Atkaashii na wayuukana sainküin mmakat süchiirua política.

•   Soʼu 2023 otta 2024 chaa México, oʼutuna aaʼinna 39 político jee atkaashii maʼin na wayuukana süchiirua política soʼu nüneekünüin chi aluwataainjachikai saaʼu wanee mma, nnojotyülia alatüin wanee kasa eekai müin aka saaʼin tia.

•   Atkaashii maʼin na wayuukana süchiirua política chayaa Europa maʼaka saaʼin tü alatakat maayoʼu 15 soʼu 2024, ajachijünüshi shikiipüʼüjana tü mmakat Eslovaquia.

•   Mmotshii maʼin na wayuukana chaa Estados Unidos saaʼu najachijünüin chi aluwataapuʼukai saaʼu tia mmakat Donald Trump, juulioʼu 13, 2024.

 ¿Jamüshii natkaaka na wayuukana süchiirua política? ¿Ajaʼtteetche tia mapeena? ¿Kasa süküjaka tü Bibliakat süchiki tia?

 Süküjatüjülia tü Bibliakat mojulaajeenain na wayuukana maaʼulu, nnojoleenain naya paaʼinwajiraain sülüʼütpa sükalia süpüla sajaʼttüin kasa mojusü.

•   «Pütüjaainjatpejeʼe saaʼu kapüleejeerüin maʼin tü kasa alatakat jee keemeerüin maʼin tü mmapaʼakat sülüʼütpa sükalia süpüla sajaʼttüin kasa mojusü. Jamüshiijaʼa na wayuukana kapüleerü neʼe naaʼin nakuwaʼipa namüiwaʼa, [...] nnojoleena aapüin analuʼut jee nnojoleena naya waneepiain namaa na waneinnua, [...] nnojoleerü anashiin namüin anajiraain naya, mojeerü nanüiki süchiki wayuu, nnojoleerü nachecherüin naaʼin, wayuujeena jashichi naya [...] Aainjeena kasa mojusü namüin naʼaleewainyuu, macheʼejeena süchiirua tü namakat, yaleteerü naaʼin» (2 Timoteo 3:1-4).

 Süküjatüjülia tü Bibliakat natkaajeenain na wayuukana namaa na sülaülashiikana mma jee atkaajeena na wayuukana süchiirua política (Lucas 21:9). Ajaʼlajeʼenneerü mapa tü atkawaakat süchiirua política.

 Süküjatüjülia tü Bibliakat najaʼttirüinjatüin Maleiwa sukuwaʼipa aluwatawaa natuma na wayuukana süpüla niainjachin aluwataain.

•   «Soʼunnaa naluwataain naya wayuukana, nüikaleʼerüinjatü chi Maleiwa sirumatuʼujeʼewaikai sukuwaʼipa wanee aluwatawaa [...] najaʼttireerü Maleiwa süpüshuaʼa sukuwaʼipa aluwatawaa sutuma wayuu, shieetkalaka eein waneepia tü sukuwaʼipakat aluwatawaa nutuma» (Daniel 2:44).

 Paaʼinwajiraajeena na wayuukana jee jimateerü naaʼin nuluwataapa Maleiwa saaʼu tü mmakat.

•   Niainjachin Jesucristo chi aluwataakai saaʼu, chi «Aluwataai Eeinjachika atuma Jimataa Aaʼin [...] otta waneepieerü nutuma tü jimataakalü aaʼin» (Isaías 9:6, 7).

•   Na wayuu nuluwataainjanakana aaʼu Maleiwa paaʼinwajiraainapa naya maaʼulu. Müsü tü Bibliakat nachiki naya wayuukana : «Tü chajaruuta natkaayakat, shiʼicheerü tü naawajiakat mma otta tü jatü miyoʼuyuukat, noʼoyonoojieerü sütüna napünajüin. Nnojoleena atkaajiraain otta ekirajaain sünain atkawaa» (Isaías 2:3, 4).

 Pütüjeere sooʼomüin süchiki tia, paashajeʼera tü pütchikat: «¿Kaseerü eeka sutuma Nuluwataaya Maleiwa?» otta pünaja tü videokot ¿Paapüirü süchiki Nuluwataainjachin Maleiwa?