Asakinnüshii jekenainka waneinnua wayuu suluʼu waneirua mma a jee naʼakajee pienchishii wayuu eeshi wanee nümüiwaʼakai aaʼin.

•   «Eeshi nükatalaale nümüiwaʼa wanee wayuu jaʼitairü jeʼrain nuuyase jee jalain nia kepiain» (Chido Mpemba, copresidenta de la Comisión de la Organización Mundial de la Salud sobre Conexión Social).

 Nnojoishii nayain neʼe namüiwaʼain aaʼin na wayuu laülaainnakana jee na kepiakana namüiwaʼa, alatüsü tia namüin na jimaʼaliikana jee na majayünnüükana jaʼitainna anain nakuwaʼipa, nnojoluin naya ayuulin jee kaʼwayuusere naya. Ayuuijeechi wanee wayuu jee mojeerü naaʼin nükatarüle noulia na waneinnua jee jülüjale naaʼin müin nümüiwaʼakai aaʼin.

•   «Keemaleesia maʼin nümüiwaʼale naaʼin wanee wayuu suulialeʼeya mojuin neʼe naaʼin [...]. Eeshi süpüla outuin wanee wayuu nükatalaale noulia na waneinnua jee nnojoire nia yootuin sümaa wayuu, tü nukuwaʼipakat suluʼu müin nia müsü aka saaʼin nukuwaʼipa wanee wayuu akamüjakai 15 sikariia kaʼiwai» (Vivek Murthy, director general de Salud Pública de Estados Unidos).

 Nnojotsü nücheküin chi kakumajalakai waya wakatalaain suulia wayuu. Shia nüchekaka Maleiwa talatajiraainjanain waya namaa wayuukana sümaa waʼaleewajaain namaa.

•   Tü sümakat tü Bibliakat: «Müsü naaʼin nüleʼeruʼu jooluʼu Jehová, chi Maleiwakai: “Anasü saaʼin tamüin kamaajanale chi wayuukai suulia nümüiwain”» (Génesis 2:18).

 Shia nüchekaka Maleiwa waʼaleewajaain nümaa. Nüküjain wamüin nürütkajeechin wanainmüin warütkaale nünainmüin (Santiago 4:8).

•   Tü sümakat tü Bibliakat: «Anakuwaʼipalii na wayuu ayaawatakana saaʼu choʼujaain chi Maleiwakai namüin süka neʼreerüin tü kasa anasü eejeetkat nuluwataapeena Maleiwa» (Mateo 5:3).

 Shia nüchekaka Maleiwa kottuin waya namaa na wayuukana sünain aʼwaajaa nia. Talatüsü maʼin waaʼin waaʼinrüle tia.

•   Tü sümakat tü Bibliakat: «Anasü kachipünaale waaʼin nakuwaʼipa na waneinnua süpüla aijiraainjanain waya jee süpüla waaʼinrüinjanain kasa anasü. Nnojoliinjana makatüin waya suulia tü outkajawaakat [...]. Shiainjaʼa anain watütüleʼerüle naaʼin na waneinnua waneʼewai wakua» (Hebreokana 10:24, 25).

 Pütüjeere sooʼomüin süchiki tü waaʼinrajatkat süpüla nnojoluin müin wamüiwaʼakai aaʼin, paashajeʼera tü pütchikat «Soledad en la era de la comunicación».