1, 2. ¿Kasa naaʼinraka Balaam süpüla numojujain sukuwaʼipa nupueulose Jeʼwaa?

 WANEE wayuu olojui jime nütüjaa aaʼu jalain jouluin nüpüla tü jimekat. Niʼitaain tü meeyakat sünain tü kulirakat sümaa nujutuin shia shiroku tü wüinkat. Yalashi nia aʼatapajüin, shiasaʼa saaʼütapa tü jimekat tü kulirakat, naaʼütüin emetut tü kulirakat süpüla saʼatuuin suwaraluʼu tü jimekat. Süchikijee tia, niyuʼluin tü jimekat.

² Akaʼaya na wayuukana, eeshii süpüla kemeeyain naya atumawaa süpüla nataʼülüüin. Jamüshiijaʼa wanaa sümaa chajanain na israeliitakana süpaʼa tü patajatshii chajatkat Moab, pejeshii naya süpüla nekerotuin suluʼu tü Mma Anasükat. Chi aluwataakai saaʼu Moab, nüküjain nümüin Balaam naapeerüin wainma nneerü nümüin nuʼulejüle na israeliitakana. Mapa, nünta anainrü Balaam sukuwaʼipa süpüla outuinjanain na israeliitakana. Nuluwataain jieyuu süpüla nemeʼejüin naaʼin na tooloyuu israeliitakana (Números 22:1-7; 31:15, 16; Alateetkat Mapeena [Apocalipsis] 2:14).

3. ¿Kasa alataka namüin na israeliitakana sutuma nimeejüin naya Balaam?

³ Watta naalii na israeliita ataʼülüükana süka tü meeyakat,  aʼluwajiraashii nakuwaʼipa sümaa jieyuu chajatkat Moab. Emeejünüshii naya nutuma Balaam, naʼwaajüin maleiwayaasü otta naʼwaajüin Baal chi namaleiwasekai na amaʼüjiraakana akuwaʼipa chajachika Peor. Suluʼujee tia, outushii 24.000 israeliita pejepa naya süpüla nekerotuin suluʼu tü Mma Anasükat (Números 25:1-9).

4. ¿Jamüshii wainmaka na israeliita aʼluwajiraakana nakuwaʼipa?

⁴ ¿Jamüshii wainmaka na israeliita emeejünakana nutuma Balaam? Shia sutuma naaʼinrüin tü suchuntaakat naaʼin otta motuin naaʼin tü naaʼinrakat Jeʼwaa napüleerua. Nujuʼitirüin Maleiwa naya suulia achepchieein chaa Egipto, naapüin eküülü namüin chaa isashiipaʼa otta naaʼinmajüin naya süpüla nantajanain suluʼumüin tü Mma Anasükat (Hebreokana 3:12). Ayatapejeʼe naʼluwajiraain nakuwaʼipa. Müshi Pablo: «Anakaja nnojoliire waʼluwajiraain wakuaippa sümaa wayuu jierü otta wane jierü nümaa wane toolo, maa aka tü naaʼinrakat na watuushinuukana» (1 Corinto 10:8).

5, 6. ¿Kasa watüjaka sünainjee tü alatakat suluʼu tü patajatshii chajatkat Moab?

⁵ Alüʼütshii waya süpüla wekerotuin suluʼumüin tü mma jeketkat maʼaka naaʼin na israeliitakana wanaa sümaa nalüʼülaain süpüla nekerotuin suluʼu tü Mma Anasükat (1 Corinto 10:11). Maaʼulu yaa, alanaʼaleesia suchuntaain saaʼin wayuu sümaʼüjiraain sukuwaʼipa noulialeʼeya na moabiitakana. Eesü süpüla sumojujaain nakuwaʼipa na wayuu suluʼukana nupueulose Jeʼwaa sutuma tia. Watta naalii na wayuu amaʼüjiraakana akuwaʼipa sutuma nimeejüin naya Satanaa (Números 25:6, 14; 2 Corinto 2:11; Judas 4).

⁶ Püsakira paaʼin sünain tüü: «¿Taaʼinreetche tü kasa mojusü suchuntaakat taaʼin süpüla talatüin taaʼin motsomüin? ¿Talateetaapa taaʼin waneepia suluʼu tü mma jeketkat? ¿Anasüche woonoole sümaa tü nümakat Jeʼwaa sünain nnojoluinjanain waʼluwajiraain wakuwaʼipa?» (1 Corinto 6:18).

7, 8. ¿Kasa wayu tü aʼluwajirawaakalü akuwaʼipaa? ¿Jamüsü eejüinjatka waaʼin suulia tia?

⁷ Wainma wayuu maapülinka sümüin sukuwaʼipa, mojutsat namüin tü nümakat Maleiwa süchiki tü aainjirawaakalü akuwaʼipaa. Tü aʼluwajirawaakat akuwaʼipaa saashin tü Wiwüliakat, shia nüinkaale wanee toolo sümaa wanee jiet nnojotka nuʼwayuusein, nümaʼüjiraale nukuwaʼipa wanee toolo nümaa wanee toolo, wanee jiet sümaa wanee jiet otta wanee wayuu sümaa wanee mürüt. Eeshii na amaʼujiraakana nakuwaʼipa naanüküluʼupünaa, nachiiruapünaa otta namülejiraale nakorolo (paashajeʼera noota 23).

⁸ Chi eekai ayatüin nuʼluwajiraain nukuwaʼipa saashin tü Wiwüliakat, ojuʼitinnajachi naʼakajee na wawalayuukana (1 Corinto 6:9; Alateetkat Mapeena 22:15). Chi kiʼrakai sünain nuʼluwajiraain nukuwaʼipa, mojutujiraasai nia otta mojutsai nia sümüin wayuu. Na wayuu aʼluwajiraakana nakuwaʼipa, mojukuʼu müsü naaʼin, eesü eekai ipuoluin sümaa nnojoluin kachonweein shia, mojujiraashii naya sümaa naʼwayuuse otta eeshii süpüla ayuulin jee outuin naya (paashajeʼera Galacia 6:7, 8, TNM). Jülüjale naaʼin wanee wayuu tü kasa mojusü eekat sünainjee suʼluwajiraain sukuwaʼipa wayuu, niyouteerü tia. Eeshii waneinnua wayuu aaʼinrakana wanee kasa eeka süpüla naʼluwajiraain atuma nakuwaʼipa. Naaʼinrüin tia süka naaʼinreein tü kasa mojusü suchuntaakat naaʼin. Na wayuu makana akuwaʼipa, shiawai nanajaka palajana shiyaakua wayuu maichesat jee amaʼüjiraasü sukuwaʼipa.

9. ¿Jamüsü mojuka maʼin anajaa shiyaakua wayuu maichesat jee amaʼüjiraasü sukuwaʼipa?

⁹ Chi anajakai shiyaakua wayuu maichesat jee amaʼüjiraasü sukuwaʼipa, suchuntaajeerü naaʼin nuʼluwajiraain  nukuwaʼipa. Maaʼulu yaa, joutsü maʼin tü süchikimaajatkat shiyaakua wayuu maichesat jee amaʼüjiraasü sukuwaʼipa suluʼu rewiisüta, karaloʼutairua, muusika, suluʼu telewisoot otta suluʼu Internet. Wainma na wayuu nnojoliikana mojuin naashin anajaa shiyaakua wayuu maichesat jee amaʼüjiraasü sukuwaʼipa, alawaapejeʼe tia. Nünajüle tia wanee wayuu, suchuntaajeerü naaʼin waneepia naainjiraain nukuwaʼipa otta jülüjakuʼu meerü naaʼin kasa yarüttüsü. Na wayuu oʼttakana sünain anajaa shiyaakua wayuu maichesat jee amaʼüjiraasü sukuwaʼipa, natütüjeerü jee namülejeerü nakorolo, mojujiraajeena naya sümaa naʼwayuuse otta eeshii süpüla nooʼulaajiraain (Roma 1:24-27; Éfeso 4:19; paashajeʼera noota 24).

10. ¿Jamüsü wayouteetka tü aʼluwajirawaakalü akuwaʼipaa sotule waaʼin tü sümakat Santiago 1:14, 15?

¹⁰ Jülüjeesü waaʼin eein süpüla sumojujaain wakuwaʼipa suchuntaale waaʼin waʼluwajiraain wakuwaʼipa. Soto waaʼin tü sümakat Santiago 1:14, 15: «¿Kasa kaainjaleeka atüma wane wayuu? Kaainjaleeshi süka noonooin sümaa tü kasa mojusü keeʼireekat naaʼin. Müleka naaʼinrüle tü mojusükat keeʼireekat naaʼin, kaainjalaa tia. Je müleka nnojoire nuuʼulaain suulia kaainjalaa, oukteechi nia». Wanaa sümaa süntajaain kasa mojusü wekiiruʼu, wasünneʼeramaata shia. Sujuʼitalaa sümüle shiyaakua wayuu maichesat suluʼu tü telewisootkat, chajaa poʼu suulia. Piyokojoo tü computador pünajakat jee shiale puʼwanajaain tü piʼrajakat. Nnojo paaʼinrüin tü kasa mojusü suchuntaakat paaʼin suulia mojuin pukuwaʼipa. Nnojorüle piyoutuin shia, icheechi pia sünain tü kasa mojusü suchuntaakat paaʼin jee iseerü püchiki püchecherüin paaʼin suulia (paashajeʼera Mateo 5:29, 30).

11. ¿Kasa naaʼinraka Jeʼwaa süpüla nükaaliinjain waya suulia jülüjain waaʼin kasa yarüttüsü?

¹¹ Niʼraajüin maʼin wakuwaʼipa Jeʼwaa woulia wayakana jee nütüjaa aaʼu joʼuujiraain waya sümaa kaainjalaa. Nütüjaa  aaʼu eein süpüla wayoutuin tü kasa mojusü suchuntaakat waaʼin. Müsü nünüiki Jeʼwaa: «Juuʼulaa jümata suulia süpüshua tü kasa mojusü keejiapüʼükat paala jümüin [...], maa aka aʼluwajirawaa akuaippaa sümaa wayuu jierü otta wane jierü nümaa wane toolo, maa aka keeʼireein jaaʼin tü mojusükat, je maa aka kachiiruaa aaʼin washirüü sünain müin aka saaʼin jümaleiwase shia» (Colosas 3:5). Mayaapejeʼe kapüleein tia, nütüjaa aaʼu Jeʼwaa eein süpüla wooʼulaain shia jee nükaaliinjeena waya (Salmo 68:19). Eeshi wanee wawala jimaʼai kiʼrakai sünain anajaa shiyaakua wayuu maichesat jee amaʼüjiraasü sukuwaʼipa otta atütajakai nükorolo. Müsü nanüiki na koleejiakana nümaa: «Nnojotsü mojuin paaʼinrüle tia, choʼujaasü paaʼinrüin shia süka miyoʼuchipain pia». Anuu nünüiki süchiki tia: «Yarüttüsü tü jülüjakat taaʼin sutuma jee aʼluwajiraashi taya takuwaʼipa sutuma». Niyaawata aaʼu mapa chia wawalakai nnojoluinjatüin jülüjain naaʼin tü kasa mojusükat. Sutuma nükaaliinjain nia Jeʼwaa, nuuʼulaain tia. Suchuntaale paaʼin  puʼluwajiraain pukuwaʼipa, puchunta kaaliinwaa nümüin Jeʼwaa süpüla püchecherüin paaʼin suulia otta süpüla jülüjain paaʼin kasa wulesü (2 Corinto 4:7; 1 Corinto 9:27).

12. ¿Jamüsü waaʼinmajüinjatka tü waaʼinkat?

¹² Anuu nünüiki Salomón: «Paaʼinmaja tü paaʼinkat suulialeʼeya süpüshuaʼa kasa, süka jamüin, kateerüin poʼu sünainjee» (Proverbios 4:23). Wanaa sümaa «tü paaʼinkat» sümüin tü Wiwüliakat, shia saashajaaka achiki tü jülüjakat naaʼin wanee wayuu, tü keeʼireekat naaʼin otta tü kasa nüsaʼwateekalü amüin. Tia shia tü kasa kojutukat nümüin Jeʼwaa. Tü kasa wanajakat eesü süpüla anain jee mojuin wakuwaʼipa sutuma. Müsü nünüiki Job: «Tapansaajüitpa tanüiki. Nnojotsü shiiʼireeinjatüin taaʼin wanee majayüt teirakaapa sümüin» (Job 31:1). Jülüjeesü waaʼin tü kasa wanajakat jee tü suchuntaakat waaʼin. Wachunta tü nümakat chi salmistakai wanaa sümaa nuʼuraajüin: «Nnojo puuʼulaain teʼrüin tü kasa nnojotkat kasain anain apüla; ayataʼaya katüin toʼu putuma suluʼu tü püpünakat» (Salmo 119:37).

13. ¿Jaralii na saʼaleewajaakana amaa Dina?

¹³ Anale nukuwaʼipa wanee waʼaleewain, aneerü wakuwaʼipa nutuma. Püneeküle paʼaleewainyuu aaʼinrakana tü nuluwataakalü anain Maleiwa, nakaaliinjeechi pia süpüla paaʼinrüin tü nüchekakat Jeʼwaa (Proverbios 13:20; paashajeʼera 1 Corinto 15:33, TNM). Sünainjee tü alatakat sümüin Dina, wayaawata aaʼu anainjatüin naneekia watuma na waʼaleewainkana. Dina shia tü nüchonkat Jacob, na wayuu kachonkana shia anoujashii nünain Jeʼwaa. Wulesü sukuwaʼipa Dina, aʼaleewajaapajaʼa shia namaa na jieyuu chajanakana Canaán nnojoliikana aʼwaajüin Jeʼwaa. Kojutusü sümüin nupueulose Jeʼwaa tü nukuwaʼipakat wanee wayuu sümaa nuʼwayuuse. Mojutupejeʼe tia namüin na cananeokana süka naʼluwajiraain nakuwaʼipa  (Levítico 18:6-25). Wanaa sümaa chajatüin Dina sümaa tü saʼaleewainkalüirua, shiʼraajüin wanee jimaʼai kanüliakai Siquem. Anajüsü Dina nümüin. Kojutushi «Siquem noulialeʼeya napüshua na nüchonniikana Hamor». Nnojoipejeʼe alin Jeʼwaa nüpüla (Génesis 34:18, 19).

14. ¿Kasa alataka sümüin Dina?

¹⁴ Süka anajüin Dina nümüin Siquem, nütaüjaain shia. Nnojotsü mojuin nümüin tia naaʼinrakat (paashajeʼera Génesis 34:1-4). Eʼrüsü müliaa Dina otta aainjashii kasa mojusü na suwalayuukana (Génesis 34:7, 25-31; Galacia 6:7, 8).

15, 16. ¿Kasa waaʼinrajatka süpüla kekiin waya?

¹⁵ Watüjaa aaʼu aneerüin wakuwaʼipa waaʼinrüle tü nümakat Maleiwa. Nnojotsü choʼujaain weʼrüinjanain wamüliala maʼaka saaʼin Dina. «Kekiijeechi maʼin wanee wayuu naʼaleewajaale nümaa chi wayuu kekiikai maʼin. Mojeerü nukuwaʼipa wanee wayuu naʼaleewajaale nümaa chi wayuu eekai mojulaain» (Proverbios 13:20). Püchajaa sukuwaʼipa waneepia süpüla paaʼinrüin tü kasa anasükat suulia piʼrüin müliaa jee mojuin pukuwaʼipa (Proverbios 2:6-9; Salmo 1:1-3).

¹⁶ Kekiijeena waya wekirajaale sünain tü Nünüikikat Maleiwa, wachuntule kaaliinwaa nümüin Jeʼwaa süpüla waaʼinrüin wanee kasa otta waaʼinrüle tü nümakat chi achepchiee oonookai otta kekiikai maʼin (Mateo 24:45; Santiago 1:5). Watüjaa aaʼu waleʼeruʼuin tü kaainjalaakat (Jeremías 17:9). ¿Aneetche pümüin nüchiaale pia wanee wawala suulia puʼluwajiraain pukuwaʼipa? ¿Jashicheechiche pia nümüin? ¿Paapaajeetche tia pütchikat süka anakalü akuwaʼipa? (2 Reyes 22:18, 19).

17. Püküja jamüin anaka waaʼinrüle tü nümakat wamüin wanee wawala.

¹⁷ Jülüja waaʼin tüü: Eeshi wanee wayuu aʼyataakai sümaa wanee wawala, nuunejaain shia süpüla sujuʼitüin nümaa  süka anajüin shia nümüin. Mayaainjeʼe nnojolin nüküjalin pütchi, kamaneeshi nia otta anashi aaʼinchi. Shiasaʼa wanee wawala, süchiaain tia wawalakat süka shiʼrüin shia nümaa wanee wayuu manoujainsai. ¿Kanüikiyaajeetche shia süpüla sujuʼitüin nümaa? ¿Saapaajeetche amaa tü pütchi aküjünakat sümüin? Aishi Jeʼwaa süpüla tia wawalakat otta aaʼinreesü kasa anasü. Ayatüle shia nümaa chi manoujainsaikai, ¿shiyoutuinche tü aʼluwajirawaakalü akuwaʼipaa? ¿Shiataajeetpa süneeküin tü anakat saaʼin sümüin? (Proverbios 22:3; 28:26; Mateo 6:13; 26:41).

18, 19. Püküja tü naaʼinrakat José süpüla niyoutuin nümaʼüjiraain nukuwaʼipa.

¹⁸ Eejachi wanee jimaʼai achepchieeshi Egipto, José nünülia. «Püinkaa tamaa», maʼwaisü nuʼwayuuse Potifar nümüin José. Nütüjaa aaʼu José mojuin tia. Aishi maʼin Jeʼwaa nüpüla otta naaʼinreein tü keeʼireekat naaʼin. Shimeʼeja  aaʼinchi nia tü jietkat süpüla nüinkaain sümaa, niyoutapajaʼa naaʼinrüin tia. Süka achepchieein José, nnojoishi süpüla nuʼunuin nümaʼanajee chi nülaamainkai. Soʼu wanee kaʼi, nuʼwayuuse chi nülaamainkai, saapaain nia süka nüsheʼin sümaa sümüin nümüin: «Püinkaa tamaa». Niasaʼa José nüpattajaaka sümaʼanajee (paashajeʼera Génesis 39:7-12).

¹⁹ Aʼluwajiraashije nukuwaʼipa José sümaa tü jietkat müleka jülüjale naaʼin shia waneepia jee nikiiruʼukuʼu nümüle nümaʼüjiraain sümaa. Süka kojutuin maʼin nümüin José aleewain nia nümaa Jeʼwaa, niyoutuin naaʼinrüin kasa mojusü. Müshijeseʼe nümüin: «Taashitpa tapüla süpüshua tü kasakat nütüma [chi talaamainkai]. Piajaʼa neʼe piakat nnojotka taashin tapüla saaʼu nuʼwayuusein pia. ¿Jamataalainjachikalaka taya süpüla taaʼinrüinjatüin wane kasa eekai mojuin maʼi, wane kaainjalaa nuʼupalapünaa Maleiwakai?» (Génesis 39:8, 9).

20. ¿Jamüsü watüjaaka saaʼu talatüin Jeʼwaa nutuma José?

²⁰ Mayaainjeʼe wattajachin José suulia nüpüshi jee suulia nuumain, ayatüshia nia waneepiain nümaa Maleiwa. Anasü nukuwaʼipa José nutuma Jeʼwaa (Génesis 41:39-49). Talatüshi Jeʼwaa saaʼujee waneepiain nia nümaa (Proverbios 27:11). Eesü kapüleere wamüin wachecherüin waaʼin suulia waʼluwajiraain wakuwaʼipa. Jülüja waaʼin pütchikat tüü: «Jia aikana apüla Jeʼwaa, jüleraja tü kasa mojusükat. Niakai naaʼinmajüin na waneepiakana nümaa, nükaaliinjain naya noulia na mojulaashiikana» (Salmo 97:10).

21. ¿Kasa naaʼinraka wanee wawala jimaʼai süpüla nüshatüin nukuwaʼipa José?

²¹ Jaʼyasü naaʼu na suluʼukana nupueulose Jeʼwaa nalerajüin tü kasa mojusükat otta nacheküin naaʼinrüin tü kasa anasükat (Amós 5:15). Jaʼitairü jeʼrairüin puuyase, eeshi süpüla waneepiain pia nümaa Jeʼwaa. Eeshi wanee  wawala jimaʼai ooʼulaküna aaʼinchi suluʼu koleejia. «Ainkaweerü taya pümaa pükaaliinjale taya sünain tü examen aainjünajatkat sünain ayaawajaa nuumero», müsü wanee majayüt nümüin. ¿Kasakaʼa naaʼinrüin chi wawalakai? Nüshatüin tü naaʼinrakat José. Nüküjain sümüin naaʼinrüin tü sümakat tü Wiwüliakat jee kojutuin nümüin nukuwaʼipa». Puʼluwajiraale pukuwaʼipa, talateerü neʼe paaʼin motsomüin, shiasaʼa mapa, eʼreechi pia pümüliala otta mojeerü paaʼin (Hebreokana 11:25). Poonoole nümaa Jeʼwaa, talateechi pia waneepia (Proverbios 10:22).

22, 23. ¿Kasa naaʼinraka Jeʼwaa süpüla nükaaliinjain waya waainjale kasa mojusü?

²² Nüchajaweerü sukuwaʼipa Satanaa süpüla waʼluwajiraain wakuwaʼipa. Eesü süpüla kapüleein wamüin wachecherüin waaʼin suulia tia. Eejeerü kaʼi jülüjeetka waaʼin kasa mojusü (Roma 7:21-25). Niyaawata aaʼu Jeʼwaa jülüjawalin waaʼin kasa mojusü otta nütüjaa aaʼu sümamülain waya mma (Salmo 103:14). ¿Jama nuʼluwajiraale nukuwaʼipa wanee wawala? ¿Kepisüche tia? Aa, kepisü. Niyaawajaale suulia naainjala, nükaaliinjeechi nia Jeʼwaa süka niain wanee Maleiwa motokai aaʼin saainjala wayuu (Salmo 86:5; Santiago 5:16; paashajeʼera Proverbios 28:13).

²³ Naapajala wamüin Jeʼwaa na laülaashiikana, nakaaliinjain waya otta aishii waya napüla (Éfeso 4:8, 12; Santiago 5:14, 15). Naapajala wamüin Jeʼwaa na laülaashiikana süpüla nanoutuin wakuwaʼipa (Proverbios 15:32).

24, 25. ¿Jamüsü wayouteetka waʼluwajiraain wakuwaʼipa wayaawatüle saaʼu tü waaʼinrajatkat?

²⁴ Süpüla anainjatüin süneekia watuma wanee kasa,  choʼujaasü wayaawatüin saaʼu jamüin aneetka wakuwaʼipa sutuma tü pütchi nuluwataakalü anain waya Jeʼwaa. Nnojoishii waya meein maʼaka naaʼin chi jimaʼai aashajaanakai achiki suluʼu Proverbios 7:6-23. Nnojotsü niyaawatüin saaʼu tü naaʼinrajatkat, emeejünüshi nia süpüla nuʼluwajiraain nukuwaʼipa. Wayaawatüle saaʼu tü kasa waaʼinrajatkat, alanaʼaleesia suulia kekiwaa. Waaʼinrüle tia, wayaawateerü saaʼu tü jülüjakat naaʼin Maleiwa otta weʼitaajeerü suluʼu wakuwaʼipa. Soto waaʼin pütchikat tüü: «Chi wayuu ayaawatakai saaʼu tü naaʼinrajatkat, aijiraashi nia nüpülajiraa. Otta niyaawateerü saaʼu tü naaʼinrajatkat süpüla anain nukuwaʼipa» (Proverbios 19:8).

²⁵ ¿Pütüjaa aaʼuche anain tü kasa nuluwataakalü anain Jeʼwaa? ¿Pütüjaa aaʼuche talateerüin paaʼin paaʼinrüle shia? (Salmo 19:7-10; Isaías 48:17, 18). Wainmajüle paaʼin saaʼu tia, jülüja paaʼin süpüshuaʼa tü kasa anasü naaʼinrakat Jeʼwaa püpüleerua. «Jiyaawata saaʼu süka jukuwaʼipa jümüiwaʼa anamiain Jeʼwaa» (Salmo 34:8). Paaʼinrüle tia, aijeechi püpüla Maleiwa. Püchekeerü paaʼinrüin tü kasa anakat nümüin Maleiwa otta pülerajeerü tü kasa nülerajakat. Jülüja waaʼin kasa anasü «maa aka tü shiimüinkat [...], maa aka tü lotokat atüma wakuaippa, maa aka tü wulekat atüma waaʼin, maa aka tü kasa anasü kamalainkat wamüin, maa aka tü waʼwaataakat saaʼu anain maʼi shia» (Filipos 4:8, 9). Washata nukuwaʼipa José, chi anakai akuwaʼipa sutuma naaʼinrüin tü nümakat Jeʼwaa (Isaías 64:8).

26. ¿Kasa wekirajaainjatka anain sünain tü wane ekirajaayakalüirua?

²⁶ Nücheküin Jeʼwaa anain pukuwaʼipa otta talatüin pia kaʼwayuusere jee maʼwayuusere pia. Sünain tü wane piamasükat ekirajaaya, wekirajaajeerü anain tü waaʼinrajatkat süpüla talatüin waya sümaa waʼwayuuse.