Alatüsü suulia 200 mma eere nekirajüin wayuu sünain tü Wiwüliakat na Aküjaliikana pütchi nüchiki Jeʼwaa otta nakaalinjain na wayuukana sünain tü choʼujaakat namüin. 35 neʼe tü mma eere süsülajünüin tü nneerü kettaakat sümaa tü choʼujaakat namüin na wawalayuukana suluʼu tia mmakat. ¿Kasa aainjünaka süpüla nakaaliinjünüin na wawalayuu kepiakana suluʼu wanee mma eere alin shiʼree nneerü?

 Na Laülaashii Jülüjakana Aaʼin na Aküjaliikana pütchi sainküin Mma, jülüjasü naaʼin tü naʼyataainkat na wawalayuukana otta tü choʼujaakat namüin süpüla katchinjatüin maaʼin nanoula. Jamüsüjaʼa süsetaale nneerü sümüin wane Weteet, suluwataain shia sümüin waneirua Weteet choʼujaakalü amüin, tia shia tü naaʼinrapuʼukat na anoujashii namaiwajanakana akaaliijiraashii naya. Nakatalawalin tü nanneetsekat süpüla nakaalinjain na nawalayuukana choʼujaakana amüin. Sükajee naaʼinrüin tia, wanaawajiraashii naya napüshuaʼa (2 Corinto 8:14).

 ¿Jamüsü naaʼin na wawalayuu akaalinjünakana sükajee tü nneerü suluwataakat namüin waneirua Weteet? Chaa Tanzania, watta naalii na wayuu eekana amaa neʼe piamasü dólares süpüla wanee kaʼi, sükajee tü nneerü aluwataanakat namüin, anoutunüsü tü piichi noutkajaaleekat na wawalayuukana chaa Mafinga. Anuu tü namakat na wawalayuukana: «Sutuma sukumajünüin tü Piichi Outkajaaleekat kooʼomüinshii na wayuu outkajaakana wamaa. Waapüin analuʼutkat nümüin Jeʼwaa sükajee nükaalinjain waya sükajee tü nupueulosekat, kamaneeshii maʼin na wawalayuukana, anachonsü maʼin tü piichi waʼwaajaka aluʼu Jeʼwaa maaʼutpünaa».

 Sutuma tü ayuuliikat COVID-19 kapüleesü namüin waneinnua wawalayuu chejeʼewaliikana Sri Lanka, nantüinjatüin sünain tü neküinjatkat. Shiaʼaya alataka tia sümüin tü wawalakat Imara Fernando nümaa chi süchonchonkai Enosh. Akaalinjünapejeʼe naya sünain tü choʼujaakat namüin sutuma tü nasülajakat na wawalayuukana sainküin mma. Anuu tü nashajakat suluʼu wanee karaloʼutachon: «Waapüin analuʼutkat namüin na wawalayuukana süka aipüralin maʼin naya wayuu, nakaalinjain waya soʼunnaa sülatüin wamüin kasa mojusü. Talatashaatasü maʼin waaʼin süka suluʼuin waya tü nupueulosekat Jeʼwaa otta wachuntuin maʼin nümüin Jeʼwaa süpüla ayatüin nakaalinjain na wawalayuukana sümaʼinruʼu sülüʼülüin sükalia süpüla sajaʼttajatüin kasakat süpüshuaʼa».

 Jaʼitaina jalain kepiain na wawalayuukana asülajülii maʼin naya. Jamüshijaʼa Enosh, akatatshi suluʼu wanee kaajachon tü nüsülajüinjatkat namüin na wawalayuu choʼujaakat namüin shia. Akaʼaya tü wawalakat Guadalupe Álvarez asülajüt maʼin shia. Kepiasü shia suluʼu wanee mma chaa México eere alin maʼin shiiʼiree aʼyatawaa, maʼletsesalii na wayuukana chayaa. Akatsaʼa tü wawalakat süchajaain sukuwaʼipa süpüla süsülajüinjatüin, anuu tü sümakat: «Taapüin analuʼutkat nümüin Jeʼwaa süka aipüralin maʼin nia otta kamaneeshi maʼin, tatüjaa aaʼu akaalinjünüin na wawalayuu choʼujaakana namüin sükajee tü tasülajakat otta tü nasülajakat na waneinnua».

 Talatüshii maʼin na wawalayuukana suluʼu tü weteetkalüirua süka nakaalinjain na waneinnua. Anuu tü nümakat chi wawalakai Anthony Carvalho, naʼakashi nia na wawalayuu jülüjakana aaʼin tü aʼyatawaakat suluʼu tü Weteet chakat chaa Brasil: «Akaalinjünüshii maʼin waya yaa Brasil soʼu waaʼinmaa juya sutuma tü wane weteetkalüirua. Sutuma tia, akooʼomüinraasü maʼin tü aʼyatawaakat nümüin Jeʼwaa, maaʼulu yaa aʼwanajaaitpa tü wakuwaʼipakat, wayashii na akaalinjakana na waneinnua, talatüsü maʼin waaʼin süka waaʼinrüin tia. Nayaawata aaʼu na wawalayuukana süküjünüinjatüin tü pütchikat sainküin mmakat süpüshuaʼa, müshiijeseʼe nasülajüin süpüshi nanneetse süpüla tia aʼyatawaakat».

 ¿Kasa naaʼinrajatka na aküjaliikana pütchi nüchiki Jeʼwaa süpüla nakaalinjain na nawalayuu alatitkana müliaa? Nnojotsü naluwataainjatüin nneerü sümüin tü weteetkalüirua. Shia anaka aluʼu nejitüle tü nasülajüinjatkat suluʼu tü kojonchon eekat suluʼu tü piichi outkajaaleekat eere shijitünüin tü nneerü süpülajatkat süküjünüin pütchi sainküin mma jee naluwataale shia suluʼupünaa donate.pr418.com. Kojutusü maʼin sümüin tü nupueulosekat Jeʼwaa tü nneerü asülajünakat.