¿KASEERÜ aainjünaka saaʼin pümüin soʼu tü Kaʼi kasalajaneetkalü oʼu saainjala wayuu? Wainma na anoujakana sünain noutkajaainjanain soʼu tia eere nuluwataain Maleiwa süpüla süsalain naya naainjala. Naashin, eeshii eeka kepiainjanain sirumatuʼu otta waneeinnua müliainjana saʼaka siki. Saashin tü Wiwüliakat tü Kaʼi kasalajaneetkalü oʼu saainjala wayuu naatainjatü sukuwaʼipa: nnojotsü keemainjatüin, shiainjatü wanee kaʼi aʼatapajünajatka oʼu wanee kasa anasü otta anoukteʼennüinjatka oʼu wakuwaʼipa.

Süchiki kaʼikat tia müshi Juan suluʼu Alateetkat Mapeena 20:11, 12, TNM: ‹Teʼraka wanee einasee kasuusü otta chi joyotokoi saaʼu. Teʼraka na ouktüshiikana, na miyoʼuyuukana, na joʼuucheinkana shaʼwatüshii sümülatuʼu tü einaseekat, sujutannaka wanee karalouktairua. Akatsaʼa sujutannüin wanee karalouktaya; shia tü sünainpünaakat tü kataakat oʼuu. Süsalashii na ouktüshiikana tü naainjala ashajünakat suluʼu tü karalouktakalüirua›. ¿Jarai chi Süsalakai atuma saainjala wayuu?

Nia Jeʼwaa. Akaisaʼa nia nüneeküin wanee wayuu süpüla naainjain tia. Naashin Pablo suluʼu Aluwataaushikana 17:31 ‹niʼitaain [Maleiwa] wane kaʼi nikeraajüinjatkalü oʼu sükuaippa tü wayuukalüirua. Nikeraajüinjatü nükajee wane wayuu niʼitaala süpüla›. Chia Wayuukai nia Jesuu (Juan 5:22).  ¿Joujeerü tü Kaʼi kasalajaneetkalü oʼu saainjala wayuu? ¿Jeʼreerü sükalia?

Saashin Alateetkat Mapeena oʼttajatü süchikijee Armagedón, tü ajaʼttirajatkat tü kasa nuluwataakalü aaʼu Satanaa (Alateetkat Mapeena 16:14, 16; 19:19–20:3). * Süchikijee Armagedón asürünneechi Satanaa otta na yolujaakana suluʼu wanee ishi soʼu 1000 juya. Soʼu tia, süsaleerü saainjala wayuu natuma na 144.000 ‹aluwataainjanakana nümaa Cristo› soʼu tü miitkat juya (Alateetkat Mapeena 14:1-3; 20:1-4; Roma 8:17). Maʼaka wekirajaainnapain tü Kaʼi kasalajaneetkalü oʼu saainjala wayuu nnojotsü motsomüinjatüin maʼaka wanee kaʼi otta wanee ai, aainjünajatü shia soʼutpünaa 1.000 juya.

Soʼutpünaa tü miitkat juya, ‹süsaleena naainjala nutuma Jesuu wayuu eekai katüin noʼu ooʼulaka eekai ouktüin› (2 Timoteo 4:1). Tü pütchikat «wayuu eekai katüin noʼu» naya na ‹wayuu wattakana maʼin naalii› katüinjanaka oʼu süchikijee Armagedón (Alateetkat Mapeena 7:9-17). Otta müshia Juan niʼrüin ‹na wayuu ouktakana shaʼwashawalüin nümülatuʼu chi joyotüshikai saaʼu tü einaseekat›. Naashin Jesuu, ‹saapeerü nünüiki süpüshuaʼa tü wayuu ouktusükalüirua sümaa sujuʼiteerüin mmaapüjee› (Juan 5:28, 29; Aluwataaushikana 24:15). ¿Kasa tü jülüjainjatkat naaʼin Jesuu süsalapa saainjala wayuu nutuma?

Naashin Juan ‹ojutannüsü wanee karalouktairua› otta «süsalashii na ouktüshiikana tü naainjala ashajünakat suluʼu tü karalouktakalüirua» (Alateetkat Mapeena 20:12). ¿Ashajünüsüche suluʼu tia karalouktakat tü naainjapuʼukat na wayuukana kataiwaʼaya noʼu? Nnojo. Tü süsalakat anainjee naya nnojotsü shiain tü naainjapuʼukat kataiwaʼaya noʼu. ¿Jamüsü watüjaaka saaʼu tia? Shia süka ‹taashin na wayuukana suulia naainjala ouktapa naya› saashin tü Wiwüliakat (Roma 6:7). Na asoʼiraainjanakana aaʼin motuinjatü naaʼin Maleiwa tü naainjalakat. Tü karaloukta ojutannakat shiyaakuayaasü tü kasa jeketü  nikirajüinjanakat anain waya Maleiwa. Süpüla katüin noʼu waneepia na asoʼiraainjanakana aaʼin otta na katüinjanakana oʼu süchikijee Armagedón oonooinjana sümaa nünüiki Maleiwa. Süpüshi tü pütchi jeketüinjatkat nüküjeerü shia Jeʼwaa soʼutpünaa tü miitkat juya. Sükajee tia, süsaleena na wayuukana tü naainjainjatkat soʼutpünaa tü miitkat juya.

Soʼutpünaa tia kaʼikat, wainmeena wayuu ekirajaaka sünain tü nümakat Maleiwa otta naainjeerü shia. Süpüla tia, ekirajünüinjana maʼin naya. «Tü natüjainjatkat na wayuu kepiakana saaʼu tü mmakat shia tü lotookat akuwaʼipaa» (Isaías 26:9, TNM). Akatsaʼa nnojoleerüin naainjain napüshuaʼa na wayuukana tü keeʼireekat naaʼin Maleiwa. Müsü tü karalouktakat Isaías 26:10, TNM: ‹Jaʼitaichi amüliajünüin chi mojulaashikai, nnojoleerü lotuin nukuwaʼipa. Nnojoleerü niʼrüin tü kasa anasü naainjainjatkat Jeʼwaa›. Wayuukana naainnua ajaʼttinnajana soʼutpünaa tü Kaʼi kasalajaneetkalü oʼu saainjala wayuu (Isaías 65:20).

Sajaʼlajaapa tia kaʼikat, na katakana oʼu ayateerü katüin noʼu waneepia otta aneena maʼin naya. Soʼutpünaa tia Kaʼikat aneena maʼin na wayuukana maʼaka anain naya namaiwa (1 Corinto 15:24-28). Sajaʼttiamüin tü miitkat juya ooʼulaküneerü naaʼin na wayuukana. Süpüla tia taasheechi Satanaa süpüla nimeejüin naya. Süchikijee, nnojoleena ooʼulakünüin aaʼin (Alateetkat Mapeena 20:3, 7-10). Na aʼleejakana chi Yolujaakai ekeraajeerü nanain pütchikat tüü: «Na lotokana akuwaʼipa, nayeena kepiaka saaʼu tü mmakat süpüla kaʼika süpüshuaʼa» (Salmo 37:29, TNM). Shiimain tia, tü Kaʼi kasalajaneetkalü oʼu saainjala wayuu süpülajatü anain maʼin nakuwaʼipa napüshuaʼa na oonookana waneepia sümaa nünüiki Maleiwa.