70 miyoone na wayuu manüisalii eekana sainküin mmakat otta aashajaashii naya süka najapü, eetaasü maʼaka saaʼin 200 nanüikipala na manüisaliikana. Müliashii maʼin naya sutuma wayuu, anuu süpüshi tü aainjünakat namüin:

•   «Sainküin mmakat, nnojoishii kojutuin amüinñüü na manüisaliikana jee na moʼukana ekii» (Asociación Nacional de Sordos de Estados Unidos).

•   «Na manüisalii kepiakana suluʼu waneirua mma eere maʼletsein wayuu, kapüleesü namüin koleejiain naya, naʼyataain jee süküjünüin namüin tü natüjaweekalü aaʼu» (Federación Mundial de Sordos).

 ¿Jülüjashiiche naaʼin Maleiwa na manüisaliikana? ¿Jamüsü sünüiki tü Bibliakat nachiki na manüisaliikana? ¿Kasa naainjaka na aküjaliikana pütchi nüchiki Jehová süpüla nakaalinjain na manüisaliikana?

Tü jülüjakat naaʼin Maleiwa nachiki na manüisaliikana

 Süküjain tü Bibliakat nükaalinjain Jehová a na manüisaliikana. Shia anaka nümüin kojutuin naya atumawaa jee nikirajeein naya sünain tü nümakat.

 Wetsiikulo: «Nnojo puʼulejüin chi eekai manülin» (Levítico 19:14).

 Wetsiikulo: Nnojotsü «koʼuin nukuwaʼipa Maleiwa» (Aluwataaushikana 10:34).

 Wetsiikulo: «Nuʼunaka Jesús sainküin pueulo […]. Aküjashi nia pütchi anasü süchiki niainjachin aluwataain Maleiwa saaʼu wayuu» (Mateo 9:35).

 Wetsiikulo: «Kacheʼeshi nutuma [Jesús] chi eekai macheʼein jee kanüishi nutuma chi eekai manülin» (Marcos 7:37).

 Wetsiikulo: «Kacheʼejeena na macheʼesaliikana» (Isaías 35:5).

 Jamaluʼuluin shia: Nüküjatüjülia Jehová kacheʼeinjanain na eekana macheʼein (Isaías 29:18).

¿Kasa naainjaka na aküjaliikana pütchi nüchiki Jehová süpüla nakaalinjain na manüisaliikana?

 Na aküjaliikana pütchi nüchiki Jehová naküjain pütchi namüin na manüisaliikana suluʼu tü nanüikipalakat süchiki tü kasa anasü naaʼinrajatkat Maleiwa. ¿Kasa waaʼinraka süpüla wountuin tia? Wakürawaajüin tü Bibliakat suluʼu videoin shia otta waneirua video, alatüsü suulia 100 anüikii sukumajünaka aluʼu. Wekirajüin na wayuu manüisaliikana sünain tü Bibliakat otta aainjünüsü outkajawaa napüla. Waainjain wainma kasa sümaa nnojoluin wachekajüin saaʼu süpüla nikirajaain nüchiki Maleiwa chi achekakai shia. ¿Jamüsüche waainjaka tia? Shia sutuma tü nümakat Jesús: «Nnojoishii achekajüinjanain jia saaʼu tia maʼaka nnojoluin süchekajünüin jümüin paala» (Mateo 10:8).

 Eesü süpüla pünajüin shia suluʼu internet jee püdescargaajüin shia suluʼu püserulaatse. Anuu tü sukuwaʼipainjatkat putuma:

 Tü paaginakat jw.org. Piʼitaa click eere suʼwanajaanüin sünüiki tü paajinakat jee püneeka tü anüikii naashajaakat na manüisaliikana puumainpaʼa.

 Tü aplicaciónkat JW Library Sign Language. Püdescargaaja tia aplicaciónkat suluʼu püserulaatse, maliasat shia otta eesü süpüla pünajüin video suluʼu jee püdescargaajüin shia.

¿Kasa tü wekirajaakalü anain naya suluʼu tü Bibliakat?

 Tü Bibliakat suluʼu nanüikipala na manüisaliikana. Tü Bibliakat Namüinjatü na Wayuu Kepieenakana Suluʼu tü Mma Jeketükat suluʼu nanüikipala na manüisaliikana chakana Estados Unidos, shia tü palajatkalü ojuʼitüin suluʼu kottuin shia. Eeitpa joo süpüshuaʼa tü Bibliakat Namüinjatü na Wayuu Kepieenakana Suluʼu tü Mma Jeketükat jee shiale süpüshi suluʼu nanüikipala na manüisalii eekana sainküin mmakat otta ojuʼiteerü sooʼomüin juyawai (pünaʼla suluʼu jw.org tü Biblia eekat napüla na manüisaliikana otta tü recuadro kanüliakat « Tü Bibliakat Namüinjatü na Wayuu Kepieenakana Suluʼu tü Mma Jeketükat suluʼu nanüikipala na manüisaliikana»).

•   Pünaja tü videokot La Traducción del Nuevo Mundo completa en lenguaje de señas americano ya está disponible, süpüla pütüjaain saaʼu tü aʼyatawaa aainjünakat süpüla eeinjatüin tü Bibliakat suluʼu nanüikipala na manüisaliikana.

•   Süpüla anaʼleein anajaa tü Bibliakat suluʼu videoin shia, püdescargaaja tü aplicaciónkat JW Library Sign Language. Eesü süpüla püchajaain suluʼu tü wetsiikulo pünajüinjatkat.

•   Dmytro sümaa Vita manüisalii naya jee kanüishii na nachonniikana. Pütüjaajeerü aaʼu jamüin anaka nakuwaʼipa sutuma nanajüin weinshi tü Bibliakat suluʼu nanüikipala na manüisaliikana.

 Video ekirajaka süchiki tü Bibliakat. Na aküjaliikana pütchi nüchiki Jehová nakumajüin video suluʼu nanüikipala na manüisaliikana süpüla nayaawatüin saaʼu tü aküjünakat suluʼu tü Bibliakat jee noonooin sümaa.

•   Kaʼwayuusere naya jee kachonniire naya

•   Jimaʼaliire naya jee majayünnüüle naya

•   Tepichire naya

 Ekirajawaa sünain tü Bibliakat. Pikirajaa sünain tü sümakat tü Bibliakat suluʼu nanüikipala na manüisaliikana nümaa wanee wayuu, eesü süpüla paliʼirawaire tü pikirajaakalü anain. Puchunta süküjünüin pümüin jamüin sukuwaʼipa ekirajawaa sünain tü Bibliakat.

 Jeson Senajonon kepiashi nia chaa Filipinas. Pünaja süchiki naʼaleewajaain maʼin nümaa Jehová sutuma nikirajaain wamaa sünain tü Bibliakat.

 Mario Antúnez shikiipüʼüshi nia wanee iküleesia chaa Honduras. Paashajeʼera süchiki tü naainjakat süpüla nütüjaain saaʼu susoutia tü nüsakirakalü anain suluʼujee tü Bibliakat. Anuu sünülia tü pütchikat: «Tenía muchas preguntas y pocas respuestas».

 Outkajawaa jee outkajawaa miyoʼu. Eesü outkajawaa watuma semaanawai sainküin mmakat suluʼu nanüikipala na manüisaliikana, ekirajaashii naya nüchiki Maleiwa otta naʼwaajüin nia. Aainjashii waya outkajawaa miyoʼu juyawai süpüla wekirajüin sünain tü Bibliakat na wayuu manüisaliikana. Sünain tü outkajawaa aainjünakat semaanawai jee tü outkajawaakat miyoʼu, eeshii wawalayuu akaalinjaka na wayuu moʼusaliikana sümaa macheʼein naya süpüla nayaawatüin saaʼu tü ekirajaanakalü anain, naainjain tia süka najapü. Wakumajüin karaloʼuta suluʼu braille napüla na moʼupaʼakana sümaa nnojoluin wachekajüin saaʼu.

•   Püchajaa eeinjachire puutkajaain.

•   Pütüja süchiki tü outkajawaa miyoʼu aainjünakat juyawai.

•   Puʼuna sünain tü Outkajawaakat eere Sotuin Waaʼin Outuin Jesús. Shia wanee outkajawaa kojutuka maʼin shia wamüin otta aainjünüsü shia juyawai.

 José Luis Ayala kepiashi nia chaa México. Jemeishi nia sümaa macheʼein nia otta moʼupaʼashi nia mapa. Pünaja süchiki tü aainjünakat nüpüleerua süpüla tütüin nia sünain ekirajaa wayuu sünain tü Bibliakat.