Nanajeerü na wawalayuukana sainküin mmaka süpüshuaʼa sükajee video tü outkajawaakat miyoʼu apünüinka kaʼi soʼujee juulioʼu sümaa akoosütoʼu, 2020; nnojotsü maajüin yaa. Süpüla müinjatüin shia, alatüsü suulia 500 tü anüikii akürawaajünakalü aluʼu nanüiki na wawalayuu ekirajakana. Akumajünatüjülüinjatü sukuwaʼipa wanee juya süpülapünaa, saainjünüinjatüle wanee kasa makat aka tüü süpüla kettaain shia. Shiasa saaʼujee tü ayuulii coronavirus münakat, pienchi neʼe kashi eejatka napüla na wawalayuu akürawaajüinjanakana tü outkajawaakat miyoʼu apünüinka kaʼi 2020: ¡Talata maʼin jaaʼin waneepia!, süpüla kettaain shia natuma.

 Akaalinjashii maʼin na wawalayuu aʼyataakana suluʼu Servicios de Traducción otta na aʼyataakana suluʼu Departamento Mundial de Compras sünain aʼyatawaakat tüü. Nayaawata aaʼulu na wawalayuu aʼyataakana suluʼu Servicios de Traducción eein tü choʼujaakat namüin na wawalayuu aʼyataayakana sünain akürawaajaa pütchi, maa aka saaʼin micrófono eekai anashaatain. Nayaʼlajüinjeseʼe na wawalayuu aʼyataakana suluʼu Departamento Mundial de Compras miit micrófono otta naluwataaka shia sümüin 200 piichi eere naʼyataain na wawalayuu akürawaajakana pütchi.

 Süpüla jayalüinjatüin saaʼin napüleerua, wainma tü micrófono ayaʼlajünakat sümaa waneesiain tü mma aluwataanakalü aluʼumüin süpüshuaʼa jee yalejee eitajünüsü namüin na aʼyataakana sünain akürawaajaa tü pütchikat sainküin mmaka. Eetaasü maʼaka saaʼin 170 dólares sujuʼittaka aaʼu wanee micrófono sümaayaleʼeya tü süsapiakat. Ojuʼittsü jayalüin napüleerua na wawalayuukana tü micrófonokot sükajee tia.

 Shiyaʼlajüin tia Departamento Mundial de Compras jee suluwataʼaleein shia soʼu kashika aaʼuriiroʼu otta maayoʼu 2020 nnojotkalü oʼu jutatüin maʼin tü oiküleekat korolo saaʼujee eein tü ayuulii coronavirus münakat. Ayatapejeʼe ayaʼlajünüin sajaʼttiamüin tü kashikat maayo tü aʼyataayainjakat sümüin wainma piichi eere sükürawaajünüin pütchi jee sümüin wainma Weteet.

 «Aʼyanaajiraashii na wawalayuu suluʼukana Weteet namaa na oikaaliikana sünain tü ayaʼlajaakat süpüla eeinjatüin namaʼana tü kasa choʼujaakat namüin. Wountuin wakaalinjamaatüin na wawalayuukana sümaa anain sukuwaʼipa watuma tü nneerü asülajuushikat süka nükaalinjain waya Maleiwa nükajee chi naaʼinkai» müsü nünüiki Jay Swinney, chi nekiipüʼüjanakai na aʼyataakana suluʼu Departamento Mundial de Compras.

 Anuu nünüiki Nicholas Ahladis, aʼyataakai suluʼu Servicios de Traducción: «Talatüsü maʼin naaʼin na wawalayuu aʼyataakana sünain akürawaajaa pütchi, jüntinnapa namüin tü naʼyataaya jeketkat ayaʼlajuushin. Mayaainjeʼe jimatüin naya nepialuʼu, aʼyataashaatashii sünain akürawaajaa pütchi, jayeechi otta waneeirua kasa. Alatüsü suulia 500 anüikii akürawaajünakalü aluʼu pütchi jee paaʼinwashii na wawalayuukana sünain tia».

 Tüü, süpüshi neʼe tü aʼyatawaa aainjünakat süpüla eeinjatüin napüla napüshuaʼa na wawalayuukana tü outkajawaakat miyoʼu apünüinka kaʼi 2020: ¡Talata maʼin jaaʼin waneepia! Wountuin wayaʼlajüin tü kasa choʼujaakat süka jüsülajüin süpüshi jünneetse süka jaaʼin jümüinwaʼa otta sükajee tü juluwataakat suluʼupünaa donate.pr418.com.