Soʼu maayoʼu 24 soʼu 2022, alatüsü wanee kasa keemasü maʼin suluʼu tü mmakat Uvalde (Texas, Estados Unidos). Saashin tü karaloʼutakat The New York Times, «Oʼutunaa aaʼinchii 19 tepichi otta piamashii profesoot […] suluʼu wanee koleejia escuela primaria Robb münüsü».

 Mayaainjeʼe keemain maʼin tia alatawaisü maʼin shia. Anuu tü ashajünakat suluʼu wanee karaloʼuta USA Today münüsü: «Soʼu tü juyakat 2021, suluʼu tü mmakat Estados Unidos, eejatü 249 ashanajirawaa suluʼu koleejia, watta maʼin saalii tia, nnojotsü maajüin sukuwaʼipa tia soʼujee tü juyakat 1970».

 ¿Jamüsüche maʼin sülatakat tia? ¿Kasache eeka süpüla waaʼinrüin sülatüle wamüin kasa mojusü makat aka saaʼin tia? ¿Eejeetche wanee kaʼi nnojoleetkalü oʼu eein mojulawaa? Aküjünüsü susoutia tia suluʼu tü Bibliakat.

•   Saashin tü Bibliakat kepiashii waya soʼunnaa tü kaʼi alüʼütka süpüla sajaʼttajatüin kasa mojusü otta süküjain eejeerüin wayuu eekai «maaliin wayuu napüla» otta eekai maaʼin naaʼin sümaa jashiee sümaa naaʼinrajatüin kasa mojusü. Naya wayuu mojulaashiikana maʼin kachiirueerü maʼin naaʼin tü mojulawaakat (2 Timoteo 3:1-5, 13). Pütüjeere sooʼomüin, paashajeʼera tü pütchikat «¿Predijo la Biblia cómo sería la gente en nuestros días?».

 Wainma na wayuu jülüjakana aaʼin jamüin nuuʼulaka Maleiwa sülatüin kasa mojusü, maʼaka saaʼin neʼinaʼannüin tepichi suluʼu koleejia. Pütüjeere sooʼomüin tü sümakat tü Bibliakat süchiki tia, paashajeʼera tü pütchikat «¿Jamüsü sülataka kasa mojusü namüin na wayuu anamiakana?».

•   «Aamasü maʼi wamüin süpüshua tü pütchi ashajünakat paala suluʼu tü karaloukta nüchikimaajatkat Maleiwa [...] katsüinsü waaʼin sütüma tü pütchikat sümaʼinruʼu waʼatapajüin» (Roma 15:4).

 Piyaawatüle saaʼu tü sümakat tü Bibliakat, püchechereerü paaʼin mayaainjeʼe jouluin mojulawaa. Pütüjeere sooʼomüin, paashajeʼera tü pütchikat «¿Acabará algún día la violencia?», suluʼusü tü rewiisütakat ¡Eeja Waaʼin! (alijunaikiruʼusü).

 Jütüjaweere saaʼu tü naaʼinrajatkat na kachonshiikana suulia mojuin naaʼin nachonnii sutuma naapüin notiisia eekai keemain, paashajeʼera tü pütchikat «El efecto de las noticias en los niños».

•   «Nükaalinjeena naya suulia kasa mojusü otta suulia tü mojulawaakat» (Salmo 72:14).

•   «Napünajieerü tü chajaruutakat otta tü jatü natkaayakat, nnojoleena atkaain süka chajaruuta otta nnojoleena ekirajaain sünain tü atkawaakat» (Miqueas 4:3).

 Nuluwataapeena chi Maleiwakai naaʼinreerü tü isakat süchiki tü wayuukalüirua, najaʼttirüinjatü tü mojulawaakat otta müiria nnojoluin eein atkawaa. Pütüjeere sooʼomüin süchiki sukuwaʼipainjatka aluwatawaa nutuma Maleiwa, paashajeʼera tü pütchikat «Jimateerü saaʼin wayuu Nuluwataapa Maleiwa».