Watta saalii tü kasa mojusü alataka sainküin mmaka soʼu juyakat 2020 maʼaka saaʼin tü ayuuliikat COVID-19. ¿Kasa naaʼinraka na aküjaliikana pütchi nüchiki Jeʼwaa süpüla nakaalinjain na wayuu müliakana sutuma tia kasakalüirua?

 Soʼujee settienpüroʼu 2019 sünainmüin akoosütoʼu 2020, süneeküin Comité de Coordinadores sükataajünüin maʼaka 28 miyoone dólares, süpüla nakaalinjünüin na wayuu müliakana sutuma tü kasa mojusü alatakat. Akaalinjünüshii wayuu müliakana sutuma 200 kasa mojusü alataka sainküin mmaka, maʼaka naaʼin na müliakana sutuma tü ayuuliikat COVID-19, sutuma waneirua wawai, sutuma süsetüin tü wüinkat chaa África, alin shiiʼiree eküülü chaa Wenesueela otta na wayuu müliakana sutuma alin wüinyaasü chaa Zimbabue. Sükajee tü nneerü asülajünakat aapünüsü sümüin wayuu wüin, eküülü, eeinjanale natunküin, nasheʼin, eeshii na anannakana sutuma tottoolu, anoutunüsü nepia otta aapünüsü namüin waneirua kasa choʼujaaka namüin. Jülüjaa waaʼin tü naaʼinrakat na Aküjaliikana pütchi süpüla nakaalinjain na wayuu müliakana.

 COVID-19. Sainküin mmaka süpüshuaʼa müliashii maʼin na wawalayuukana sutuma tia ayuuliikat, shapaasü maʼin naaʼin otta kapüleeshaatasü namüin nousütüin tü choʼujaakat namüin. Süpüla nakaaliinjünüin na wawalayuukana alatüsü suulia 800 Comités de Socorro, akumajünaka sainküin mmaka süpüshuaʼa. Jülüjashaanasü naaʼin naya wawalayuukana, kasain choʼujaain maʼin namüin na wawalayuu müliakana otta naküjamaatüin shia namüin na wawalayuu suluʼukana Comité de Coordinadores süpüla sütüjaanamaatüin saaʼu tü aainjünajatkat süpüla nakaalinjünüin.

 Soʼunnaa juyaka tia akaalinjünüshii watta naalii wawalayuu sutuma Comités de Socorro otta aapünüsü namüin eküülü, wüin, epinasee otta waneirua kasa choʼujaakat namüin. Eejana waneirua laülaashii suluʼu tü outkajaaleekalüirua aʼyataakana sünain akaalinjaa na wawalayuukana süpüla saapünüinjatüin namüin tü nasülajakat na sülaülashiikana mma.

 Jaʼitakajaʼa na wayuu nnojoliikana aküjalii pütchi nüchiki Jeʼwaa, nayaawata aaʼu anashaatain maʼin tü naaʼinrakat na wawalayuukana. Anuu tü nümakat wanee wayuu Field Simwinga nünülia, nia wanee wanee laulashi naaʼu na pulusiiakana chaa Nakonde suluʼu tü mmakat Zambia: «Kojutushaatasü maʼin wamüin tü jaaʼinrakat süpüleerua wayuu, anashii müin jükaalinjain na wayuu eʼrakana namüliala».

 Aisü shiiʼiree tü eküütkat chaa Angola. Sutuma tü ayuuliikat COVID-19, aisü maʼin shiiʼiree tü eküütkat otta kojutushaatasü maʼin shia chaa Angola. Müsüjeseʼe kapüleein maʼin namüin na wawalayuukana nayaʼlajüin tü eküütkat.

 Achuntunusü sümüin tü Weteet chakat Brasil süpüla nakaalinjain na wawalayuu chejeʼewaliikana Angola. Süpüla anainjatüin sukuwaʼipa tü nneerü asülajünakat aluwataanüsü kojuyasü paquete eküülü otta jülüjasü aaʼinyüü jetsüin tü eküülü choʼujaakat süpüla shiyaʼlajünüin jee jamüinjatüin sukuwaʼipa süpüla suluwataanüin. 22 dólares sülia wanee paquete eküülü sümaʼaleʼeya tü süsapiakat, eesü suluʼu roo, pitshuushi, seita, eetaasü maʼaka saaʼin 20 kiilo shipesain. Eeirü aluwataanüin 33.544 paquete eküülü, süpüshuaʼale tia 654 miit kiilo eküülü. Süka tü eküülü süsülajaakat Weteet chaa Angola sümaa tü aluwataanakat namüin alatüsü suulia 50.000 na wayuu akaalinjünakana.

 ¿Jamüsüche naaʼin na wawalayuukana sutuma nakaaliinjünüin? Anuu tü nümakat wanee wawala Alexandre nünülia, kepiashi nia suluʼu wanee mma wattaka maʼin chaa Angola: «Tü kasa naaʼinraka na wawalayuukana shiiʼiyatüin tamüin nnojoluin taya tamüiwaʼain jee shiimüin alin maʼin taya nüpüla Jeʼwaa, jülüjashi maʼin taya saaʼin tü nupueulosekat Jeʼwaa». Maritza shia wanee wayuu epijaka süchon sümüiwaʼa, müsü shia: «Taapüin maʼin analuʼut nümüin Jeʼwaa süka naapüin tanüiki wanaa sümaa toʼuraajüin nümüin otta nükaalinjain taya sükajee tü nupueulosekat».

 Akaalinjünüshii na wawalayuukana wanaa sümaa alin wüinyaasü chaa Zimbabue. Soʼujee settienpüroʼu 2019 sünainmüinreʼeya akoosütoʼu soʼu tü juyakat 2020, aisü maʼin wüinyaasü chaa Zimbabue. Watta naalii na wayuu müliakana maʼin sutuma jamü, müshiijeseʼe wainmain na wawalayuu eeka amaʼana palitchon eküülü.

 Akumajünüsü jaʼraisü Comités de Socorro süpüla nakaaliinjünüin na wawalayuukana sünain tü kasa choʼujaakat namüin maʼaka saaʼin eküülü. Wainma na wawalayuukana akaalinjakana sünain anaajawaa tü eküütkat, nashakajirüin shia otta eejana na anapitkana neʼejena süpüla sülüʼüjünüinjatüin tü eküütkat. a Soʼujee settienpüroʼu 2019 sünainmüinreʼeya akoosütoʼu soʼu tü juyakat 2020, eetaasü maʼaka saaʼin 691.561 dólares akataajünakat süpüla nakaaliinjünüin 22.700 wayuu.

 Sajaʼlajaiwaʼaya tü eküülü eejatkat namaʼana waneinnua wawalayuu akaalinjünamaatüshii naya süka süntamaatüin tü eküütkat. Talatüshii maʼin na wawalayuukana sümaa naʼwaajüin Jeʼwaa otta eeshii wawalayuu eeʼirajakana jayeechi.

 Eeshii piamashii wawalayuu outakana aʼwayuuse oʼunaka sünain wanee akotchojirawaa saainjaka wanee organización eere nasülajüinjatüin eküülü, sünain tia akotchojirawaakat shia aashajaanaka maʼin achiki tü poliitikakat. Müshiijeseʼe nayoutuin na wawalayuukana tü kaalinwaa aapünüinjatka namüin süka naaʼinrüinjatüin wanee kasa sünainpünaakat poliitika. Wanaa sümaa nojuʼitüin na wawalayuukana sünainjee tia akotchojirawaakat «nnojoliinjanapejeʼe jia antüin jüchikuaʼa yaamüin sünain asaajaa eküülü», münüshii naya. Piama semaana süchikijee tia, antapaashii na wawalayuukana sünain nakaalinjain na piamashii wawalayuu outakana aʼwayuuse, nantirüin eküülü namüin süpülapünaa süntüin tü eküülü süsülajüinjatkat tü organizaciónkat.

 Ponusü saaʼin tü wayuukalüirua tü naaʼinrakat na wawalayuukana chaa Zimbabue otta natüjaweein saaʼu tü nanoujakalü anain na Aküjaliikana pütchi. Jülüjataa waaʼin tü alatakat sümüin Prisca, kepiasü shia suluʼu wanee pueulo joʼuuchon. Mayaainjeʼe müliain shia sutuma alin maʼin wüinyaasü, aküjawaisü pütchi mietkuloʼu jee piennoʼu jaʼitairü shiain sükalia süpüla aawajaa tü mmakat. «Outeerü pia sümaa püpüshi sutuma jamü», müshii na wayuukana sümüin. «Nnojoishii nüpütüin Jeʼwaa namüiwaʼa na wayuu aʼyataakana nümüin», mapajeʼe shia namüin. Mapa akaalinjünüsü shia sutuma tü nupueulosekat Jeʼwaa, ponoshaanasü naaʼin tia na wayuu kepiakana süʼütpünaa Prisca, namaka sümüin: «Nnojotsü nüpütüin pia Maleiwa pümüiwaʼa, atüjeeshii waya nüchiki». Müshijeseʼe eein akaratshi wayuu kepiakana süʼütpaʼa aapajakana tü pütchi nalatitka na aküjaliikana pütchi nüchiki Jeʼwaa suluʼu raawia.

 Süka sülüʼülüin tü kaʼi sajaʼlajaainjatkalü oʼu kasakat süpüshuaʼa, kooʼomüinjeerü maʼin tü kasa mojusükat (Mateo 24:3, 7). Kojutusü maʼin wamüin otta waapüin tü analuʼutkat namüin na wawalayuu asülajakana sainküin mmakat süpüshuaʼa suluʼupünaa donate.pr418.com. Süka tia nasülajaka eeshii süpüla wakaalinjain na wawalayuu müliakana.