Watta maʼin saalii tü pütchi eekat suluʼu Internet maaʼulu yaa natuma na aküjaliikana pütchi nüchiki Jeʼwaa. Wattapejeʼe naalii na wawalayuukana sainküin mmakat nnojoliika amaʼana Internet süka kojutuin maʼin shia eere kepiain naya, eesü matsüinre Internet noulia, eesü suʼunawaire jee eesü nnojorüle shia.

 Ayatapajaʼa wainmain na wawalayuu adescargaajakana pütchi sümaa nnojoluin Internet namaʼana. ¿Pütüjawee aaʼu jamüin sukuwaʼipa natuma?

 Eeitpa jooluʼu napüla na wawalayuu nnojoliikana amaʼana Internet wanee kaajachon JW Box sünülia. Tia kaajachonkot, shia wanee rúter shiyaʼlajaka nupueulose Jeʼwaa, nayapejeʼe na wawalayuu aʼyataakana suluʼu Departamento de Computación kakumajalaka tü software eekat suluʼu. Neʼitaain naya wawalayuukana suluʼu tia kaajachonkot tü videokalüirua otta tü pütchiirua eekat suluʼu jw.org. Eesü maʼaka 75 dólares naaʼu waneeshia.

 Suluʼu tü Piichi Outkajaaleekat, eeshii süpüla nakonektaajüin nateleeponose na wawalayuukana sünain JW Box süpüla nashakatirüin pütchiirua otta video. Jaʼitairü nnojoluin anain maʼin tü nateleeponosekat eesü süpüla nakonektaajüin shia sünain. ¿Jama nnojorüle eein Internet suluʼu tü Piichi Outkajaaleekat? ¿Jamüsü süpüla eeinjatüin suluʼu tü kaajachonkot tü kasa jeketü eʼitaanakat suluʼu jw.org? Aluwataanawaisü sutuma Weteet wanee memoria USB sümaa tü kasa jeketü eʼitaanakat suluʼu jw.org süpüla shiʼitaanüin suluʼu JW Box. 4 dólares sülia waneesia memoria USB.

 Jalouisü maʼin namüin na wawalayuukana tü kaajachonkot JW Box. Anuujeseʼe nünüiki chi wawalakai Nathan Adruandra, kepiakai chaa República Democrática del Congo: «Tachajaain maʼin sukuwaʼipa süpüla tadescargaajüin tü video kanüliakat ‹Teʼitaain taaʼin pünain, Jeʼwaa› otta Soto jaaʼin süchiki tü nuʼwayuusekat Lot, akatsaʼa isainya neʼe tachiki tadescargaajüin shia. Shiasaʼa maaʼulu yaa, mapüleeitpa adescargajaa tamüin tü videokalüirua suluʼujee JW Box. Jalouisü maʼin tamüin tü videokalüirua süpüla tekirajüin na tachonniikana süka».

 Anuu nünüiki wanee wawala akaalinjakai na wawalayuukana chaa Nigeria süpüla neʼitaain JW Box suluʼu tü outkajaalekalüirua: «Kojutusü maʼin namüin na wawalayuukana JW Box, müsü saaʼin nüsülajala tia Jeʼwaa namüin. Talatashaatasü naaʼin süka mapüleein namüin nadescargaajüin tü videokalüirua otta tü pütchiirua nekirajüinjatkalü aka wayuu».

 Aluwataanüsü maʼaka 1.700 JW Box chaa África, Oceanía otta Sudamérica otta aluwataaneerü sooʼomüin mapa. ¿Jalejeekuwat tü nneerü nayalajakalü aka na wawalayuukana tü kaajachonkot JW Box? Sünainjeejatü tü nneerü nasülajakat na wayuukana süka naaʼin namüiwaʼa süpüla tü aküjaakat pütchi. Wainma na asülajakana nanneetse suluʼupünaa donate.pr418.com. Anashiʼiya müin jükaalinjain waya sükajee tia.