NNOJOTSÜ süküjüin wamüin tü Wiwüliakat tü kaʼi jemeikalü oʼu Jesuu. Akatsaʼa süküjüin wamüin nnojoluin jemein nia tisienpüroʼu.

¿Kasa eeka tisienpüroʼu suluʼu tü mmakat Belén, eejachire jemein Jesuu? Aisü jemiai otta aʼitüsü maʼin tü juyakat nowienpüroʼu otta tisienpüroʼu, tü kashi kislev namakat na judíokana. Süchikijee tia, aireesia maʼin jemiai otta kasuusü saaʼupünaa tü uuchikat tisienpüroʼu otta eneeroʼu, tü kashi tebet namakat na judíokana. Wekirajaa sünain tü sümakat tü Wiwüliakat süchiki tia.

Naashin Esdras, wanee ashajaka tü Wiwüliakat, nüküjüin alin jemiai otta shiʼitüin maʼin tü juyakat soʼu tü kashikat kislev. Naashin, «soʼu tü mekietsatkat kashi, [kislev] soʼu tü piamakat shikii kaʼi» outkajaashii wainma wayuu Jerusalén, «kutkuttüshii [...] sutuma shiʼitüin maʼin tü juyakat». Otta müshiʼiya na wayuu chajanakana jutkatüin müsü nanüiki süchiki tü alatakat soʼu tia kaʼikat: «Tüü shia tü kaʼi eere shiʼitüin maʼin tü juyakat, nnojotsü süpüla anuuipaʼainjatüin wayuu»  (Esdras 10:9, 13, TNM; Jeremías 36:22). Sülüʼütpa tisienpüroʼu, nakotchojüin naʼanneetse na arüleejüliikana süpüla nnojoluin narüleejüin saʼwai süpaʼa anoouishii.

Saashin tü Wiwüliakat wanaa sümaa jemein Jesuu eejana wayuu süpaʼa anoouishii sünain aaʼinmajaa naʼanneetse. Naashin Lucas, wanee ashajaka tü Nüchikimaajatkat Jesukürisüto, «soʼu aikat tia, eeshii wane wayuuirua arüleejülii sünain aaʼinmajaa naʼanneetse süpaʼa wane anoouishii chaʼaya süʼütpaʼa Belén» (Lucas 2:8-12). Soto waaʼin naaʼinmajüin naʼanneetse na arüleejüliikana süpaʼa wanee anoouishii soʼu aikat tia. Aire jemiai otta shiʼitüle maʼin tü juyakat tisienpüroʼu chaaʼaya Belén, ¿naaʼinmajeetche naʼanneetse na arüleejüliikana süpaʼa anoouishii? Nnojorüleejaa. Sutuma tia, shiiʼiyatüin nnojoluin jemein Jesuu tisienpüroʼu. *

Süküjüin maʼin tü Wiwüliakat süchiki tü kaʼi ouktakalü oʼu Jesuu, akatsaʼa nnojotsü süküjüin maʼin süchiki tü kaʼi jemeikalü oʼu nia. Sutuma tia, sotusü waaʼin tü nümakat Salomón: «Analeeka wanee anüliee suulialeʼe wanee seita anasü otta tü kaʼi ouktakalü oʼu waya suulialeʼe tü kaʼi jemeikalü oʼu waya» (Eclesiastés 7:1, TNM). Sünainjee tia, watüjaaitpa aaʼu jamüin süküjaka maʼin tü Wiwüliakat nüchiki Jesuu wanaa sümaa nüküjüin pütchi, ouktüin nia otta nnojoluin süküjüin maʼin süchiki tü kaʼi jemeikalü oʼu nia.