Outkajaʼawaishii juyawai na aküjaliikana pütchi nüchiki Jehová otta na wayuu nounejaakana sünain tü outkajawaakat eere Sotuin Waaʼin Outuin Jesús, naaʼinrüin shia wanaapünaa sümaa tü nuluwataakalü anain Jesús (Lucas 22:19, TNM). Wayaawata aaʼu sünainjee tia outkajawaakat, kojutuin maʼin naapajiraain nikii Jesús napüleerua wayuukana. Aküjünüsü sünain outkajawaakat tia aneerüin wakuwaʼipa maaʼulu otta müsia mapeena (Juan 3:16, TNM).

 Puʼunuichire jee nnojoiyüire puʼunuin sünain wanee outkajawaa eere Sotuin Waaʼin Outuin Jesús, ¿kasa paaʼinrajatka süpüla anain pukuwaʼipa sutuma naapajiraain nikii Jesús? Anuu piamasü kasa waaʼinrajatka naashin Jesús:

1.  1. Pikirajaa nüchiki Maleiwa jee nüchiki Jesús. Anuu nünüiki Jesús wanaa sümaa nuʼuraajüin nümüin chi Nüshi chakai iipünaa: «Na wayuu kateekana oʼu süpüla kaʼikat süpüshuaʼa choʼujaasü namüin neʼraajüinjachin pia, chi waneeshikaijaʼa suluʼu Maleiwain otta choʼujaasü neʼraajüinjachin Jesucristo, chi püjünalakai» (Juan 17:3, TNM).

2.  2. Punouteʼera pukuwaʼipa wanaapünaa sümaa tü pikirajaakalü anain. Nüküjain Jesús choʼujaain maʼin wanouteʼerüin wakuwaʼipa wanaapünaa sümaa tü wekirajaakalü anain. Wanaa sümaa nikirajüin Jesús saaʼu wanee namüna, anasü nünüiki nachiki na wayuu aapajakana nünüiki otta na aaʼinrakana tü nümakat (Lucas 6:46-48, TNM). Anuu wanee pütchi nüküjakat: «Süka jütüjaaitpain saaʼu tia, talateerü jaaʼin jaaʼinrüle shia» (Juan 13:17, TNM).

 ¿Ekirajaweeshi pia sooʼomüin nüchiki Maleiwa jee nüchiki Jesús? ¿Kasache paaʼinrajatka süpüla punouteʼerüin pukuwaʼipa wanaapünaa sümaa tü pikirajaakalü anain? Anuu waneirua kasa eeka süpüla paaʼinrüin.

 Nekirajaapa na wayuukana wamaa sünain tü Bibliakat, nayaawata aaʼulu tü sümakat jee nanouteʼerüin nakuwaʼipa wanaapünaa sümaa aküjünaka suluʼu.

•   Pütüjaajeerü aaʼu jamüin sukuwaʼipa ekirajawaa püchajaale eere sümüin Pikirajaa sünain tü Bibliakat.

•   Pünaja tü videokot Sukuwaʼipainjatü ekirajawaa sünain tü Bibliakat süpüla pütüjaain saaʼu jamüin sukuwaʼipa ekirajawaa namaa na aküjaliikana pütchi nüchiki Jehová.

 Na aküjaliikana pütchi nüchiki Jehová outkajaashii naya suluʼu tü Piichi Outkajaaleekat. Ekirajaashii waya sünain tü Bibliakat otta wayaawata aaʼu tü waaʼinrajatkat süpüla woonooin sümaa sünüiki.

 Eesü süpüla suʼunuin wayuu maʼleekalia; nnojotsü choʼujaain püküjalinjachin pütchi süpüla puutkajaainjachin wamaa. Eeshi süpüla puʼunuin suluʼu wanee Piichi Outkajaalee anale saaʼin pümüin jee shiale suluʼupünaa videoconferencia.

•   Pünaja tü videokot ¿Kasache aainjünaka suluʼu tü Piichi Outkajaaleekat? süpüla pütüjain saaʼu jamüin sukuwaʼipa tü outkajawaakat.

•   Pütüjaajeerü aaʼu jalainjachin pia outkajaain pünaʼlaale eere sümüin Outkajawaa naainjaka na aküjaliikana pütchi nüchiki Jehová.

 Paashajeʼerüle tü pütchikat jee tü video suluʼukat jw.org, wainmeerü kasa pütüjaajeetka aaʼu süchiki tü nikirajakalü anain Jesús jee tü kasa anasü eekat sutuma naapajiraain nikii.

 Süpüla pütüjaain saaʼu jamüin aneetka nakuwaʼipa na wayuukana sükajee tü naainjakat waneeshia wayuu, paashajeʼera tü pütchikat «¿Kasa naaʼinraka Jesús süpüla katüinjatüin woʼu?» otta «¿Jamüshi müliaka jee ouktaka Jesuu?» jee shiale pünajüin tü videokot ¿Jamüshi ouktaka Jesuu?