1. ¿Kasa shapaaka aaʼujee naaʼin Jesuu wanee ai süpülapünaa nuʼutunuin aaʼin?

 AIPAʼA paala süpülapünaa nuʼutunuin aaʼin Jesuu, niyaawata aaʼu nüpüteenain na nikirajüinkana jee shapaasü naaʼin naaʼu. Müshi Jesuu namüin: «Nnojoishii wanaawain jia namaa» na manoujainsaliikana (Juan 15:19). Süchikijee tia, achuntushi nia nümüin chi Nüshikai napüleerua sünain maa: «Nnojoliishii süpüshin naya tü manoujainsatkalüirua, maa aka tayakai shiimain nnojolin süpüshinya» (Juan 17:15, 16). ¿Jamaluʼutche nünüiki Jesuu?

2. ¿Jaralii na wayuu manoujainsaliikana?

² Na manoujainsaliikana, naya na nnojoliikana eʼraajüin Maleiwa otta nia Satanaa laülaaka naaʼu (Juan 14:30; Éfeso 2:2; Santiago 4:4; 1 Juan 5:19). ¿Kasa waaʼinrajatka süpüla nnojoluin washatüin nakuwaʼipa? Anuu tü wekirajaainjatkalü anain: ¿Kasa waaʼinrajatka süpüla nümaainjanain neʼe waya Maleiwa otta nnojoliin waya sünainpünaain poliitika? ¿Kasa waaʼinrajatka süpüla wayoutuin tü keejiakat namüin na manoujainsaliikana? ¿Kasa waaʼinrajatka süpüla anain sukuwaʼipa waʼanaaya jee keisalain waya? ¿Kasa waaʼinrajatka suulia kachiiruain waaʼin washirüü? ¿Kasa waaʼinrajatka süpüla waʼatüin wanain tü korolo süpülakat atkaaya naapaka wamüin Maleiwa? (Paashajeʼera noota 16).

3. ¿Jamüsü watüjaaka saaʼu nnojoluin nikerotuin Jesuu sünain poliitika?

³ Wanaa sümaa yaajachin Jesuu Mmapaʼa, niʼrüin namüliala na wayuukana sutuma tü alatakat namüin. Amülialaasü naaʼin Jesuu naalin otta nükaaliinjain naya. Nnojoishi nia sünainpünaain poliitika süka nütüjaain saaʼu aneerüin sukuwaʼipa wayuu nuluwataapeena Maleiwa saaʼu tü Mmakat, tia shia tü naashajaakat maʼin achiki Jesuu yaaiwaʼaya nia mmapaʼa. Aneekünüshi nia nutuma Maleiwa süpüla nuluwataainjachin (Daniel 7:13, 14; Lucas 4:43; 17:20, 21). Nnojoishi ekerotuin Jesuu sünain poliitika jee nnojoishi sünainpünaain nia. Soʼu nüntinnüin nümaʼanamüin wanee aluwataai romano kanüliakai Poncio Pilato, müshi nia nümüin: «Waneʼeya sümüin sukuaippa tü taluwataayakat, nnojotsü müin aka nakuaippa na sülaülashiikana mma» (Juan 18:36). Akaʼaya na nikirajüinkana Jesuu, nnojoishii naya ekerotuin sünain poliitika. Müsü wanee karaloʼuta: «Nnojoishii ekerotuin sünain poliitika na anoujashii namaiwajanakana» (On the Road to Civilization [Camino a la civilización]). Ayatüsia tia maaʼulu natuma na anoujashii shiimainkana. Süka niain Maleiwa aluwataain waaʼu, nia neʼe kamaaka waya otta nnojoishii ekerotuin waya sünainpünaa poliitika (Mateo 24:14).

4. ¿Kasa naaʼinraka na anoujashii shiimainkana süka nümaain naya Maleiwa?

⁴ Wanee aluwataai saaʼu mma, nüjütüin wanee niʼipajachi suluʼumüin wanee mma süpüla naashajaain nooʼopünaa chayaa otta nnojoishi ekerotuinjachin nia sünainpünaa poliitika suluʼu tia Mmakat. Akaʼaya neʼe tü naaʼinrakat na anoujashii aluwataainjanakana nümaa Jesuu chaa iipünaa. Müshi Pablo namüin: «Aluwataanüshii waya anoujashiikana wapüshua nütüma chi Maleiwakai süpüla waapirüinjatüin wayuu süka nünüiki Cristo» (2 Corinto 5:20). Aʼyataashii  niʼipajee Jesuu naya anoujashiikana. Nnojoishii naya ekerotuin sünain poliitika otta nnojotsü naaʼinrüin wanee kasa sünainpünaaka poliitika (Filipos 3:20). Sutuma tia, watta naalii na wayuu nekirajakana süpüla natüjaain saaʼu tü nukuwaʼipakat Maleiwa sünain aluwatawaa. Na wayuu yaainjanakana yaa mmapaʼa, aʼyataajiraashii naya namaa otta nnojoishii naya ekerotuin sünain poliitikaya (Juan 10:16; Mateo 25:31-40). Na anoujashii shiimainkana, nnojoishii naya ekerotuin sünain poliitika (paashajeʼera Isaías 2:2-4).

5. ¿Kasa nnojotka noʼunuin aaʼujee na anoujashiikana sünain wanee atkawaa?

⁵ Pawalaawajiraashii na anoujashii shiimainkana otta paaʼinwajiraashii naya, jaʼitairü naatain noumain otta nakuwaʼipa (1 Corinto 1:10). Woʼunataale sünain atkawaa, nayeena neʼe washutaka aaʼu na wapüshikana otta na anoujiraakana wamaa, na alinjanakana wapüla naashin Jesuu (Juan 13:34, 35; 1 Juan 3:10-12). Alinjana wapüla na waʼünüükana  naashin Jesuu maʼaka nüküjain shia namüin na nikirajüinkana.

6. ¿Jamüshii jüüjüüinjanaka waya namüin na sülaülashiikana mma?

⁶ Mayaapejeʼe nnojoluin wekerotuin sünain poliitika, jüüjüüshii waya sümüin tü nachuntakat na sülaülashiikana mma, maʼaka saaʼin wawalaajüin tü luusakat, tü wüinkat otta tü kaasükat. Shiapejeʼe waaʼinrüin waneepia tü nuluwataakalü anain Maleiwa (Marcos 12:17; Roma 13:1-7; 1 Corinto 6:19, 20). Süpüshi tü nuluwataakalü anain waya Maleiwa shia alinjachin nia wapüla, woonooinjanain nümaa otta waʼwaajüinjachin nia. Oonooshii waya sümaa nünüiki Maleiwa mayaainjeʼe eein süpüla woʼutunuin aaʼin saaʼujee (Lucas 4:8; 10:27; paashajeʼera Aluwataaushikana [Hechos] 5:29; Roma 14:8).

7, 8. (1) ¿Jarat tü akuwaʼipaa jaʼyakat naaʼu na wanaawakana aaʼin nümaa Satanaa? (2) ¿Jamüsü sukuwaʼipa wayuu sutuma?

⁷ Süpüla nnojoluinjatüin washatüin nakuwaʼipa na manoujainsaliikana, nnojoluinjatü keejiain wamüin tü nakuwaʼipakat. Keejieerü wamüin tü keejiakat namüin müleka wanaawale tü jülüjakat waaʼin namaa otta washatüle nakuwaʼipa. Tia shia nakuwaʼipa na nnojoliikana aʼyataain nümüin Jeʼwaa. Nachecherüin naaʼin na anoujashiikana suulia nacheküin tia akuwaʼipaakalüirua. Müshi Pablo: «Tü shiimainkat ekirajünakat anain waya, nnojotsü shikiiruʼujeejatüin wayuu manoujainsat. Nia chi Naaʼinkai Maleiwa nümüiwa ekirajaka waya sünain tü shiimainkat» (1 Corinto 2:12; Éfeso 2:2, 3; paashajeʼera noota 17).

⁸ Kapülasü naaʼin nakuwaʼipa namüiwaʼa, yaleta aaʼinchii otta eʼrülii wayumüin na wayuukana sutuma nacheküin tü keejiakat namüin na manoujainsaliikana. Nnojoishii naya oonooin sümaa nünüiki Maleiwa sutuma. Nücheküin  Satanaa naaʼinrüin na wayuukana tü anakat neʼe saaʼin namüin jee nnojoluin jülüjain naaʼin tü alateetkat namüin sünainjee. Nücheküin Satanaa naaʼinrüin na wayuukana tü suchuntaakat naaʼin suulialeʼeya wanee kasa (1 Juan 2:16; 1 Timoteo 6:9, 10). Nüchajaain sukuwaʼipa chi Yolujaakai süpüla nimeejüin na aʼyataakana nümüin Jeʼwaa otta nimeejüin waaʼin süpüla washatüin nukuwaʼipa.

9. ¿Jamüsü süpüla keejiain wamüin tü keejiakat namüin na manoujainsaliikana?

⁹ Tü kasa keejiakat namüin na manoujainsaliikana müsü aka saaʼin tü joutaikat, süpaʼasü mmaka süpüshuaʼa. Nnojorüle wachecherüin waaʼin suulia, mojeerü wakuwaʼipa sutuma (paashajeʼera Proverbios 4:23). Eesüjaʼa süpüla nnojoluin mojuin paala wamüin nakuwaʼipa na manoujainsaliikana otta tü naaʼinrakat (Proverbios 13:20; 1 Corinto 15:33, TNM). Otta eesüjaʼa süpüla anajüin neʼe mapa wamüin tü kasa mojeetkalü atuma wakuwaʼipa maʼaka saaʼin anajaa shiyaakua wayuu maichesat jee amaʼüjiraasü sukuwaʼipa, anajüin wamüin nanüiki na ooʼulaakana Jeʼwaa süpüla nekirajüin alawaa otta washaitüle wanee kasa eeka süpüla outuin atuma waya jee nayale outuin na waneinnua (paashajeʼera noota 18).

10. ¿Kasa waaʼinrajatka suulia keejiain wamüin tü keejiakat namüin na manoujainsaliikana?

¹⁰ ¿Kasa waaʼinrajatka suulia keejiain wamüin tü keejiakat namüin na manoujainsaliikana? Aleewainjana waya nümaa Jeʼwaa otta wooʼulaainjatü nuʼunirüin wakuwaʼipa. Wachuntajatü nümüin Maleiwa chi naaʼinkai otta aküjainjana waya pütchi. Pülashi maʼin Jeʼwaa suulia kasa süpüshuaʼa. Watüjaa aaʼu nükaaliinjeenain waya süpüla wayoutuin tü keejiakat namüin na manoujainsaliikana (1 Juan 4:4).

11. ¿Jamüsü sukuwaʼipa naʼanaaya na manoujainsaliikana?

¹¹ Wayouteerü tü keejiakat namüin na manoujainsaliikana  anale waʼanaaya jee keisarale waya. Wainma na joʼuuchonkana jee arülakana asheʼein shiiʼiree neirakaanüin amüin. Müsü nasheʼin süpüla suchuntaainjatüin naaʼin namaʼüjiraain nakuwaʼipa namaa na eʼrakana naya, jee neeʼiyatüin neʼrüliin wayumüin otta müsia süpüla sütüjaanüin aaʼu washirüin naya. Eeshii na nnojoliikana jamajatüin namüin sukuwaʼipa naʼanaaya otta eesü yarüttüle nasheʼin. Nnojotsü müinjatüin wakuwaʼipa, keisalainjana waya.

12, 13. ¿Jarat tü pütchi suluʼujeejatkat tü Wiwüliakat jülüjainjatka waaʼin süpülapünaa waʼatüin washeʼin?

¹² Süka wanoujain nünain Jeʼwaa, anainjatü waʼanaaya,  wuleinjatü otta anainjatü shiyolojo. Saashin tü Wiwüliakat, anainjatü waʼanaaya otta laülaainjatü waaʼin süka waʼwaajüin Maleiwa (1 Timoteo 2:9,10; Judas 21).

¹³ Anale waʼanaaya, aneerü sünüiki wayuu nüchiki Jeʼwaa otta süchiki nupueulose. Kojutuinjachi nia watuma sükajee süpüshuaʼa tü kasa waaʼinrakat (1 Corinto 10:31). Laülaale waaʼin, eejeerü waaʼin suulia mojushiijüin namüin na wayuukana waʼanaaya. Wanaa sümaa waneeküin tü washeʼinjatkat jee tü waʼatüinjatkat süpüla anain wayolojo, jülüjeesü waaʼin eein süpüla anain jee mojuin sünüiki wayuu süchiki (1 Corinto 4:9; 2 Corinto 6:3, 4; 7:1).

14. ¿Kasa jülüjainjatka waaʼin palajana waʼatüinjatpa wanain washeʼin süpüla woutkajaain jee waküjain pütchi?

¹⁴ ¿Jamüinjatü waʼanaaya sünain tü outkajawaakat jee waküjapa pütchi? ¿Wayache soʼumaaka neʼe wayuu sutuma washeʼin? ¿Japüisüche wayuu watuma shiʼrapa jamüin waʼanaaya? «Nnojotsü jaralüinjatüin aküjain tamüin jamüinjatüin taʼanaaya» ¿müshiiche waya? (Filipos 4:5, TNM; 1 Pedro 5:6). Aneesü wayolojo wapüshuaʼa, anaʼleejeerü maʼin shia jaʼyale waaʼu tü akuwaʼipaa anakat nümüin Maleiwa. Kojutusü nümüin Jeʼwaa anale wakuwaʼipa suulialeʼeya anain neʼe wayolojo. Niʼrüin Jeʼwaa süpüshuaʼa tü suluʼukat waaʼin otta shiimainre tü wanoulakat nünain (1 Pedro 3:3, 4,TNM).

15. ¿Jamüsü nnojotka nüküjain wamüin Jeʼwaa tü kuluulu waʼatüinjatkat wanain otta jamüinjatüin wayolojo?

¹⁵ Nnojotsü nüküjain wamüin Jeʼwaa suluʼu wanee karaloʼuta tü kuluulu waʼatüinjatkat wanain. Shia naapaka wamüin waneirua pütchi suluʼuka tü Wiwüliakat oʼunirajatka wakuwaʼipa süpüla anain watuma tü waneekakat (Hebreokana 5:14). Jaʼitairü mapüleein tü waneeküinjatkat, nücheküin Jeʼwaa waaʼinrüin wanee kasa saaʼujee alin nia wapüla jee alin wapüla na wawalayuukana (paashajeʼera Marcos 12:30, 31). Naatawaisü sukuwaʼipa nasheʼin na wawalayuukana  sainküin mmakat süpüshuaʼa süka naatain noumain jee tü kamalainkat namüin. Anasü maʼin süka müin shia.

16. (1) ¿Jamüsü nnojotka wanaawain tü nümakat Jesuu sümaa tü namakat na manoujainsaliikana süchiki tü nneetkat? (2) ¿Kasa püsakireʼerüinjatka anain paaʼin?

¹⁶ Naashin Satanaa, talateena na wayuukana washirüle naya otta wainmale korolo namaʼana. Natüjaapejeʼe saaʼu na aʼyataashiikana nümüin Jeʼwaa alawaain tia. Müshi Jesuu: «Tü talateetkat atüma jaaʼin, nnojolüinjatü shiain sükajee kooʼomüin jümüin tü jükorolokot» (Lucas 12:15). Nnojotsü talatüin waaʼin sutuma tü nneetkat, jiwaʼatüsü waaʼin  sutuma otta nnojoleerü katüin woʼu waneepia sutuma. Eesü aleewale wayuu wamaa saaʼujee washirüin neʼe waya. Shiimain choʼujaain wamüin waneirua kasa otta keeʼireesü waaʼin talatüin waya. Naashin Jesuu shia talateetka atuma waaʼin aleewale waya nümaa Maleiwa otta waʼwaajüle nia sooʼopünaa kasa süpüshuaʼa (Mateo 5:3; 6:22). Püsakira paaʼin sünain tüü: «¿Wainmeesüche nneerü tamaʼana maʼaka naaʼin na manoujainsaliikana? ¿Shiache taashajaaka achiki waneepia tü nneetkat? ¿Jülüjasüche taaʼin shia waneepia?» (Lucas 6:45; 21:34-36; 2 Juan 6).

17. ¿Jamüsü aneetka pukuwaʼipa nnojorüle kachiiruain paaʼin tü washirüükat?

¹⁷ Aneerü wakuwaʼipa waneepia shiale jülüjain waaʼin tü waʼyataainkat nümüin Jeʼwaa otta nnojoleerü kachiiruain waaʼin tü washirüükat (Mateo 11:29, 30). Talateena waya otta nnojoleerü kasain jiwaʼatüin atuma waaʼin (Mateo 6:31, 32; Roma 15:13). Nnojoleerü shapaain waaʼin shiiʼiree kamaʼanaa wainma korolo (paashajeʼera 1 Timoteo 6:9, 10). Talateena waya wasülajapa kasa (Aluwataaushikana 20:35). Alatireena waya kaʼi namaa na wayuu aikana wapüla otta atunkeena waya sümaa nnojoluin jiwaʼatüin waaʼin (Eclesiastés 5:12).

18. ¿Kasa nüchajaaka maʼin akuwaʼipa Satanaa?

¹⁸ Nüchajaain sukuwaʼipa Satanaa süpüla numojujeʼerüin wakuwaʼipa nümaa Jeʼwaa, müsüjeseʼe eeinjatüin waaʼin suulia tia. Atkaashii waya sümaa «tü yolujaa mojulaasükalüirua» (Éfeso 6:12). Nnojotsü nücheküin Satanaa namaa na yolujaakana talatüin waaʼin otta katüin woʼu waneepia (1 Pedro 5:8). Pülashii maʼin naya, nükaaliinjeenapejeʼe waya Jeʼwaa süpüla wakanajüin naya.

19. ¿Jamüsü sünüiki Éfeso 6:14-18 süchiki tü korolo atkaayakat?

¹⁹ Sümaiwa paala, na surulaatkana naʼatapuʼuin nanain  tü sheʼin kachueera naaʼintoʼupünaakat suulia noʼutunuin aaʼin natuma na naʼünüükana. Akaʼaya waya, waʼatüinjatü wanain tü korolo naapakat wamüin Jeʼwaa suulia weewaain (Éfeso 6:13). Aküjünüsü suluʼu Éfeso 6:14-18 süchiki tü korolo atkaayakat. Saashin tia pütchikat, oonooinjana waya waneepia sümaa tü shiimainkat nüchikikat chi Maleiwakai süpüla yapainjanain waya süpüla atkawaa, maʼaka naʼatüin wanee surulaat chejeʼewaikai Roma tü siʼira jee tü sheʼin kachueerakat naaʼintoʼupünaa. Maʼaka naʼatüin wanee surulaat tü nüsapaatsekat, yapainjana waya süpüla aküjaa tü nüchikikat Maleiwa anaka atuma saaʼin wayuu. Maʼaka wanee taapüla najapuluʼukat wanee surulaat suulia sülanüin najatü na nüʼünüükana nünainmüin, anakajaʼa müleka wachecherüle waaʼin sünain anoujaa süpüla wayoutuinjatüin tü mojusü nüchekakat Satanaa. Jee maʼaka naʼatüin wanee surulaat tü uwomu kachueerakat sünain nikii süpüla atkawaa suulia sheewaʼalaain. Jee maʼaka najapuluʼuin wanee chajaruuta atkaaya, anakajaʼa waapaale nünüiki chi Maleiwakai akaaliinjünaka aka waya nutuma chi naaʼinkai nuulia Satanaa. Anakajaʼa müleka wachecherüle waaʼin sünain achuntaa nümüin chi Maleiwakai süpüla naaʼinmajüinjanain waya nüka chi naaʼinkai sünain süpüshuaʼa tü waaʼinrüinjatkat jee sünain atkawaa nümaa Satanaa.

20. ¿Kasa waaʼinrajatka süka tü korolo watkaayakat müleka aneere waya?

²⁰ Nnojorüle naʼatüin nünain wanee surulaat süpüshuaʼa tü nüsheʼin nütkaayakat, najayateechi nia yalapünaa chi nüʼünüükai. Keeʼireere waaʼin nnojoluin weewaain, kottuinjatü wanain tü korolo aapünakat wamüin süpüla watkaayain. Nnojotsü waakatüinjatüin shia woulia otta wuleinjatü shia watuma waneepia. Waakata tü watkaayakat sajaʼlajeʼennapa tü kasa nuluwataakalü aaʼu Satanaa otta nnojoitpa nia mmapaʼa namaa na yolujaakana (Alateetkat Mapeena [Apocalipsis] 12:17; 20:1-3). Ayata eejiraain waya  sümaa tü kasa mojusü suchuntaakat waaʼin otta tü kasa kapüleekat wamüin (1 Corinto 9:27).

21. ¿Kasa waaʼinrajatka süpüla wakanajüinjanain?

²¹ Iseechi wachiki wakanalüin chi Yolujaakai wamüiwaʼa. Nükaaliinjeena waya Jeʼwaa süpüla wakanajüin nia. Süpüla waneepiain waya nümaa Jeʼwaa, oʼuraajüinjana waya, ekirajaainjana waya sünain tü Wiwüliakat otta outkajaainjana waya namaa na wawalayuukana (Hebreokana 10:24, 25). Waaʼinrüle tia, ayateena waneepiain waya nümaa Maleiwa otta yapeena waya süpüla wasoutuin saaʼu wanoula.

22, 23. (1) ¿Jamüshii yapainjanaka waya waneepia süpüla wasoutuin saaʼu wanoula? (2) ¿Kasa wekirajaajeetka sünain tü wane ekirajaayakat?

²² Yapainjana waya süpüla wasoutuin waneepia saaʼu wanoula (Juan 15:19). Naata noʼunaka achiirua na aküjaliikana pütchi nüchiki Jeʼwaa suulia tü noʼunakalü achiirua na manoujainsaliikana. Püsakireʼera paaʼin sünain tüü: «¿Tatüjaa aaʼu jamüin taaʼinraka wanee kasa? ¿Shiimainche tanoujain sünain tü sümakat tü Wiwüliakat otta tü nümakat chi achepchiee oonookai otta kekiikai maʼin?» (Mateo 24:45; Juan 17:17, TNM). «¿Talatüsüche taaʼin sutuma taküjalin pütchi?» (Salmo 34:2; Mateo 10:32, 33). «¿Kasa taaʼinrajatka süpüla taküjain sümüin wayuu tü tanoujakalü anain?» (paashajeʼera 1 Pedro 3:15).

²³ Eesü mapüleere wamüin watüjaain saaʼu mojule wanee kasa noʼuluʼu Maleiwa. Eepejeʼe waneirua kasa kapüleeka wamüin süpüla wayaawatüin saaʼu anale shia. Wainma tü kasa niʼitaakat Satanaa wapüleerua shiiʼiree nimeejüin waya. Wanee kasa nimeejaka aka waya shia sükajee tü kasa waapajakat, tü wanajakat otta sükajee tü washaitakat. ¿Kasa waaʼinrajatka süpüla anain süneekia watuma tü washaitüinjatkat, tü wanajüinjatkat otta tü waapajüinjatkat? Wekirajaajeerü anain tia sünain tü wane ekirajaayakat.