Soʼujee settienpüroʼu 2020 sünainmüin akoosütoʼu 2021, müliasü maʼin saaʼin wayuu sainküin mmakat süpüshuaʼa sutuma tü ayuuliikat COVID-19. Maʼaka süküjünüin sünain tü pütchi «Tü aainjünakat sainküin mmakat soʼunnaa tü ayuulii eekat maaʼulu», watta saalii miyoone dólar akataajünaka süpüla akaalinjünaa na wawalayuukana otta eesü 950 Comités de Socorro süpüla akaalinjaa na wawalayuukana.

 Sümaʼinruʼu eein tü ayuuliikat sainküin mmaka, eesü waneirua kasa mojusü, akutkujaasü tü mmakat otta asetüsü tü palaakat. Eetaasü maʼaka 200 kasa makat aka kasain tia alatakat sainküin mmakat, choʼujaasüjeseʼe nakaalinjünüin na wawalayuukana soʼunnaa tia. Mayaainjeʼe sükataajünüin wainma nneerü süpüla akaalinjünaa na wawalayuukana soʼunnaa tü ayuuliikat, naneeküin na wawalayuu aʼyataakana suluʼu Comité de Coordinadores sükataajünüin 8 miyoone dólar süpüla akaalinjaa na wawalayuu eʼrakana müliaa sutuma sukutkujaain mma jee süsetüin tü palaakat.

 Maayoʼu 22 soʼu 2021 osotoosü tü uuchi kanüliakat Nyiragongo suluʼu tü mmakat República Democrática del Congo. Amülouisü sutuma kojuya miichi, koleejia otta jososü wanee laa sutuma. Suluʼu tü mmakat Goma, kaitüsü shia soʼu wainma kaʼi, ayuuisü wayuu sutuma tü sükalirakat otta akutkujaasü tü mmakat. Akolojeʼennüshii watta saalii wayuu yalajanakana kepiain pejepünaa sünain. Watta naalii na oʼunakana suluʼujee tia mmakat, eeshii na antakana chamüin Ruanda.

 Eejana 5.000 Aküjalii Pütchi, eeshii eekai amülouireein nepia sutuma susotooin tü uuchikat otta na aʼluwajünakana tü kasa eejatkat namaʼana napütapa nepia. Süpüla nakaalinjain na wawalayuukana, aʼyataajiraashii na wawalayuu aʼyataakana suluʼu Comité de Socorro chaa Ruanda namaa na chajanakana República Democrática del Congo. Anuu tü namakat na wawalayuu aʼyataakana suluʼu tü Weteet chakat Congo süchiki naʼyataain na wawalayuu suluʼukana Comité de Socorro: «Mayaainjeʼe keemain maʼin mmapaʼakat soʼu tia, süpülapünaa nakolojeʼennüin na wayuukana, na wawalayuu aʼyataakana suluʼu Comité de socorro naapüin eküülü, wüin otta nasheʼin namüin na wawalayuu müliakana». Alatüshii suulia 2.000 wawalayuu antakana suluʼumüin wanee pueulo, akaalinjünüshii naya chayaa sutuma Comité de Socorro, kepiayaashii naya atumawaa, aapünüsü namüin neʼicheerajana otta aküjünüsü namüin tü naaʼinrajatkat süpüla keisalainjanain naya suulia tü ayuuliikat COVID-19 otta cólera.

 Soʼu apünüin kashi na wawalayuu aʼyataakana suluʼu Comité de socorro, naapüin namüin na wawalayuukana 6.000 kilo roo, 6.000 kilo ariina, alatüsü suulia 8.000 liitüro seita aapünakat namüin otta 8.000 liitüro wüin. Suulia sükataajünüin wainma nneerü sünain tia, ayaʼlajünüsü tia kasakalüirua suluʼuya neʼe tia mmakat, nnojotsü ayaʼlajünüin shia suluʼujee wanee mma wattajee.

 Anuu tü sümakat wanee wawala: «Müliashii maʼin waya wanaa sümaa tia». Amülouisü tü shipia jeketkat wanaa sümaa susotooin tü uuchikat, akaalinjünapejeʼe tü wawalakat namaa na süpüshikana, aapünüsü tü choʼujaakat namüin otta atütüleʼennüsü naaʼin. Anuu sooʼomüin sünüiki tü wawalakat: «Anataʼaleeshijaʼa maʼin Jehová nükaalinjaka waya soʼunnaa tü müliaa weʼrakat, müsü jamaamakai waaʼin nutuma mayaainjeʼe weʼrüin maʼin wamüliala».

 Kakaliairü alin maʼin shiiʼiree nneerü chaa Wenesueela, kojutusü maʼin tü eküütkat otta kooʼomüinsü maʼin tü mojulawaakat. Kapüleeshaatasü namüin na wawalayuukana nousütüin tü neküinjatkalü aaʼu, akaalinjünapejeʼe maʼin naya nutuma Jehová otta sutuma tü nupueulosekat.

 Soʼujee settienpüroʼu 2020 sünainmüin akoosütoʼu 2021, akataajünüsü wanee miyon dólar süpüla shiyaʼlajünüin eküülü otta jabón napüla na wawalayuu maʼletsekana. Anuu tü namakat na wawalayuu aʼyataakana suluʼu tü Weteet chakat Wenesueela: «Kapüleeshaatasü wamüin weʼikajaain kashiwai 130 miit kilo eküülü sainküinpünaa Wenesueela namüin na wawalayuu maʼletsekana». Suulia amüloulin tü eküütkat shia aapünawaikat namüin na wawalayuukana tü eküülü nnojotkat amojujamaatüin. «Ayaʼlajawaishii waya wainma eküülü, wayaʼlajüin jooutpa maʼin shia jee jaʼyaka oʼu shia otta wachajaain sukuwaʼipa süpüla weʼikajaain shia namüin na wawalayuukana».

 Anuu tü nümakat chi wawalakai Leonel aʼyataashi nia suluʼu wanee Comité de Socorro chaa Wenesueela: «Anasü maʼin taaʼin sünain aʼyatawaa suluʼu Comité de Socorro, sutuma taʼyataain maʼin sünain akaalinjaa wainma wawalayuu maʼletsesalii, anasü taaʼin sutuma mayaainjeʼe mojuin taaʼin süchikijee sünaajaain tü taʼwayuusekat sutuma tü ayuuliikat COVID-19. Teʼrüin nikeraajüin Jehová tü nünüikikat suluʼu naaʼinmajüinjatüin tü nupueulosekat».

 Anuu tü nümakat wanee wawala aʼyataapuʼukai suluʼu wanee Comité de Socorro: «Tayaichipa choʼujaaka amüin akaalinjünaa jooluʼu, nnojotsü naapüin neʼe na wawalayuukana tü choʼujaakat tamüin otta sümüin tü taʼwayuusekat nakaalinjain waya süpüla jimatüinjatüin waaʼin soʼunnaa tü müliaa weʼrakat otta natütüleʼerüin waaʼin».

 Eejaʼalaa müsü neʼe tü kasa mojusükat. Mayaainjeʼe müin tia, eemaatüshi Jehová sünain akaalinjaa waya sükajee tü nupueulosekat. Suuntuin tü nupueulosekat Jehová saaʼinrüin tia sükajee tü nneerü jüsülajakat, jüchajaale suluʼu donate.pr418.com jiʼreerü tü jaaʼinrüinjatkat süpüla jüsülajüin nneerü. ¡Anashiʼiya müin jia jüsülajüliin maʼin!