Nayaawata aaʼu na tottootkana soʼu 2023, choʼujaain nakaalinjain na wayuu makana namüiwaʼakai aaʼin süka shiain wanee ayuulii jouluipaka maʼin sainküin mma. ¿Kepisüche tia ayuuliikat?

•   «Wamüiwaʼale aaʼin jee wakatalaale noulia na wayuukana, eeshii süpüla ayuulin waya sutuma. Aneetpejeʼe waaʼin wachajaale sukuwaʼipa kaʼiwai süpüla waʼaleewajaain maʼin namaa na waʼaleewainkana» (Vivek Murthy, director general de Salud Pública chaa Estados Unidos). a

 Jaʼitairü wainmain wayuu nüʼütpaʼa wanee wayuu eesü süpüla süntajaain suluʼumüin naaʼin müin nümüiwaʼakai aaʼin. Aküjünapejeʼe suluʼu tü Bibliakat tü eekat süpüla waaʼinrüin süpüla nnojoluin müin wamüiwaʼakai aaʼin, ashajünüsü suluʼu anain maʼin aleewajiraale waya sümaa wayuu.

 Atüjainjachi pia süpüleerua pünüiki. Nnojoishii yootuinjana neʼe waya nümaa wanee waʼaleewain süchiki jamüin maʼin waaʼin, anasü jülüjale maʼin waaʼin tü nümakat wamüin. Kapürale waaʼin nukuwaʼipa wanee wayuu aleeweena maʼin waya nümaa.

•   Tü sümakat tü Bibliakat: «Nnojotsü shiainjatüin neʼe kapülain jaaʼin tü jukuwaʼipakat, kapülainjatiaʼaya jaaʼin nakuwaʼipa na waneinnua» (Filipos 2:4).

 Paʼaleewajaa namaa waneinnua wayuu. Anasü paʼaleewajaale namaa na wayuu miyoʼukana puulia, na joʼuukana puulia, na naatakana akuwaʼipa jee namaa na naatakana oumain.

•   Tü sümakat tü Bibliakat: «Shia anaka aluʼu kooʼomüinre saalin wayuu jüpüla» (2 Corinto 6:13).

 Pütüjeere sooʼomüin süchiki tü paaʼinrajatkat süpüla paʼaleewajaain sümaa wayuu, paashajeʼera tü pütchikat «Cómo saciar la sed de amistad».