Soʼunnaa kashikat juulioʼu 2022, aküjünüsü jaʼin maʼin chi kaʼikai suluʼu mmakat süpüshuaʼa.

•   «Aküjünüsü chaa China alinjatüin maʼin walatshi süchikuaʼa suluʼu 70 pueulo soʼunnaa kashikat tüü» (Juulioʼu 25 soʼu 2022, servicio de noticias de la CNN).

•   «Sutuma jaʼin maʼin chi kaʼikai chaa Europa aʼajaasü wainma wunuʼulia chayaa» (Juulioʼu 17 soʼu 2022, The Guardian).

•   «Suluʼu waneirua pueulo chayaa Estados Unidos aisü maʼin walatshi rimiinkoʼu otta wattakuatsü shia wüinpümüin jee uuchimüin suluʼu tia mmakat» (Juulioʼu 24 soʼu 2022, The New York Times).

 ¿Jamüsüche sülataka tia? Sutuma müin sukuwaʼipa tü mmakat, ¿nnojoleetche kepiain wayuu suluʼu? ¿Jamüsüche sünüiki tü Bibliakat süchiki tia?

 Aa. Sutuma jaʼin maʼin chi kaʼikai suluʼu mmakat süpüshuaʼa, wayaawata aaʼulu shikeraajüin tü sümakat tü Bibliakat süchiki tü alatüinjatkat maaʼutpünaa. Maʼaka nüküjain shia Jesús «shiʼreerü wayuu kasa mmoleetka eema shia sümaa shiiʼiyalaajeerüin kasa» (Lucas 21:11, TNM). Wainma na wayuu mmotkana eein süpüla sajaʼttinnüin tü mmakat sutuma tü naainjakat na wayuukana, müsü naaʼin sutuma neʼrüin jaʼin maʼin chi kaʼikai sainküin mma.

 Nnojo. Nukumajüin Maleiwa tü mmakat süpüla kepiainjanain na wayuukana waneepia suluʼu (Salmo 115:16; Eclesiastés 1:4). Nnojoleerü nuuʼulaain sajaʼlajeʼennüin tü mmakat natuma na wayuukana. Maʼaka nüküjain shia suluʼu tü Bibliakat najaʼlajeʼerüinjana na amojujakana tü mmakat (Alateetkat Mapeena [Apocalipsis] 11:18).

 Anuu piamasü pütchi nümaka Maleiwa naaʼinrüinjatka süpüleerua tü mmakat:

•   «Wüittuuijeerü otta kasiijeerü maʼin wunuʼulia süpaʼapünaa tü anoouishiikat otta tü isashiipaʼakat maʼaka kasiin tü kanüliakat azafrán» (Isaías 35:1). Nnojoleerü nuuʼulaain Maleiwa isashiipaʼain süpüshuaʼa tü mmakat jee kapüleein sümüin wayuu kepiain suluʼu. Nunouteʼereerü tü amojujakat sünain.

•   «Paaʼinmaja tü mmakat süpüla piʼitaainjatüin wainma kasa saaʼu jee süpüla anashaatain maʼin shia putuma» (Salmo 65:9). Paʼaraiiseerü tü mmakat nutuma Maleiwa.

 Pütüjeere sooʼomüin süchiki tü sümakat tü Bibliakat sünain jamüin jaʼika maʼin chi kaʼikai, paashajeʼera tü pütchikat «¿Qué dice la Biblia sobre el cambio climático y nuestro futuro?».

 Süküjain tü Bibliakat sunoutaajeerüin sukuwaʼipa tü mmakat, süpüla pütüjaain saaʼu sooʼomüin süchiki tia paashajeʼera tü pütchikat «¿Quién salvará el planeta?».