EINASEE. Nnojoluinjatü kapülain paaʼin pukuwaʼipa pümüiwaʼa wanaa sümaa püneeküin piinase. Soto paaʼin eein süpüla pükatalüin neinase na antakana pümaa, na pikirajüinkana jee na kepiakana pümaa. Nnojo piʼitaain wanee kasa saaʼu tü einasee nnojoluinjatkat pükatalüin.

KASA EEKAI AMÜLOULIN. Piʼikajaa tü kasa puusütakalü anain eemüin süpülee tü kasa amülouikat. Amülouire wanee kasa puulia, püsakira sünain chayaa. Na tepichi maaʼawakana, eʼikajaanüinjana chamüin. Nnojotpejeʼe aaʼinmajüleein tepichi. Jaaʼinmaja jüchonnii otta waneepia naya jümaa.

NA AKAALINJAKANA EEKAI AYUUIJAAIN. Tüü, napülajatü neʼe na eekana ayuuijaain otta neewaain.

NA JÜLÜJAKANA AAʼIN NA ANTÜSHIIKANA. Eʼitaanüshii naya süpüla nakaalinjain pia. Paainja tü namakat wanaa sümaa naküjain pümüin eeinjachire püshaʼwaleʼerüin peʼejena, eeinjachire püikalain otta waneirua kasa.

NAMÜINJATÜ NA OUTKAJAASHIIKANA EEKAI NAKAALINJEEIN. Müleka pükaalinjeere sünain tü outkajawaakat, pürütkaa nanainmüin na wawalayuu shikiipüʼükana.

TÜ NNEERÜ WASÜLAJAKAT. Wainma nneerü choʼujaaka süpüla eeinjatüin tü emiyoʼujiakat pütchi, tü einaseekat otta waneirua kasa süpüla anain waaʼin sünain aapajaa tü pütchikat otta warütkaain nünainmüin Jeʼwaa. Tü nneerü jüsülajakat süka jaaʼin, süpülajatü suwalaajünüin tia otta süpülajatü süküjünüin tü pütchikat süchiki Nuluwataaya Maleiwa sainküin tü Mmakat. Suluʼu tü outkajaaleekat, eesü wainma kaaja süpüla wejitüin nneerü suluʼu otta eesü süpüla puluwataain shia suluʼu donate.pr418.com. Na Laülaashii Jülüjakana Aaʼin na Aküjaliikana Pütchi sainküin Mma naapüin analuʼut jümüin saaʼu jüsülajüin nneerü.

WOUTIISAA. Na woutiisainjanakana, aikalaainjana maalü soʼu tü piamakat kaʼi eere tü einasee aneekajünakat napüla nnojoluiwaʼaya suʼttüin tü pütchi namüinjatkat. Yaleerü neinase shiʼipoʼujee tü aashajaaleekat, müleka eere wanee kasa jeketü aainjünajatka, aküjüneerü shia namüin. Alüʼüjainjana kuluulu noosojia, nnojoluinjatü arülain otta joʼuuchoin nasheʼin.

Ekirajawaa napüla na Aküjaliikana Pütchi Outkajaainjana na wawalayuukana soʼu tü apünüinkat kaʼi aliika. Aküjüneerü jalapüshinjatüin otta jalainjatüin shia. Na wawalayuu pürekutsootkana 23 nouyase sümaa nnojoliin alatüin suulia 65 nouyase kooʼomüinweekana naʼyataain nümüin Jeʼwaa eeshii süpüla narütkaain sünain tia outkajawaakat.