Wainma eʼinirawaa sainküin mmakat soʼu juulioʼu 2022:

•   «Ainkuusü maʼin saaʼin wayuu chaa Japón sutuma nuʼutunüin aaʼin wanee poliitiko eʼnnaajünakai maʼin Shinzo Abe nünülia. Nnojotsü maajüin nakuwaʼipa na wayuukana suluʼu tia mmakat süka süpülajünüin maʼin noulia kaʼapülainjanain naya» (Juulioʼu 10 soʼu 2022, The Japan Times).

•   «Ayoʼujaasü saaʼin wayuu süka suʼutunüin saaʼin apünüinsü wayuu nutuma wanee wayuu kaʼapülashi suluʼu wanee centro comercial chaa Copenhague, Dinamarca» (Juulioʼu 4 soʼu 2022, Reuters).

•   «Oʼutunaa aaʼinchii 15 wayuu natuma waneeinna wayuu kaʼapülajakana antakana suluʼumüin wanee asaalee chaa Soweto Sudáfrica» (Juulioʼu 10 soʼu 2022, The Guardian).

•   «Alatüshii suulia 220 wayuu oʼutakana sutuma neʼitünüin sünain tü miʼiraa aainjünawaikat soʼujee 4 juulioʼu sünainmüin 5 juulioʼu chaa Estados Unidos» (Juulioʼu 5 soʼu 2022, CBS News).

 ¿Ajaʼtteetche soʼu wanee kaʼi tü kasa mojusü alatakat maaʼulu? ¿Jamüsüche sünüiki tü Bibliakat süchiki tia?

 Saashin tü Bibliakat kepiashii waya soʼu tü kaʼi alüʼütkat oʼu süpüla sajaʼttüin kasa mojusü, eejeetkalü oʼu wayuu eekai maaʼin naaʼin sümaa jashiee otta eekai nayoutuin tü anasükat (2 Timoteo 3:1, 3). Shapaasüjeseʼe maʼin saaʼin wayuu sutuma tü kasa mojusü alatakat (Lucas 21:11). Süküjapejeʼe tü Bibliakat sünteerüin wanee kaʼi nnojoleetkalü oʼu müliain saaʼin wayuu, eere aneerüin maʼin saaʼin wayuu, jimateerüin naaʼin, aneerüin maʼin nepia otta nnojoleerüin kasain ekeʼejüin naaʼin (Isaías 32:18). ¿Jameetche shikeraajia tia?

 Najaʼttireena Maleiwa mojulaashiikana otta tü naʼapülakat.

•   «Aluʼujasaʼa na wayuu aaʼinrakana tü kasa mojusükat, ayamünneena naya» (Proverbios 2:22).

•   «Najaʼlajeʼereerü [Maleiwa] tü atkawaakat sainküin mmaka. Nüshataain tü uraichikat, niʼyülüjaain tü jatü miyoʼukat otta naʼajüin tü kemion atkaayakat» (Salmo 46:9).

 Nikirajeena Maleiwa na wayuukana süpüla anamiainjanain naya, nnojoleena aaʼinrüin kasa mojusü.

•   «Nnojoleerü jamajüin wayuu natuma saaʼu süpüshuaʼa tü taʼuuchisekat, süka niʼraajüneechin maʼin Jehová sainküin mmakat süpüshuaʼa maʼaka piratüin wüin tü palaakat» (Isaías 11:9).

•   Jaʼitakajaʼa maaʼulu yaa, nikirajüin Maleiwa na wayuukana süpüla nnojoluin natkaain jee anamiainjanain naya, «napünajieerü tü chajaruutakat otta tü jatü natkaayakat» (Miqueas 4:3).

 Pütüjeere sooʼomüin süchiki nnojoleerüin eein kasa mojusü saaʼu tü mmakat, paashajeʼera tü pütchikat «¿Es posible librarse del miedo?».

 Pütüjeere sooʼomüin süchiki tü naaʼinrajatkat Maleiwa süpüla najaʼlajeʼerüin tü mojulawaakat, paashajeʼera tü pütchikat «¡Por fin paz en la Tierra!».