1, 2. ¿Kasa waaʼinrajatka süpüla wayaawatüin waneepia waalin nüpüla Maleiwa?

 ANEESHII waya wapüshuaʼa. Süpüla nnojoluin ayuulin waya, eküinjana waya, aainjüinjana waya ejercicio otta keisalainjana waya sümüin wakuwaʼipa. Mayaapejeʼe kapüleein tia, puunteerü shia. Eepejeʼe sooʼomüin tü kasa waaʼinrajatkat süpüla anain wakuwaʼipa.

² Mayaapejeʼe weʼraajüin Jeʼwaa, aleeweeshii maʼin waya nümaa. Nüküjain Judas tü naaʼinrajatkat na anoujashiikana süpüla nayaawatüin waneepia tü naalinkat nüpüla Maleiwa. Müshi nia: «Anakaja müleka ayatüle jia sünain ekirajaa tü shiimüinkat süpüla jükaaliijiraain sünain kooʼomüinjatüin jümüin sütsüin jaaʼin sünain anoujaa» (Judas 20, 21). ¿Kasa waaʼinrajatka süpüla katsüin wanoula?

3-5. (1) ¿Kasa keeʼireeka naaʼin Satanaa jülüjain waaʼin süchiki tü nuluwataakalü anain waya Jeʼwaa? (2) ¿Jamüsü talataka paaʼin sutuma tü nuluwataakalü anain Jeʼwaa?

³ Kojutuinjatü pümüin tü nümakat Jeʼwaa. Keeʼireesü naaʼin Satanaa jülüjain paaʼin kapüleein aaʼinraa tü nuluwataakalü anain Maleiwa otta aneerüin pukuwaʼipa paaʼinrüle tü anakat neʼe saaʼin pümüin. Naʼalainpaleesü wayuu Satanaa maʼaka naaʼinrüin shia nüka Adán sümaa Eva (Génesis  3:1-6). Ayatüsia nimeejüin wayuu Satanaa maaʼulu yaa.

⁴ ¿Shiimainche tü nümakat Satanaa? ¿Shiimainche kapüin wakuwaʼipa sutuma tü nuluwataakalü anain waya Jeʼwaa? Nnojo. Anuu wanee shiyaawase. Warai mataashi pia süpaʼapünaa wanee mma. Piʼraka kachueeraluʼuin shiʼipa tia mmakat. «¿Kasapülajatche tüü?», maa müsü paaʼin. Shiasaʼa paapaka nülonoin wanee wasashi. «Atakü, nüpülajatüle chii suulia nikajüin wayuu», pümaka. ¿Aashin nnojoluin mmoluin paaʼin sutuma pütüjaain saaʼu kachueeraluʼuin shia? Tü pütchi nuluwataakalü anain waya Jeʼwaa müsü aka saaʼin tia kachueerakat, saaʼinmajüin waya. Otta chi Yolujaakai nia chi wasashikai. Müsü tü Wiwüliakat: «Eeja jaaʼin nuulia chi Yolujaakai süka jüʼünüüin nia. Müshi nia aka saaʼin wanee wasashi jashichikai maʼin, nüchajaain chi nikeekai amüin» (1 Pedro 5:8, TNM).

⁵ Keeʼireesü naaʼin Jeʼwaa anain wakuwaʼipa waneepia. Nnojotsü keeʼireein naaʼin nimeejüin waya Satanaa. Müsüjeseʼe nüküjain wamüin Jeʼwaa tü waaʼinrajatkat otta tü pütchi oʼunirajatkat wakuwaʼipa. Tia suluʼusü tü Wiwüliakat (Éfeso 6:11). Müshi Santiago: «Chi eekai jülüjüin naaʼin nünüiki Maleiwa süpüla naaʼinrüinjatüin waneepia tü suluwataakat anain, sümaa nnojolüin motüin naaʼin shia, alanaʼaleejeeria maʼi sünain talatüin naaʼin sünain süpüshua tü naaʼinrakat» (Santiago 1:25).

6. ¿Jamüsü anaka maʼin tü nuluwataakalü anain waya Jeʼwaa?

⁶ Waaʼinrüle tü nuluwataakalü anain waya Jeʼwaa, anoutaajeerü wakuwaʼipa otta aleeweena maʼin waya nümaa. Woʼuraajüle nümüin Jeʼwaa waneepia, aneerü wakuwaʼipa (Mateo 6:5-8; 1 Tesalónica 5:17). Talatüsü waaʼin sutuma woʼunuin sünain tü outkajawaakat, watütülüin naaʼin na waneinnua, waküjain pütchi otta wekirajüin wayuu sünain tü Wiwüliakat (Mateo 28:19, 20; Galacia 6:2; Hebreokana 10:24, 25). Jülüjale waaʼin anain wakuwaʼipa sutuma  tia, katsüinjeerü wanoula otta weʼitaajeerü waaʼin sünain aneerüin wakuwaʼipa sutuma tü nümakat Jeʼwaa.

7, 8. ¿Kasa akaalinjeenaka waya suuʼulakünapa waaʼin?

⁷ Eesü shapaale waaʼin maaʼulu sutuma suuʼulaküneerüin wanoula mapa jee iseerüle wachiki walatüin süchikumüin. Sülatüle wamüin tia, jülüja waaʼin tü nümakat Jeʼwaa: «Tayakai Jeʼwaa, taya chi Pümaleiwasekai, Chi ekirajakai pia süpüla anainjatüin pukuwaʼipa, Chi oʼunirakai pia suluʼupünaa tü wopu anasükat. Poonoole sümaa tü taluwataakalü anain, jimateerü paaʼin maʼaka saaʼin wanee süchi otta loteerü pukuwaʼipa maʼaka saaʼin sümüna tü palaakat» (Isaías 48:17, 18).

⁸ Woonoole sümaa nünüiki Jeʼwaa, jimateerü waaʼin maʼaka saaʼin wanee süchi kaluʼuka wüin weinshi otta loteerü wakuwaʼipa waneepia maʼaka saaʼin waneepiain tü sümünakat palaa. Jaʼitairü kasain alatüin wamüin eeshii süpüla waneepiain waya nümaa Jeʼwaa süpüla kaʼikat  süpüshuaʼa. Anuu tü waaʼinrajatkat saashin tü Wiwüliakat: «Piʼitaa naaʼu Jeʼwaa tü kasa jawatakat pümüin süpüla nükaalinjain pia. Nnojoleechi niyüülajüin wanee wayuu eekai lotuin akuwaʼipa» (Salmo 55:22).

9, 10. ¿Kasa jaʼyaka naaʼu wanee anoujashi laülaakai aaʼin sünain anoujaa?

⁹ Aleewale maʼin pia nümaa Jeʼwaa, laülaajeerü paaʼin sünain anoujaa (Hebreokana 6:1). ¿Kasa jaʼyaka naaʼu wanee wayuu laülaakai aaʼin sünain anoujaa?

¹⁰ Nnojotsü laülaain waaʼin sünain anoujaa sutuma laülaayuuin neʼe waya. Süpüla laülaain waaʼin sünain anoujaa, aleewainjana maʼin waya nümaa Jeʼwaa otta wanaawainjatü waaʼin nümaa (Juan 4:23). Müshi Pablo: «Na jülüjakana aaʼin tü suchuntaakat saaʼin neʼiruku shia neʼe naaʼinraka tia; akanasaʼa na jülüjakana aaʼin tü nüchekakat chi naaʼinkai Maleiwa, shia naaʼinraka tü nüchekakat Maleiwa» (Roma 8:5, TNM). Wanee anoujashi laülaakai aaʼin sünain anoujaa, nnojotsü kapülain naaʼin nukuwaʼipa nümüiwaʼa jee nnojotsü kachiiruain naaʼin kamaʼanaa wainma korolo. Jülüjasü naaʼin waneepia tü niʼyataainkat nümüin Jeʼwaa otta nüneeküin tü anainjatkalü atuma nukuwaʼipa (Proverbios 27:11; paashajeʼera Santiago 1:2, 3). Wanee anoujashi laülaakai aaʼin sünain anoujaa, nnojoishi oonooin sümaa wayuu süpüla naaʼinrüin kasa mojusü otta nütüjaa aaʼu tü kasa anasükat sümaa naaʼinrüin shia.

11, 12. (1) ¿Kasa naaʼinrajatka chi wayuu laülaakai aaʼin sünain anoujaa naashin Pablo? (2) ¿Jamüshi nikirajaainjachika wanee anoujashi maʼaka naaʼin wanee ayoujiraai?

¹¹ Laülaainjatü waaʼin sünain anoujaa. «Tü eküülü kaʼüsükat napülajatü na wayuu laülaakana aaʼin sünain anoujaa, na ekirajaakana süpüla nayaawatüin saaʼu anale jee mojule wanee kasa», müsü nünüiki Pablo (Hebreokana  5:14, TNM). Tü pütchi «ekirajaa» makat, nia saashajaaka achiki wanee wayuu ayoujiraai sünain awatawaa.

¹² Süpüla nütüjain maʼin wanee ayoujiraai, ekirajaashi maʼin nia palajana, nnojoishi nia joʼuujiraain sümaa nütüjain ayoujirawaa. Jemeitpa wanee joʼuu, isasü nüchiki aapawaa wanee kasa otta akoyojoo. Nimiyoʼulaapa, nuunteerü tia. Miyoʼupa nia, eeshi süpüla nütüjain ayoujirawaa nikirajaale. Müsia neʼe nukuwaʼipa wanee anoujashi, ekirajaainjachi sünain tü Wiwüliakat süpüla laülaain naaʼin sünain anoujaa.

13. ¿Kasa waaʼinrajatka süpüla wanaawain waaʼin nümaa Jeʼwaa?

¹³ Sünain karaloʼutakat tüü, wekirajaaitpa anain süchiki tü waaʼinrajatkat süpüla wanaawain waaʼin nümaa Jeʼwaa otta waaʼinrüin tü anakat noʼuluʼu. Kojutuitpa wamüin tü nuluwataakalü anain waya Maleiwa. Süpüla waneeküin wanee kasa waaʼinrajatka, anasü wasakirüle waaʼin sünain tüü: «¿Jarat tü pütchi suluʼukat tü Wiwüliakat akaalinjeechika taya sünain tü alatakat tamüin? ¿Kasa taaʼinrajatka süpüla teʼitaain shia suluʼu takuwaʼipa? ¿Kasa taaʼinrajatka naashin Jeʼwaa?» (paashajeʼera Proverbios 3:5, 6; Santiago 1:5).

14. ¿Kasa waaʼinrajatka süpüla wakatsüinrüin wanoula?

¹⁴ Wakatsüinra waneepia wanoula nünain Jeʼwaa. Weküle eküülü anasü, aneena waya sutuma. Akaʼaya wekirajaale waneepia nüchiki Jeʼwaa, katsüinjeerü wanoula nünain. Woʼttaiwaʼaya sünain ekirajawaa sünain tü Wiwüliakat, watüjaa aaʼu tü kasa mapüleekat nüchiki Jeʼwaa otta tü kasa nümakat wamüin. Kakaliapa waya sünain anoujaa, choʼujaasü wekirajaain sünain tü kasa kapüleekat suluʼujee tü Wiwüliakat. «Tü eküülü kaʼüsükat napülajatü na wayuu laülaakana aaʼin sünain anoujaa», müsü nünüiki Pablo. Weʼitaale suluʼu wakuwaʼipa tü wekirajaakalü anain, kekiijeena waya. «Anaʼleeshia kekiire wanee wayuu suulialeʼeya  wanee kasa», müsü tü Wiwüliakat (Proverbios 4:5-7; 1 Pedro 2:2).

15. ¿Jamüsü choʼujaaka shiimainjachin alin wapüla Jeʼwaa otta na wawalayuukana?

¹⁵ Süpüla nnojoluin ayuulin wanee wayuu, keisalainjachi nia waneepia sümüin nukuwaʼipa. Müshia wanee wayuu laülaakai aaʼin sünain anoujaa, aleewainjachi maʼin nia nümaa Jeʼwaa. Anuu nünüiki Pablo wamüin: «Jiyaawata saaʼu waneʼewai jukua lotule tü junoulakat, jiiʼiyata süka jukuwaʼipa shiimain lotuin tü jaaʼinrakat» (2 Corinto 13:5, TNM). Choʼujaasü wakatchinrüin wanoula. Kooʼomüinjatü naalin Jeʼwaa wapüla otta na wawalayuukana. Anuu nünüiki Pablo: «Müleka maalinre wayuu tapüla, nnojoleerü tountüin takaaliijain naya sünain tü nanoulakat [...]. Müleka maalinre wayuu tapüla, nnojotsü kasain saapüin tamüin» (1 Corinto 13:1-3).

16. ¿Kasa keeʼireeka naaʼin Satanaa jülüjain waaʼin?

¹⁶ Keeʼireesü naaʼin Satanaa jülüjain waaʼin nnojoluin talatüin Jeʼwaa wamaa. Niʼreein waya sünain mojuin waaʼin otta mepin wanee kasa sülatüle wamüin. Nnojotsü nücheküin Satanaa weʼitaain waaʼin nanain na wawalayuukana otta talatüin waaʼin (Éfeso 2:2). Keeʼireesü naaʼin Satanaa jülüjain waaʼin kasa mojusü süpüla mojuin wakuwaʼipa otta mojuin wakuwaʼipa nümaa Maleiwa. Naapapejeʼe Jeʼwaa wamüin tü kasa akaalinjeenakat waya süpüla wayamülüin tü kasa mojusü jülüjakat waaʼin: kaʼatapalashii waya nutuma.

17. ¿Jamüsü anaka jülüjale waaʼin tü kasa anasü waʼatapajakat nutuma Jeʼwaa?

¹⁷ Tü kasa waʼatapajakat nutuma Maleiwa saashin tü Wiwüliakat suluʼu 1 Tesalónica 5:8, TNM, müsü aka saaʼin tü uwon kachueera nünainkat wanee surulaat aaʼinmajakai  nikii suulia seewaʼalaain. Tü kasa anasü waʼatapajakat nutuma Jeʼwaa, saaʼinmajüin tü waaʼinkat suulia jülüjain waaʼin kasa mojusü.

18, 19. ¿Kasa sükaaliijaka anain Jesuu tü kasa anasü naʼatapajakat nutuma Maleiwa?

¹⁸ Sükaalinjain Jesuu tü kasa anasü naʼatapajakat nutuma Maleiwa. Wanee ai süpülapünaa outuin nia, wainma tü kasa eejiraakalü amaa nia. Aapüna ekiichi Jesuu nutuma wanee naʼaleewain. Eeshi wanee naʼaleewain «nnojoishi teʼraajüin nia», makai nüchiki. Otta eeshii waneinnua naʼaleewainyuu apütakana nia nümüiwaʼa. Müliashi Jesuu atumawaa otta oʼutuna aaʼinchi nia sutuma wayuu chejeʼewat nuumainpaʼa. ¿Kasa akaaliijaka nia süpüla nüchecherüin naaʼin suʼunnaa müliaa? Müsü tü Wiwüliakat: «Sükajee tü talataa eʼitaanakat nüpüleerua, nüchecherüin naaʼin suʼunnaa nükachennüin sünain wanee wunuʼu, niyoutuin tü japüliikat otta nüikalaaka nikialuʼujee Maleiwa» (Hebreokana 12:2, TNM).

 ¹⁹ Kojutushi Jeʼwaa nümüin Jesuu sutuma waneepiain nia nümaa otta nüküjain alaain Satanaa. Nütüjaa aaʼu nüleʼejüinjachin iipünaamüin süpüla chain nia nümaa chi Nüshikai. Tü kasa anasü naʼatapajakat Jesuu, sükaaliijain nia süpüla nüchecherüin naaʼin suʼunnaa müliaa. Jülüja waaʼin tü kasa anasü waʼatapajakat nutuma Maleiwa maʼaka naaʼinrüin shia Jesuu. Waaʼinrüle tia, sükaaliijeena waya süpüla wachecherüin waaʼin suʼunnaa kasa kapüleesü.

20. ¿Kasa akaalinjeenaka waya süpüla jülüjain waaʼin kasa anasü?

²⁰ Nütüjaa aaʼu Jeʼwaa kanoulain pia jee püchecherüin paaʼin suʼunnaa müliaa (Isaías 30:18; paashajeʼera Malaquías 3:10). Naashin Jeʼwaa, naapeerü pümüin tü keeʼireekat paaʼin (Salmo 37:4). Jülüja paaʼin waneepia tü kasa anasü paʼatapajakat nutuma Maleiwa. Nnojotsü keeʼireein naaʼin Satanaa punoujain sünain naapeerüin pümüin Jeʼwaa kasa anasü otta nnojoleerüin nikeraajüin tü nümakat pümüin. Nnojo jülüjain paaʼin tia.  Wainmajüle paaʼin saaʼu nnojoleerüin naapüin pümüin Jeʼwaa tü kasa paʼatapajakat, puchunta kaalinwaa nümüin Jeʼwaa. Soto paaʼin tü nümakat Maleiwa pümüin: «Nnojo jüshapataain aaʼin sooʼopünaa wane kasa. Shia jaaʼinra achuntaa nümüin Maleiwa sooʼopünaa kasa süpüshua. Jüküja nümüin tü shapaakat atüma jaaʼin. Otta nnojo motüin jaaʼin aapaa analuʼut nümüin saaʼu tü anasü naaʼinrakat jümüin. Müleka masütaajule jia sünain achuntaa nümüin Maleiwa, aapüneerü wane anaa jümüin nütüma. Isasü wachiki wayaawatüin saaʼu tia anaa naapakat wamüin, saaʼu wayuuin neʼe waya. Otta sükajee saʼaniraaitpain wakuaippa nümaa Cristo Jesús, jutateena waya suulia shapawaa aaʼin je suulia jülüjaa aaʼin kasa mojusü wanaa sümaa anain waya nütüma» (Filipos 4:6, 7).

21, 22. (1) ¿Kasa keeʼireeka naaʼin Jeʼwaa süpüleerua tü mmakat? (2) ¿Kasa püchecheraainjatka anain waneepia?

²¹ Pükatala kaʼi süpüla jülüjain paaʼin tü kasa anasü eejeetkat mapeena. Alüʼütsü tü kaʼi aʼwaajüneechikalü oʼu Jeʼwaa sutuma wayuu süpüshuaʼa (Alateetkat Mapeena [Apocalipsis] 7:9, 14). Aneerü maʼin wakuwaʼipa paʼaraiisüpa tü Mmakat. Nnojoleechi Satanaa, na yolujaakana otta nnojoleerü tü mojulawaakat. Müiria nnojoluin ayuulii jee outaa. Achijiraweena waya waneepia sümaa talatüin waaʼin jee anain waya. Kotteena waya süpüla paʼaraiisüin watuma tü mmakat. Jouleerü eküülü otta jimateerü waaʼin. Anamieerü wayuu süpüshuaʼa. Süchikijee, taasheerü sukuwaʼipa wayuu süpüshuaʼa maʼaka taashin na nüchonniikana Maleiwa (Roma 8:21, TNM).

²² Keeʼireesü naaʼin Jeʼwaa aleewain maʼin pia nümaa. Poonoo waneepia nümaa otta pürütkaa maʼin nünainmüin. Waaʼinrüle tia wapüshuaʼa, wayaawateerü waneepia waalin nüpüla Maleiwa (Judas 21).