Napüshuaʼaleʼeya na wawalayuu aʼyataakana sünain ashajaa pütchi suluʼu wanee naata anüikii, nnojoishii aʼyataain naya suluʼu Weteet, wainma na aʼyataakana watta suulia Weteet suluʼu wanee piichi eere süshajünüin pütchi suluʼu wanee naata anüikii. ¿Kasa anasü eeka sünainjee müin sukuwaʼipa mayaa? ¿Kasa choʼujaaka süpüla anainjatüin sukuwaʼipa naʼyataain na wawalayuukana? ¿Kasa anasü eeka sünainjee nakolojooin na wawalayuukana eere kepiain na wayuu aashajaakana tü anüikii naashajaakat?

 Anuu tü sümakat wanee wawala kanüliaka Karin, ashajüt shia pütchi suluʼu tü anüikiikat bajo alemán: «Soʼujeʼereʼeya wakolojooin yaamüin Cuauhtémoc, Chihuahua, México, aashajaashii waya weinshi bajo alemán namaa na wawalayuu aʼyataakana wamaa, müsia wanaa sümaa waküjain pütchi jee wojuʼitüle sünain ayaʼlaajaa wanee kasa. Naʼakashii waya na wayuu aashajaakana tia anüikiikat. Jülüjasü maʼin waaʼin tü namakat otta tü pütchi nachuntakat, atüjashaanashii maʼin waya süpüleerua tü wanüikipalakat nanainjee. Sükajee waapajawalin maʼin nanüiki naya wayuukana, jülüjasü maʼin waaʼin sukuwaʼipainjatka saashajaaya bajo alemán».

 Chi wawalakai James, aʼyataakai sünain ashajaa pütchi suluʼu frafra chaa Ghana, nüküjain eein nusukajaale na wawalayuu niʼyataajiraapuʼukana amaa suluʼu Weteet. Anuupejeʼe tü nümakat: «Talatashaatasü taaʼin sünain aʼyatawaa yaʼaya süka taküjain pütchi namüin na wayuukana suluʼu tü anüikii naashajaakat otta süka teʼrüin süntüin tü pütchikat suluʼumüin naaʼin».

 ¿Kasa jülüjakana naaʼin na wawalayuukana süpüla naneeküin jalainjatüin wanee piichi süpülajatka ashajaa pütchi suluʼu wanee naata anüikii? Naashin chi wawalakai Joseph, aʼyataaikai suluʼu Departamento Mundial de Diseño y Construcción chakat chaa Warwick, Nueva York, eesü kapüleere maʼin shia süka eein pueulo nnojotkalü aluʼu luusa, wüin otta Internet. Müsüjeseʼe jülüjain maʼin aaʼinyüü jalainjanain naʼyataain na wawalayuukana sünain ashajaa pütchi suluʼu wanee naata anüikii.

 Süpüla kasetirain tü nneetkat otta süpüla naʼyataamaatüin na wawalayuukana, shia anaka aluʼu naʼyataale suluʼu wanee Piichi eere saainjünüin Outkajawaa Miyoʼu, suluʼu wanee Piichi Outkajaalee jee shiale suluʼu nepia na misioneerokana eere nantawalinjanain na wawalayuukana sünain aʼyatawaa. Müleka nnojorüle eein wanee piichi süpülajatka tia, eesü süpüla shiyaʼlajünüin miichi jee oficina süpüla kepiainjanain jee naʼyataainjanain na wawalayuukana suluʼu. Kasale wayuu aʼwanajaain mapüleejeerü namüin na wawalayuukana noiküin tia miichikat otta sükataajünüin tü nneetkat süpüla waneirua kasa choʼujaajeetkat apüla shia.

 Soʼujee settienpüroʼu 2019 sünainmüin akoosütoʼu 2020, akataajünüsü 13 miyoone dólares süpüla anainjatüin sukuwaʼipa tü aʼyatawaakat suluʼu tü piichikalüirua eere süshajünüin pütchi suluʼu wanee naata anüikii. Choʼujaasü namüin na wawalayuukana computador, programa anaka maʼin, tü choʼujaaka süpüla akürawaajaa pütchi, choʼujaasü namüin Internet otta waneirua kasa. Süpüla kettaain wanee computador süpüla niʼyataain wanee wawala, oʼunusü sünain maʼaka 750 dólares. Eeinjatü sünain wanee computador waneinnua programa otta tü kanüliakat Watchtower Translation System, tia shia wanee programa akaalinjaka na wawalayuu ashajakana pütchi suluʼu wanee naata anüikii süpüla mapüleeinjatüin namüin tü aʼyatawaakat.

 Aapünüsü namüin na wawalayuukana micrófono otta waneirua kasa choʼujaaka süpüla nakürawaajüin pütchi. Jalouisü tü aapünakat namüin soʼunnaa tü ayuuliikat COVID-19 süka nalüʼüjain tia nepialuʼumüin otta naʼyataain sünain akürawaajaa, ashajaa pütchi otta akumajaa video nepialuʼujee.

 Eeshii wawalayuu pejekana epia akaalinjakana sünain jülüjain naaʼin tü pütchikat otta naküjain mapüleere ayaawataa shia jee eeshii na akumajakana jee anouteʼeraa wanee kasa amojujaakat suluʼu tü piichi eere süshajünüin pütchi suluʼu wanee naata anüikii. «Watta naalii wawalayuu pürekutsootkana jee nnojoliikana pürekutsoolin, eekana süpüla naʼyataain nümüin Jeʼwaa yaʼaya sünain tü natüjaakalü apüleerua», müsü nünüiki Cirstin, wanee wawala aʼyataakai suluʼu wanee piichi eere süshajünüin pütchi suluʼu wanee naata anüikii chayaa Ciudad del Cabo, Sudáfrica.

 Kamalainsü maʼin namüin na wawalayuukana aʼyatawaa suluʼu tü piichi eere süshajünüin pütchi suluʼu wanee naata anüiki. Saashin wanee wawala akaalinjaka na wawalayuukana, müsü süsanatkai aaʼin wanaa sümaa shiʼyataain suluʼu tü piichikat. Eeshii wawalayuu akaalinjakana sünain akürawaajaa pütchi. Anuu tü sümakat Juana, wanee wawala ashajüt pütchi suluʼu tü anüikiikat totonaca, suluʼu tü pueulokot Veracruz chaa México: «Süka waʼyataain eere saashajaanüin maʼin tü anüikii washajakalü aluʼu, wainma na wawalayuu mapüleekana amüin nakaalinjain waya sünain akürawaajaa pütchi otta video».

 ¿Kasa anasü eeka sutuma nakolojooin na wawalayuukana eere saashajaanüin maʼin tü anüikii nashajakat? Anuu tü nümakat Cédric, aʼyataashi nia sünain ashajaa pütchi suluʼu tü anüikiikat congo chaʼayaa República Democrática del Congo: «‹Tüü shia sukuwaʼipa tü wanüikipalakat suluʼu Congo sutuma Watch Tower›, eejana wawalayuu mapuʼukana anüiki sutuma naatayaa müin tü pütchikat nacheʼeruʼu na wayuukana. Aluʼujasaʼa jooluʼu, nayaawatüin maʼin tü pütchikat, ‹shiaʼaya sünüikipalakat maʼin wayuu tia maaʼutpünaaya›, müshii naya».

 Müsia neʼe tü naapakat achiki Andile chaa Sudáfrica, aʼyataashi chia wawalakai sünain ashajaa pütchi suluʼu xhosa: «‹Anaʼleeitpa maʼin sukuwaʼipa tü pütchi jüshajakat›, eeshii na wayuu makana, jamüshiijaʼa na tepichikana, naashajeʼerapuʼuin tü rewiisütakat Aapiria Wayuu suluʼu inkülee, akanasaʼa maaʼutpünaa shiaitpa naashajeʼerakat tü ashajünakat suluʼu tü anüikiikat xhosa. Kamalainreesia maʼin sümüin wayuu tü pütchi ashajünakat suluʼu tü Biblia jeketkat Traducción del Nuevo Mundo».

 Sünainjee tü nneerü asülajünakat süpüla süküjünüin pütchi sainküin mmakat süpüshuaʼa, akumajünüsü otta anouteʼennüsü tü piichikalüirua eere süshajünüin pütchi suluʼu wanee naata anüikii otta aapünüsü tü choʼujaakat namüin na wawalayuu aʼyataakana sünain. Eesü süsülajünüle tia suluʼupünaa donate jw.org.