1, 2. ¿Kasa watüjaainjatka aaʼu nüchiki Satanaa namaa na yolujaakana?

 ANEERÜ maʼin wakuwaʼipa suluʼupa waya tü mma jeketü naapajatkat wamüin Jeʼwaa. Ekeraajeerü tü keeʼireekat naaʼin wapüleerua. Kepiapejeʼe waya maaʼulu suluʼu wanee mma nuluwataaka aaʼu Satanaa namaa na yolujaakana (2 Corinto 4:3, 4). Shiimainya nnojoluin weʼrüin naya, watüjaapejeʼe saaʼu pülain naya.

² Sünain ekirajaayakat tüü, wekirajaweerü anain tü waaʼinrajatkat süpüla pejein waya nünain Jeʼwaa otta tü waaʼinrajatkat süpüla wattaluʼuin waya nuulia Satanaa. Nüküjain wamüin Jeʼwaa nükaalinjeenain waya. Akatsaʼa watüjaweein saaʼu kasain tü nimeejakalü aka waya Satanaa namaa na yolujaakana süpüla wojutuuin najapuluʼu.

3. ¿Kasa keeʼireeka naaʼin Satanaa wapüleerua?

³ Naashin Satanaa, aʼwaajünüshi Jeʼwaa natuma na wayuukana süka naapüin kasa anasü namüin. Shiasaʼa sülatapa kasa mojusü namüin, ooʼulaajeena naya suulia aʼyatawaa nümüin Jeʼwaa (paashajeʼera Job 2:4, 5). Niʼrapa Satanaa jee na yolujaakana nikirajaweein wanee wayuu nüchiki Jeʼwaa, nachajaain sukuwaʼipa süpüla nuuʼulaain suulia. Jashichishii naya naapapa naaʼin  wanee wayuu nümüin Jeʼwaa jee woutiisapa nia. Saashin tü Wiwüliakat, chi Yolujaakai müshi aka naaʼin wanee «wasashi jashichikai maʼin, nüchajaain chi nikeekai amüin» (1 Pedro 5:8, TNM). Keeʼireesü naaʼin Satanaa numojujeʼerüin wakuwaʼipa nümaa Jeʼwaa (Salmo 7:1, 2; 2 Timoteo 3:12).

4, 5. (1) ¿Kasa isaka nüchiki Satanaa? (2) ¿Kasa waaʼinrajatka süpüla waʼleejüin Satanaa?

⁴ Nnojo mmoluin waya neema Satanaa jee na yolujaakana. Mayaapejeʼe eein süpüla naaʼinrüin Satanaa kasa mojusü nümüin wanee anoujashi, nnojoleena jamajüin waya wapüshuaʼa nütuma. Naashin Jeʼwaa, wainmeena na  wayuu oʼttaakana suʼunnaa tü müliaa miyoʼusükat (Alateetkat Mapeena [Apocalipsis] 7:9, 14). Iseerü nüchiki Satanaa nuuʼuleʼerüin shikeraajüin tia süka naaʼinmajüin Jeʼwaa tü nupueulosekat.

⁵ Aleewale maʼin waya nümaa Jeʼwaa, iseerü nüchiki Satanaa nükayaleʼerüin waya nuulia. Müsü tü Wiwüliakat wamüin: «Eejeechi Jeʼwaa jümaa müleka nnojoliire jükayalaain nuulia» (2 Crónicas 15:2; paashajeʼera 1 Corinto 10:13). Wainma na wayuu aʼleejakana Satanaa namaiwa süka aleewain naya nümaa Jeʼwaa. Noʼutku naya wayuukana nia Abel, Enoc, Noé, Sara otta Moisés (Hebreokana 11:4-40). Waʼleeja chi Yolujaakai maʼaka naaʼinrüin shia naya wayuukana. «Müleka [jüʼleejüle] chi Yolujaakai, oʼunamaateechi juulia», müsü tü Wiwüliakat (Santiago 4:7).

6. ¿Kasa naaʼinraka Satanaa süpüla numojujain wakuwaʼipa nümaa Maleiwa?

⁶ Mayaainjeʼe nütüjaain saaʼu Satanaa naaʼinmajüin waya Jeʼwaa, ayatüsia nüchajaain sukuwaʼipa süpüla numojujain wakuwaʼipa nümaa Jeʼwaa. Maaʼulu yaa, nuuʼulaküin waaʼin chi Yolujaakai süka wainma kasa, kakaliairü naaʼinrüin tia. ¿Kasa nimeejaka aka wayuu Satanaa?

7. ¿Jamüshi ayataka Satanaa nushutuin saaʼu nupueulose Jeʼwaa?

⁷ Müshi chi aluwataaushikai Juan: «Otta tü wayuu manoujainsatkalüirua suluʼu mmakat süpüshua, nia aluwataaka saaʼu chi Yolujaakai» (1 Juan 5:19). Nia Satanaa aluwataaka saaʼu tü mmakat otta aluwataweeshi nia saaʼu nupueulose Jeʼwaa (Miqueas 4:1; Juan 15:19; Alateetkat Mapeena 12:12, 17). Nütüjaa aaʼu chi Yolujaakai süpütaain palit kaʼi süpüla nütaʼünüin, müsüjeseʼe nüpüleeruain maʼin waaʼin süpüla nnojoluin waneepiain waya nümaa Maleiwa. Eeshi nimeejüle waya Satanaa süka kasa eekai nnojoluin jaʼyain maʼin otta süka eekai jaʼyain.

8. ¿Kasa natüjaainjatka aaʼu na wawalayuukana waneʼewai nakua?

 ⁸ Müsü tü Wiwüliakat: «Atkaashii sümaa tü yolujaa mojulaasükalüirua, tü aluwataakat saaʼu tü manoujainsatkalüirua sainküin mmakat» (Éfeso 6:12). Eejiraainjana waya waneʼewai wakua nümaa chi Yolujaakai jee namaa na yolujaakana. Oʼttüshii waya sünain eejirawaa namaa waapapa waaʼin nümüin Jeʼwaa. Apünüintua nüküjain Pablo namüin na anoujashii chajanakana Éfeso, nachecherüinjatüin naaʼin sünain anoujaa (Éfeso 6:11, 13, 14, TNM).

9. ¿Kasa naaʼinreeka waka Satanaa namaa na yolujaakana?

⁹ Wainma sukuwaʼipa tü kasa nimeejeekalü aka waya Satanaa otta na yolujaakana. Jaʼitasü wayoutuin paala wanee kasa mojusü niʼitaaka wapüleerua Satanaa, eejüinjatü waaʼin süka nuuʼulakeerüin waaʼin wachikuaʼa. Jülüjasü naaʼin Satanaa tü jookalü apüla waya süpüla naainjirüin waya kasa mojusü. Nnojoleena waya ojutuuin najapuluʼu müleka jülüjale waaʼin tü sümakat tü Wiwüliakat süchiki tü kasa nimeejakalü aka wayuu (2 Corinto 2:11; paashajeʼera noota 31). Nimeejüin wayuu Satanaa sükajee tü sukuwaʼipamaajatkat yolujaa.

10. (1) ¿Kasa naaʼinraka chi eekai sünainpünaain sukuwaʼipa yolujaa? (2) ¿Anasüche nümüin Jeʼwaa tü sünainpünaakat yolujaa?

¹⁰ Sünainpünaashi wanee wayuu sukuwaʼipa yolujaa, nuuʼulakirüle ouutsü, nümaʼüjale wayuu otta naashajaale namaa na outushiikana sükajee ouutsü. Saashin tü Wiwüliakat, nia waʼwaajüinjachika Jeʼwaa otta nnojoluinjana waya sünainpünaainjanain yolujaa süka nülerajüin shia (Deuteronomio 18:10-12; Alateetkat Mapeena 21:8). Wayoutajatü süpüshuaʼa tü kasa sünainpünaakat yolujaa (Roma 12:9).

11. ¿Jameena waya kamalainre wamüin tü sünainpünaakat yolujaa?

 ¹¹ Niʼrüle waya Satanaa kamalain wamüin tü sünainpünaakat yolujaa, mapüleejeerü nümüin nimeejüin waya. Mojeerü wakuwaʼipa nümaa Jeʼwaa sünainpünaale waya yolujaa.

12. ¿Kasa nüchajaaka akuwaʼipa Satanaa süpüleerua wayuu?

¹² Nüchajaain sukuwaʼipa Satanaa süpüla wainmajüin naaʼin na wayuukana saaʼu tü naaʼinrajatkat. Keeʼireesü naaʼin Satanaa anajüinjatüin namüin na wayuukana tü kasa mojusükat otta mojuinjatüin namüin tü kasa anasükat (Isaías 5:20). Naashin chi Yolujaakai, nnojotsü kasain anain apüla tü sümakat tü Wiwüliakat otta nnojotsü choʼujaain naaʼinrüin wanee wayuu tü nümakat Maleiwa süpüla talatüin nia.

13. ¿Jamüsü sukuwaʼipa nutuma Satanaa süpüla wainmajüin saaʼin wayuu nutuma?

¹³ Wainmajüsü saaʼin wayuu nutuma Satanaa. Tia shia tü nimeejakat maʼin aka wayuu. Kakaliairü naaʼinrüin tia. Jamüsüjaʼa suluʼu tü apain kanüliakat Edén, nimeʼejüin saaʼin Eva wanaa sümaa nümüin sümüin: «¿Jamüsü taaʼin nünüiki Maleiwa jümüin? ¿Shiimüinsaʼaya nümüin jümüin nnojoliinjanain jiküin süchon tü wunuʼuliakat süpüshua yaakat suluʼu tü apainkat?» (Génesis 3:1). Wanaa sümaa katüin noʼu Job, müshi Satanaa nümüin Jeʼwaa noʼupala na aapieekana: «¿Kojutushiche neʼe Maleiwa nümüin Job süpaʼa mma?» (Job 1:9). Süchikijee woutiisain Jesuu, müshi Satanaa nümüin: «Müleka Nüchonle pia Maleiwa, puluwataa türa ipakat shiiʼiranajaaiwa pan» (Mateo 4:3).

14. ¿Jamüsü sukuwaʼipa nutuma Satanaa süpüla anain wamüin tü sünainpünaakat yolujaa?

¹⁴ Maaʼulu yaa, ayatüsia wainmajüin saaʼin wayuu  nutuma Satanaa. Nüchajaain sukuwaʼipa süpüla nnojoluin mojuin namüin na wayuukana tü kasa sünainpünaakat yolujaa. Eeshii anoujashii nimeejaka süpüla sünainpünaain naya yolujaa (2 Corinto 11:3). ¿Kasa waaʼinrajatka süpüla nnojoluin sünainpünaain waya yolujaa? ¿Kasa waaʼinrajatka süpüla nnojoluin nimeejüin waya Satanaa? Wekirajaa sünain piamasü kasa nimeejaka aka waya Satanaa waneekajatpa tü wanajüinjatkat otta tü wepinaseinjatkat.

15. ¿Kasa wayu tü eekat süpüla sünainpünaain atuma waya tü yolujaakalüirua?

¹⁵ Maaʼulu yaa, alatinnüsü tü naaʼinrakat na yolujaakana suluʼu peliikula, video, telewisoot, videojuegos otta suluʼu Internet. Naashin na wayuukana, nnojoleena jamajüin naya naaʼinrüle tia otta nnojotsü natüjaain aaʼu mojeerüin nakuwaʼipa natuma na yolujaakana. Eeshii wayuu ooʼulakakana süka horóscopo, sajapü wayuu, waraaja otta maraaja koʼoyoosü. Nukumajüin sukuwaʼipa Satanaa süpüla kamalain shia sümüin wayuu jee ponuin shia saaʼin. Eeshii na wayuu makana: «Nnojotsü mojuin anajaa tia, aluʼusaʼa waaʼinrajatüle tü saaʼinrakat yolujaa». ¿Jamüsü mojeetka wakuwaʼipa sutuma tia? (1 Corinto 10:12).

16. ¿Jamüsü wayoutajatka wanajüin, waapajüin jee washaitüin wanee kasa sünainpünaaka yolujaa?

¹⁶ Nnojotsü nütüjaain aaʼu Satanaa otta na yolujaakana tü jülüjakat waaʼin. Eepajaʼa süpüla natüjaain saaʼu tü keeʼireekat waaʼin otta tü jülüjakat waaʼin sutuma tü kasa waneekakat otta tü waneekakat süpüleerua wapüshi. ¿Jamüsü süpüla nütüjaain aaʼu Satanaa otta na yolujaakana weʼreein sümüin tü kasa naaʼinrakat? Natüjaweerü aaʼu tia wanajüle, waashajeʼerüle jee waapajüle wanee  kasa sünainpünaaka tü naaʼinrakat na ouutshiikana, na ooʼulaküliikana, wuruuja, wanpiiro, na kaleʼeruʼukana yolujaa jee waneirua kasa. Natüjaapa saaʼu tia, nachajaweerü sukuwaʼipa süpüla sünainpünaain maʼin waya tü naaʼinrakat (paashajeʼera Galacia 6:7, TNM).

17. ¿Jamüsü sukuwaʼipa nutuma Satanaa süpüla sünainpünaain waya yolujaa?

¹⁷ Ayuuire waya, eeshii süpüla sünainpünaain waya yolujaa nutuma Satanaa shiiʼiree anain waya. Maaʼulu yaa, wainma wayuu müliaka sutuma ayuulii. Eeshii wayuu aainjaka wainma kasa sümaa nnojoluin anayaain nia (Marcos 5:25, 26). Sutuma tia, eesü süpüla shapaain naaʼin otta nuuʼulaküin kasa nnojotka anain. Wayakana  anoujashiikana, eejüinjatü waaʼin suulia wasajüin wunuʼu sünainpünaaka yolujaa (Isaías 1:13).

18. ¿Jarat tü wunuʼu wayoutajatkat suulia wasajüin?

¹⁸ Sümaiwa paala, eeshii israeliita sünainpünaaka sukuwaʼipa yolujaa. Müshi Jeʼwaa namüin: «Jiyalerapa tü jajapükat, nnojoleerü teirakaain amüin. Jaʼitaina achuntuin maʼin jia tamüin, nnojoleerü taapüin jünüiki» (Isaías 1:15). Nnojoluinjatü naapüin Jeʼwaa nanüiki süka mojushaatain tia noʼuluʼu. Müsüjeseʼe wayoutajatüin wanee tratamiento mojeetka atuma wakuwaʼipa nümaa Jeʼwaa. Keeʼireesü waaʼin nükaalinjain waya Jeʼwaa ayuuipa waya (Salmo 41:3). Choʼujaasejeseʼe jülüjainjatüin waaʼin müleka nnojorüle sünainpünaain yolujaa tü tratamiento waneekajatkat (Mateo 6:13). Wayaawatüle saaʼu sünainpünaain yolujaa tü wunuʼu wasüinjatkat, wayouta shia (paashajeʼera noota 32).

19. ¿Kasa naaʼinraka chi Yolujaakai süpüla mmoluin wayuu neema?

¹⁹ Eeshii wayuu nnojoliika anoujain sünain eein chi Yolujaakai otta na yolujaakana. Eeshii wayuu atüjaaka saaʼu shiimain eein na yolujaakana sutuma sülatüirüin kasa namüin. Wainma wayuu mmotka seema tü yolujaakalüirua. Mmotkuʼu müshii naya waneepia sutuma tü kasa «pülasü», sümakalü amüin wayuu. Eeshii na mmotkana sutuma sükuentajünüin namüin süchiki tü kasa keemasü naaʼinrakat sümüin wayuu na yolujaakana. Eeshii na kamalainkana amüin aapajaa kuenta süchikimaajatü yolujaa otta kamalainsü namüin naküjain shia sümüin wayuu. Sutuma naaʼinrüin tia, mmotsü wayuu neema chi Yolujaakai.

20. ¿Kasa waaʼinrajatka suulia wakaalinjain Satanaa?

²⁰ Aküjai alawaa Satanaa otta keeʼireesü naaʼin mmoluin  wayuu neema (2 Tesalónica 2:9, 10). Eesü wayuu kamalainka amüin tü sünainpünaakat yolujaa. Niasaʼa Satanaa nüchajaain sukuwaʼipa süpüla kamalain shia namüin otta nimeʼejüin saaʼin wayuu süpüla nunoujirüin sünain alawaa. Wayuukana naainnua nakuentajüin süchiki tü neʼrakat otta tü naapakat naashin. Süküjünüle tü kuentakat sümüin wainma wayuu, nakooʼomüinjüin neʼe süchiki tia. Süpüla nnojoluinjachin wakaalinjain Satanaa, nnojo wakuentajüin süchiki tia (Juan 8:44; 2 Timoteo 2:16).

21. ¿Kasa anaka süpüla waashajaain achiki suulia wakuentajüin süchiki yolujaa?

²¹ Jamüshijaʼa eere wanee aküjai pütchi sünainpünaapuʼukai sukuwaʼipa yolujaa, nnojotsü anain nüküjale tia namüin na waneinnua. Na wayuu suluʼukana nupueulose Jeʼwaa, nnojoishii mmoluinjanain naya seema tü naaʼinrakat Satanaa otta na yolujaakana. Shia anaka aluʼu waashajaale nüchiki Jesuu otta jülüjale waaʼin pülashin nia nutuma Jeʼwaa (Hebreokana 12:2). Nnojoishi akuentajüin Jesuu süchiki yolujaa namüin na nikirajüinkana. Tü naaʼinmaakat shia tü aküjaakat pütchi süchiki Nuluwataaya Maleiwa otta süchiki tü kasa anasü naaʼinrakat Maleiwa (Aluwataaushikana [Hechos] 2:11; Lucas 8:1; Roma 1:11, 12).

22. ¿Kasa wayu tü wayoutuinjatkat?

²² Soto waaʼin keeʼireein naaʼin Satanaa mojuin wakuwaʼipa nümaa Jeʼwaa. Nüchajaain sukuwaʼipa süpüla nuuntuin tia. Watüjaa aaʼu kasain nimeejeein aka waya Satanaa, müsüjeseʼe wayoutuinjatüin süpüshuaʼa tü kasa sünainpünaakat yolujaa. Nnojo wooʼulaain numojujeʼerüin chi Yolujaakai tü wakuwaʼipakat nümaa Maleiwa (paashajeʼera Éfeso 4:26, 27). Waʼleejüle chi Yolujaakai, nnojoleena waya nimeejüin otta naaʼinmajeena waya Jeʼwaa (Éfeso 6:11).