EESÜ pütchi shiyaakuayaaka wanee kasa suluʼu Alateetkat Mapeena. Aashajaasü shia süchiki wanee wayuu maaʼinsat kanüliasü shiʼipoʼunain «Babilonia, tü pueulo kojutükat sütüma wayuu, [Babilonia tü Miyoʼusükat, TNM]». Joyotüsü shia saaʼu «wayuu eekat sainküin mmakat süpüshua» (Alateetkat Mapeena 17:1, 5, 15). Tia nnojotsü süpüla saainjain wanee wayuu, makalaka shiyaakuayaain shia wanee kasa. ¿Kasa kayaakuayaaka shia?

 Saashin Alateetkat Mapeena 17:18 Babilonia tü Miyoʼusükat ‹shiyaawase tü pueulo müleʼosükat, aluwataaka naaʼu na sülaülashiikana mma›. Tü pütchikat «pueulo», wayuu paaʼinwajiraashii maluʼulu. «Tü pueulo müleʼosükat» saainjirüin «na sülaülashiikana mma» tü keeʼireekat saaʼin. Makalaka Babilonia tü Miyoʼusükat nayain na paaʼinwajiraakana sainküin mma süpüla naainjirüin kasa mojusü na wayuukana. ¿Jaralii naya? Naya na anoujayaakana. Wekirajaa sünain süpüshi tü sümakat Alateetkat Mapeena süpüla watüjaain saaʼu jamüin maka wanüiki.

Eeshii paaʼinwajiraale sainküin mma na sünainkana poliitika, na oikkaaliikana otta na anoujayaakana. Watüjaa aaʼu Babilonia tü Miyoʼusükat nnojoluin nayain na sünainkana poliitika süka sümüin tü Wiwüliakat nachiki: ‹Na aluwataashiikana sainküin mma kaainjalashii naya süka namaʼüjiraain nakuwaʼipa sümaa›. Tia maluʼulu paaʼinwajiraain shia namaa na aluwataashiikana. Sutuma tia, ‹wayuu maaʼinsat maʼi› münüsü shia (Alateetkat Mapeena 17:1, 2; Santiago 4:4).

Saashin tü Wiwüliakat aʼyalajeena maʼin ‹na oikkaaliikana sainküin mma› ouktapa tü jietkat. Sutuma tia, Babilonia tü Miyoʼusükat nnojoishii nayain na oikkaaliikana. Saashin tü Wiwüliakat na aluwataashiikana sainküin tü Mmakat otta na oikkaaliikana shaʼwateena naya «kaʼyata» suulia (Alateetkat Mapeena 18:3, 9, 10, 15-17). Sünainjee tia, Babilonia tü Miyoʼusükat naya na anoujayaakana.

Eesü wanee kasa eeʼiyataka nayain na anoujayaakana Babilonia tü Miyoʼusükat: nemeejüin wayuu süka tü ‹naaʼinrakat na outshiikana› (Alateetkat Mapeena 18:23). Tü naaʼinrakat na outshiikana sümaʼanajeejatü tü iküleesiakalüirua otta yolujaakalüirua. Makalaka «shipiasü yolujaa neʼe» sümüin tü Wiwüliakat sümüin Babilonia tü Miyoʼusükat (Alateetkat Mapeena 18:2; Deuteronomio 18:10-12). Otta müsia Babilonia tü Miyoʼusükat süʼürülashii na suluʼukana tü iküleesia shiimainkat, müliashii sutuma na «nünüikimaajanakana Maleiwa» otta na ‹chainjanakana aluwataain sirumatuʼumüin› (Alateetkat Mapeena 18:24). Sükajee tia, müliashii maʼin sutuma «na anoujashiikana nünain Maleiwa saaliijee ichein naya nünain Jesuu» otta suʼutirüin naaʼin (Alateetkat Mapeena 17:6). Shiimain tia: Babilonia tü Miyoʼusükat shia süpüshuaʼa tü iküleesia nnojotkat shiimain.