¿Jamüsü sünüiki tü Bibliakat süchiki alin maʼin jamü maaʼulu?
Shia keeʼireeka naaʼin napüshuaʼa na sülaülashiikana mma nnojoluinjatüin eein jamü otta jouluinjatüin maʼin eküülü sainküin mmakat, kapüleepejeʼe maʼin tia. a ¿Eejeetche wanee kaʼi nnojoleetka oʼu outuin wayuu sutuma jamü? ¿Jamüsüche sünüiki tü Bibliakat süchiki tia?
Süküjatüjülia tü Bibliakat alinjatüin jamü maaʼulu
Süküjatüjülia tü Bibliakat alinjatüin maʼin jamü maaʼulu, alatüinjatü tia «sülüʼütpa sükalia süpüla sajaʼttüin kasa mojusü» (2 Timoteo 3:1). Nnojoishi niain kasirüin Maleiwa jouluin jamü nüküjapejeʼe wamüin eeinjatüin shia (Santiago 1:13). Anuu piamasü kasa alatüinjatka saashin tü Bibliakat.
«Aijeerü jamü [...] sainküinpünaa mmakat» (Mateo 24:7). Süküjatüjülia tü Bibliakat alinjatüin jamü suluʼu wainma mma. Anuu nanüiki waneinnua wayuu ekirajaakana süchiirua jamüin sukuwaʼipa süpünajia aʼttiee jee jamüinjatüin shiitajia tü eküütkat: «Wattaleeinnapa maʼin na wayuu müliakana sutuma jamü, paliʼirüitpa neʼe tü eküüt nnojotka ayuulin atuma wayuu otta eesü mma aika maʼin aluʼu shiiʼiree eküülü». b Wainma maʼin wayuu sainküin mma nnojoliikana ousütüin sünain tü neküinjatkat. Sutumajee tia wainma maʼin na outakana.
«Teʼrakalaka wanee ama mütsiiyatai, eejatkalaka wanee pesa najapuluʼu chi naajuchikai» (Apocalipsis 6:5). Sünain tü pütchi aküjünatüjütkalia suluʼu tü Bibliakat, chi amakai jee chi naajuchikai shiyaawasesü tü jamü eeinjatkat sülüʼütpa sükalia süpüla sajaʼttüin kasa mojusü. c Tü pesa najapuluʼukat chi amaajuchikai shiyaawase shiisattünajatüin eküülü süka paliʼirüin shia. Sümaʼainruʼu nuwateʼerüin tü amakat aküjünüsü wanee pütchi süchiki kojutuinjatüin maʼin eküülü otta nüküjain namüin na wayuukana neisattüinjatüin tü eküülü eekat namaʼana (Apocalipsis 6:6). Wayaawata aaʼu sünainjee tüü alin maʼin jamü sainküin mma, wainma na wayuu kapüleejeenaka amüin nousütüin sünain tü neküinjatkat jee naʼyalajüin eküülü anasü.
¿Jamüinjatü sukuwaʼipa süpüla nnojoluinjatüin jamü?
Naashin na ekirajaakana süchiirua sukuwaʼipa tü mmakat eesü süpüla süpünajünüin suluʼu tü eküülü choʼujaakat sümüin wayuu süpüshuaʼa. ¿Jamakaʼa aika maʼin jamü? ¿Kasa naainjeetka Jehová d saashin tü Bibliakat süpüla najaʼlajeʼerüinjatüin tü jamükat?
Tü alatakat: Isasü nachiki na sülaülashiikana mma nnojoluin müliain wayuu otta nanoutuin sukuwaʼipa tü kasa mojusü aaʼinnakat tü outakat anainjee wayuu sutuma jamü.
Tü ajaʼlajeʼerüinjatkat shia: Nnojoleena aluwataain na sülaülashiikana mma süka nüikaleʼerüinjatüin Maleiwa sukuwaʼipa wanee aluwatawaa anakat maʼin (Daniel 2:44; Mateo 6:10). Maaʼulu, wainma na wayuu maʼletsekana aʼyataakana maʼin süpüla nayaʼlajüin tü neküinjatkat, nnojoleerü müin sukuwaʼipa Nuluwataapa Maleiwa. Anuu sünüiki tü Bibliakat nüchiki Jesucristo chi Aluwataainjachikai nutuma Maleiwa: «Nükaalinjeechi chi wayuu müliashi achuntakai kaalinwaa, chi wayuu mojukai aaʼin jee chi nnojoikai jaralin akaalinjain [...]. Jouleerü maʼin pünajüt saaʼu tü mmakat otta wainmaleejeeria saaʼupünaa tü uuchikalüirua» (Salmo 72:12, 16).
Tü alatakat: Eesü atkawaa ajaʼttiraka kasa, aika atuma shiiʼiree nneerü otta tü nnojotkalü atuma eküülü.
Tü ajaʼlajeʼerüinjatkat shia: «Najaʼlajeʼereerü [Jehová] tü atkawaakat sainküin tü mmakat. Nüshataain tü uraichikat otta niʼyülüjain tü jatü miyoʼukat jee naʼajüin tü kemion atkaayakat» (Salmo 46:9). Najaʼlajeʼereerü Jehová sütkaaya wayuu jee na wayuu eekana atuma atkawaa. Mapüleejeetka namüin na wayuukana nousütüin sünain tü neküinjatkat. Müsü sünüiki tü Bibliakat süchiki tia: «Soʼu tü nükaliakat, wainmeena na lotokana akuwaʼipaa otta eejeerü jimataa aaʼin waneepia» (Salmo 72:7).
Tü alatakat: Jaishi maʼin chi kaʼikai, aʼitüsü maʼin juya, eesü wawai otta akutkujaasü mma. Ajaʼttüsü pünajüt jee outusü mürüt sutuma tia.
Tü ajaʼlajeʼerüinjatkat shia: Nunouteʼereerü Jehová tü mmapaʼakat, aneetka apünajaa saaʼu. Müsü sünüiki tü Bibliakat: «Niimaleʼerüin [Jehová] tü joutaikat; jimatüsü tü sümünakat palaa [...]. Meerü aka saaʼin lamuuna nutuma tü isashiipaʼakat otta eejeerü shikii wüin suluʼu tü mmakat eere eein wüinñaasü. Kepieena nutuma suluʼu na outakana jamü [...]. Apünajeena naya otta watteerü a saalii naʼttia» (Salmo 107:29, 35-37).
Tü alatakat: Na wayuu washireekana jee na aʼluwajakana wanee kasa, naainjain eküülü ayuuika atuma wayuu otta nnojotsü neitajirüin tü eküütkat namüin na müliakana.
Tü ajaʼlajeʼerüinjatkat shia: Nuluwataapa Maleiwa najaʼlajeʼereena napüshuaʼa na wayuu nnojoliikana lotuin akuwaʼipa (Salmo 37:10, 11; Isaías 61:8). Süküjain tü Bibliakat niain Jehová chi anoutakai sukuwaʼipa tü aaʼinnakat namüin na müliashiikana otta nikirüin na outakana jamü (Salmo 146:7).
Tü alatakat: Sainküin mma wainma maʼin eküülü ojutünakat jee mojukat juyawai.
Tü ajaʼlajeʼerüinjatkat shia: Nuluwataapa Maleiwa aneerü sukuwaʼipa shiitajia eküülü. Soʼu yaajachin Jesús mmapaʼa nnojotsü amülain nutuma eküülü. Jamüsüjaʼa soʼu wanee kaʼi nikirüin wainma maʼin wayuu, alanaʼaleesia suulia 5.000 wayuu. Süchikijee nekaain, müshi nia namüin na nikirajüinkana: «Jukotchojo tü apütaasükat suulia amülain neʼe shia» (Juan 6:5-13).
Sutuma najaʼttireerüin Maleiwa tü eekalü atuma jamü, talateena maʼin na wayuukana süka wainmeerüin maʼin eküülü eekai anain (Isaías 25:6). Süpüla pütüjaain saaʼu joujeerüin shikeraajüin tia nutuma Maleiwa, paashajeʼera tü pütchikat «¿Joujaleechi nuʼttaka Maleiwa sünain aluwatawaa saaʼu tü Mmakat?».
a Agenda 2030 sobre el Desarrollo Sostenible, aprobada en el 2015 por todos los Estados Miembros de las Naciones Unidas.
b Informe realizado por la Organización de las Naciones Unidas para la Alimentación y la Agricultura, el Fondo Internacional de Desarrollo Agrícola, el Fondo de las Naciones Unidas para la Infancia, el Programa Mundial de Alimentos de las Naciones Unidas y la Organización Mundial de la Salud.
c Süpüla pütüjain sooʼomüin nachiki na pienchishiikana amaajuna aküjünakana achiki suluʼu Apocalipsis, paashajeʼera tü pütchikat «¿Jaralii na pienchishiikana amaajuna?».
d Jehová nünülia Maleiwa saashin tü Bibliakat (Salmo 83:18). Paashajeʼera tü pütchikat «¿Jarai chi kanüliakai Jehová?».
Eesüjaʼa kamalainjeerüle pümüin aashajeʼeraa tüü
AAPIRIA WAYUU
¿Jaralii na pienchishiikana amaajuna?
Pikiraja jamüin süpüla sütüjaanüin aaʼu jaraliin na pienchishiikana amaajuna.
ENSEÑANZAS IMPORTANTES DE LA BIBLIA
¿Paapüirü süchiki Nuluwataainjachin Maleiwa?
Tü nikirajakat maʼin anain Jesuu sünain aküjaa pütchi, shia süchiki Nuluwataaya Maleiwa. Kakaliairü achuntuin wayuu süpüla süntüin Nuluwataaya Maleiwa.
