Kaʼwayuusepa wanee wayuu kepiainjachi nümüiwaʼa sümaa nuʼwayuuse. Shia kojutüleeinjatka joo nümüin nuʼwayuuse, ayatüinjatpejeʼe kojutüin nümüin nii nümaa nüshi. Eesü motule saaʼin püi kaʼwayuuseichipain pia. Anajiraajeenapajaʼa jia namaa sutuma sünüiki tü Wiwüliakat.

TÜ SÜMAKAT TÜ WIWÜLIAKAT: «Kojut putuma püshi otta püi» (Éfeso 6:2, 3). Kojutüinjachi pümüin püshi sümaa püi, jaʼitairü jeʼrain puuyase. Soto paaʼin sükatalüinjatüin kaʼi puʼwayuuse süpüla sünaʼalaain nümüin süshi sümüin shii. Nnojoleerü achunjüin paaʼin aire püpüla puʼwayuuse, nnojotkalaka mojushiinjatüin pümüin aleewajiraale maʼin shia sümaa shii jee nümaa süshi (1 Corinto 13:4; Galacia 5:26).

TÜ EEKAT SÜPÜLA PAAINJÜIN:

• «Mojuwaisü sünüiki püpüshi tamüin», «mojushiisü sümüin püi tü taainjakat», nnojotsü müinjatüin pünüiki

• Maʼaka piakaijaʼa alatüin amüin tü alatakat sümüin puʼwayuuse

TÜ SÜMAKAT TÜ WIWÜLIAKAT: «Müshijeseʼe nükatalaainjachin [...] wane wayuu shipialuʼujee nii je nipialuʼujee nüshi süpüla waneeshinjachin sünain saʼaniraainjatüin nukuaippa nümüiwa sümaa nuʼwayuuse» (Génesis 2:24). Eesü süsoukteere püi nümaa püshi sünainpünaa pukuwaʼipa sümaa puʼwayuuse saaʼujee ayatayülin naaʼinmajüin pia naaʼinruʼu.

Jiainjana aashajaajiraaka kasain nnojoluinjatüin nusouktüin anainpünaa püshi sümaa püi otta jüküjeerü shia namüin süka anaka akuwaʼipa, nnojotpejeʼe airuʼuluinjatüin jünüiki (Proverbios 15:1). Paaʼinreerü tü anasükat sümaa anajiraweechin pia namaa na kasayuukana pünain, nnojorüle yaletüin paaʼin, anamiale pia otta pütüjüle aʼatapajaa (Éfeso 4:2).

TÜ EEKAT SÜPÜLA PAAINJÜIN:

• Anashii jaashajaajiraale süpüla nnojoluin nasouktüin sünainpünaa wanee kasa na kasayuukana jünain

• Kettaaja jutuma kasain jaainjüinjatüin süpüla junouktüin tia