Wainma na wayuu müliakana aaʼin sainküin mmakat sutuma miyoʼu maʼin tü juyakat. Anuu waneirua kasa alatakat:

•   «Jekenainka chaa suluʼu tü mmakat Pekín (China) aʼitashaatasü maʼin tü juyakat, nnojotyülia aʼitüin wanee juya makalü aka saaʼin tia soʼunnaa 140 juya. Jamüsüjaʼa saawanoʼu sünainmüin mietkuloʼu, eesü maʼaka 744,8 milímetros sajaʼapüin tü juyakat» (AP News, akoosütoʼu 2, 2023).

•   «Sutuma tü wawai kanüliakat Khanun, aʼitüsü maʼin tü juyakat sümaa joutaimaain shia chaa uuchimüin sünain Japón. Jamüsüjaʼa jueewoʼulu, outushii piamashii wayuu sutuma. Ayateeria aʼitüin maʼaka 0,6 metros saaʼu tü uuchi chakat Taiwán» (Deutsche Welle, akoosütoʼu 3, 2023).

•   «Süka miyoʼuin maʼin tü juyakat chaa Nueva Escocia, epirajaasü tia pueulokot. Shia tü palajatkat sukua sünain miyoʼuin maʼin tü juyakat soʼunnaa 50 juya» (BBC News, juulioʼu 24, 2023).

 ¿Jamüsüche sünüiki tü Bibliakat süchiki tia?

 Aküjünüsü suluʼu tü Bibliakat kepiain waya soʼunnaa tü kaʼi sajaʼttüinjatkalü oʼu kasa mojusü (2 Timoteo 3:1). Nüküjatüjülia Jesús weʼreenain maaʼulu «kasa mmoleetka eema» wayuu (Lucas 21:11). Alatüsü tia sutuma jaʼin maʼin chi kaʼikai. Aʼitaʼala müsü neʼe tü juyakat, waneepiasü shia sümaa miyoʼuin maʼin shia.

 Wayaawata aaʼu sutuma tü kasa aküjünakat suluʼu tü Bibliakat nnojoluinjatüin mmoluwaain waaʼin sutuma tü kasa alatakat maaʼulu süka sunoutaajeerüin soʼu paliʼirü kaʼi. ¿Jamüsü watüjaaka saaʼu tia? Müshi Jesús: «Akaʼaya jiʼrapa sülatüin süpüshuaʼaleʼeya tü taküjaitpakat jümüin, jiyaawateerü aaʼu sülüʼülüin nükalia chi Maleiwakai süpüla aluwatawaa» (Lucas 21:31; Mateo 24:3).

 Watüjaa aaʼu sünainjee tü alatakat maaʼulu nunouteerüin Maleiwa sukuwaʼipa tü müliakalü atuma wayuu maʼaka saaʼin tü wawaikat, tü juyakat jee waneirua kasa (Job 36:27, 28; Salmo 107:29).

 Pütüjeere sooʼomüin süchiki tü naainjainjatkat Maleiwa süpüla nunouteʼerüin sukuwaʼipa tü alatakat yaa mmapaʼa, paashajeʼera tü pütchikat «¿Quién salvará el planeta?».