¡EEJA MAʼIN PAAʼIN!
Aneerü waaʼin soʼu juyakat 2023 sutuma tü kasa anasü eeinjateetkat mapeena | ¿Jamüsüche sünüiki tü Bibliakat süchiki tia?
Shia keeʼireeka maʼin waaʼin soʼu juyakat 2023 anainjatüin wakuwaʼipa jee anainjatüin nakuwaʼipa na wapüshikana. ¿Jamüsüche waʼatapajaka kasa anasü?
Süküjain tü Bibliakat eejeerüin kasa anasü mapeena
Süküjain tü Bibliakat nnojoleerüin eein waneepia tü müliaa weʼrakat maaʼulu, ajaʼtteerü shia mapeena. Ashajünüsü tü Bibliakat «süpüla wekirajünüinjanain sünain. Shia waʼatapajaka weʼrüinjanain kasa anasü sünainjee wachecherüin waaʼin otta sünainjee sümülialaain waaʼin sutuma tü sümakat» (Roma 15:4, TNM).
Süpüla pütüjain sooʼomüin süchiki tü sümakat tü Bibliakat paashajeʼera tü pütchikat «La esperanza real de un mañana mejor».
Waneirua kasa anasü eeinjatka mapeena amülialeetka paaʼin maaʼulu
Tü pütchi aküjünakat suluʼu tü Bibliakat müsü aka saaʼin «tü kachueera ajapuluʼujiakat anua» (Hebreokana 6:19). Jülüjale waaʼin tü kasa anasü eejeetkat mapeena nnojoleerü shapaakuʼu müin waaʼin. Katchinjeerü waaʼin sutuma tü sümakat tü Bibliakat jaʼitairü kasain alatüin wamüin, talatüsü waaʼin maaʼulu otta talateerü waaʼin waneepia. Anuu waneirua kasa amülialeetka paaʼin:
Jülüjaa paaʼin tü naaʼinrakat wanee wayuu sutuma nütüjaain saaʼu tü sümakat tü Bibliakat süchiki tü eeinjatkat mapeena. Pünaja tü videokot Talerajüin tü takuwaʼipapuʼukat.
Eesü süpüla sümülialaain waaʼin tü sümakat tü Bibliakat nünaajaapa wanee wayuu aikai maʼin wapüla. Pünaja tü videokot Mojusü maʼin waaʼin nünaajaale wanee wayuu aikai wapüla.
Püchechera paaʼin sünain tü kasa eeinjatkat mapeena
Wainma na wayuu keeʼireekana aaʼin sunoutaain tü kasa alatakat, nnojotpejeʼe natüjaain saaʼu müleka shiimainre sunoutaajeerüin shia. Naatapejeʼe tü pütchi aküjünakat suluʼu tü Bibliakat, ekeraajeerü shia. Watüjaa aaʼulu tia süka nüküjain shia chi Maleiwakai Jehová a, matüjainsai nia aküjaa alawaa (Tito 1:2). Niaʼala neʼe Jehová eeka süpüla nikeraajüin süpüshuaʼa tü nümakat, naaʼinrüin süpüshuaʼa tü keeʼireekat naaʼin (Salmo 135:5, 6).
Anasü pütüjaale saaʼu süchiki tü eeinjatkat mapeena saashin tü Bibliakat. Eesü süpüla piʼitaain paaʼin sünain tia pütchikat pikirajaʼawaire sünain (Alu 17:11, TNM). Süpüla pütüjaain saaʼu tia, pikirajaa wamaa sünain tü Bibliakat. Paainjale tia soʼu juyakat tüü, aneerü paaʼin süka pütüjaain saaʼu eejeerüin kasa anasü mapeena.
a Jehová shia tü nünüliakat Maleiwa (Salmo 83:18).