1, 2. ¿Jamüshi aika püpüla Jeʼwaa?

 ¿AISHI püpüla Maleiwa? Shiimain alin nia püpüla, anuʼusa paapüitpain paaʼin nümüin jee talatüsü paaʼin süka Paʼaleewain nia. Süpülapünaa alin Maleiwa püpüla, aitüjüi pia palajana nüpüla. Saashin tü Wiwüliakat «aijiraashii [waya] süka alin waya nüpüla palajana» (1 Juan 4:19).

² Wainma tü kasa jaʼyakalü atuma shiimain alin waya nüpüla Jeʼwaa. Nukumajüin wapüla tü Mmakat süpüla kepiain waya suluʼu otta niʼitaain kasa süpüshuaʼa süpüla talatüin waaʼin sümaa (Mateo 5:43-48; Alateetkat Mapeena [Apocalipsis] 4:11). Keeʼireesü naaʼin Maleiwa aleewain waya nümaa jee nükaaliinjain waya süpüla weʼraajüinjachin nia. Wanaa sümaa waashajeʼerüin tü Wiwüliakat, nia yootoka amaa waya Jeʼwaa. Naapüin wanüiki woʼuraajapa nümüin (Salmo 65:2). Nuʼunirüin wakuwaʼipa Maleiwa jee nükatchinrüin waaʼin nükajee chi naaʼinkai (Lucas 11:13). Nuluwataain chi Nüchon aishikai maʼin nüpüla Mmapaʼamüin süpüla taashin waya  nutuma suulia kaainjalaa jee outaa (paashajeʼera Juan 3:16, TNM; Roma 5:8).

3. ¿Kasa waaʼinrajatka süpüla aleewain waya waneepia nümaa Jeʼwaa?

³ Soto paaʼin wanee wayuu paʼaleewainkai maʼin, jaʼitasü kasain alatüin pümüin pümaatalashi waneepia. Wainma kasa paainjainjatka süpüla waneepiain pia nümaa chia paʼaleewainkai. Akaataajaʼa neʼe wakuwaʼipa nümaa Jeʼwaa, eeshii süpüla aleewain waya nümaa waneepia. Saashin tü Wiwüliakat, wayaawatüinjatü waneepia tü waalinkat nüpüla Maleiwa (Judas 21). ¿Kasa waaʼinrajatka süpüla ayatüin alin waya nüpüla? Anuu sünüiki tü Wiwüliakat: «Müleka waaʼinrüle tü nuluwataakat anain waya chi Maleiwakai, shiimüin alin nia wapüla. Je tü nuluwataakat anain waya, nnojotsü isain wachiki» (1 Juan 5:3).

4, 5. ¿Jamüshi aika püpüla Jeʼwaa?

⁴ Nüküjain Juan alin wapüla Maleiwa. ¿Sotusü paaʼin wanaa sümaa sukumajaain naalin Maleiwa püpüla?

⁵ Pütüjaapa saaʼu keeʼireein naaʼin Jeʼwaa katüin poʼu waneepia yaa mmapaʼa, ¿jamajaasü paaʼin sutuma tia? Soʼu kaʼikat tia pütüjaa aaʼu tü naainjakat Jeʼwaa süpüla shikeraajüinjatüin tia. Otta müsia piyaawata aaʼu naapüin Jeʼwaa chi Nüchonkai süpüla outuin nia saaʼu waainjala (Mateo 20:28; Juan 8:29; Roma 5:12, 18). Pütüjaapa saaʼu alin pia nüpüla Jeʼwaa, aishi nia püpüla (paashajeʼera 1 Juan 4:9, 10, TNM).

6. (1) ¿Kasa paaʼinrajatka aire püpüla wanee paʼaleewain? (2) ¿Kasa paaʼinraka sutuma alin püpüla Jeʼwaa?

⁶ Nnojotpejeʼe kettaain yalapünaa tü paaʼinrajatkat süpüla piiʼiyatüin alin püpüla Jeʼwaa. Aire püpüla wanee  paʼaleewain, nnojotsü kettaain süka «aishi pia tapüla» pümüin neʼe nümüin, aaʼinrajachi pia wainma kasa süpüla piiʼiyatüin alin nia püpüla. Müsia neʼe tü paaʼinrakat süka alin püpüla Jeʼwaa, paaʼinrüin tü nuluwataakalü anain pia süpüla talatüin naaʼin putuma. Sutuma sükooʼomüinraain naalin püpüla, paapüin paaʼin nümüin jee woutiisashi pia. Sutuma paainjain tia, piiʼiyatüin sünain kamalain pümüin paaʼinrüin waneepia tü nümakat Jeʼwaa (paashajeʼera Roma 14:7, 8, TNM). ¿Kasa paaʼinrajatka süpüla ayatüin pikeraajüin tia?

7. (1) ¿Kasa waaʼinreetka aire wapüla Jeʼwaa? (2) Püküja süpüshi tü kasa mojukat naashin Jeʼwaa.

⁷ Sutuma alin wapüla Jeʼwaa, waaʼinrüin tü nuluwataakalü anain waya otta oonooshii waya sümaa nünüiki. Nüküjain wamüin suluʼu tü Wiwüliakat tü waaʼinrajatkat süpüla anain wakuwaʼipa. Nüküjain wamüin mojuin epeʼruwaa, aʼluwajaa, aküjaa alawaa, aainjirawaa akuwaʼipaa sümaa wanee wayuu nnojotkat waʼwayuusein otta waʼwaajüle wanee kasa naata nuulia niakai (1 Corinto 5:11; 6:18; 10:14; Éfeso 4:28; Colosas 3:9).

8, 9. ¿Jamüsü süpüla watüjaain saaʼu aneerüle nümüin Jeʼwaa wanee kasa waaʼinrajatka? Piʼitaa wanee shiyaawase.

⁸ Süpüla talatüin naaʼin Jeʼwaa watuma, nnojotsü waaʼinrüinjatüin neʼe tü nuluwataakalü anain waya, eesü sooʼomüin tü waaʼinrajatkat. «Paaʼinra tüü, nnojo paaʼinrüin tüü», nnojotsü müin wamüin waneepia tü Wiwüliakat. ¿Kasakaʼa waaʼinrüinjatüin süpüla watüjaain saaʼu aneerüle süneekia watuma wanee kasa? (Éfeso 5:17). Aküjünüsü suluʼu tü Wiwüliakat tü pütchi oʼunirajatkat wakuwaʼipa naashin Jeʼwaa. Waashajeʼerapa tü  Wiwüliakat, weʼraajaleein nukuwaʼipa Jeʼwaa. Wayaawateerü aaʼu tü jülüjakat naaʼin süchiki wanee kasa, watüjaajeerü aaʼu tü anakat nümüin jee tü nülerajakat (paashajeʼera Salmo 97:10; Proverbios 6:16-19; paashajeʼera noota 1).

⁹ Anuu wanee sukuwaʼipa. ¿Jamüsü süpüla watüjaain saaʼu tü anakat süpüla wanajüin suluʼu telewisoot jee Internet? «Paaʼinra tüü, nnojo paaʼinrüin tüü», nnojoishi majüin Jeʼwaa wamüin waneepia. Naapapajaʼa Jeʼwaa wamüin tü pütchi oʼunirajatkat wakuwaʼipa süpüla anain süneekia watuma tü waaʼinrajatkat. Wainma tü kasa yarüttüsü ojuʼitakat maaʼulu suluʼupünaa telewisoot jee müsia tü muusika eekat maaʼulu. Süküjain tü Wiwüliakat kanain naaʼin Jeʼwaa chi eekai mojulaain. Süsaleena nutuma Jeʼwaa na amaʼüjiraakana nakuwaʼipa (Salmo 11:5; Hebreokana 13:4). ¿Kasa shikirajaka anain waya wetsiikulokalüirua tüü? Nülerajüle Jeʼwaa wanee kasa yarüttüsü, walerajüinjatü shia.

10, 11. ¿Jamüshii woonooka sümaa nünüiki Jeʼwaa?

¹⁰ ¿Jamüshii woonooka sümaa nünüiki Jeʼwaa? Nnojotsü waaʼinrüin neʼe suulia süsalain waya waainjala nutuma (Galacia 6:7). Oonooshii waya sümaa nünüiki Jeʼwaa süka alin nia wapüla. Talatüinjatü naaʼin Jeʼwaa watuma maʼaka talatüin naaʼin wanee wayuu nutuma nüchon. Talateerü maʼin waaʼin watüjaale saaʼu talatüin naaʼin Jeʼwaa watuma (Salmo 5:12; Proverbios 12:2; paashajeʼera noota 2).

¹¹ Waaʼinrüin tü nümakat Jeʼwaa süka süpüshuaʼa waaʼin, nnojotsü waaʼinrüin neʼe wanaa sümaa mapüleechoin shia wamüin jee nnojorüle kasainjatüin waneeküin. Nnojotsü waneeküin jaralüinjatüin woonooin  amaa jee tü nnojoluinjatkat woonooin amaa (Deuteronomio 12:32). Oonooshii waya nümaa Jeʼwaa süka süpüshuaʼa waaʼin maʼaka naaʼin chi salmistakai wanaa sümaa nümüin: «Kojuteerü tamüin tü puluwataakalü anain, kojuteerü maʼin tamüin» (Salmo 119:47; Roma 6:17). Washateein nukuwaʼipa Noé, aishi maʼin Jeʼwaa nüpüla müsüjeseʼe sümüin tü Wiwüliakat nüchiki: «Naaʼinrüin süpüshuaʼaya tü nuluwataakat anain [Maleiwa]» (Génesis 6:22). ¿Keeʼireesü paaʼin müin nünüiki Jeʼwaa püchiki?

12. ¿Kasa waaʼinrajatka süpüla talatüin naaʼin Jeʼwaa watuma?

¹² ¿Jamüsü naaʼin Jeʼwaa woonoopa sümaa nünüiki? Talatüshi maʼin nia watuma (Proverbios 11:20; 27:11). ¡Talateechi maʼin putuma chi Kakumainkai kasa süpüshuaʼa! Nnojoliipejeʼe nüpüleeruaain waaʼin süpüla woonooin sümaa nünüiki, nuuʼulaain waneeküin süka waaʼin wamüiwaʼa tü anakat jee tü mojukat. Keeʼireesü naaʼin Jeʼwaa weeʼiyatüin tü naalinkat wapüla sükajee tü kasa anasü waneekakat (Deuteronomio 30:15, 16, 19, 20; paashajeʼera noota 3).

13, 14. ¿Jamüsü nnojoleetka isain wachiki waaʼinrüin tü nuluwataakalü anain waya Maleiwa? Piʼitaa wanee shiyaawase.

¹³ Eesü jülüjale waaʼin kapüleein maʼin aaʼinraa tü nuluwataakalü anain waya Jeʼwaa, saaʼin wamüin nnojotsü waaʼinrüin tü wachekakat sutuma. Nnojotpejeʼe kapüleein shia süka sümüin tü Wiwüliakat wamüin: «Tü nuluwataakat anain waya [Maleiwa], nnojotsü isain wachiki» (1 Juan 5:3). Suwalaʼata tü pütchikat «nnojotsü isain wachiki» makat suluʼu griego, shia tü pütchikat «nnojotsü kapüleein» makat. Suluʼu waneirua wetsiikulo,  ashajünüsü tia pütchikat süpüla süküjünüin süchiki tü kasa mojusü aainjünakat sümüin wayuu (Mateo 23:4; Aluwataaushikana [Hechos] 20:29, 30). Wounteerü waaʼinrüin tü nuluwataakalü anain waya Jeʼwaa. Nnojotsü nuchuntuin wamüin wanee kasa iseetka wachiki.

¹⁴ Jülüjataa paaʼin pükaaliinjainjachire wanee paʼaleewain akolojooinjachikai. Chi paʼaleewainkai, nünaajaain suluʼu kaaja tü kasa eekat nümaʼana. Eesü tü jamaamakat jee eesü tü jawatakat, iseetka nüchiki nüpataain waneeshia wayuu. Nnojoleerü nuchuntuin pümüin chi paʼaleewainkai püpataain pümüiwaʼa tü kaaja jawatakat suulia peewaain sutuma. Müsia nukuwaʼipa Jeʼwaa wamaa, nnojotsü nuchuntuin wamüin wanee kasa iseetka wachiki (Deuteronomio 30:11-14). Nütüjaa aaʼulu Jeʼwaa tü wakuwaʼipakat, «niʼraajüin maʼin tü wakumajiakat ooʼulaka sotusü naaʼin sümamülain mma waya» (Salmo 103:14).

15. ¿Jamüsü watüjaaka saaʼu anain wakuwaʼipa sutuma tü nuluwataakalü anain waya Jeʼwaa?

¹⁵ Nüküjain Moisés namüin na israeliitakana aneerüin nakuwaʼipa waneepia jee kateerüin noʼu noonoole sümaa tü nuluwataakalü anain naya Jeʼwaa (Deuteronomio 5:28-33; 6:24). Mayülia tia maaʼulu. Tü nuchuntakat wamüin Jeʼwaa süpülajatü anain wakuwaʼipa (paashajeʼera Isaías 48:17). Nütüjaa aaʼulu chi Washikai tü aneetkalü atuma wakuwaʼipa (Roma 11:33). Saashin tü Wiwüliakat, aipürai wayuu Maleiwa (1 Juan 4:8). Süpüshuaʼa tü nuluwataakalü anain waya Jeʼwaa, naaʼinrüin shia sükajee alin waya nüpüla.

16. Mayaainjeʼe waleʼeruʼuin tü kaainjalaakat jee saʼakain waya wayuu mojulaasü, ¿jamüsü watüjaaka saaʼu eein süpüla woonooin sümaa nünüiki Jeʼwaa?

¹⁶ Eesü kapüleere wamüin oonowaa sümaa nünüiki  Jeʼwaa. Saʼakashii waya wayuu mojulaajüsüirua nuluwataaka aaʼu chi Yolujaakai. Nüchajaain maʼin sukuwaʼipa süpüla naainjirüin wayuu kasa mojusü (1 Juan 5:19). Eejiraashii joo waya sümaa tü kasa mojusü antawaikat wekiiruʼu jee tü suchuntakat waaʼin. Nnojo woonooin sümaa tia (Roma 7:21-25). Saaʼu alin wapüla Jeʼwaa, waaʼinreerü waneepia tü kasa anasükat. Nütüjaa aaʼulu süpüshuaʼa tü waaʼinrakat süpüla woonooin sümaa nünüiki otta nükaaliinjain waya nükajee chi naaʼinkai (1 Samuel 15:22, 23; Aluwataaushikana 5:32). Mapüleejeerü wamüin oonowaa sümaa nünüiki Jeʼwaa süka nükaaliinjeenain waya süpüla washatüin nukuwaʼipa (Galacia 5:22, 23).

17, 18. (1) ¿Kasa wekirajaajeetka anain suluʼu karaloʼutakat tüü? (2) ¿Kasa wekirajaajeetka anain suluʼu tü wane ekirajaayakat?

¹⁷ Suluʼu karaloʼutakat tüü, ekirajüneena waya sünain tü akuwaʼipaa kamalainkat nümüin Jeʼwaa. Wekirajaajeerü anain tü waaʼinrajatkat süpüla waaʼinrüin tü sümakat tü pütchi oʼunirajatkat wakuwaʼipa otta tü wuleinjatkalü atuma wakuwaʼipa. Soto paaʼin nnojoluin nüpüleeruain waaʼin Jeʼwaa süpüla woonooinjanain sümaa nünüiki. Woonoole sümaa nünüiki Jeʼwaa, aneerü wakuwaʼipa, naapeerü wamüin wainma kasa anasü mapeena otta jaʼyeerü waaʼu shiimain alin nia wapüla (paashajeʼera noota 4).

¹⁸ Nukumajüin waya Jeʼwaa süpüla wayaawatüin saaʼu tü kasa anasükat jee tü kasa mojusükat. Tia sükaaliinjeena waya süpüla waaʼinrüin tü nuluwataakalü anain waya. ¿Kasa naaʼinrajatka wanee wayuu süpüla nütüjaain saaʼu tü kasa anasükat jee tü kasa mojusükat? ¿Jamüsü sukuwaʼipa tia? Wekirajaajeerü anain tia suluʼu tü wane ekirajaayakat.