¿Süküjainche tü Bibliakat tü waaʼinrajatkat süpüla wayaawatüin saaʼu nakuwaʼipa na waneinnua?
«Wayaawatüle saaʼu nakuwaʼipa na waneinnua eeshii süpüla anajiraain waya namaa» (Declaración de Principios sobre la Tolerancia de la Unesco, 1995).
Wanee wayuu nnojoikai ayaawatüin saaʼu nakuwaʼipa na waneinnua eeshii süpüla mojutuin naya nümüin otta nüʼürülain naya. Sutuma jülüjain naaʼin tia, eesü süpüla jaʼyain saaʼu nünüiki nüʼürülain naya saaʼu noumain, neʼiruku otta eein atkawaa sutuma.
Naatawaisü tü jülüjakat naaʼin na wayuukana nachiki na waneinnua. Naashin anainjatü namüin süpüshuaʼa tü naainjakat na wayuukana. Eepejeʼe na wanaawakana aaʼin sümaa tü sümakat tü Bibliakat: wanee wayuu eekai niyaawatüin saaʼu nakuwaʼipa waneinnua, kojutusü nümüin tü naneekakat wanaapünaa sümaa tü nanoujakalü anain otta tü nakuwaʼipakat mayaainjeʼe nnojoluin pansaain shia sümaa tü jülüjakat naaʼin.
¿Sükaalinjeenache waya tü Bibliakat maaʼulu süpüla wayaawatüin saaʼu nakuwaʼipa na wayuukana?
Tü sümakat tü Bibliakat süchiki tia
Süküjain tü Bibliakat wayaawatüinjatüin saaʼu sukuwaʼipa wayuu. Müsü sünüiki: «Anasü sütüjaale saaʼu wayuu süpüshuaʼa nnojoliin ichein jia süchiirua jünüiki» (Filipos 4:5). Süküjainña wamüin kapülainjatüin waaʼin sukuwaʼipa wayuu, kamaneeinjanain waya otta lotuinjatüin wakuwaʼipa namaa na waneinnua. Na aaʼinrakana tü sümakat tü Bibliakat, nooʼulaain naaʼinrüin na wayuukana tü anakat namüin mayaainjeʼe nnojoluin pansaain sümaa tü jülüjakat naaʼin.
Watüjaaitpa aaʼu sünainjee tü sümakat tü Bibliakat nüküjain Maleiwa tü nakuwaʼipainjatkat na wayuukana. Müsü shia: «Nüküjaitpasaʼa [Maleiwa] pümüin süchiki tü kasa anasükat» (Miqueas 6:8). Nüküjain Maleiwa suluʼu tü Bibliakat tü waaʼinrajatkat süpüla anainjatüin wakuwaʼipa (Isaías 48:17, 18).
Nnojoishii niʼitaain waya Maleiwa süpüla wayoujain na wayuukana. Müsü sünüiki tü Bibliakat: «Niaʼala neʼe Maleiwa eʼitaaka shikii tü aluwataanakalü anain otta nia kasalajanaka atuma saainjala wayuu […]. ¿Jamakaʼa piyoujataalaka wanee puwala? (Santiago 4:12). Nuuʼulaain Maleiwa nüneeküin wanee wayuu tü naaʼinrajatkat otta tü kasa niʼreetkat sünainjee tia (Deuteronomio 30:19).
¿Süküjainche tü Bibliakat kojutuinjatüin wayuu wamüin?
«Kojuta jümüin wayuu maʼleekalia», müsü tü Bibliakat (1 Pedro 2:17). Na aaʼinrakana tü sümakat tü Bibliakat kojutusü wayuu süpüshuaʼa namüin jaʼitairü naatain tü nanoujakalü anain jee tü nakuwaʼipakat (Lucas 6:31). Nnojotsü maluʼuluin tia anain namüin süpüshuaʼa tü sunoujakalü anain wayuu, tü namakat jee süpüshuaʼa tü naainjakat. Nnojotpejeʼe mojuin nanüiki namüin jee mojutuyaain naya natuma, nachajaain sukuwaʼipa süpüla kapülainjatüin naya naaʼin maʼaka naainjain shia Jesús.
Jamüsüjaʼa soʼu wanee kaʼi niʼraajüin Jesús wanee wayuu nnojotka wanaawain anoula nümaa. Chi wayuu kepiajiraakai sümaa nnojoishi niain chi suʼwayuusekai otta nnojotsü anain tia nümüin Jesús. Mayaainjeʼe müin sukuwaʼipa tü wayuukot, kojutusü shia nümüin (Juan 4:9, 17-24).
Maʼaka naaʼin Jesús, na anoujashiikana naküjain tü nanoujakalü anain namüin na wayuu aapajeekana tü pütchikat. Naainjain tia sümaa kojutuin naya namüin (1 Pedro 3:15). Süküjain tü Bibliakat namüin na anoujashiikana nnojoluinjatüin napüleeruain naaʼin na waneinnua süpüla naapaainjatüin sümaa tü namakat. Wanee wayuu eekai nuushikajaain süchiirua nukuwaʼipa Cristo «nnojoishi atkaainjachin saaʼujee wanee kasa, kamaneeinjachi sümüin wayuu süpüshuaʼa» jaʼitairü naatain tü jülüjakat naaʼin (2 Timoteo 2:24).
¿Süküjainche tü Bibliakat waʼürülainjatüin saaʼin wayuu?
Müsü sünüiki tü Bibliakat: «Anakajaʼa jüchajaale sukuwaʼipa süpüla anajiraainjanain jia jüpüshuaʼa» (Hebreokana 12:14). Na wayuu achajaakana anajirawaa, nnojotsü naʼürülain saaʼin wayuu otta nachajaain sukuwaʼipa süpüla anajiraain naya namaa na wayuukana. Naainjain tia wanaapünaa sümaa tü anakat namüin (Mateo 5:9). Süküjainña tü Bibliakat alinjanain wapüla na waʼünüükana. Jaʼitainna müliain waya natuma, kamaneeinjana waya namüin (Mateo 5:44).
Süküjain tü Bibliakat suluʼu Proverbios 6:16-19 nüʼürülain Maleiwa na müliakana atuma saaʼin wayuu otta üttüsü naaʼin nanain. Tü pütchi nüʼürülain ashajünakat yaʼaya, nnojotsü maluʼuluin nüʼürülain Maleiwa na wayuukana shia nüʼürülaka tü kasa mojusü naainjakat. Süküjainña tü Bibliakat motuin naaʼin Maleiwa naainjala na wayuu aʼwanajaweekana akuwaʼipa jee na aainjeekana tü nüchekakat, nükaalinjeein maʼin naya (Isaías 55:7).
Waneirua wetsiikulo aashajaaka süchiki wayaawatüinjatüin sukuwaʼipa wayuu otta kojutuinjanain naya wamüin
Tito 3:2: «Nnojoliinjana ichein naya süchiirua tü namakat otta anamiainjana naya waneepia sümüin wayuu».
Wanee wayuu nnojoikai ichein süchiirua tü nümakat, jimatüsü naaʼin naapapa nanüiki na waneinnua jaʼitairü naatüin suulia tü jülüjakat naaʼin otta kojutushii naya nümüin.
Mateo 7:12: «Jaaʼinra kasa anasü sümüin wayuu maʼaka saaʼinneein jümüin».
Wacheka achiki kojutuin waya atumawaa otta saapaanüin amaa tü wamakat. Pütüjeere sooʼomüin süchiki tia nikirajakalü anain Jesús, paashajeʼera tü pütchikat «¿Qué es la Regla de Oro?».
Josué 24:15: «Jüneeka jooluʼuleʼeya jaralinjachin jiʼyataain amüin».
Anajiraajeena waya namaa na wayuukana wooʼulaale naneeküin tü anakat saaʼin namüin.
Aluwataaushikana 10:34: ‹Nnojotsü koʼuin nukuwaʼipa Maleiwa sümüin wayuu›.
Nnojotsü mojuin nünüiki Maleiwa nachiki na wayuu naatakana oumain, naatakana eʼirukuu, süchiki tü naainjakat paala otta tü naainjakat maaʼulu. Na ashatakana nukuwaʼipa Maleiwa kojutusü namüin wayuu süpüshuaʼa.
Habacuc 1:12, 13: «Nnojotsü anain pümüin [Maleiwa] tü mojulawaakat».
Nnojoleerü nuuʼulaain Maleiwa naainjain kasa mojusü na wayuukana waneepia. Pütüjeere sooʼomüin pünaja tü videokot ¿Jamüsü nuuʼulaaka Maleiwa eein kasa mojusü otta müliaa?
Roma 12:19: «Nnojo pasalaweein jia [...], juuʼulaa tia nüpüla Maleiwa. Anuu sünüiki tü Karaloʼuta Nüchikimaajatkat: «‹Tayeechi pasalaaka atuma wanee kasa, tayeechi achekajaka›, müshi Jehová». a
Nnojotsü nüküjain Jehová namüin na wayuukana pasalaainjanain naya. Nüneeküitpa joujainjatüin lotuin sukuwaʼipa kasa nutuma. Pütüjeere sooʼomüin paashajeʼera tü pütchikat «¿Alguna vez se hará justicia en el mundo?».
a Jehová nünülia Maleiwa saashin tü Bibliakat (Salmo 83:18). Paashajeʼera tü pütchikat «¿Jarai chi kanüliakai Jehová?».
Eesüjaʼa kamalainjeerüle pümüin aashajeʼeraa tüü
SUNOUTEʼERÜIN NAKUWAʼIPA TÜ BIBLIAKAT
¿Eesüche süpüla shiyamütnüin tü üttaakalü aaʼin sutuma tü aijirawaakat?
Kapüleesü ooʼulawaa suulia üttaa aaʼin sünain wayuu. Anuupejeʼe nukuwaʼipa wanee judío otta wanee árabe ooʼulaakana suulia üttaa aaʼin.
WACHIKI
Puchunta puwaraijaanüin aaʼu
Pikirajaa wanee pütchi sümaka tü Bibliakat jee shiale piʼraajüin nakuwaʼipa na aküjaliikana pütchi nüchiki Jehová.
