Abraham: ‹Taʼaleewain nia› (paashajeʼera Santiago 2:23). Sükajee alin David nüpüla, nümaka: ‹Anashi maʼin nia tamüin› (Aluwataaushikana 13:22). Nüchiki Daniel chi nünüikimaajachikai, müshi nia: «Aishi maʼin pia tapüla» (Daniel 9:23, TNM).

3. ¿Jamüshii nüneekaka Jeʼwaa wanee wayuuinnua süpüla naʼaleewain naya?

³ ¿Jamüshi naʼaleewainka Jeʼwaa Abraham, David otta Daniel? Müshi Jeʼwaa nümüin Abraham: «Paaʼinrüin tü taluwataakat anain pia» (Génesis 22:18). Makalaka nürütkaain Jeʼwaa nanainmüin na nnojoliikana yaletayaain aaʼin sünain aainjaa tü nümakat. Müshi nia namüin na israeliitakana: «Joonoo sümaa tanüiki, Jümaleiwaseechi taya otta tapueuloseena jia» (Jeremías 7:23, TNM). Poonoole sümaa nünüiki Jeʼwaa, paʼaleewainjeechi nia.

4, 5. ¿Kasa naainjaka Jeʼwaa süpüla nükaaliinjain süka nütchin na anoujashiikana?

⁴ Jülüja paaʼin tü kasa eekat sutuma aleewaa nümaa Maleiwa. Saashin tü Wiwüliakat jülüjashii naaʼin Jeʼwaa «süpüla nükaaliinjain süka nütchin na oonookana sümaa nünüiki süka süpüshuaʼa naaʼin» (2 Crónicas 16:9, TNM). ¿Kaseerü naainjaka Jeʼwaa süpüla nükaaliinjain pia süka nütchin? Müsü Salmo 32:8, TNM: «Kekiijeechi pia tatuma otta tekirajeechi pia sünain tü wopu puʼunuinjatkat aluʼu. Tachiajaajeechi pia sümaa jülüjüin pia taaʼin».

⁵ ¡Anakatche maʼin tü nümakat Jeʼwaa pümüin süpüla naaʼinmajüin pia! Nieechi achiaaka otta aaʼinmajaka pia paainjale tü nümakat. Nükaaliinjeein pia Maleiwa süpüla püchecherüin paaʼin sülatüle kasa mojusü pümüin (paashajeʼera 1 Pedro 5:7). Piʼyataale nümüin süka süpüshuaʼa paaʼin, meerü pünüiki maʼaka naaʼin wanee aʼyataai nümüin: ‹Eeshi Maleiwa tamaa waneepia, nnojoleerü kasain ashapatüin taaʼin› (Aluwataaushikana 2:25). Nieechi Jeʼwaa akaaliinjaka pia süpüla anain pukuwaʼipa noʼuluʼu. Akatsaʼa nnojoluin paainjeein tia nutuma chi nüʼünüükai Maleiwa.

6. ¿Jamüsü nünüiki Satanaa nachiki na wayuukana?

⁶ Maʼaka wekirajaain suluʼu ekirajaaya 11, nujuyaajüin Satanaa nuluwataaya Maleiwa. Naashin, alaa Maleiwa otta nnojoishi anain süpüla aluwatawaa sükajee nnojoluin nuuʼulaain Adán sümaa Eva naneeküin tü kasa eekalü anain jee mojuin. Süchikijee kaainjalain Adán otta Eva, awainmalaasü nooʼuliwoʼu Mmapaʼa. Mapa, naashin Satanaa nnojoishii aʼyataain na wayuukana nümüin Jeʼwaa süka naaʼin. Müshi nümakai: «Aʼyataashii naya sümaa maaliin nia napüla. Nooʼulaanüle tapüla eeshii süpüla nüʼünüüin Maleiwa tatuma wayuu eeka eein». Tia shia tü nüküjakat chi Yolujaakai nüchiki Job. ¿Jarai wayuukai  chia? ¿Jamüshi sünainpünaaka nia tü nüküjakat Satanaa?

7, 8. (1) ¿Jamüshi naataka Job noulia na kepiakana soʼu nükalia? (2) ¿Jamüsü nünüiki chi Yolujaakai nüchiki Job?

⁷ Alatüirü 3.600 juya nüchikijee Job. Müshi Jeʼwaa nüchiki: ‹Nnojoishi eein wanee wayuu eeka müin aka naaʼin, maainjalasai, lotusü nukuwaʼipa, kojutüshi Maleiwa nümüin otta nnojoishi sünainpünaain kasa mojusü› (Job 1:8, TNM). Talatüshi Jeʼwaa nümaa Job.

⁸ Naashin chi Yolujaakai nnojoishi aʼyataain Job nümüin Maleiwa süka naaʼin. Müshi nia nümüin Jeʼwaa: ‹Paaʼinmajüin Job, tü nipiakat otta süpüshuaʼa tü kasa nümaʼanakat. Anasü putuma sukuwaʼipa tü kasa naainjakat, wainma nümüʼlüin putuma. Pajaʼttirüle süpüshuaʼa tü kasa nümaʼanakat mojeerü nünüiki pümüin› (Job 1:10, 11, TNM).

9. ¿Kasa naainjaka Jeʼwaa sutuma tü nüküjakat Satanaa? ¿Jamüsü naainjaka tia?

⁹ Naashin Satanaa, aʼyataashi Job nümüin Maleiwa sutuma tü aapünakat nümüin. Sülatüle kasa mojusü nümüin, mojeerü nünüiki nümüin. ¿Kasa naainjaka Jeʼwaa sutuma tia? Nuuʼulaain nuuʼulakünüin aaʼin Job süpüla sütüjaanüin aaʼu shiimainre alin Maleiwa nüpüla jee alawaale shia.

10. ¿Kasa naainjaka Satanaa süpüla nuuʼulaküin naaʼin Job? ¿Kasa nnojotka naainjain Job?

¹⁰ Ooʼulakünüsü naaʼin Job nutuma Satanaa süka wainma kasa mojusü. Nuʼutirüin naaʼin nüchepchia, nuʼluwajirüin otta nuʼutirüin saaʼin nümüʼlüin. Sutuma tia, nnojoluitpa kasa nümaʼana Job. Mapa, ouktüshii sutuma juya na polooshiikana nüchonnii. Mayaapejeʼe sülatüin tia, «nnojoishi kaainjalain Job otta nnojotsü mojuin nünüiki nümüin Maleiwa» (Job 1:22, TNM).

11. (1) ¿Kasa niiʼiyateeka Satanaa nüka Job? ¿Kasa naainjaka Jeʼwaa sutuma tia? (2) ¿Jamüsü nünüiki Job ayuuipa nia?

¹¹ Ayatüshi Satanaa nüchiirua Job. Müshi nia: ‹Jaʼitairü  ajaʼttüin nuwashirüin, ouktüin nüchepchia otta nüchonnii, nüchechereerü naaʼin. Aluʼusaʼa ayuuire nia mojeerü nünüiki nümüin Maleiwa›. Nuuʼulaain Jeʼwaa ayuulin Job nutuma chi Yolujaakai, aisü maʼin tia ayuuliikat otta alerajünüsü shia. Akaisaʼa Job ayatüshi nia anoujain. Müshi nia: «Waneepieechi taya pümaa, waneʼereʼeya ouktapa taya» (Job 27:5, TNM).

12. ¿Kasa naainjaka Job shiʼipajee tü naainjakat chi Yolujaakai?

¹² Nnojotsü nütüjaain aaʼu Job niain Satanaa kasirüin tü alatakat nümüin. Sükajee nnojoluin nütüjaain saaʼu tü nümakat chi Yolujaakai süchiki Nuluwataaya Jeʼwaa, niayaa Maleiwa kasitka naashin tü kasa mojusü alatakat nümüin (Job 6:4; 16:11-14). Mayaapejeʼe sülatüin tia, ayatüshi Job oonooin sümaa nünüiki Jeʼwaa. Niiʼiyatüin mayaa alawaain tü nüküjakat Satanaa.

13. ¿Kasa eeka sutuma noonooin waneepia Job sümaa nünüiki Maleiwa?

¹³ Sükajee jaa nümüin waneepia Job, niiʼiyatüin Jeʼwaa alawaain tü nüküjakat Satanaa. Naʼaleewain maʼin Maleiwa Job otta wainma kasa anasü naapaka nümüin (Job 42:12-17).

14, 15. ¿Jamüsü wanainpünaaka wapüshuaʼa tü nümakat Satanaa nüchiki Job?

¹⁴ Nünainpünaasü Job otta wanainpünaasü tü nüküjakat Satanaa. Tia süküjüin shia Proverbios 27:11, TNM: «Kekii maʼin pia tachonchee otta pütalateʼera taaʼin süpüla tasouktüin niʼipajee chi ojuyaajakai taya». Tia pütchikat, shiiʼiyatüin ayatüin Satanaa nujuyaajüin Maleiwa otta mojuin nünüiki nachiki na aʼyataashiikana nümüin. Anale wakuwaʼipa weeʼiyatüin nüküjüin alawaa Satanaa otta talatüshi Maleiwa watuma. ¿Kasa paainjainjatka sutuma tia? Jaʼitairü piiʼiratüinjatüin pukuwaʼipa, ¡anasü maʼin piiʼiyatüle nüküjüin alawaa Satanaa!

 ¹⁵ Jülüja paaʼin tü nümakat Satanaa: «Naapeerü chi wayuukai süpüshuaʼa tü kasa nümaʼanakat süpüla katüin noʼu» (Job 2:4, TNM). Sükajee «chi wayuukai» nümüin, nia Job nüküjaka achiki otta napüshuaʼa na wayuukana. Anasü maʼin jülüjale waaʼin tia. Mojusü nünüiki chi Yolujaakai püchiki sutuma poonooin waneepia sümaa nünüiki Maleiwa. Keeʼireesü naaʼin nnojoluin poonooin sümaa nünüiki Maleiwa sülatüle pümüin kasa mojusü. ¿Kasa shimeejiaka wayuu nutuma Satanaa?

16. (1) ¿Kasa shimeejiaka wayuu nutuma Satanaa süpüla nakatalaain nuulia Maleiwa? (2) ¿Kaseerü naainjaka Satanaa süpüla nükatalüin pia?

¹⁶ Maʼaka wekirajaain suluʼu ekirajaaya 10, wainma shimeejia wayuu nutuma Satanaa süpüla nakatalaain nuulia Maleiwa. Müshi nia maʼaka naaʼin wanee ‹kalaira jee wasashi süpüla nümalajeʼerüin wanoula› (1 Pedro 5:8). Nnojorüle nacheküin na paʼaleewainkana, na püpüshikana otta na waneeinnua pikirajaain sünain tü Wiwüliakat otta paainjain tü sümakat, nia Satanaa süchiiruaka tia (Juan 15:19, 20). * Satanaa ‹nuuʼulaküin nakuwaʼipa na aapieekana› (2 Corinto 11:14). Wainma tü niʼitaakat süpüla nimeejüin pia otta nnojoluin anain pukuwaʼipa nümüin Maleiwa. Süpüshi tia shia tü mojuukat aaʼin. Eesü niʼitaale suluʼu paaʼin iseerüin püchiki talatüin Maleiwa putuma (Proverbios 24:10). Jaʼitaichi Satanaa müin aka wanee «kalaira» otta ‹na aapieekana›, waneesia neʼe tü kasa keeʼireekat naaʼin. Naashin, puuʼulaajeechi Maleiwa sülatüle pümüin kasa mojusü jee puuʼulakünüle aaʼin. ¿Kasa paainjainjatka süpüla piiʼiyatüin alawaain tia otta poonooin waneepia sümaa nünüiki Maleiwa maʼaka naaʼin Job?

17. ¿Jamüshii woonooka sümaa tü nuluwataakalü anain Jeʼwaa?

¹⁷ Anale pukuwaʼipa nümüin Maleiwa, piiʼiyateerü alaain Satanaa. ¿Kasa sünainpünaaka tia? Müsü tü Wiwüliakat: ‹Anashi aire püpüla Maleiwa waneepia süka süpüshua paaʼin. Anashi jülüjale paaʼin nia waneepia› (Mateo 22:37). Aire maʼin püpüla Maleiwa, paainjeerü maʼin tü nuchuntakat pümüin. Müshi chi aluwataaushikai Juan: ‹Waaʼinrüle tü nuluwataakat anain waya Maleiwa, shiimüin alin nia wapüla›. Aire püpüla Jeʼwaa süka süpüshuaʼa paaʼin ‹nnojoleerü isain püchiki paaʼinrüin tü nuluwataakat anain› (1 Juan 5:3).

18, 19. (1) Püküja süpüshi tü nuluwataakalü anain Jeʼwaa (Paashajeʼera tü pütchikat « Wayoukta tü kasa nüʼürülakat Jeʼwaa»). (2) ¿Jamüsü watüjaaka saaʼu nnojoluin nuchuntuin Jeʼwaa wamüin kasa kapüleesü?

¹⁸ ¿Kasa tü nuluwataakalü anain Jeʼwaa? Süpüshi tia shia tü sünainpünaakat tü akuwaʼipaa wayouktüinjatkat. Maʼaka saaʼin tü suluʼukat, kanüliaka: « Wayoukta tü kasa nüʼürülakat Jeʼwaa». Yala, aküjünüsü süchiki tü akuwaʼipaa mojukat maʼin saashin tü Wiwüliakat. Piʼraiwaʼaya shia, eesü nnojorüle mojuin pümüin süpüshi tia pütchikat. Püsakirapa paaʼin sünain tü pütchi suluʼujeejatkat tü Wiwüliakat, pütüjaajeerü aaʼu anain maʼin tü nuluwataakalü anain Maleiwa. Eesü choʼujaale piiʼiratüin pukuwaʼipa, akatsaʼa tia kapüleesü pümüin süka nnojoyülüin paainjain shia. Akanasaʼa na anakana noʼuluʼu Maleiwa, talatüshii maʼin naya (Isaías 48:17, 18). Tia eesü süpüla puuntüin shia. ¿Jamüsü watüjaaka saaʼu?

¹⁹ Shia süka nnojoluin nuchuntüin Jeʼwaa kasa kapüleesü süpüla waainjain (paashajeʼera 1 Juan 5:3). Nütüjaa aaʼu woulia tü kasa wountakat jee tü isakat wachiki (Salmo 103:14). Otta müsia, naapeerü wamüin tü nütchinkat süpüla woonooin sümaa nünüiki. Müshi Pablo: ‹Juuʼulakünüle aaʼin, nükaaliinjeena jia Maleiwa. Juunteerü jüchecherüin jaaʼin suʼunnaa tia, süka niiʼiyateerüin jümüin sünain jamüinjatüin jujuʼitia saʼakajee› (1 Corinto 10:13). Süpüla wachecherüin  waaʼin, naapeerü wamüin Jeʼwaa «tü yalayalaakat [tü nütchinkat, TNM]» (2 Corinto 4:7). Müshi Pablo süchikijee nüchecherüin naaʼin suʼunnaa tü kasa müliakalü atuma nia: «Katchinshi taya süpüla tü kasakat süpüshuaʼa nutuma chi katchinkai atuma taya» (Filipos 4:13, TNM).

20. ¿Kasa akuwaʼipaa talataka atuma naaʼin Maleiwa piʼitaainjatka suluʼu pukuwaʼipa? ¿Jamüsü anaka maʼin shia?

²⁰ Süpüla talatüin Jeʼwaa watuma, wayouktüinjatü tü  kasa nüʼürülakat otta anainjatü wamüin tü kasa anakat nümüin (Roma 12:9). Talatüsü paaʼin namaa na wanaawakana aaʼin otta akuwaʼipa pümaa. Müshia Jeʼwaa talatüshi nia. Sükajee tia, ana pümüin tü kasa anakat nümüin. Suluʼu Salmo 15 aküjünüsü nachiki na anakana süpüla naʼaleewain Maleiwa otta tü kasa nülerajakat (paashajeʼera Salmo 15:1-5). Na naʼaleewainkana Maleiwa eesü suluʼu nakuwaʼipa tü akuwaʼipaa eekat nutuma «chi naaʼinkai Maleiwa», maʼaka saaʼin ‹aijirawaa, talataa aaʼin, eimalawaa aaʼin, atüjaa aʼatapajaa, kamanewaa, aaʼinraa tü kasa  anasükat, anoujaa, anamiaa otta achecheraa aaʼin› (Galacia 5:22, 23).

21. ¿Kasa paainjüinjatka süpüla piʼitaain suluʼu pukuwaʼipa tü akuwaʼipaa anakat nümüin Maleiwa?

²¹ Süpüla piʼitaain suluʼu pukuwaʼipa tü akuwaʼipaa anakat nümüin Maleiwa, paashajeʼera otta pikirajaa weinshi sünain tü Wiwüliakat. Pikirajaapa maʼin sünain tü nuchuntakat Jeʼwaa pümüin, wanaaweerü paaʼin nümaa (Isaías 30:20, 21). Aire maʼin püpüla Jeʼwaa, aneerü maʼin putuma pukuwaʼipa süpüla talatüin nia putuma.

22. ¿Kaseerü aapünaka pümüin anale pukuwaʼipa noʼuluʼu Maleiwa?

²² Aʼyataweeshii waya süchiirua anain wakuwaʼipa nümüin Maleiwa. Saashin tü Wiwüliakat wanoukteʼerapa maʼin wakuwaʼipa, ooʼulaashii waya suulia tü kasa mojusükat (Colosas 3:9, 10). Müshi chi eeʼirajüikai nümüin Maleiwa süchiki tü nuluwataakalü anain: «Eʼreena waya kasa anasü woonoole sümaa» (Salmo 19:11, TNM). Anale pukuwaʼipa noʼuluʼu Maleiwa, wainmeerü kasa anasü naapaka pümüin. Otta müsia piiʼiyateerü nüküjüin alawaa Satanaa otta talateerü naaʼin Jeʼwaa putuma.