1, 2. ¿Kasa keeʼireeka naaʼin Pedro napüleerua na wayuukana wanaa sümaa naapajüin nünüiki Jesuu chaa Capernaum? ¿Kasakaʼa neʼe naaʼinrüin na wayuukana?

NIʼRAJAʼALAATAAIN Pedro na wayuu yalajanakana aapajüin nünüiki Jesuu. Chajana naya suluʼu tü ekirajüleekat na judíokana chaa Capernaum. Chajatü kepiain nüpüshi Pedro suluʼu tia mmakat, naʼaleewainyuu jee tü niʼyataakalüirua amaa. Chaʼwaishi nia ejimejüin suluʼu tia mmakat, shiroku tü palaakat Galilea. Keeʼireesü maʼin naaʼin Pedro naapajüin naya wayuukana tü nikirajakalü anain Jesuu, wanee wayuu atüjakai maʼin ekirajaa süchiki Nuluwataaya Maleiwa. Akatsaʼa müin suʼunakai aaʼin suluʼu wanee mojuluʼulu tü pütchikat namüin na wayuukana.

² Nnojorülaa müsü naaʼin na wayuukana sünain aapajaa nünüiki Jesuu. Eeshii na mojukana anüiki süchiki tü nümakat Jesuu. Tü shapaakalü atuma naaʼin Pedro shia eein waneinnua nikirajüinkana Jesuu nnojoliikana anain amüin tia pütchikat. Nnojotsü jaʼyain naaʼu naya anoujashiikana talatüin naaʼin maʼakaapuʼu. Jashichisü noʼuuta. Eeshii na mojushiikana amüin tia pütchikat jee noʼunaka nümaʼanajee. Süchikijee tia, ooʼulaayaa müsü tü wayuukalüirua suulia nümawaa Jesuu (paashajeʼera Juan 6:60, 66).

3. ¿Kasa naaʼinraka Pedro sutuma ichein maʼin tü nunoulakat?

³ Jaʼitakajeʼe na aluwataaushiikana, nnojotsü müin pansaakai saaʼin namüin tü nümakat Jesuu. Jaʼitakajeʼe neʼe Pedro, nnojotsü niyaawatüin saaʼu. Airuʼutsüjeʼeya shia wamüin eejanale waya sünain aapajaa nünüiki Jesuu sümaa nnojoluin wayaawatüin saaʼu. ¿Kasaje paainjaka piale alatüin amüin tia? Nnojotsü eiwaʼalüin alatüin nümüin Pedro tia. Wekirajaa sünain tü naaʼinrakat Pedro süpüla eejiraain nia sümaa tü alatakat nümüin jee süpüla waneepiain nia nümaa Jesuu sutuma ichein maʼin tü nunoulakat.

4, 5. ¿Jamüsü mojuka namüin na wayuukana nukuwaʼipa Jesuu?

⁴ Wainmatua mojuin naaʼin Pedro sutuma nünüiki jee nukuwaʼipa Jesuu. Eejatü paa wanee kasa alataka wanee kaʼi süpülapünaa  tü waashajaakalü achiki. Süchikijee nikirüin Jesuu wainma wayuu sükajee jeʼrachen pan otta jime, naneekeein nia süpüla aluwatawaa naaʼu. Nnojotsü neʼitaain na waneinnua niyoutuinjatüin Jesuu süchiki tia. Oʼunushi nia yalejee suulia tü wayuukalüirua. Nuluwataaka na nikirajüinkana noʼunaiwa suluʼu wanee anua chamüin Capernaumüin. Soʼu aikat tia, neʼrüin Jesuu waraitüin sooʼopünaa tü palaakat Galilea suʼunnaa wanee wawai. Sülataka wanee kasa eeʼiyataka nümüin Pedro kanoulainjachin maʼin nia.

⁵ Jaʼyuumüin süchikijee tia, neʼrüin na nikirajüinkana Jesuu süntüin tü wayuukalüirua nachiirua. ¿Kasakaʼa naainjain Jesuu? Nütüjaa aaʼu Jesuu nnojoluin süntüin tia wayuukalüirua shiiʼiree aapajaa nünüiki Maleiwa. Antüsüirua shiiʼiree shikinnüin nutuma Jesuu, nüchiaaka naya (Juan 6:25-27). Chaa suluʼu tü ekirajüleekat na judíokana chaa Capernaum, ayatshijaʼa yootuin Jesuu jee nüküjaka wanee pütchi kapüleeka ayaawataa. Wainma tü wayuu aponojookat sümaa nünüiki Jesuu.

6. ¿Kasa nüküjaka Jesuu sümüin tü wayuukalüirua? ¿Jamüsü sünüiki tü wayuukalüirua?

⁶ Shia keeʼireeka naaʼin Jesuu nnojoliin noʼunuin süchiirua washirüü na wayuukana jee nayaawatüin saaʼu nüntüin chi wayuu nüjünalakai Maleiwa, chi aapajiraainjachikai nikii saaʼu tü wayuukalüirua süpüla katüin soʼu waneepia. Süpüla nayaawatüin saaʼu tia, nüküjain Jesuu namüin müin nia maʼaka saaʼin tü manaakat, tü eküülü ojutuukalü iipünaajee nükalioʼu Moisés. Niʼrüin Jesuu eein na wayuu mojukana anüiki süchiki tia, nüküjaka namüin neküinjatüin niʼiruku jee nasüinjatüin nüsha süpüla katüinjatüin noʼu. Wainma na wayuu jashichikana jee mojushiikana amüin tia pütchikat, namakalaka: «Nnojotsüsaʼa kapüleein waaʼin tü nümakat wamüin. Nnojoleeru wountüin» (Juan 6:48-60, 66). *

7, 8. (1) ¿Kasa nnojotka niyaawatüin aaʼu Pedro nüchiki Jesuu? (2) ¿Jamüsü nünüiki Pedro shiʼipajee tü nüsakitkalü anain Jesuu?

⁷ Eesüjaʼa süpüla wainmajüin naaʼin Pedro süka nnojoluin niyaawatüin saaʼu outajachin Jesuu süpüla shikeraajüin tü keeʼireekat naaʼin Maleiwa. Nnojoipejeʼe nia oʼunuin namaa na wayuu mojushiikana amüin nünüiki Jesuu. Eesü wanee kasa naataka atuma nukuwaʼipa Pedro. ¿Jaratche eera shia? Jooʼu waashajaai süchiki tia.

⁸ Nüsakirüin Jesuu na aluwataaushiikana: «¿Jamüinjatü jukuaippa? ¿Oʼuneeshii jia tamaʼanajeʼeya» (Juan 6:67). Namüinjatü pütchikat tia na polookana piamamüin aluwataaushii. Niapejeʼe asoutuin Pedro. Maʼwaishi nia, shiajaʼa eera süka niain miyoʼushin nia naʼakajee. Jee shiale süka nüküjaleeinya uatuwoʼushi tü  suluʼukat naaʼin. Ayatayülia sotuin aaʼinyüü tü nümakat, sünain maa: «Senyotkalee, nnojotsü wayuu eekai müin aka pia woʼunuinjachikai anainmüin, süka shiimüin sünain shiiʼiranajaaitpain waaʼin sütüma pünüiki süpüla eeinjanain waya waneepia nümaa Maleiwa» (Juan 6:68).

9. ¿Jamüsü watüjaaka saaʼu waneepiain Pedro nümaa Jesuu?

⁹ ¡Anashaatasü maʼin nünüiki Pedro! Süka ichein nunoula Pedro nünain Jesuu, waneepiashi nia nümaa. Nütüjaa aaʼu Pedro niain Jesuu chi nuluwataakai Jeʼwaa süpüla oʼtteʼeraa tü wayuukalüirua jee nütüjaa aaʼu kateerüin noʼu waneepia naapajüle nünüiki Jesuu süchiki Nuluwataaya Maleiwa. Mayaainjeʼe nnojoluin niyaawatüin maʼin saaʼu süpüshuaʼa tü nümakat Jesuu, nütüjaa aaʼu nieechin anajiraain atuma wayuu nümaa Maleiwa süpüla katüin soʼu waneepia

10. ¿Jamüshii süpüla waneepiainjanain waya nümaa Jesuu maʼaka nutuma Pedro?

¹⁰ ¿Wanaawasü pünüiki nümaa Pedro? Maaʼutpünaa, wainma wayuu aika apüla Jesuu naashin, nnojoliipejeʼe waneepiain naya nümaa. Waneepiashii waya nümaa Kürisüto müleka waapaale sümaa tü nikirajakalü anain maʼaka naainjain shia Pedro. Wachajaainjatü sukuwaʼipa süpüla wayaawatüin saaʼu otta weʼitaain suluʼu wakuwaʼipa; jaʼitairü müin kapüleekai saaʼin wamüin jee nnojoluin shiain maʼin tü wachekakat. Süpüla katüinjatüin woʼu waneepia nutuma Jesuu, waneepiainjana waya nümaa (paashajeʼera Salmo 97:10).

11. ¿Jalamüinshi oʼunuin Jesuu namaa na nikirajüinkana?

¹¹ Süchikijee tia, oʼunushi Jesuu namaa na aluwataaushiikana chaa palaamüin saaʼujee Capernaum. Chaa süraloʼumüin tü uuchikat Hermón, süʼütpaʼa tü mma aapünakat paala namüin na israeliitakana. Jaʼyasü yalejeechiki tü palaakat Galilea. Jaʼyasü maʼin tü uuchikat nalüʼütpa maʼin sünain tü pueulokot Cesarea chaa Filipos. Saaʼujee tia uuchikat sümaʼinruʼu nanajüin tü mma aapünakat paala namüin na israeliitakana, nüsakirüin Jesuu na nikirajüinkana sünain wanee kasa.

12, 13. (1) ¿Jamüsü nütüjaweeka saaʼu Jesuu jamüin sünüiki tü wayuukalüirua nüchiki? (2) Sünainjee tü nümakat Pedro nümüin Jesuu, ¿jamüsü watüjaaka saaʼu ichein nunoula?

¹² «¿Jarai taya saashin tü wattakat saalin wayuu?», nümakalaka Jesuu namüin. Chüntakajasaʼa noʼu Pedro nünain Jesuu, nütüjaa aaʼuchi kekiin maʼin nia. Nütüjawee aaʼu Jesuu jamüin sünüiki tü wayuukalüirua nüchiki. Naküjaka na nikirajüinkana jamüin sünüiki tü wayuukalüirua nüchiki. Nütüjawee aaʼu Jesuu müleka nanoujale na nikirajüinkana tü sümakat tü wayuukalüirua nüchiki. Nümakalaka namüin: «Jama jiakana, ¿jarai taya jaajüin?» (Luc. 9:18-20).

 ¹³ Nnojoishi kajain Pedro süpüla asoutaa, asoutamaatüshi nia. Tü nümakat Pedro pansaasü sümaa tü suluʼukat naaʼin na waneinnua, müshi nia: «Pia Cristokaʼaya, chi Nüneekajalakai Maleiwa süpüla oʼtteʼeraa wayuu». Talatakajasaʼa naaʼin Jesuu nümaa Pedro süka lotuin maʼin tü nünüikikat. Nüküjaka niain Jeʼwaa aküjain tia shiimainkat namüin na aʼwaajakana nia, nnojotsü süküjalain wayuu. Niakalaka Jeʼwaa aküjain nümüin Pedro wanee kasa nnojotka atüjaanüin aaʼu paala: sünain niain Jesuu chi Kürisütokai, chi Mesías nüjünalakai Jeʼwaa (paashajeʼera Mateo 16:16, 17).

14. ¿Kasa sünainpünaaka tü aʼyatawaa naapakat Jesuu nümüin Pedro?

¹⁴ Suluʼu tü Nüchikimaajatkat Maleiwa, aküjünüsü müin Kürisüto maʼaka saaʼin «tü ipa ayouktünakat natüma na akumajüliikana miichi» (Sal. 118:22; Luc. 20:17). Sünainjee tia pütchikat otta waneirua, nüküjain Jesuu niain chi ipa ayoutunakai paala. Nücheküin nia Maleiwa süpüla sukumajaainjatüin nünainjee tü anoujaa shiimainsükat. Nüneekünaka Pedro nutuma Jesuu süpüla waneirua aʼyatawaa. Nnojoishi nia alanaʼaleein sünain anain noulia na wane aluwataaushiikana. Naashin Jesuu, meechi aka wanee wayuu kamaʼanaka shiyaawein wanee miichi (Mat. 16:18, 19). Müinjachi niakai ojutalüin Pedro supuettoʼuse Nuluwataaya Maleiwa napüleerua na wayuukana. Apünüinsü neʼipapaʼa naya wayuukana, naya palajanaka na judíokana namaa na prosélito münakana, süchikijee na samariajeʼewaliikana otta sajaʼttiamüin naya na gentiilekana.

15. ¿Jamüshi nüchiaanaka Jesuu nutuma Pedro? ¿Jamüsü nünüiki Pedro nümüin?

¹⁵ Maʼaka jeʼra kashi süchikijee tia, müshi Jesuu namüin na nikirajüinkana: «Chi aapünakai amüin kasa wainma süpüla niʼyataainjachin nümüin Maleiwa, acheküshi naaʼinrüin süpüshua tü eʼitaanakat nüpüla». Niyaawata aaʼu mapa Pedro shiimain maʼin tü nümakat Jesuu (Luc. 12:48). Nüküjapa Jesuu süchiki tü naaʼinrüinjatkat Pedro, ayatshia aashajaain Jesuu süchiki tü alatajatkat nümüin chi Mesíaskai maʼaka müliainjachin nia atumaa jee nuʼutunuinjachin aaʼin chaa Jerusalén. Niyouta achikit tia Pedro, najattaka Jesuu mamüin aka türa sünain nüchiaain nia: «Senyotkalee, jalia pia suulia sülanüin pümüin tüü» (Mat. 16:21, 22).

16. ¿Jamüsü nüchiaaya Pedro nutuma Jesuu? ¿Kasa shikirajaka anain waya tü nümakat Jesuu?

¹⁶ Nüküjain Pedro tia süka keeʼireein naaʼin anain Jesuu.  Makalaka koʼutaleeinya nia süka nujuntaain Jesuu nuulia jee niirakaain namüin na wane nikirajüinkana sünain maa: «Nünüikimaajachi pia Satanás, koʼuta neʼe pia toulia. Nnojo paʼalijirüin taya suulia tekeraajüin tü nüchekakat tapüleerua Maleiwa. Tü jülüjakat paaʼin, püleʼeruʼujeejatü neʼe shia, nnojotsü shiain tü niʼinaajalakat paala chi Maleiwakai tapüleerua». Eesüjaʼa wanaawale naaʼin na wane nikirajüinkana Jesuu nümaa Pedro (Mat. 16:23; Mar. 8:32, 33). Wainma tü kasa shikirajakalü anain waya tü nümakat Jesuu. Eesü shiale waainjeein tü wachekakat wamüiwaʼa suulia tü nüchekakat Maleiwa. Nnojorüle eejüin waaʼin sünain tü wamakat, eeshii süpüla wanaawain waya nümaa Satanaa jaʼitairü shiain keeʼireein waaʼin saainjünüin tü nüchekakat Maleiwa. Anashii wekirajaale sooʼomüin nüchiki Pedro jee süchiki tü naainjakat wanaa sümaa nüchiaain nia Jesuu.

17. ¿Kasa nüküjeeka achiki Jesuu nümüin Pedro?

¹⁷ Nütüja aaʼu Pedro nnojoluin nüküjeein Jesuu nümüin niain wanee nünüikimaajachi Satanaa. Nnojoishi niyoutuin Pedro süpüla niainjachin wanee aluwataaushi, nütüjaa aaʼu kasain suluʼuin naaʼin jee tü nüinkakat. Nüchiaain nia Jesuu shiiʼiree jülüjain naaʼin tü kasa jülüjakat naaʼin Maleiwa. Tü nüküjeekat Jesuu shia nnojolin naʼalijirüinjachin nia Pedro suulia aaʼinraa tü nüchekakat Maleiwa. Shia jülüjainjatka naaʼin oushikajawaa süchiirua nukuwaʼipa Jesuu jee akaaliinjaa nia.

18. ¿Jamüsü watüjaaka saaʼu waneepiain Pedro nümaa Jesuu? ¿Jamüsü süpüla washatüin nukuwaʼipa?

¹⁸ Nnojoishi aashichijaain nia jee nnojotsü alin nümüin nünüiki Jesuu. Nnojotsü yaletüin naaʼin Pedro, naapaa amaalü nünüiki Jesuu. Anasü maʼin ashataa nukuwaʼipa Pedro, wanee wayuu waneepiakai nümaa Jesuu. Eeshii wachiaaneenale soʼu wanee kaʼi. Nnojotsü pülayaainjatüin waaʼin wachiaanüle, waapaainjatü amaa tü münakat wamüin. Süka jamüin, sükaaliinjeenain waya süpüla warütkaain nünainmüin Jesuu otta Jeʼwaa, chi Nüshikai (paashajeʼera Proverbios 4:13).

19. ¿Jamüsü nünüiki Jesuu? ¿Kasa eeka süpüla jülüjain naaʼin Pedro?

¹⁹ Maʼaka jeʼra kaʼi süchikijee tia, müshi Jesuu nüchikuaʼa namüin: «Shiimüin tü tamakat jümüin: Anaʼaya juʼutku jia yaakana maaʼulu yaa nnojoleenakana ouktüin süpülapünaa neʼrüin tayakai chi  Shipayakai Wayuu sünain oʼttaa sünain aluwatawaa» (Mat. 16:28). ¿Jaraliijeenache eʼraka chi shipayakai wayuu? Nütüjawee aaʼu Pedro tia. Shiasaʼa sutuma nüchiaanüin, eeshijaʼa nümüle: «¿Eejeeiche taya naʼaka naya wayuukana?».

20, 21. (1) Püküja tü kasa niʼrakat Pedro. (2) ¿Kasa niyaawataka aaʼu Pedro sutuma tü pütchi naapajakat?

²⁰ Waneemüin semaana süchikijee tia, oʼunushi Jesuu saaʼumüin wanee uuchi, eesüjaʼa süpüla shiain tü uuchikat Hermón, nnojotsü kaʼyatüin shia. Nümaashi Jacobo (Santiago), Juan otta Pedro. Saʼwaijatü eera tia, müshiijeseʼe natunkeein maʼin soʼu tia. Sümaʼinruʼu nuʼuraajüin Jesuu, alatüsü wanee kasa awataleeka atuma lapü noulia naya apünüinshiikana wayuu (Mat. 17:1; Luc. 9:28, 29, 32).

²¹ Eeʼiranajaasü nuʼupünaa Jesuu otta jorottüsü maʼin nüsheʼin maa aka shiyaa juya. Neʼraka neweenuwaain wanee piamashii wayuu nünainmüin Jesuu, nia Moisés ooʼulaka Elías. Yootushii naya nümaa Jesuu süchiki outajachin nia chaʼayaa Jerusalén jee süchiki  nüsoʼiraainjachin aaʼin. Naapapa Pedro tü namakat, niyaawata aaʼu nnojoluin pansaain tü nümakat wanaa sümaa nüküjain nnojolinjachin müliain jee outuin Jesuu (Luc. 9:30, 31).

22, 23. (1) ¿Jamüsü watüjaaka saaʼu kamaneein jee jüüjüüin Pedro? (2) ¿Kasa maa niʼraka Pedro, Santiago otta Juan soʼuleʼeya tia aikat?

²² Müshi nusouteekai aaʼin Pedro sünain tia aashajawaakat. Eesüjaʼa keeʼireere naaʼin kamaʼain Jesuu sünain yootoo nümaa Moisés otta Elías. Jee wanaa sümaa niʼrüin Pedro noʼuneein nümaʼanajee Jesuu, müshi nia: «Ekirajüikalee, anasü maʼi süka weʼrüitpain tü kasa alatakat woʼupala. Anasü müleka wakumajüle apünüinsü luma: wane püpüla, wane nüpüla Moisés, je wane nüpüla Elías». Nnojotsü choʼujaain kalumasein naya wayuukana, kakaliainna outuin naya. Yootushi neʼe Pedro süpaʼa mma. Akaisaʼa niain wanee wayuu kamaneeshi jee jüüjüüshi (Luc. 9:33).

²³ Soʼuleʼeya aikat tia, niʼrüin Pedro, Santiago otta Juan sukumajaain wanee siruma naaʼu, susoutakalaka wanee pütchi suluʼujee tü sirumakat, müsü mayaa: «Anii chi Tachonkai, chi Taneekajalakai. Jüüjüü mata jia sümüin nünüiki». Nia Jeʼwaa kanüikika tia. Sajaʼttapa tü neʼrakat, naya neʼe eejanakana namüiwaʼa nümaa Jesuu chaa saaʼu tü uuchikat (Luc. 9:34-36).

24. (1) ¿Jamüsü nukuwaʼipa Pedro sutuma niʼrüin shiiʼiranajaain nuʼupünaa Jesuu? (2) ¿Jamüsü wakuwaʼipa sutuma watüjaain saaʼu tü alatakat?

²⁴ Kojutushaatasü nümüin Pedro tü niʼrakat soʼu aikat tia, akaʼaya neʼe wayakana, kojutusü wamüin watüjaain saaʼu tü alatakat soʼu tia. Kojuya juya süchikijee tia nüküjain Pedro eejachin nia naʼaka na wayuu eʼrakana paala Jesuu sünain «anashaatain maʼi niyolojo soʼu tü kaʼi shiiʼiranajaakat oʼu nuʼupünaa ooʼulaka nüsheʼin». Eeʼiyatünüsü nümüin Pedro jameerüin nukuwaʼipa Jesuu Nuluwataapa chaa iipünaa. Soʼu aikat tia, niʼrüin Pedro shikeraajüin tü pütchi ashajünakat paala suluʼu nünüiki Maleiwa jee süchecherüin naaʼin Pedro süpüla eejiraain nia sümaa tü kasa alateetkat nümüin (paashajeʼera 2 Pedro 1:16-19). Washatüle nukuwaʼipa Pedro, naapeerü wamüin Jeʼwaa wainma kasa. ¿Jamüsü süpüla washatüin nukuwaʼipa Pedro? Waneepiainjana waya nümaa Jesuu, ekirajaainjana waya nüchiki, nnojoliinjana waya aashichijaain nüchiaale waya otta woonooinjatü amaa weinshi tü nikirajakalü anain waya.