1-3. (1) Püküja jamüin naaʼin na wayuukana sümüinmüin tü aʼyatawaakat. (2) ¿Jarat tü pütchiirua wekirajaainjatkalü anain sünain ekirajaayakat tüü?

 SAINKÜIN mmakat süpüshuaʼa, aʼyataashii maʼin na wayuukana süpüla tü choʼujaakat sümüin napüshi otta tü choʼujaakat namüin. Eeshii na anakana amüin tü naʼyataakalü anain jee eeshii na mmotkana sünain oʼunaa naʼyataaleruʼu. Müle pukuwaʼipa, ¿kasa paaʼinrajatka süpüla kamalain pümüin tü aʼyatawaakat? ¿Kasa paaʼinrajatka süpüla talatüin paaʼin sünain aʼyatawaa?

² Müshi Jeʼwaa wamüin: «Otta müshiʼiya napüshuaʼa na wayuukana eküinjana, asüinjana otta talatüinjatü naaʼin sümaa tü kasa anasü neʼrakat sünainjee naʼyataain maʼin. Tia, nüsülajala Maleiwa» (Eclesiastés 3:13). Nukumajüin waya Jeʼwaa süpüla anainjatüin wamüin aʼyatawaa. Keeʼireesü naaʼin talatüin waaʼin sünain tü kasa waaʼinrakat (paashajeʼera Eclesiastés 2:24; 5:18).

³ ¿Kasa waaʼinrajatka süpüla talatüin waaʼin sünain aʼyatawaa? ¿Jarat tü aʼyatawaa niyoutajatkat wanee anoujashi? ¿Kasa waaʼinrajatka süpüla waʼyataain nümüin Jeʼwaa otta waʼyataain süpüleerua tü choʼujaakat wamüin? ¿Jarat tü aʼyatawaa palajanainjatkat watuma?

4, 5. Püküja jamüin anaka maʼin nümüin Jeʼwaa aʼyatawaa.

⁴ Anasü maʼin nümüin Jeʼwaa aʼyatawaa. Saashin tü Wiwüliakat, nukumajüin Maleiwa paala sümaiwa kasa süpüshuaʼa chaa iipünaa otta yaa mmoluʼu (Génesis 1:1). Kettaapa nutuma Jeʼwaa tü Mmakat otta süpüshuaʼa tü kasa eekat saaʼu, nüküjain sünain anain süpüshuaʼa tü nukumajakat (Génesis 1:31). Talatüshi maʼin Jeʼwaa süka niʼrüin anain maʼin tü kasa nukumalakat (1 Timoteo 1:11, TNM).

⁵ Matüjainsai Jeʼwaa ooʼulawaa suulia aʼyatawaa. Müshi Jesuu: «Ayatayüiya chi Tashikai sünain aʼyatawaa maaʼulu» (Juan 5:17, TNM). Weʼraajüin süpüshi tü kasa anashaatasü naaʼinrakat Jeʼwaa. Nüneekajüin na anoujashii chainjanakana aluwataain iipünaa nümaa Jesuu (2 Corinto 5:17). Nuʼunirüin Jeʼwaa nakuwaʼipa na wayuukana otta jülüjashii naya naaʼin. Süka süküjünüin tü pütchi anasükat sainküin mmakat süpüshuaʼa, watta naalii na wayuu eʼraajakana Jeʼwaa otta naʼatapajüin katüin noʼu waneepia paʼaraiisüpa tü Mmakat (Juan 6:44; Roma 6:23, TNM).

6, 7. ¿Kasa naaʼinraka Jesuu süpüla jaʼyain naaʼu niʼyataalin?

⁶ Anasü nümüin Jesuu aʼyatawaa maʼaka naaʼin chi Nüshikai. Soʼu chajachin Jesuu chaa iipünaa, nükaalinjain chi Maleiwakai sünain akumajaa kasa süpüshuaʼa chaa iipünaa otta yaa Mmapaʼa (Proverbios 8:22-31; Colosas 1:15-17). Suʼunnaa yaajachin Jesuu mmapaʼa, nnojoishi ooʼulaain nia suulia aʼyatawaa. Jintüliiwaʼaya nia, ekirajünüshi nia süpüla nütüjain aʼyatawaa süka taapüla. Eeshijaʼa nukumajüle einasee, puettoʼu otta piichi. Süpüʼüya nia tü niʼyataainkat. «Chi aʼyataaikai sümaa taapüla» münüshi nia sutuma wayuu (Marcos 6:3).

⁷ Tü niʼyataakat maʼin anain Jesuu yaa mmapaʼa shia tü aküjaakat pütchi otta tü ekirajaakat wayuu nüchiki Jeʼwaa. Aküjashi maʼin nia pütchi soʼu apünüin juya  shiatapünaamüin. Oʼttüshi Jesuu sünain aʼyatawaa wattaʼa maalü otta ooʼulaashi nia kaʼlepa aika (Lucas 21:37, 38; Juan 3:2). Wattakuwaishi nia sünain aküjaa tü pütchi anasükat sümüin wayuu maʼleekalia, nuuʼuikashi nia (Lucas 8:1).

8, 9. ¿Jamüsü talataka naaʼin Jesuu sünain aʼyatawaa?

⁸ Talatüsü naaʼin Jesuu süka niʼyataain nümüin Maleiwa. Müshi aka naaʼin wanee wayuu eekai talatüin naaʼin emirapa nia. Atütülaasü naaʼin Jesuu sutuma naaʼinrüin tia aʼyatawaakat. Eesü siraale kaʼika naaʼu Jesuu sümaa nnojolin niküin süka nikeraajeein tü niʼyataainkat nümüin Maleiwa (Juan 4:31-38). Nüchajaain maʼin Jesuu sukuwaʼipa süpüla nikirajüin wayuu nüchiki chi Nüshikai. Müshijeseʼe nümüin nümüin Jeʼwaa: «Saaʼu tekeraajüin süpüshua tü puluwataakat anain taya, teeʼiyatüitpa pukuaippa sümüin wayuu süpüshua sainküin mma sünain anashaatain maʼi pia» (Juan 17:4).

⁹ Aʼyataai maʼin Jeʼwaa nümaa Jesuu. Talatüshii naya sünain aʼyatawaa otta anasü namüin. Washata «nukuaippa chi Maleiwakai» otta woushikajaa süchiirua nukuwaʼipa Jesuu (Éfeso 5:1; 1 Pedro 2:21). Müsüjeseʼe keeʼireein waaʼin waʼyataaliin maʼin otta anainjatüin sukuwaʼipa watuma tü waaʼinrakat.

10, 11. ¿Kasa waaʼinrajatka süpüla talatüin waaʼin sünain tü waʼyataainkat?

¹⁰ Süka suluʼuin waya nupueulose Maleiwa, aʼyataashii maʼin waya süpüla tü choʼujaakat sümüin wapüshi otta tü choʼujaakat wamüin. Talateesü waaʼin sünain aʼyatawaa, eepejeʼe süpüla kapüleein wamüin wountuin tia. ¿Kasa waaʼinrajatka nnojorüle talatüin waaʼin sünain aʼyatawaa?

¹¹ Talata waaʼin sünain waʼyataain. Eesü iseerüle  wachiki weeʼiratüin jalainjanain waʼyataain otta jeʼrain kaʼi walatitka sünain, aneetpejeʼe waaʼin talatüle waaʼin sünain aʼyatawaa. Watüjaale saaʼu tü keeʼireekat naaʼin Jeʼwaa wapüleerua, talateerü waaʼin sünain aʼyatawaa. Keeʼireesü naaʼin Jeʼwaa naapüinjatüin chi wayuukai tü kasa choʼujaakat sümüin nüpüshi. Saashin tü Wiwüliakat, chi nnojoikai aapüin tü choʼujaakat sümüin nüpüshi, «mojuleesia maʼi tü naaʼinrakat nuulia wane manoulasai» (1 Timoteo 5:8). Kaʼwayuusere jee kachonle pia, pütüjaa aaʼu piʼyataainjachin süpüleerua paapüin tü choʼujaakat namüin. Jaʼitasü mamalain pümüin tü piʼyataakalü anain, talateechi Jeʼwaa putuma piʼyataale süpüla paapüin tü choʼujaakat sümüin püpüshi.

12. ¿Jamüsü aneetka wakuwaʼipa waʼyataaliire jee lotule wakuwaʼipa?

¹² Tütü pia sünain aʼyatawaa otta loto pukuwaʼipa. Müle pukuwaʼipa, talateechi pia sünain aʼyatawaa (Proverbios 12:24; 22:29). Tü wane kasa piʼreetkat, shia kojuteechin pia nümüin chi pülaamainkai. Kojutusü nümüin wanee laama lotule nukuwaʼipa wanee aʼyataai süka nnojoleechin nuʼluwajüin nneerü, korolo otta aʼyataajeechi nia soʼu tü oora achuntunakat nümüin (Éfeso 4:28). Nütüjaa aaʼulu Jeʼwaa tütüle pia sünain piʼyataain otta lotule pukuwaʼipa. Aneerü paaʼin süka pütüjaain saaʼu talatüin naaʼin chi Maleiwa aikai püpüla (Hebreokana 13:18, TNM; Colosas 3:22-24).

13. ¿Kasa anasü weʼreetka lotule wakuwaʼipa sünain aʼyatawaa?

¹³ Kojuteechi Jeʼwaa atumawaa anale pukuwaʼipa piʼyataaleruʼu. Jülüjale waaʼin tia, kamalainjeerü wamüin aʼyatawaa (Tito 2:9, 10). Otta müsia, eeshi süpüla nikirajaweein sünain tü Wiwüliakat wanee wayuu aʼyataakai pümaa saaʼujee anain pukuwaʼipa (paashajeʼera Proverbios 27:11; 1 Pedro 2:12).

14-16. ¿Kasa jülüjainjatka waaʼin süpülapünaa waapaain wanee aʼyatawaa?

¹⁴ Nnojotsü süküjain tü Wiwüliakat jaralüin tü aʼyatawaa niyoutajatkat wanee anoujashi. Eepejeʼe waneirua pütchiirua suluʼu tü Wiwüliakat akaalinjaka waya süpüla waapaain wanee aʼyatawaa eekai anain (Proverbios 2:6). Sükaje tü sümakat tü Wiwüliakat, pusouta shiʼipajee tü asakinnajatkalü anain.

 ¹⁵ ¿Taaʼinreetche wanee kasa mojuka nümüin Jeʼwaa sünain aʼyatawaakat tüü? Wekirajaaitpa anain kasain mojuin nümüin Jeʼwaa. Mojusü nümüin tü aʼluwajaakat otta tü aküjaakalü alawaa (Éxodo 20:4; Aluwataaushikana [Hechos] 15:29; Éfeso 4:28; Alateetkat Mapeena [Apocalipsis] 21:8). Eeja waaʼin suulia waapaain wanee aʼyatawaa mojuka noʼuluʼu Jeʼwaa (paashajeʼera 1 Juan 5:3).

¹⁶ ¿Sünainpünaasüche wanee kasa mojuka noʼuluʼu Jeʼwaa aʼyatawaakat tüü? ¿Kaseerü paaʼinraka saapünüle pümüin wanee aʼyatawaa suluʼu wanee pitaalü süpüleeka ojutiraa joʼuu? Tü paaʼinrüinjatkat shia püshajüinjatüin neʼe nanülia na antakana. Pütüjaapejeʼe aaʼu mojuin nümüin Jeʼwaa tü ojutiraakat joʼuu. Mayaapejeʼe nnojoluin piain chi tottoot aaʼinrajachikai tia, ¿aneetche nümüin Jeʼwaa paapaale tia ayatawaakat? (Éxodo 21:22-24).

17. ¿Kasa waaʼinrajatka süpüla waneeküin tü kasa anakat noʼuluʼu Jeʼwaa?

¹⁷ Jülüjale waaʼin tü sümakat tü Wiwüliakat, wayaawateerü saaʼu tü anasükat süpüla waaʼinrüin jee tü mojusükat süpüla wayoutuin shia, maʼaka süküjain Hebreokana 5:14. Püsakira paaʼin sünain tüü: «Taapaale aʼyatawaakat tüü, ¿aneetche shia noʼuluʼu na waneinnua? Toʼunule sünain wanee aʼyatawaa suluʼu wanee mma wattasü, ¿aneetche tapütüle taʼwayuuse namaa tachonnii süpüleerua?».

18. ¿Kasa kapüleejeetka aaʼu palajanain watuma tü waʼyataainkat nümüin Maleiwa?

¹⁸ Süka sülüʼülüin «sükalia sajaʼttüinjatüin tü kasakat süpüshua», eesü kapüleere wamüin palajanain watuma tü waʼyataainkat nümüin Jeʼwaa (2 Timoteo 3:1). Kapüleesü ousütaa sünain aʼyatawaa jee ayatüin waʼyataain  sünain. Choʼujaasü waaʼinmajüin wapüshi, shiapejeʼe palajanainjatüin watuma tü waaʼinrajatkat süpüla waʼwaajüin Jeʼwaa. Eeja waaʼin suulia shiain alanaʼaleein ojutu wamüin tü kasa sünainpünaakat washirüü (1 Timoteo 6:9, 10). ¿Kasa waaʼinrajatka süpüla palajanain watuma tü waʼyataainkat nümüin Maleiwa sümaa waapüin tü kasa choʼujaakat sümüin wapüshi? (Filipos 1:10, TNM).

19. Weʼitaale maʼin waaʼin nünain Jeʼwaa, ¿Jamüsü nnojoleetka shapaain maʼin waaʼin süchiirua tü choʼujaakat wamüin?

¹⁹ Weʼitaa maʼin waaʼin nünain Jeʼwaa (paashajeʼera Proverbios 3:5, 6). Nütüjaa aaʼulu Jeʼwaa kasain choʼujaain wamüin otta jülüjashii waya naaʼin (Salmo 37:25; 1 Pedro 5:7). Müsü tü Wiwüliakat wamüin: «Anakaja müleka nnojoliire keeʼireein jaaʼin washirüü. Shia anaka aluʼu müleka talatüle neʼe jaaʼin waneʼewai jukua sümaa tü eekai eein jümaʼana, sükajee nümüin wamüin chi Maleiwakai: ‹Nnojoleechi taya oʼunüin jümaʼanajee. Nnojoleena tapütüin jia jümüiwa›» (Hebreokana 13:5). Nnojotsü keeʼireein naaʼin Jeʼwaa shapaain maʼin waaʼin süpüleerua waapüin tü kasa choʼujaakat sümüin wapüshi. Watüjaa aaʼulu wattairüin saalii tü kasa naapakat Jeʼwaa namüin na aʼyataakana nümüin (Mateo 6:25-32). Jaʼitaina aʼyataain jee maʼyataain waya, ayata wekirajaain waneepia sünain tü Nünüikikat Maleiwa, waküjain tü pütchi anasükat otta woʼunuin sünain tü outkajawaakat (Mateo 24:14; Hebreokana 10:24, 25).

20. ¿Kasa waaʼinrajatka suulia kachiiruain waaʼin wainma korolo?

²⁰ Ana watuma sukuwaʼipa tü woʼukot (paashajeʼera Mateo 6:22, 23). Nnojoluinjatü kachiiruain paaʼin kamaʼanaa wainma korolo maluʼulu tia. ¿Kasa apüla? Süpüla paaʼinmaain tü piʼyataainkat nümüin Jeʼwaa. Nnojotsü anain wooʼulaale suulia aleewaa nümaa Maleiwa saaʼujee kachiiruain waaʼin washirüü otta keejiale wamüin tü kasa  jeketkat ojuʼitüin maʼaka saaʼin serulaat, tableta otta computador. ¿Kasa waaʼinrajatka süpüla palajanain watuma tü waʼyataainkat nümüin Maleiwa? Wachecherüinjatü waaʼin suulia wojuyaajüin nneerü. Kojuyaarale pia, püchajaa sukuwaʼipa süpüla süpaliʼirajüin pujuyaala jee puwalaajüle shia süpüshuaʼa. Paaʼinmaale kamaʼanaa wainma korolo, nnojoleerü asetaain kaʼi püpüla otta mapüseechi pia süpüla puʼuraajüin, pikirajaain jee püküjain pütchi. Eere wamaʼana tü weküinjatkat otta tü washeʼinjatkat, talata waaʼin sümaa tia suulia kachiiruain waaʼin washirüü (1 Timoteo 6:8). Jaʼitaina kojuyaalain jee mojuyaalain waya, anasü jülüjale waaʼin eere süpüla wakooʼomüinrüin tü waʼyataainkat nümüin Maleiwa.

21. ¿Jamüsü watüjaainjatka saaʼu tü palajanainjatkat watuma?

 ²¹ Tü palajanainjatkat watuma. Nnojoliire kekiin maʼin waya, mapüseena waya sutuma waaʼinmaain waneepia tü nneetkat otta tü ekirajawaakat suluʼu eʼikülee miyoʼu otta nnojoleerü apütaain kaʼi wapüla süpüla waʼyataain nümüin Maleiwa. Müshi Jesuu: «Ayata jüchajaain palajana tü nuluwataayakat Maleiwa» (Mateo 6:33, TNM). Atüjaana aaʼu kasain palajanain suluʼu waaʼin sükajee tü waneekakat, tü waaʼinrakat waneepia otta tü waaʼinreekalü amüin mapa.

22, 23. (1) ¿Jarat tü aʼyatawaa waaʼinmaainjatkat? (2) ¿Kasa waaʼinrajatka süpüla talatüin waaʼin sünain aʼyatawaa?

²² Tü waaʼinmaainjatkat shia tü waʼyataainkat nümüin Jeʼwaa otta tü aküjaakat pütchi (Mateo 24:14; 28:19, 20). Wachajaa sukuwaʼipa süpüla waaʼinrüin tia maʼaka naaʼin Jesuu. Eeshii na akolojookana eere palitchoin Aküjalii pütchi. Eeshii na ekirajaakana sünain wanee anüikii naatajatü süpüla naküjain pütchi. Paashajaa namaa na wawalayuu aainjakana tia otta püsakira jamüin sukuwaʼipa natuma. Naküjeetka pümüin talatüin naaʼin sutuma naʼyataain nümüin Maleiwa (paashajeʼera Proverbios 10:22).

²³ Maaʼulu yaa, eeshii walatirüle wainma oora sünain aʼyatawaa süpüla waapüin tü kasa choʼujaakat sümüin wapüshi. Eesü kojuyale waʼyataain. Nütüjaa aaʼulu tia Jeʼwaa otta kojutusü nümüin süpüshuaʼa tü waaʼinrakat süpüla waaʼinmajüin wapüshi. Jaʼitairü kasain waʼyataain anain, aʼyataaliinjana maʼin waya maʼaka naaʼin Jeʼwaa otta Jesuu. Tü waaʼinmaainjatkat shia tü waʼyataainkat nümüin Jeʼwaa otta waküjain süchiki nuluwataainjachin Maleiwa mapeena saaʼu tü Mmakat. Talateena maʼin waya waaʼinrüle tia.