‹Süpüla süküjünüin tü pütchi shiimüinkat sümüin eʼirukuukat süpüshua sainküin mma›, alatsü suulia 700 anüikii nalatiraka aluʼu karaloukta na aküjüliikana pütchi (Alateetkat Mapeena 14:6). ¿Jamüsü sukuwaʼipa natuma? Wainma na wawalayuu ashajakana tü karalouktakat jee naatawaisü noumain; eeshii maʼaka 3.300 na wawalayuu alatirakana pütchi.

Ashajünüsü palajana suluʼu inkülee. Na Laülaashii Jülüjakana Aaʼin na Aküjüliikana Pütchi sainküin Mma, jülüjüsü naaʼin eere süshajünüin tü karalouktakat. Yala, akumajünüsü sukuwaʼipa naʼyataain na ashajakana tü karalouktakat chayaa Estados Unidos jee suluʼu waneeirua Weteet. Süka wainmain na ashajakana tü karalouktakat otta süpüla kamalainjatüin sümüin wayuu eekai eein, ashajünüsü süchiki tü kasa sünainpünaakat sukuwaʼipa wainma wayuu.

Aluwataanüsü namüin na alatirüliikana pütchi. Keraapa wanee karaloukta, aluwataanüsü namüin na alatirüliikana pütchi sainküin mmaka. Nalatirüin shia suluʼu tü anüikii naashajaakat, jülüjüsü naaʼin sümaa nanouktüin shia. Naneeküin na alatirüliikana pütchi wanee pütchi pansaaka atuma tü aküjünakat inküleeruʼu (Eclesiastés 12:10).

Kajaalapüshii sutuma eein computador. Isasü süchiki saainjüin wanee computador tü naainjakat na wawalayuu ashajakana tü karalouktakat jee na alatirüliikana pütchi. Akatsaʼa kajaalapüin naya sutuma naʼyataain süka wanee computador. Nakumajüin na aküjüliikana pütchi tü kanüliakat Sistema Electrónico de Edición Plurilingüe (MEPS münaka süka inkülee) süpüla nakumajüin karaloukta suluʼu wainma anüikii otta süpüla shiʼinprimiijünüin.

¿Jamüsü sülatinnaka maʼin pütchi? Jaʼitainna paliʼirüin jee  wainmain na wayuu naatakana anüikii, alatinnüsü shia «süka keeʼireein maʼi naaʼin [Jeʼwaa] suʼtteʼennüinjatüin wayuu süpüshua sümaa sütüjaainjatüin saaʼu tü shiimüinkat» (1 Timoteo 2:3, 4).

• ¿Kasa sünainpünaaka ashajaa tü karaloukta weitajakat?

• ¿Jamüsü sülatinnaka tü karalouktakat suluʼumüin wainma anüikii?