WAINMA wayuu aʼwaajaka otta kojutüka amüin tü kuruusakat. Saashin Enciclopedia Hispánica «shia tü ayaawatünakalü aka tü iküleesia niʼitaalakat Jesuu». Sutuma tia, ¿eeinjatche kuruusa wamaʼana?

Jülüjainjatü waaʼin nnojoluin ouktüin Jesukürisüto sünain wanee kuruusa. Tü pütchikat griego «kuruusa» shia staurós, «wunuʼu lotusü» maluʼulu. Tia pütchi ashajünakat süka griego «nnojotsü piamain wunuʼu akurusajuushi [...]. Tü griego ashajünakalü aka [Nuevo Testamento], nnojotsü aküjüin piamain wunuʼu» (The Companion Bible).

 Na ashajakana tü Wiwüliakat, nashajüin süka tü pütchikat griego xýlon tü akachennakalü anain Jesuu. «Wunuʼu» otta «shiʼipa wunuʼu» maluʼulu (Aluwataaushikana 5:30; 10:39; 13:29, TNM; Galacia 3:13; 1 Pedro 2:24, TNM).

Chi ekirajaaikai Hermann Fulda nüküjüin jamüin sükachennapuʼuka wayuu sünain wanee wunuʼu lotusü: «Nnojotsü wunuʼulia eepuʼule sükachennüin wayuu noʼupala na waneeinnua. Makalaka shiʼitaanüin wanee wunuʼu lotusü süpüla nakachennüin na mojulaashiikana, achitünüsü tü najapükat iipünaa otta tü nooʼuikat wünaapünaa» (Das Kreuz und die Kreuzigung [Tü kuruusakat otta na akachennakana sünain]).

Tü aküjakat maʼin tü shiimainkat shia tü Wiwüliakat. Müshi Pablo: «Taashiinapa waya anoujashiikana nütüma Cristo suulia süsalainjanain waainjala, süka niaichipain süsalain waainjala nütüma Maleiwa. Shia tü ashajünakat achiki paala sünain müin mayaa: ‹Atüjaana aaʼuchi chi eekai akachennüin sünain wane wunuʼu sünain süsalaichipain naainjala nütüma Maleiwa› » (Galacia 3:13). Pütchikat tia nüshajüin Pablo suluʼujee Deuteronomio 21:22, 23, aashajaasü süchiki wanee wunuʼu, nnojotsü aashajaain süchiki wanee kuruusa. Wayuu eeka kachetüin sünain wunuʼu «süsalashi naainjala». Makalaka mojuin weʼitaale wepialuʼu wanee kuruusa eere kachetüin Kürisüto sünain.

Sünainjee tü wekirajaaitpakalü anain, ¿kasa alataka süchikijee ouktüin Kürisüto? 300 juya süchikijee tia, nnojoishii kamaʼanain kuruusa süpüla naʼwaajüin Maleiwa na anoujayaakana. Soʼutpünaa tü juyakat 300, Constantino, chi sülaülakai mma, süchikijee manoulain nia paala naainjüitpa jooluʼu tü naainjakat na ooʼulaakana Jeʼwaa. Soʼujee tia, niʼitaain tü kuruusakat süpüla shiyaawatünüin aka tü iküleesia kaluʼukat nia. Mayaapejeʼe naainjain tia, nnojotsü nünainpünaain Jesukürisüto tü kuruusakat. Namaʼanajeejatü shia na manoujainsaliikana. Müsü wanee karaloukta katoolika: «Tü kuruusakat namaʼanapuʼusü shia na anoujapuʼukana nüpülapünaa Jesuu otta na manoujainsaliikana» (New  Catholic Encyclopedia). Naashin na waneeinnua sünainpünaasü shia tü kasa aʼwaajünakat mmapaʼa otta tü amaʼüjirawaakalü akuwaʼipaa.

¿Jamüsü shikirajünaka maʼin anain tü kuruusakat? Shia süpüla «nanoujain» na manoujainsaliikana. Mojusü saashin tü Wiwüliakat waʼwaajüle shiyaakua wanee kasa eeka namaʼanajeejatüin na manoujainsaliikana (2 Corinto 6:14-18). Otta müsia süchiyaain waya suulia tü maleiwayaasükalüirua (Aluwataaushikana 17:29; 1 Corinto 10:14). Makalaka nnojoluinjatüin kuruusa namaʼana na aʼwaajakana Maleiwa. *