Nüküjaka Ramón nümüin Juan sümaa María eein waneeirua nukuwaʼipa Jeʼwaa jaʼyakat sünain tü kasa nukumajakat. Naashajeʼeraka namüin wetsiikulokot tüü:

• «¡Jeʼwaakalee, watta maʼin saalii tü kasa pukumajakat! Otta shiiʼiyatüin kekiin maʼin pia. Pukumajala süpüshuaʼa tü kasa eekat saaʼu tü mmakat» (Salmo 104:24).

Nümaka Ramón: «Kekiishi maʼin Jeʼwaa. Weʼrüin tia nukuwaʼipakat sünain tü seʼechenkat mma. Saashin tü Wiwüliakat atüjasü maʼin tü jeyuukat, aletüjülia sukumajia nutuma Jeʼwaa».

Nüküjaka Ramón nümüin Juan sünain tütüin maʼin tü jeyuukot, suchonoojüin süpana tü mojuuikat süpüla shiʼikajaain shia suluʼumüin tü shipiakat. Sütüja apüleeruat tia tü jeyuukot süka aletüjülüinya sukumajia saashin tü Wiwüliakat. ¿Jara kakumalaka tü jeyuukot? ¿Jara atüjaka atuma shia? Nia Jeʼwaa saashin tü Wiwüliakat, chi Maleiwa kakumalakai tü kasa chakat iipünaa otta tü mmakat (Proverbios 30:24, 25).

Nümaka Juan: «Shiimain tü pümakat. Eeshi chi kakumalakai tü jeyuukat makalaka sütüjain maʼin».

«Süka kekiin maʼin Jeʼwaa, katüsü woʼu yaa saaʼu mmaka», nümaka Ramón nümüin Juan sümaa María. Ponoka maʼin naaʼin Juan tü nümakat Ramón.

 Nüküjaka Ramón ponuin maʼin naaʼin sukumajia tü Mmakat. Anasü maʼin süpüla kepiainjatüin wayuu suluʼu. Pooitüsü tü Mmakat sümaa leeyatüin shia jiattaʼa süpüla süntajatüin nuwarala chi Kaʼikai sainküin mmaka. Leeyatüsü jiattaʼa tü mmakat süpüla nnojoliinjanain wojuttüin. Miyoʼu tü wüinkat süpüla nnojoliinjanain ouktüin waya sutuma miyaasü. Anasü maʼin tü mmakat süpüla apünajaa, süʼittapa tü juyakat yotusü tü mmakat.

Nümaka Ramón: «Nnojotsü eejaʼalaa müin tia kasakalüirua sümüiwaʼa. Nia Jeʼwaa eʼitaaka shikii tü kasakalüirua süpüla eeinjatüin kataa oʼuu. Kekiishi maʼin nia».

Nunouja anainrü Juan sümaa María tü nüküjakat Ramón.

Nüküjaka joo Ramón wanee nukuwaʼipa Jeʼwaa poneetka maʼin naaʼin Juan sümaa María: shia pülain maʼin Maleiwa. Nütüjawee aaʼu Juan jamüin sünüiki tü Wiwüliakat süchiki tia nukuwaʼipakat Jeʼwaa. Naashajeʼeraka Ramón wetsiikulokot tüü:

• «Piakai, Senyotkai Jeʼwaa, pukumajüin süpüshuaʼa tü kasa chakalü iipünaa otta tü mmakat süka pülain maʼin pia» (Jeremías 32:17).

«Süpüla watüjaain saaʼu pülain maʼin Jeʼwaa, jülüja paaʼin naaʼayula chi kaʼikai. Jaʼire chi kaʼikai, ishashii waya sutuma tü naaʼayulakat, ¿aashimüin? ¿Jetsüche maʼin naaʼayula chi kaʼikai chaʼayaa nüʼütpaʼa?», nümaka Ramón nümüin Juan.

 «Aiwaisü maʼin walatshi yaʼayaa süpülapünaa süntüin tü jepirachikat», nümaka Juan sümaa María.

Nümaka Ramón: «Taashajeʼerüinka nüchiki chi kaʼikai sünain jaʼin maʼin nia. Eesü süpüla ouktüin wanee wayuu sutuma tü naaʼayulakat. Müleka eereje süpüla paapaain niʼipachon chi kaʼikai maʼaka saaʼin sajaʼapüin shikii wanee utia, wattaluʼuinjachi pia suulia maʼaka 150 kiloometüro. Tü naaʼayulakat chi kaʼikai müsü aka saaʼin saaʼayula kojuyasü bomba susotoopa».

«Jaʼishantaashi chi kaʼikai, makalaka pülain maʼin chi kakumalakai nia. Weʼrüin nünain chi kaʼikai pülain maʼin Jeʼwaa chi kakumalakai chi kaʼikai», nümaka Ramón.

Shiimainsü nümüin Juan sümaa María tü aküjünakat namüin. Nnojotsü akumajaʼalaain neʼetü kasakalüirua süpaʼa mmaka. Nayaawata aaʼu nnojolin wattaluʼuin Jeʼwaa noulia. Anasü maʼin nukuwaʼipa Maleiwa, aisü nüpüla wayuu, loto akuwaʼipachi, kekiishi maʼin nia otta pülashi.