Nowienpüroʼu 20 soʼu 2022, outkajaashii na aʼyataakana suluʼu Naciones Unidas süpüla naashajaain süchiki sukuwaʼipa tü mmakat (COP27). Naküjain sünain naapüinjanain wanee nneerü süpüla sükaalinjünüin wayuu suluʼu waneirua mma müliakana aaʼin sutuma sukutkujaain mma, süsetüin wüin jee sutuma sülatüin waneirua kasa keemaka maʼin. Mayaainjeʼe anain maʼin tü napansaajakat, eeshii waneirua wayuu aküjakana iseerüin nachiki nanouteʼerüin tia.

•   «Anasü saaʼin tamüin waapüin nneerü süpüla nakaalinjünüin na müliakana aaʼin […]. Watüjaa aaʼulu nnojoleerüin asetaain tia nneetkat […]. Wainma maʼin kasa amojujeʼeraka tü mmakat» (António Guterres, aʼyataashi nia suluʼu Naciones Unidas; nowienpüroʼu 19 soʼu 2022).

•   «Ayatüsü amojujaain maʼin sukuwaʼipa tü mmakat sutuma süsetaain wüin, sukutkujaain mma jee sülatüin waneirua kasa keemakat maʼin» (Mary Robinson, aluwataapuʼusü saaʼu Irlanda otta aʼyataapuʼusü shia suluʼu ONU; nowienpüroʼu 20 soʼu 2022).

 Shapaasü naaʼin na jimaʼaliikana jee na majayünnüükana sutuma sumojujaain maʼin sukuwaʼipa tü mmakat. ¿Eeshiiche süpüla naʼyataajiraain na sülaülashiikana mma süpüla nanouteʼerüin sukuwaʼipa tü mmakat? ¿Jamüsüche sünüiki tü Bibliakat süchiki tia?

 Mayaainjeʼe wainmain wayuu aʼyataakana maʼin süpüla nanouteʼerüin sukuwaʼipa tü mmakat, süküjain tü Bibliakat kapüleejeerüin namüin naaʼinrüin süpüshuaʼale tü keeʼireekat naaʼin. Wekiraja sünain piamasü kasa süküjaka tü Bibliakat:

•   «Wanee kasa eekai shokotuin, nnojotsü süpüla süloʼinnüin» (Eclesiastés 1:15).

   Jamaluʼulu tia: Nnojoleerü nountuin na sülaülashiikana mma naaʼinrüin tü keeʼireekat naaʼin süka nnojoluin laülaain naya saaʼu nakuwaʼipa namüiwaʼa (Jeremías 10:23). Iseerü nachiki na sülaülashiikana mma nanouteʼerüin tü alatakat saaʼu tü mmakat, jaʼitairü nachajaain maʼin sukuwaʼipa süpüla tia.

•   «Eejeena na wayuu kapülakana aaʼin nakuwaʼipa namüiwaʼa, eekai kachiiruain aaʼin washirüü […] na ayoutakana süchiki anajirawaa» (2 Timoteo 3:2, 3, TNM).

   Jamaluʼulu tia: Süküjatüjülia tü Bibliakat kapülainjatüin naaʼin na wayuukana nakuwaʼipa neʼe namüiwaʼa otta nnojoluinjatü anain namüin paaʼinwain naya sünain aʼyatawaa. Müsia weʼrüin nakuwaʼipa na wayuukana maaʼulu yaa.

 Nnojoleerü anoutaain sukuwaʼipa tü mmakat natuma na wayuukana. Nüneeküichipa Maleiwa wanee wayuu aluwataainjachikai saaʼu tü mmakat: nia Jesucristo. Anuu tü sümaka tü Bibliakat nüchiki:

•   «Niainjachi aluwataaka. Atüjashi maʼin Achiawaa, Maleiwa Pülashi, Washi Matüjainkai Outaa otta Aluwataai Eeinjachika atuma Jimataa Aaʼin» (Isaías 9:6).

 Aluwataaichipa Jesús nutuma Maleiwa chaa sirumatuʼu (Mateo 6:10, TNM) Pülashi nia, kekiishi nia otta keeʼireesü naaʼin anain sukuwaʼipa tü mmakat nutuma jee anain nakuwaʼipa na kepiakana suluʼu (Salmo 72:12, 16). Nuluwataapa Jesús, najaʼttireerü napüshuaʼa na amojujeʼerakana tü mmakat otta aneerü tü mmakat nutuma (Alateetkat Mapeena 11:18; Isaías 35:1, 7).

 Pütüjeere sooʼomüin süchiki tü anouteʼerüinjatkat sukuwaʼipa tü mmakat, paashajeʼera tü pütchi kanüliakat: «¿Qué dice la Biblia sobre el cambio climático y nuestro futuro?».