Sainküin mmakat süpüshuaʼa, kapüleesü namüin na wayuukana süsetaain nanneetse süpüla nayaʼlajüin tü kasa choʼujaajeetkat namüin otta kapüleerejeeria maʼin shia maaʼulu.

•   Asakinnüshii jekenainka waneinnua wayuu sainküin mmakat a otta naküjain «masetiraain tü nneerü nakanainkat kashiwai». Nnojorüle sunoutaain tia «nnojoleerü wanaawain nakuwaʼipa na wayuukana süka eejeenain na washinnuukana jee na maʼletsekana» otta «nnojoleerü anain maʼin nakuwaʼipa wainma wayuu maʼakaapuʼu shia».

 ¿Nounteetche na sülaülashiikana mma nanouteʼerüin tia jee anain nakuwaʼipa na wayuukana natuma?

 Süküjain tü Bibliakat süchiki wanee Sukuwaʼipa Aluwatawaa anouteʼerüinjatka tia otta paaʼinweenaka atuma na wayuukana. Anuu tü sümakat: «Nüikaleʼerüinjatü chi Maleiwa sirumatuʼujeʼewaikai sukuwaʼipa wanee aluwatawaa» otta shieerü neʼe aluwataaka saaʼu tü mmakat (Daniel 2:44). Nnojoleerü motuin naaʼin Maleiwa na wayuukana nuluwataapa (Salmo 9:18). Nuluwataapa Maleiwa nnojoleerü kasain choʼujaain namüin na wayuukana süpüla talatüinjatüin naaʼin. Talateeria naaʼin napüshuaʼa na wayuukana sünain aʼyatawaa (Isaías 65:21, 22).