Aküjünüsü suluʼu noticiero wainmain na mojukana anüiki süchiki wayuu sutuma üttüin naaʼin jee aainjashii kasa keemasü sutuma nalerajüin wayuu jee joutsü atkawaa.

•   «Üttüsü maʼin saaʼin wayuu sünain aashajawaa suluʼupünaa redes sociales sünainjee tü alatakat chaa Israel sümaa Gaza otta sünainjee tü naküjakat na ootokana wayuu sünain atkawaa jee üttaa aaʼin» (The New York Times, noviembre 15, 2023).

•   «Soʼujee octubre 7, wainma maʼin tü pütchi aküjünakat süchiki üttaa aaʼin jee süchiki atkawaa sutuma sülerajünüin maʼin wayuu» (Dennis Francis, shikiipüʼü asamblea general de las Naciones Unidas, noviembre 3, 2023).

 Kakaliairü yootuin wayuu süchiki üttaa aaʼin, süchiki mojulawaa jee süchiki atkawaa. Ashajünüsü suluʼu tü Bibliakat nachiki na wayuu mojukana anüiki süchiki wayuu, müsü aka saaʼin jatü tia nanüikikat jee atkaashii naya sümaa nootuin wayuu sünain atkawaa (Salmo 64:3; 120:7; 140:1). Aküjünüsü suluʼu tü Bibliakat jamüin üttaka maʼin saaʼin wayuu maaʼulu.

 Ashajünüsü suluʼu tü Bibliakat piamasü kasa wayaawataka akajee jamüin üttaka saaʼin wayuu maaʼulu.

1.  1. Süküjain tü Bibliakat maalinjiraajeerüin «wayuu jooutpa maʼin tü mojulawaakat» (Mateo 24:12). Nnojoishii aijiraainjanain na wayuukana, jaʼyainjatü saaʼu nakuwaʼipa tü kasa üttajiraakalü atuma saaʼin wayuu (2 Timoteo 3:1-5).

2.  2. Üttüsü maʼin saaʼin wayuu maaʼulu nutuma chi Yolujaakai. «Napüshuaʼa na manoujainsaliikana, najapuluʼushii naya chi Yolujaakai» saashin tü Bibliakat (1 Juan 5:19; Apocalipsis 12:9, 12).

 Ashajünüsü suluʼu tü Bibliakat najaʼttireerüin Maleiwa tü üttakalü atuma saaʼin wayuu. Najaʼttireeria Maleiwa tü müliaa shiʼrakat wayuu sutuma üttüin saaʼin. Anuu tü alateetkat saashin tü Bibliakat:

•   «Meerü nülaʼajaakai saaʼin Maleiwa naʼwüira naya wayuukana, nnojoleerü outaa, nnojoleerü mojuu aaʼin, nnojoleerü aʼyalajaa jee nnojoleerü saalin wanee kasa. Alatüitpa tü kasa müliapuʼukalü atuma waaʼin» (Apocalipsis 21:4).