Soʼu maayoʼu 19, 2022, na aʼyataakana suluʼu Consejo de Seguridad de las Naciones Unidas naapajüin nanainjee 75 funcionarios «alin maʼin tü jamükat sainküin mmakat sutuma tü ayuuliikat Covid-19 jee sutuma suʼwanajaain sukuwaʼipa tü mmapaʼakat. Otta aireesia maʼin jamü maaʼulu sutuma tü atkawaa chakat Ucrania». Anuu tü sümakat tü rewiisütakat The Economist: «Weʼrüin maʼin mülia sutuma tü atkawaakat otta akooʼomüinraasü maʼin tü jamükat». Süküjatüjülia wamüin tü Bibliakat aijeerüin maʼin tü jamükat maaʼulu yaa otta süküjain wamüin tü waaʼinrajatkat sülatapa tia.

•   Anuu tü nüküjatüjütkalia Jesús: «Atkaajiraajeerü wayuu sainküin mmakat süpüshua. Mülieerü maʼi saaʼin wayuu sütüma jamü [...] sainküin mma» (Mateo 24:7).

•   Aküjünüsü suluʼu Alateetkat Mapeena nachiki na pienchishii wayuu amaajunakana. Eeshi wanee amaajüchi shiyaawase tü atkawaakat. Chi nüchikijeejaachikai shiyaawase tü jamükat, soʼu tia aijeerü maʼin shiʼree eküülü otta kojuteerü maʼin shia. «Eweeta müshia joo wane amaʼaya, mütsiiya maʼi. Je najapuluʼu chi naajuchikai, eesü wane pesa. Je pasanainjee nanain na pienchishii katoʼuchiikana, taapüin wane pütchi müsü aka saaʼin sünüiki wayuu sünain maa: “Süka aliitpain jamü sainküin mma, eisalajüneesü tü seitakat je tü wiinokat. Kojutüitpa maʼi tü eküütkat süpüshua. Maa aka tü wanekat poote trigo, kettaʼalaasü sümaa niʼyataainjut wane wayuu süpüla wane kaʼi”, maluʼutsü tü pütchikat» (Alateetkat Mapeena 6:5, 6).

 Tia pütchikat süküjatüjütkalia tü Bibliakat süchiki alinjatüin jamü ekeraajüsü shia maaʼulu yaa, sükalioʼu sajaʼttajatkalü oʼu kasa mojusü (2 Timoteo 3:1). Süpüla pütüjaain saaʼu sooʼomüin süchiki tü kaʼi sajaʼlajaainjatkalü oʼu kasa mojusü otta nachiki na pienchishii amaajüna aküjünakana achiki suluʼu Alateetkat Mapeena, piʼrajaa tü videokot En 1914 el mundo cambio de rumbo otta paashajeʼera tü pütchikat «¿Jaralii na pienchishiikana amaajuna?».

•   Eesü pütchi aküjünaka suluʼu tü Bibliakat akaalinjeenaka waya soʼunnaa müliaa, aire maʼin shiʼree eküülü jee kojutule maʼin shia. Paashajeʼera tü pütchikat «Como vivir con menos».

•   Süküjain wamüin tü Bibliakat sunoutaajeerüin tia mapeena. Aküjünüsü suluʼu «jouleerüin maʼin pünajüt saaʼu tü mmakat» otta nnojoleerü alin shiʼree eküülü (Salmo 72:16). Pütüjaweere saaʼu tü sümakat tü Bibliakat süchiki tü alatajatkat mapeena otta jamüin piʼitaainjatka paaʼin sünain tia, paashajeʼera tü pütchikat «La esperanza real de un mañana mejor».