Yootushii jekenainka süchiki tia na sülaülashiikana mma, na científicokana otta na atüjakana süpüleerua computador. Naküjain anain maʼin tia, shapaapejeʼe naaʼin süka eein süpüla mojuin sukuwaʼipa atumawaa.

•   «Tü eekat süpüla saainjünüin maaʼulu suluʼu computador eesü süpüla sunoutuin sukuwaʼipa wayuu [...]. Eesü süpüla anain waaʼin sutuma, eepejeʼe süpüla mmoluwaain waaʼin sutuma süka eein süpüla sütüjaanüin aaʼu sutuma wayuu wanee kasa wachiki otta eesü süpüla nnojoluin wanoujain sünain tü namakat na sülaülashiikana mma sutuma tia» (Kamala Harris, nutujeejatü chi aluwataaikai saaʼu Estados Unidos, maayoʼu 4, 2023).

•   «Eesü süpüla sunoutuin tü naaʼinrakat na tottootkana süpüleerua wayuu, eepejeʼe süpüla ayuulin wayuu sutuma jee nnojoluin pansaain tü suluʼukat nekii» (Tottoonuʼu atüjakana maʼin süpüleerua anaʼlaa wayuu, nia laülaakai napüleerua chi tottootkai Frederik Federspiel. Ojuʼitüsü tia pütchi namakat suluʼu tü karaloʼutakat BMJ Global Health maayoʼu 9, 2023). a

•   «Eesü süpüla naküjain alawaa na wayuukana sükajee tia. Eesü süpüla süsütüin naʼyataain na wayuukana. Na atüjakana maʼin süpüleerua computador shapaasü naaʼin süka eein süpüla sumojujeʼerüin mapa nakuwaʼipa na wayuukana» (The New York Times, maayoʼu 1, 2023).

 Atüjaaneerü aaʼu mapa aneerülejeʼeya sukuwaʼipa wayuu sutuma. ¿Jamüsüche sünüiki tü Bibliakat süchiki tia?

 Süküjain tü Bibliakat nnojoleerüin nountuin na wayuukana nanoutuin sukuwaʼipa wayuu sükajee tü kasa nakumajakat.

1.  1. Eesüjaʼa nnojorüle naainjeein na wayuukana kasa mojusü, nnojotpejeʼe nayaawatüin saaʼu eein süpüla mojuin sukuwaʼipa wayu sutuma tü saainjakat.

   •   «Eesüjaʼa jülüjale naaʼin wanee wayuu lotuin tü kasa naaʼinrakat, eepejeʼe süpüla outuin nia suluʼujee tia» (Proverbios 14:12).

2.  2. Nnojotsü kasakain nutuma wanee wayuu anale jee mojule tü naaʼinrakat na waneinnua.

   •   «Tapütajatü shia nüpüla chi wayuu antajachikai tachikumüin. Eetaayaai tatüjaain saaʼu kekiire nia jee nnojorüle kasain nütüjaain aaʼu. Niechepejeʼe laülaakai saaʼu tü kasa taʼyataakalü maʼin achiirua» (Eclesiastés 2:18, 19).

 Wayaawata aaʼu sükajee tia choʼujaain maʼin woʼuninnüin akuwaʼipa nutuma chi Kakumajalakai waya.

 Nüküjain wamüin chi Kakumalakai waya nnojoleerü eein wanee kasa sukumajalaka wayuu jee nayalejeʼeya na wayuukana ajaʼttirüin tü mmakat jee sajaʼttirüin wayuu.

•   «Tü mmakat, ayateeria eein shia waneepia» (Eclesiastés 1:4).

•   «Nayeena kepiaka suluʼu tü mmakat süpüla kaʼikat süpüshuaʼa na lotokana akuwaʼipa» (Salmo 37:29).

 Sükajee tü Bibliakat nikirajüin waya chi Kakumajalakai waya süpüla anainjatüin wakuwaʼipa mapeena jee jimatüin waaʼin. Süpüla pütüjaain sooʼomüin süchiki tü sümakat tü Bibliakat, paashajeʼera tü pütchikat «¿Jaleerü puusütüin anain tü anainjatkalü atuma pukuwaʼipa watta kaʼi?» otta «La esperanza real de un mañana mejor».