1. (1) ¿Kasa waaʼinrajatka süpüla anain wakuwaʼipa noʼuluʼu Jeʼwaa sünain aʼwaajaa nia? (2) ¿Jamüsü choʼujaaka waaʼinrüin tia?

 MÜSHI Jesuu: «Anakaja müleka jüchuntüle nümüin [Maleiwa] chi Naaʼinkai süpüla niiʼiyatüin jümüin tü shiimüinkat. Shiainjatü jukuaippaka jooluʼu sünain aʼwaajaa chi Washikai Maleiwa. Shia nüchekaka Maleiwa süpüla saaʼinraa wayuu süpüshua» (Juan 4:23; 6:44). Wayaawatüinjatü saaʼu waneʼewai wakua «tü nüchekakat chi Senyotkai» wapüleerua (Éfeso 5:10). Nnojotpejeʼe mapüleein tia. Nimeejeein waya Satanaa süpüla waaʼinrüin wanee kasa mojuka noʼuluʼu Jeʼwaa (Alateetkat Mapeena [Apocalipsis] 12:9).

2. Püküja tü alatakat süʼütpaʼa tü uuchikat Sinaí.

² ¿Kasa naaʼinraka Satanaa süpüla nimeejüin waya? Wanee kasa naaʼinraka shia nüchajaain sukuwaʼipa süpüla nnojoluin wayaawatüin saaʼu tü kasa anasükat suulia tü kasa mojusükat. Jamüshiijaʼa wanaa sümaa chajanain na israeliitakana süʼütpaʼa tü uuchikat Sinaí, oʼunushi Moisés saaʼumüin tü uuchikat jee naʼatapajüin maʼin na israeliitakana nüleʼejüinjachin nüchikuaʼa. Süka nnojoluin nüleʼejamaatüin Moisés, naashajaaka na israeliitakana nümaa Aarón süpüla nukumajüin namüin wanee maleiwayaashi. Nukumajaka Aarón wanee paaʼachon aainjuushi süka ooro. Naainjaka wanee miʼiraa na israeliitakana shikiira  tia. Naʼleeyatüin chi paaʼachonkai sümaa nayonnojüin jee nasapainkashii naya nümülatuʼu. Niayaa naaʼinruʼu na israeliitakana naʼwaajaka Jeʼwaa süka nasapainkain naya nümülatuʼu chi paaʼachonkai. Süka naʼwaajüin wanee maleiwayaashi nuʼupala Jeʼwaa, wainma na israeliita outakana soʼu kaʼikat tia (Éxodo 32:1-6, 10, 28). ¿Kasa watüjaka sünainjee tü alatakat? Eejüinjatü waaʼin suulia wemeejünüin. Müshi Jeʼwaa wamüin: «Nnojo jaapaain kasa eekai yarüttüin». Tia maluʼulu nnojoliinjanain waya sünainpünaain tü iküleesia nnojotkat shiimain. Wooʼulaa nikirajai waya Jeʼwaa süpüla wayaawatüin saaʼu tü kasa anasükat suulia tü kasa mojusükat (Isaías 52:11; Ezequiel 44:23; Galacia 5:9).

3, 4. ¿Jamüsü anaka watüjaale saaʼu kasain shikiisüin maʼin tü miʼiraa aainjünakat maʼin maaʼulu?

³ Wanaa sümaa yaajachin Jesuu mmapaʼa, nikirajüin na aluwataaushiikana süpüla wulein natuma sukuwaʼipa tü aʼwaajaakat Maleiwa. Süchikijee outuin Jesuu, ayatüshii nekirajüin na aluwataaushiikana na wayuu jekenakana sünain anoujaa sünain tü nümakat Jeʼwaa. Outapa na aluwataaushiikana, wainma na anoujayaashii ekirajakana sünain alawaa, sünain akuwaʼipaa nnojotka anain jee miʼiraa kamalainka namüin na manoujainsaliikana. Naya wayuukana neeʼiratüin sünülia soʼutku tia miʼiraakat süpüla nacheküin shia na anoujashiikana (2 Tesalónica 2:7, 10; 2 Juan 6, 7). Soʼutku tia miʼiraakat, aainjünüsü maʼin maaʼulu. Sünainpünaasü alawaa otta sukuwaʼipamaajatü yolujaa (Alateetkat Mapeena 18:2-4, 23). *

⁴ Sainküin mmakat süpüshuaʼa, eesü miʼiraa kojutuka sümüin wayuu. Sümaʼinruʼu pikirajaain sooʼomüin süchiki  tü nümakat Jeʼwaa süchiki waneirua kasa, eesü süpüla piyaawatüin saaʼu sünainpünaain pia miʼiraa nnojotka anain noʼuluʼu. Nükaalinjeechi pia Jeʼwaa süpüla puuʼulaain suulia tia, jaʼitaisü kapüleein shia pümüin. Wekirajaa süchiki soʼutku tü miʼiraa aainjünakat maʼin maaʼulu otta jaralüin shikiisüin maʼin. Otta watüjaweerü aaʼu jamüin nünüiki Jeʼwaa süchiki tia miʼiraakat.

5. ¿Jamüsü watüjaaka saaʼu nnojoluin jemelin Jesuu 25 tisienpüroʼu?

⁵ Suluʼu wainma mma, aainjünüsü wanee miʼiraa 25 tisienpüroʼu. Naashin na wayuukana, jemeishi Jesuu soʼu kaʼikat tia. Nnojotsü süküjain wamüin tü Wiwüliakat tü kaʼi jee tü kashi jemeikalü oʼu Jesuu, shia neʼe süküjaka wamüin nnojoluin alin maʼin jemiai soʼu tia. Naashin Lucas, wanaa sümaa jemelin Jesuu chaa Belén, eejana waneinnua «arüleejülii sünain aaʼinmajaa naʼanneetse süpaʼa wane anooishi» (Lucas 2:8-11). Aisü maʼin jemiai tisienpüroʼu chaa Belén, juyapoʼulujatü shia otta eesü nieve. Nnojoishii süpüla naaʼinmajüin naʼanneetse na arüleejüliikana chaa anouishii soʼu aikat tia. ¿Kasa watüjaka sünainjee tia? Nnojolin jemelin Jesuu 25 tisienpüroʼu wanaa sümaa alin maʼin jemiai. Wayaawata aaʼu sünainjee tü sümakat tü Wiwüliakat, jemelin Jesuu soʼutpünaa tü kashikat settienpüroʼu otta oʼutuupüroʼu. Müsia neʼe nanüiki na ekirajaakana süchiki kasa alatüirü.

6, 7. (1) ¿Jarat shikiisüka tü miʼiraa aainjünakat 25 tisienpüroʼu? (2) ¿Kasa wasülajüinjatka aaʼujee wanee kasa?

⁶ ¿Jarat tü shikiisükat tü miʼiraa aainjünakat 25 tisienpüroʼu? Sünainjeejatü wanee miʼiraa naainjaka na romaanokana nümüin Saturno, kanüliaka Saturnales. Nia chi namaleiwase anakai atuma naʼttia naashin. Müsü sünüiki The Encyclopedia Americana: «Süseʼeruʼu tü kashikat tisienpüroʼu  aainjünüsü chaa Roma wanee miʼiraa kanüliasü Saturnales, tü shikiisükat tü miʼiraa aainjünakat tisienpüroʼu. Sünain tia miʼiraakat, eesü ekawaa, asülajaa jee epejawaa». Jee müsia aainjünüsü wanee miʼiraa 25 tisienpüroʼu nikiira Mitra, chi kaʼi namaleiwasekai na persakana.

⁷ Wainma na wayuu aainjakana tü miʼiraa aainjünakat 25 tisienpüroʼu sümaa nnojoluin natüjaain saaʼu jalejeekualüin shia. Naʼatapajüin süntüin tia kaʼikat süpüla kottiraain naya sümaa napüshi, eein ekawaa otta eein asülajaa kasa. Aishii wapüla wapüshi jee waʼaleewainyuu, keeʼireesü naaʼin Jeʼwaa kottiraain waya. Saashin tü Wiwüliakat,  talatüsü naaʼin «chi Maleiwakai nümaa chi wayuu asülajakai süka naaʼin» (2 Corinto 9:7). Nnojotsü keeʼireein naaʼin Jeʼwaa wasülajüin kasa sümüin wayuu suʼunnaa neʼe wanee miʼiraa. Wayakana suluʼukana nupueulose Jeʼwaa, talatüshii waya süka wasülajüliin jee kottiraain waya namaa waʼaleewainyuu jee wapüshi, nnojotsü waʼatapajüin eein wanee miʼiraa süpüla waaʼinrüin tia otta nnojotsü waʼatapajüin süsülajünüin shiiʼiraka tü wasülajakat. Asülajüshii waya süka alin wapüla na wayuukana (Lucas 14:12-14).

8. Na wayuu atüjakana süpüleerua sukuwaʼipa jolotsü, ¿asülajüshiiche kasa nümüin Jesuu soʼu tü kaʼi jemeikalü oʼu nia? Püküja jamüin maka pünüiki.

⁸ Naashin na wayuukana, apünüinshii na wayuu asülajakana kasa nümüin Jesuu soʼu jemelin nia. Makalaka nasülajuinjanain na wayuukana naashin suʼunnaa 25 tisienpüroʼu. Shiimain nantüin waneinnua wayuu sünain anaʼlawaa nümüin Jesuu otta asülajüshii kasa kojutusü nümüin. Sümaiwa paala, chi wayuu kojutkai atumawaa asülajünapuʼusü kasa nümüin (1 Reyes 10:1, 2, 10, 13). Saashin tü Wiwüliakat, na wayuu antakana sünain anaʼlawaa nümüin Jesuu, ooʼulakülii naya süka jolotsü otta nnojoishi naʼwaajüin Jeʼwaa. Jee müsia, nnojoishii antüin naya wayuukana soʼu tü kaʼi jemeikalü oʼu Jesuu. Antüshii naya chapa Jesuu nipialuʼu, kojuya kashi süchikijee jemelin nia (Mateo 2:1, 2, 11).

9. Saashin tü Wiwüliakat, ¿jaralii na aainjünakana amüin miʼiraa shikiira shikeraajüin nouyase?

⁹ Talatüsü maʼin saaʼin wayuu jemeitpa wanee joʼuu (Salmo 127:3). Nnojoliipajaʼa waya aainjain miʼiraa shikiira shikeraajüin suuyase wayuu. Saashin tü Wiwüliakat, eesü piamasü miʼiraa aainjünaka shikiira ouyasee. Tü palajatkat  miʼiraa shia tü aainjünakat nümüin wanee wayuu aluwataaikai saaʼu Egipto. Jee tü wane shia tü aainjünakat nümüin chi aluwataaikai Herodes Antipas (paashajeʼera Génesis 40:20-22; Marcos 6:21-29). Naya wayuukana nnojoishii aʼyataain nümüin Jeʼwaa. Nnojotsü aküjünüin suluʼu tü Wiwüliakat saainjünüin miʼiraa shikiira shikeraajüin nuuyase wanee wayuu aʼyataakai nümüin Maleiwa.

10. ¿Jamüsü saaʼin namüin na anoujashii namaiwajanakana tü ekeraajaakalü ouyasee?

¹⁰ Saashin wanee karaloʼuta nnojotsü naaʼinrüin na anoujashii eejanakana nükalioʼu Jesuu tü miʼiraa shikiirakat ekeraajaa ouyasee, süka jamüin, «nukuwaʼipain shia chi wayuu manoujainsaikai» (Las cosas nuestras de cada día). Mojusü nümüin Maleiwa tia miʼiraakat. Naashin na griego namaiwajanakana, jemeitpa wanee joʼuu aaʼinmajünüshi nia nutuma wanee maleiwayaashi, joʼuushi chia maleiwayaashikai soʼu tü kaʼi jemeikalü oʼu chi joʼuukai. Tü miʼiraa aainjünakat nikeraajapa nuuyase wanee wayuu sünainpünaasü tü naaʼinrakat na ooʼulaküliikana süka jolotsü otta horóscopo.

11. ¿Jamüsü naaʼin Jeʼwaa wasülajüle kasa sümüin wayuu?

¹¹ Nekeraajapa nouyase noʼutku na wayuukana, eeʼiyatünajatü namüin alin naya apülawaa otta kojutuin naya atumawaa. Weeʼiyatüinjatü waneepia alin wapüla wapüshi jee waʼaleewainyuu, nnojoishii alinjanain neʼe wapüla soʼu tü kaʼi nekeraajakalü oʼu nouyase. Keeʼireesü naaʼin Jeʼwaa kamaneein waya otta wasülajüliin (paashajeʼera Aluwataaushikana [Hechos] 20:35). Kojutusü wamüin waneepia katüin woʼu nutuma Jeʼwaa, nnojotsü kojutuin neʼe wamüin wekeraajapa wouyase (Salmo 8:3, 4; 36:9).

12. ¿Jamüsü anaka tü kaʼi outakalü oʼu waya suulialeʼeya tü kaʼi jemeikalü oʼu waya?

¹² Müsü tü Wiwüliakat: «Anaʼleesia anale pütchi wachiki  suulialeʼeya wanee seita anasü. Anaʼleesia tü kaʼi outakalü oʼu waya suulialeʼeya tü kaʼi jemeikalü oʼu waya» (Eclesiastés 7:1). ¿Jamüsü anaka tü kaʼi outakalü oʼu waya suulialeʼeya tü kaʼi jemeikalü oʼu waya? Wanaa sümaa jemelin waya, nnojotsü kasain waainjain. Aluʼuinjaʼa waʼyataapa nümüin Jeʼwaa otta waainjapa kasa anasü süpüleerua wayuu, anasü pütchi wachiki. Otta soteena waya naaʼin Maleiwa outule waya (Job 14:14, 15). Na wayuu suluʼukana nupueulose Jeʼwaa, nnojoishii aainjain miʼiraa shikiira suuyase wayuu otta nnojotsü naainjain miʼiraa süpüla sotuin  naaʼin tü kaʼi jemeikalü oʼu Jesuu. Tü nuluwataakalü anain naya Jesuu, shia sotuinjatüin naaʼin tü kaʼi outakalü oʼu nia (Lucas 22:17-20; Hebreokana 1:3, 4).

13, 14. ¿Jamüshii nnojoliika sünainpünaain waya tü aainjünakat soʼu Semana Santa?

¹³ Eʼitaanüsü tü kanüliakat Semana Santa süpüla sotuin saaʼin wayuu süsoʼiraain naaʼin Jesuu. Mayaapejeʼe müin shia, sümaʼanajeejatü tü iküleesia nnojotkat shiimain. Soʼu semaanakat tia, awaraijinnüsü niyaakua Jesuu otta nnojotsü ekünüin asalaa. ¿Jalejeekuwat tia akuwaʼipaakat? Nnojotsü süküjain tü Wiwüliakat namüin na anoujashiikana sünainpünaainjanain naya tü aainjünakat soʼu tü Semana Santakat, shia neʼe süküjaka namüin noutkajaainjanain süpüla sotuin naaʼin outuin Jesuu. Tü kasa aainjünakat soʼu tü Semana Santakat, nnojotsü pansaain sümaa tü sümakat tü Wiwüliakat.

¹⁴ Na anoujakana nünain Kürisüto naashin, naainjain wanee outkajawaa süpüla sotuin naaʼin süsoʼiraain naaʼin Jesuu. ¿Anasüche nümüin Jeʼwaa waainjale tia? Nnojotsü anain (2 Corinto 6:17, 18). Nnojotsü nuluwataain Jeʼwaa saainjünüin wanee outkajawaa süpüla sotuin waaʼin nüsoʼiraain aaʼin Jesuu.

15. ¿Jalejeekuwat tü miʼiraa kanüliakat Halloween?

¹⁵ Eesü wanee miʼiraa kanüliaka Halloween. Tia sünainpünaasü wuruuja, ishesheʼin otta sukuwaʼipa yolujaa. Kakaliairü aainjünüin tia miʼiraakat. Chaa Gran Bretaña otta Irlanda aainjünüsü natuma na celtakana wanee miʼiraa sülüʼütpa tü kaʼi suʼttajatkalü oʼu tü kashikat nowienpüroʼu 1. Siraapa chi Kashikai, naainjain tü miʼiraa  kanüliakat Samhain. Soʼu tia kaʼikat naashin na celtakana, ashakatüsü Mmapaʼamüin naaʼin na outushiikana. Süpüla nnojoluin jamajüin naya natuma na meʼrujusaliikana, neʼitaain eküülü napüla otta nasüin. Soʼu oʼutuupüroʼu 31, ojuʼitüshii na tepichikana sünain ojulijaa konpiita. Kasheʼinyaashii naya atumawaa, yolujaayaashii, wuruujayaashii naya otta neimmolojuin na wayuukana. Nnojotsü natüjaain saaʼu na tepichikana nashatüin wanee miʼiraa aainjünaka sümüin yolujaa.

16, 17. ¿Kasa jülüjainjatka waaʼin süchiki tü aainjünakat napüleerua na kasaatkana?

¹⁶ Talatüshii maʼin na wayuukana soʼu tü kaʼi kasaatkalü oʼu naya. Suluʼu mmakat süpüshuaʼa, naatawai tü kasa aainjünakat napüla na kasaatkana. Wainma wayuu aainjaka kasa napüleerua na kasaatkana, nnojotpejeʼe natüjaain saaʼu mojuin tia süka naainjapuʼuin shia na anoujayaashiikana. Kasaalüinjanale na wawalayuukana, jülüjainjatü naaʼin tü aainjünajatkat soʼu kasaalüin naya, shiainjatü aainjünaka tü kasa anakat nümüin Jeʼwaa. Natüjaale saaʼu jalejeekualüin tü kasa aainjünawaikat napüla na wayuu kasaatkana, natüjaweerü saaʼu tü anakat süpüla naaʼinrüin (Marcos 10:6-9).

¹⁷ Tü kasairua aainjünakat suʼunnaa kasaalüin wayuu, süpülajatü anain nakuwaʼipa waneepia saashin wayuu (Isaías 65:11). Suluʼu waneirua mma, ejitünüsü roo naaʼu na kasaatkana. Aainjünüsü tia süpüla kachoin naya, talatüin naaʼin, anain nakuwaʼipa otta süpüla naaʼinmajünüin suulia sülatüin kasa mojusü namüin. Jülüjainjatü waaʼin suulia waainjain wanee kasa sünainpünaaka tü iküleesia nnojotkat shiimain (paashajeʼera 2 Corinto 6:14-18).

18. Kasaalüinjanale waya, ¿jarat tü waneirua pütchi sümakat tü Wiwüliakat aneetka atuma wakuwaʼipa?

 ¹⁸ Na wawalayuu kasaalüinjanakana, keeʼireesü naaʼin anain sukuwaʼipa tü kaʼi kasaatkalü oʼu naya otta talatüin naaʼin na jutkatakana. Na antakana sünain eʼrajaa nakua na kasaatkana, nnojoishii atamaainjanain süpüla naküjain pütchi yarüttüsü, eʼreenaka atuma japülii na kasaatshiikana otta na jutkatüshiikana (Proverbios 26:18, 19; Lucas 6:31; 10:27). Nnojotsü choʼujaain shiʼitaanüin wainma kasa kojutusü jaʼyaka saaʼu naʼwaataain suluʼu tü kasa namanakat na kasaatshiikana (1 Juan 2:16). Pukumajüle sukuwaʼipa süpüla kasaalüin pia, anainjatü sukuwaʼipa putuma tü aainjünajatkat soʼu kaʼikat tia süpüla talatüin paaʼin mapeena (paashajeʼera noota 28).

19, 20. ¿Jarat tü shikiisükalü ayaleraa asia sümaa sütaʼijiraanüin?

¹⁹ Wanee kasa aainjünaka soʼu kasaalüin wayuu shia nayalerüin na wayuukana tü nasiakat sümaa nataʼijiraain shia otta naküjain pütchi anasü namüin na kasaatkana. Aainjünüsü tia sünain wanee ekawaa, sünain miʼiraa jee waneirua kasa. ¿Naaʼinrüinjatche na anoujashii shiimainshiikana tia?

²⁰ Saashin wanee karaloʼuta, nakuwaʼipa na manoujainsaliikana nataʼijiraain nasia. «Naaʼinrapuʼuin shia namüin na namaleiwasekana». Naaʼinrüin shia shiiʼiree anain nakuwaʼipa sümaa müin nanüiki: «Kasataalejeseʼe anain pukuwaʼipa waneepia» (International Handbook on Alcohol and Culture [Karaloʼuta süchikimaajatü asüüshi jee akuwaʼipaa]). Sümaiwa paala, nayaletpuʼuin tü nasiakat jee nachuntuin namüin namaleiwase süpüla anain nakuwaʼipa natuma. Nnojotpejeʼe müin sukuwaʼipa nutuma Jeʼwaa süpüla anain sukuwaʼipa wayuu nutuma (Juan 14:6; 16:23).

21. ¿Jarat tü wane miʼiraa nayoutajatkat na anoujashii shiimainkana?

²¹ Puʼunuinjachire sünain wanee miʼiraa, jülüjainjatü paaʼin müleka aneerüle pukuwaʼipa sutuma. Jamüsüjaʼa sünain waneirua miʼiraa, eesü shiyonnojüle wayuu sümaa masiwatüin, eesü asawaa otta akuwaʼipaa yarüttüsü. Sünain tia miʼiraakalüirua, eesü jaleetsüirua, jieyuu tooleeka aaʼin otta eeshii na makana: «Anaʼleesia toumain suulia puumain». Woʼunule sünain miʼiraa eere saainjünüin tia, nnojoleerü walerajüin tü kasa nülerajakat Jeʼwaa (Salmo 1:1, 2; 97:10; 119:37).

22. ¿Kasa akaalinjeechika wanee anoujashi süpüla nütüjaain saaʼu nuʼunuinjachire sünain wanee miʼiraa?

²² Na anoujashii shiimainshiikana nnojoishii sünainpünaain tü miʼiraa mojutkalü atuma Jeʼwaa. Müsü nünüiki Pablo: «Wanaa sümaa jikaain, wanaa sümaa jüsaain, wanaa sümaa jaaʼinrüin eekai eein, anakaja müleka jaaʼinrüle shia süpüla kojutüinjachin waneepia chi Maleiwakai» (1 Corinto 10:31; paashajeʼera noota 29). Eesü miʼiraa nnojotka sünainpünaain amaʼüjirawaa akuwaʼipaa, tü iküleesia nnojotkat shiimain otta nnojotka eeʼiyatüin sujutü mma. Eere wanee miʼiraa nnojotka pansaain sümaa tü sümakat tü Wiwüliakat, wayainjana aneekaka süka waaʼin wamüiwaʼa woʼunuinjanale sünain. Jülüjainjatü waaʼin mojeerüle nakuwaʼipa na waneinnua sutuma tü waneekakat.

23, 24. ¿Kasa waaʼinrajatka süpüla waküjain sümüin wapüshi jamüin nnojoliika sünainpünaain waya wanee miʼiraa?

²³ Eeshi puuʼulaaichire suulia oʼunaa sünain miʼiraa mojutka atuma Jeʼwaa. Shiasaʼa suluʼujee tia, eesüjaʼa mojushiire namüin püpüshi nnojoluichipain kottüin pia namaa  sünain wanee miʼiraa. «Maaliinsalii waya nüpüla, nnojoluichipa nia wamaain», eeshiijaʼa süpüla namüin. ¿Kasa paaʼinrajatka sülatüle pümüin tia? Eesü süpüla püchajaain sukuwaʼipa süpüla piiʼiyatüin alin naya püpüla otta kojutuin naya pümüin (Proverbios 11:25; Eclesiastés 3:12, 13). Püchajaa sukuwaʼipa süpüla pükatalüin kaʼi eere kottüinjachin pia namaa.

²⁴ Natüjaweere saaʼu na püpüshikana jamüin nnojoika kottüin pia namaa sünain wanee miʼiraa, eesü süpüla püchajaain suluʼu tü karaloʼutairua eekat wamaʼana jee shiale suluʼu jw.org, akaalinjeechika pia süpüla püküjain shia namüin. Püküja shia süka anakalü akuwaʼipa otta nnojo püpüleeruain naaʼin süpüla wanaawain naaʼin pümaa. Püküja namüin wainmain tü kasa püneekakat aaʼujee nnojolin pia sünainpünaain tia miʼiraakat. Kamanee pia otta kemeʼeria pünüiki (Colosas 4:6).

25, 26. ¿Kasa naaʼinrajatka na kachonshiikana süpüla kojutuin namüin nachonnii tü nuluwataakalü anain Jeʼwaa?

²⁵ Wayakana wapüshuaʼa, watüjaainjatü aaʼu jamüin nnojoliika waya sünainpünaain waneirua miʼiraa (Hebreokana 5:14). Tü keeʼireekat waaʼin shia talatüin Jeʼwaa wamaa. Kachonniire jia, jüchajaa sukuwaʼipa süpüla jükaalinjain jüchonnii süpüla nayaawatüin saaʼu tü sümakat tü Wiwüliakat otta kojutuin shia namüin. Aleewapa maʼin na jüchonniikana nümaa Jeʼwaa, naaʼinreerü tü nüchekakat Jeʼwaa (Isaías 48:17, 18; 1 Pedro 3:15).

²⁶ Talatüsü naaʼin Jeʼwaa wachajaale sukuwaʼipa süpüla waʼwaajüin nia sümaa wulein wanoula noʼuluʼu jee müsia keeʼiresü naaʼin waʼwaajüin nia süka tü shiimainkat (Juan 4:23). «Nnojoishi eein wanee wayuu lotokoi akuwaʼipa», eeshii na makana sutuma wainmain wayuu nnojotka lotuin akuwaʼipa maaʼulu. ¿Shiimainche tia? Wekirajaajeerü anain tia sünain tü wane ekirajaayakat.