1, 2. ¿Jarai chi aaʼinmajüinjachikai waya?

SÜSIRUMAJAALE, kayaajaale, sütüttüle otta shiʼitüle tü juyakat sümaa kaʼüliain shia wanaa sümaa waraittüin pia, ¿kaseerü paainjaka? Püchajaajeerü wanee kasa punjulaayainjatü. Piʼraka wanee piichi sotpaʼa tü wopukot, jososü otta anasü shia. ¡Talatüsü maʼin paaʼin sükajee puusütüin shia!

² Wainma maʼin tü kasa mojusü alatakat maaʼulu otta amojujaasü maʼin sukuwaʼipa tü mmakat. Akatsaʼa, eeshi wanee aaʼinmajüinjachika waya suulia tia. ¿Jarai nia? Jülüja paaʼin tü sümakat tü Wiwüliakat: «Meechi taya nümüin Jeʼwaa: ‹Pia akaaliinjaka taya, chi tounjulaayakai, chi Tamaleiwase tanoujakai anain›» (Salmo 91:2, TNM).

3. ¿Kasa waainjainjatka süpüla nükaaliinjain waya Jeʼwaa?

³ Jeʼwaa, chi Kakumalakai tü kasakat süpüshuaʼa otta chi Aluwataakai saaʼu, nia akaaliinjeenaka waya. ¡Anakatche maʼin tia! Pülashi maʼin nia suulia wayuu otta wanee kasa eeka sumojujeʼereein wakuwaʼipa. Jaʼitairü  aainjünüin kasa mojusü wamüin, nunoukteʼereerü shia Jeʼwaa. ¿Kasa waainjainjatka süpüla nükaaliinjain waya? Weʼitaa waaʼin nünain. Müsü tü Wiwüliakat wamüin: «Jiisatta jukuwaʼipa süpüla alinjanain jia nüpüla Maleiwa» (Judas 21, TNM). Müsia, weisattüinjatü wakuwaʼipa süpüla alinjanain waya nüpüla Maleiwa otta paaʼinwajiraainjana waya nümaa. Müle shia watuma, wounjulaayeechi nia. Akatsaʼa, ¿kasa waainjainjatka süpüla aleewain maʼin waya nümaa Jeʼwaa?

4, 5. Püküja süpüshi tü kasa niiʼiyatakalü aka Jeʼwaa alin waya nüpüla.

⁴ Wainma kasa niiʼiyataka aka Maleiwa alin waya nüpüla. Wekirajaa sünain tia süpüla alinjanain waya nüpüla. Jülüja paaʼin tü pütüjaaitpakat aaʼu sükajee karalouktakat tüü. Süpüla talatüin waaʼin naapüin wamüin Jeʼwaa tü Mmakat, eküülü, wüin, tü kasa ayuʼnnakat sünainjee, mürüʼlü otta wunuʼulia anashaatasü. Otta müsia, watüjaa aaʼu nüshajiralain Maleiwa tü Wiwüliakat, eere nüküjüin wamüin nünülia otta nukuwaʼipa. Saashin tü Wiwüliakat nüjütüin chi Nüchonkai Mmapaʼamüin süpüla müliain jee ouktüin nia waaʼu (Juan 3:16). Sükajee tia, nüsülajüin wamüin wanee kasa anasü maʼin, tü anainjatkalü atuma wakuwaʼipa mapeena.

⁵ Tia sünainjeesü wanee kasa naainjakat Jeʼwaa. Niʼitaain wanee aluwataaya sirumatuʼu, shia tü Nuluwataayakat Jesukürisüto. Tia Aluwataayakat sajaʼttireerü tü müliaakat otta paʼaraiiseerü tü Mmakat sutuma. ¡Anakatche maʼin tia! ¡Talateena waya otta kateerü woʼu waneepia sümaa jimatüin waaʼin! (Salmo 37:29.) Süpülapünaa eein tia, sükaaliinjain waya tü Wiwüliakat süpüla anain wakuwaʼipa. Otta müsia nüsülajüin wamüin wanee kasa: shia tü aashajawaakat nümaa. Eeshii süpüla waashajaain nümaa eepünaale waya. Tü wekirajaaitpakalü anain süpüshi neʼe tü kasa  niiʼiyatakalü aka Maleiwa alin pia nüpüla otta na wayuukana.

6. ¿Kasa paainjainjatka sutuma alin pia nüpüla Jeʼwaa?

⁶ Jooluʼu, püsakira paaʼin: «¿Kasa taainjainjatka sutuma alin taya nüpüla Jeʼwaa?». Eesü sümüle wayuu: «Alinjachi wapüla Jeʼwaa». ¿Müsia shia saaʼin pümüin? Naashin Jesuu tü alanaʼleekat sünainjee tü pütchi aapünakat nümüin Moisés shia tüü: ‹Anashi aire püpüla Maleiwa waneepia süka süpüshua paaʼin. Anashi jülüjale paaʼin Maleiwa waneepia› (Mateo 22:37). Wainma kasa alinjachika püpüla anainjee Jeʼwaa. Süpüla alin püpüla Jeʼwaa süka süpüshuaʼa paaʼin, ¿kamalainjaiche neʼe nia pümüin?

7. Süpüla alin wapüla Jeʼwaa, ¿kamalainjaiche neʼe nia wamüin? ¿Jamüsü maka pünüiki?

⁷ Aire wapüla Maleiwa saashin tü Wiwüliakat nnojotsü shiain kamalainjachin neʼe nia wamüin. Mayaapejeʼe choʼujaain tia, shia neʼe tü akumajaakat palajana suluʼu waaʼin süpüla alin wapüla Maleiwa. Süpüla watüjaain saaʼu, weʼitaa wanee shiyaawase: keeʼireere paaʼin wanee mansaana, ¿talateetche paaʼin saapünüle pümüin tü süʼükat? Nnojorüleejaa. Shiimain choʼujaain tü süʼükat süpüla süsotüin tü suuʼuliakat mansaana, akatsaʼa tü keeʼireekat paaʼin shia tü süchonkat. Müsia naalii Jeʼwaa wapüla: maʼaka saaʼin süʼü tü mansaanakat, yotuinjatü palajana süpüla kachoin shia. Müsü tü Wiwüliakat: «Waaʼinrüle tü nuluwataakat anain waya chi Maleiwakai, shiimüin alin nia wapüla» (1 Juan 5:3). Shiimainre alin wapüla Jeʼwaa weeʼiyatüinjatü süka tü kasa waainjakat (paashajeʼera Mateo 7:16-20).

8, 9. ¿Kasa weeʼiyataka aka alin wapüla Jeʼwaa otta kojutüin wamüin tü naainjakat wapüleerua?

⁸ Aishi wapüla Maleiwa woonoole sümaa tü nuluwataakalü anain waya. Mapüleesat tia, nnojotsü müin aka saaʼin  wanee kasa jawatüsü, süpülajatü talatüin waaʼin otta anain wakuwaʼipa sutuma (Isaías 48:17, 18). Wooʼulaale nikirajüin waya Jeʼwaa, weeʼiyatüin kojutüin wamüin tü naainjakat wapüleerua. Naainjain tia palitchon wayuu. Nnojotsü washateein nakuwaʼipa noʼutku na wayuu kepiakana soʼu nükalia Jesuu. Soʼu wanee kaʼi, niiyajüin Kürisüto polooshii wayuu ajaʼtta atachii, akaisaʼa waneeshia neʼe chi aapakai analuʼut nümüin (Lucas 17:12-17). Washateein nukuwaʼipa wayuukai chia otta nnojotsü washateein nakuwaʼipa na mekietsalii nnojoliikana aapüin analuʼut nümüin Jesuu.

⁹ ¿Kasa pütchi woonooinjatka amaa naashin Jeʼwaa? Aküjünüipa süpüshi tia pütchikat suluʼu karalouktakat tüü. Wekirajaa sünain süchikuaʼa. Waainjale tü nuluwataakalü anain waya Jeʼwaa, aijeena waya nüpüla.

10. ¿Jamüsü anaka maʼin ayatüle wekirajaain nünain Jeʼwaa?

¹⁰ Weʼraajüle maʼin Jeʼwaa, arütkaajeena maʼin waya nünainmüin. Waainjainjatü shia waneepia.  Chale pia wünaʼapü, aisü maʼin tü jemiaikat puchuwajaaka wanee siki süpüla paatulujüin. ¿Puuʼulaajeetche shiyokojooin tü sikikat? Nnojorüleejaa. Piʼitaajeerü siki sooʼomüin süpüla ayatüin shia chuwatüin süka kateerüin poʼu sutuma. Maʼaka ayatüin chuwatüin wanee siki sutuma tü wunuʼukat, müsia ‹wekirajaale nünain Maleiwa› aishi nia wapüla sutuma (Proverbios 2:1-5, TNM).

11. ¿Jamüsü naaʼin na nikirajüinkana Jesuu sutuma tü nikirajakalü anain naya?

¹¹ Keeʼireesü naaʼin Jesuu alinjachin Jeʼwaa waneepia napüla na nikirajüinkana otta kojutüin namüin tü Nünüikikat. Süchikijee süsoʼiraain naaʼin, nüküjüin namüin piamashii nikirajüin tü pütchi ashajünakat süka Hebreo, tü ekeraajakat nünain. ¿Jamüsü naaʼin na nikirajüinkana sutuma tia? Mapa, müshii naya: ‹Talatashaanasü maʼin waaʼin wanaa sümaa nikirajüin waya sünain tü pütchi nüchikimaajatkat Maleiwa› (Lucas 24:32).

12, 13. (1) ¿Aishiche Maleiwa napüla napüshuaʼa na wayuukana otta kojutüsü namüin tü Wiwüliakat? (2) ¿Kasa waainjainjatka süpüla alinjachin waneepia wapüla Jeʼwaa?

¹² Wanaa sümaa pikirajaain sünain tü shikirajakat maʼin tü Wiwüliakat, talatashaatasü maʼin paaʼin sümaa alin püpüla Maleiwa ¿aashimüin? Wainma na alatakana amüin tia. Tü kapüleekat maʼin shia ayatüinjachin alin maʼin püpüla Maleiwa otta kooʼomüin naalii püpüla. Naashin Jesuu, nnojotsü waainjainjatüin tü naainjakat na wayuukana maaʼulu: ‹Nooʼulaainjanain suulia aijirawaa› (Mateo 24:12). ¿Kasa paainjainjatka süpüla alin waneepia püpüla Jeʼwaa otta kojutüin pümüin tü sümakat tü Wiwüliakat?

¹³ Ayata pikirajaain nünain Jeʼwaa otta Jesukürisüto (Juan 17:3). Jülüja paaʼin tü paashajeʼerakat suluʼujee tü Wiwüliakat otta püsakira paaʼin: «¿Kasa shikirajaka anain taya tüü nüchiki Jeʼwaa? ¿Sükaaliinjainche taya süpüla alinjachin Jeʼwaa tapüla süka süpüshuaʼa taaʼin?» (paashajeʼera 1 Timoteo 4:15). Paainjale tia aijeechi maʼin püpüla Jeʼwaa.

14. ¿Jamüsü anaka maʼin waashajaale nümaa Maleiwa süpüla alin nia wapüla waneepia?

 ¹⁴ Wanee sukuwaʼipa süpüla alin waneepia wapüla Jeʼwaa shia waashajaale nümaa waneepia (1 Tesalónica 5:17). Suluʼu ekirajaaya 17, wekirajaa anainrü nüsülajalain wamüin Maleiwa tü aashajawaakat nümaa. Aleewashii waya namaa na wayuukana waashajaale namaa waneepia otta waküjüle tü shiimainkat namüin. Müsia waashajaale nümaa Jeʼwaa waneepia aleeweena maʼin waya nümaa. Nnojoluinjatü weitirakuu wamüin wanüiki. Waashajaainjachi amaa Jeʼwaa maʼaka wanee jintüi nümüin nüshi. Waainjapa tia, kojutüinjachi nia wamüin otta waküjainjatü tü shiimainkat süka süpüshuaʼa waaʼin (Salmo 62:8). Süpüla waʼwaajüin Maleiwa anasü maʼin wekirajaale wamüiwaʼa sünain tü Wiwüliakat otta waashajaale nümaa süka tü shiimainkat. Sükajee tia, aijeena waya nüpüla.

15, 16. ¿Jamüsü anainjatka sümaa müinjatüin aka wanee korolo kojutüsü wamüin tü aküjaakat pütchi?

¹⁵ Waʼwaajüin Maleiwa wamüiwaʼa wekirajaale sünain tü Wiwüliakat otta waashajaale nümaa. Jooluʼu, wekirajaa sünain tü aküjaakat süchiki tü wanoujakalü anain. ¿Püküjüirü sümüin wayuu tü pikirajaakalü anain? Müle shia putuma, paainjain wanee kasa anasü maʼin (Lucas 1:74, 75). Waküjüle sümüin wayuu tü wekirajaakat nünainjee Jeʼwaa, waainjain tü kasa anasü aluwataanakalü anain na anoujashii shiimainshiikana: aküjaa süchiki Nuluwataaya Maleiwa (paashajeʼera Mateo 24:14; 28:19, 20).

¹⁶ Kojutüsü maʼin nümüin Pablo tü aküjaakat pütchi, müsü aka saaʼin wanee korolo kojutüsü maʼin naashin (2 Corinto 4:7, TNM). Waküjüle pütchi nüchiki Jeʼwaa otta süchiki tü naainjainjatkat shia wanee aʼyatawaa anasü maʼin. Waainjain shia süka anain maʼin chi waʼyataakai amüin. Otta müsia anashaatasü wakuwaʼipa sutuma.  Waküjüle pütchi wakaaliinjain na wayuukana süpüla narütkaain nünainmüin Jeʼwaa otta süpüla katüin noʼu waneepia. ¿Eesüche wanee aʼyatawaa eeka talatüin maʼin waaʼin sutuma? Otta müsia waküjüle pütchi nüchiki Jeʼwaa otta süchiki tü Nünüikikat, kooʼomüinsü wanoula otta  aishi maʼin nia wapüla. Kojutüsü nümüin Jeʼwaa tü kasa waainjakat nümüin (Hebreokana 6:10). Ayatüle waya sünain tia aʼyatawaakat aijeena waya nüpüla Maleiwa (paashajeʼera 1 Corinto 15:58).

17. ¿Jamüshii waküjüinjanaka maʼin pütchi?

¹⁷ Sotuinjatü waaʼin süküjünajatüin maʼin süchiki Nuluwataaya Maleiwa. Müsü tü Wiwüliakat: ‹Püküja waneepia tü nünüikikat Maleiwa sümüin wayuu. Ayata pia sünain aküjaa› (2 Timoteo 4:2). ¿Jamüshii waküjüinjanaka maʼin pütchi maaʼulu? Shia süka sümüin wamüin tü Wiwüliakat: ‹Alüʼütsü tü nükalia Jeʼwaa keemakat maʼin› (Sofonías 1:14, TNM). Müsia, alüʼütsü maʼin tü kaʼi najaʼttirüinjatkalü oʼu Jeʼwaa tü kasa mojusükat. ¡Tia natüjaainjatü aaʼu na wayuukana! Natüjaainjatü aaʼu noonooinjanain maaʼulu sümaa nünüiki Jeʼwaa chi Aluwataakai naaʼu süka «nnojoleerüin kamaʼain» tia kaʼikat (Habacuc 2:3, TNM).

18. ¿Jamüshi waʼwaajüinjachika Jeʼwaa noʼupala na waneeinnua namaa na anoujashii shiimainshiikana?

¹⁸ Keeʼireesü naaʼin Jeʼwaa waʼwaajüin nia noʼupala na waneeinnua namaa na anoujashii shiimainshiikana. Makalaka sümüin tü Nünüikikat: ‹Shia anaka jutkatiraale waya süpüla wachecherüin waaʼin sünain anoujaa süka sülüʼülüin nükalia chi Senyotkai› (Hebreokana 10:24, 25). Woutkajaale namaa na wawalayuukana, waʼwaajüin chi Wamaleiwasekai. Otta müsia katchinsü sümaa watütüleʼerüin waaʼin namaa na wawalayuukana.

19. ¿Kasa waainjainjatka süpüla aijiraain waya namaa na wawalayuukana?

¹⁹ Woutkajaale namaa na aʼyataakana nümüin Jeʼwaa aijiraashii otta aleewajiraashii maʼin waya namaa. Anasü maʼin jülüjale waaʼin tü akuwaʼipaa anasü eekat nanain na waneeinnua maʼaka jülüjain naaʼin Jeʼwaa tü akuwaʼipaa anasü eekat wanain. Nnojo paʼatapajüin anainjatüin maʼin nakuwaʼipa na puwalayuukana. Soto paaʼin kaainjaraliin waya otta eein eeka natüjamaatüin jee nnojoluin  natüjamaatüin (paashajeʼera Colosas 3:13). Aleewa pia namaa na aikana apüla Jeʼwaa süka süpüshuaʼa naaʼin, müle shia kooʼomüinjeerü punoula. Puʼwaajüle Jeʼwaa namaa na puwalayuu tooloyuukana otta na jieyuukana, aijeechi pia nüpüla Maleiwa. Wekirajaa jooluʼu sünain tü kasa naapakat Jeʼwaa namüin na aʼwaajakana nia waneepia otta na aikana nüpüla.

20, 21. ¿Kasa «tü kataa oʼuu shiimainkat maʼin»? ¿Jamüsü anainjatka maʼin shia?

²⁰ Tü kasa naapakat Jeʼwaa namüin na oonookana waneepia sümaa nünüiki shia tü kataakalü oʼuu, ¿kasa kataa oʼuu tia? Eeshii süpüla wamüin: ‹Katüsü woʼu, asanalaashii, eküshii otta asüshii waya›. Otta müsia anale wakuwaʼipa eeshii süpüla wamüin: «¡Anakatche maʼin wakuwaʼipa!». Akatsaʼa, saashin tü Wiwüliakat müsü nnojotkai katüin soʼu wayuu maaʼulu.

²¹ Saashin tü Wiwüliakat «wachajaainjatü tü kataa oʼuu shiimainkat maʼin» (1 Timoteo 6:19, TNM). «Tia kataa oʼuu shiimainkat maʼin» shia tü aapünajatkat wamüin mapeena. Anapa maʼin waya meerü wakuwaʼipa maʼaka nücheküin shia Maleiwa paala. Suluʼupa waya tü Paʼaraiisükat sümaa jimatüin, talatüin waaʼin otta nnojoluin ayuulin waya «kateerü woʼu waneepia» (1 Timoteo 6:12, TNM). Shiimain tia, anashaatasü maʼin tü alatajatkat mapeena ¿aashimüin?

22. ¿Kasa paainjainjatka süpüla puusütüin «tü kataa oʼuu shiimainkat maʼin»?

²² ¿Kasa waainjainjatka süpüla wousütüin «tü kataa oʼuu shiimainkat maʼin»? Süpülapünaa nüküjüin Pablo tia pütchikat nuluwataain na anoujashiikana «sünain aaʼinraa waneepia kasa anasü sümüin wayuu» (1 Timoteo 6:18). Kateerü woʼu waainjale tü wekirajaakalü anain suluʼujee tü Wiwüliakat. Akatsaʼa, waaʼinrüle tü kasa anasükat, ¿aapüneetche  wamüin «tü kataa oʼuu shiimainkat maʼin» sünainjee? Nnojo. Tü kataakalü oʼuu waneepia sünainjeesü ‹anamiain maʼin chi Maleiwakai› (Roma 5:15). Akaisaʼa Jeʼwaa, anasü nümüin naapüin kasa anasü namüin na oonookana waneepia sümaa nünüiki. Keeʼireesü naaʼin katüin poʼu waneepia sümaa jimatüin otta talatüin paaʼin. Tia shia tü kataa oʼuu aapünajatkat namüin na aikana nüpüla Maleiwa.

23. ¿Jamüsü anaka maʼin aire waya nüpüla Maleiwa?

²³ Wasakira waaʼin: «¿Taʼwaajüinche Maleiwa maʼaka nüküjüin shia suluʼu tü Wiwüliakat?». Aa wamüle weinshi, anasü maʼin tia. Watüjaa aaʼu nükaaliinjeenain waya Jeʼwaa. Süpülapünaa sajaʼlajaain tü kasa mojusükat, naaʼinmajeena na anoujashii oonookana waneepia sümaa nünüiki. Otta müsia, suluʼujeena waya tü mma jeketüinjatkat nutuma. ¡Anashaateerü maʼin tia! ¡Talateena maʼin waya sutuma waneeküin maaʼulu tü akuwaʼipaa anasükat! Püneeküle shia jooluʼu, kateerü poʼu waneepia maʼaka keeʼireein shia naaʼin Jeʼwaa paala.