¡EEJA MAʼIN PAAʼIN!

Nansülüin na científicokana soʼoorain sajaʼttajatkalü oʼu tü mmakat | ¿Jamüsüche sünüiki tü Bibliakat süchiki tia?

PIPEJAA SÜKA

Eneeroʼu 24 soʼu 2023, nansülüin na científicokana soʼoorain sajaʼttajatkalü oʼu tü mmakat, a alüʼütsü süpüla süntüin süseʼeruʼumüin aikat.

«Maatteʼuluinka, nansülüin na científicokana soʼoorain sajaʼttajatkalü oʼu tü mmakat pejeipa maʼin natuma süseʼeruʼumüin aikat. Naainjain shia sutuma tü atkawaa chakat Ucrania, tü wonpa akumajünakat otta sutuma suʼwanajaain maʼin sukuwaʼipa tü mmakat» (Servicio internacional de noticias de la agencia AFP).
«Naküjain na científicokana maatteʼuluinka nansülüin tü relookat 90 sekunto süpüla pejein shia süseʼeruʼumüin aikat. Alüʼütsü saaʼin namüin tü kaʼi süntajatkalü oʼu Armagedón» (ABC News).
«Waneinnua científico suluʼujeejanakana waneirua mma naküjain nnojotyüliain alatüin wanee kasa makalü aka saaʼin tü alatakat maaʼulu yaa saaʼu tü mmakat» (The Guardian).

¿Alüʼütsüche süpüla sajaʼttinnüin tü mmakat jee na wayuukana? ¿Ayoʼujaainjatche waaʼin sutuma tü alatüinjatkat mapeena? ¿Jamüsüche sünüiki tü Bibliakat süchiki tia?

Tü kasa eejeetkat mapeena

Saashin tü Bibliakat «ayateeria eein [tü mmakat] waneepia» otta eejeena wayuu kepieenakana «suluʼu tü mmakat süpüla kaʼikat süpüshuaʼa» (Eclesiastés 1:4; Salmo 37:29). Nnojoleerü najaʼttirüin na wayuukana tü mmakat.

Süküjapejeʼe tü Bibliakat sajaʼttinnüinjatüin waneirua kasa. Anuu tü sümakat: «Ajaʼttinneena na manoujainsaliikana» (1 Juan 2:17, TNM).

Pütüjaweere sooʼomüin süchiki tü sümakat tü Bibliakat süchiki sajaʼttüinjatüin tü mmakat, paashajeʼera tü pütchikat «¿Se acerca el fin del mundo? ¿Qué es el apocalipsis?».
Süpüla pütüjaain saaʼu tü sümakat tü Bibliakat süchiki joujeerüin sülatüin waneirua kasa saaʼu tü mmakat, paashajeʼera tü pütchikat «¿Cuándo será el fin del mundo?».

Nnojo shapaain waaʼin

Süküjain wamüin tü Bibliakat tü waaʼinrüinjatkat süpüla nnojoluin shapaain waaʼin mayaainjeʼe mojuin maʼin tü mmapaʼakat. Anuu tü süküjakat wamüin:

Süküjain tü Bibliakat tü anakat süpüla waaʼinrüin (2 Timoteo 3:16, 17). Pütüjawere saaʼu tü sümakat tü Bibliakat süchiki tü paaʼinrüinjatkat süpüla nnojoluin shapaain paaʼin mayaainjeʼe kapüleein tü alatakat pümüin, paashajeʼera tü pütchikat «Qué puedo hacer para no preocuparme tanto».
Süküjain tü Bibliakat weʼreenain kasa anasü mapeena (Roma 15:4, TNM). Süküjain tü weʼrüinjatkat maaʼulu yaa otta tü we’ruinjateetkat mapeena. Anasü waaʼin sutuma tia jaʼitasü sülatüin kasa keemasü maaʼulu yaa.

Süpüla pütüjaain saaʼu sooʼomüin süchiki tü sümakat tü Bibliakat, pikirajaa sünain tü Bibliakat namaa na aküjaliikana pütchi nüchiki Jehová.

a «Tü aküjünakat süchiki nansülüin na científicokana soʼoorain sajaʼttajatkalü oʼu tü mmakat, shiyaakuayaasü neʼe süpüla naapinnüin na wayuukana eein süpüla outuin wayuu sutuma tü wonpa akumajünakat maaʼulu yaa. Aküjünüsü tia süpüla jülüjain naaʼin na wayuukana tü kasa naaʼinrajatkat süpüla nanoutuin tü kasa eekat maaʼulu jee ayatüin katüin noʼu» (Bulletin of the Atomic Scientists [Boletín de Científicos Atómicos]).