1, 2. ¿Kasa alatawaika wamüin waʼyalajaka atuma?

 NNOJOISHI eeichin wanee wayuu maʼyalajüinkai. Eeshii waʼyalajüle sutuma talatüin waaʼin süka jemein wachoin, eeshiijaʼa waʼyalajüle sutuma sotuin waaʼin wanee kasa talataka atuma waaʼin jee shiale sutuma weʼrüin wanee wawala kakaliaichika nnojolin weʼrüin.

² Eepejeʼe waʼyalajüle sutuma müliain waaʼin, eeshii waʼyalajüle sutuma saainjünüin wanee kasa mojusü wamüin, sutuma wanain wanee ayuulii outasiroʼu jee sutuma nünaajaain wane wapüshi. Eesüjaʼa müle waaʼin maʼaka naaʼin Jeremías wanaa sümaa sajaʼttinnüin Jerusalén natuma na chejeʼewaliikana Babilonia. Anuu nünüiki: «Müsü akaʼa saaʼin sainña luwopu taʼwüira [...] aʼyalajüshi taya waneepia. Nnojoishi taya koʼutuin» (Lam. 3:48, 49).

3. ¿Jamüsü naaʼin Jehová niʼrüle müliain na aʼyataashiikana nümüin? (Isaías 63:9).

³ Nütüjaa aaʼulu Jehová waʼyalajüle sutuma tü kasa alatakat wamüin. Süküjain tü Bibliakat niʼrüin wamüliala otta naapüin wanüiki soʼu wachuntuin nümüin (Sal. 34:15). Nnojotpejeʼe niʼrüin neʼe Jehová jee naapüin wanüiki, eesü wanee kasa naaʼinraka wapüleerua süpüla nükaalinjain waya. Aishii maʼin waya nüpüla süka washin nia, mojusü naaʼin niʼrüle naʼyalajüin na nüchonniikana. Nukumajamaatüinjeseʼe sukuwaʼipa süpüla nükaalinjain waya (paashajeʼera Isaías 63:9).

4. (1) ¿Jaralii na wekirajaajeenakana achiki? (2) ¿Kasa wekirajaajeetka nüchiki Jehová?

⁴ Ashajünüsü suluʼu tü Bibliakat tü naaʼinrakat Jehová niʼrüle wanee aʼyataai nümüin aʼyalajakai sutuma tü kasa alatakat  nümüin. Wekirajaa süchiki tü alatakat sümüin Ana, nümüin David otta nümüin Ezequías, chi aluwataashikai. ¿Kasa alataka namüin naʼyalajaka atuma? ¿Kasa naaʼinraka Jehová napüleerua süpüla nükaalinjain naya? ¿Kasa watüjaka nanainjee mojule waaʼin saaʼinnüle wanee kasa mojusü wamüin otta waʼyalajüle maʼin?

PIʼYALAJÜLE SUTUMA MOJUIN MAʼIN PAAʼIN

5. ¿Jamüsü saaʼin Ana sutuma tü alatakat sümüin?

⁵ Alatüsü kasa mojusü sümüin Ana mojuka maʼin atuma saaʼin jee shiʼyalajaka maʼin atuma. Aʼürülaanüsü shia sutuma Peniná, tü suwalaʼatakat nutuma chi suʼwayuusekai jee müliasü maʼin saaʼin Ana sutuma. Wayuu marat Ana, akaajasaʼa Peniná kachonsü shia (1 Sam. 1:1, 2). Müsüjeseʼe meeʼerapalain maʼin Ana sutuma Peniná sünainjee tia. ¿Jamüsüje paaʼin piale alatüin amüin tia? Mojusü maʼin saaʼin Ana, aʼyalajüsü shia jee nnojotsü eküin shia (1 Sam. 1:6, 7, 10).

6. ¿Kasa saaʼinraka Ana süpüla anain saaʼin?

⁶ ¿Kasa saaʼinraka Ana süpüla anainjatüin saaʼin? Oʼunusü shia eemüin tü aʼwaajüleekat Maleiwa. Yalapa shia yala süʼütpaʼa soʼu tü aʼwaajüleekat, oʼuraajüsü shia nümüin Jehová sümaa shiʼyalajüin maʼin. Achuntusü maʼin shia süpüla jülüjain naaʼin tü alatakat sümüin. Anuu sünüiki: «Jülüja paaʼin mojuin maʼin saaʼin tü püchepchiakat» (1 Sam. 1:10₂, 11). Süküjain nümüin Jehová süpüshuaʼa tü alatakat sümüin. Mojukajasaʼa maʼin naaʼin Jehová süka niʼrüin shiʼyalajüin maʼin Ana.

7. ¿Jamüsü saaʼin Ana süchikijee süküjain nümüin Jehová tü alatakat sümüin?

⁷ ¿Jamüsü saaʼin Ana süchikijee süküjain nümüin Jehová tü alatakat sümüin jee süchikijee saapajüin nünüiki Elí chi nalaülakai na sacerdotekana? Anuu tü münakat süchiki: «Suʼunakalaka sümaa shiküin eküülü jee nnojotkalaka mojuin saaʼin süchikijee tia» (1 Sam. 1:17, 18). Anasü saaʼin Ana mayaainjeʼe nnojoluin süsünnaamaatüin suulia tü kasa alatakat sümüin. Suuʼulaain tü alatakat sümüin najapuluʼu Jehová. Niʼrüin Jehová müliain maʼin saaʼin, naapüin sünüiki. Naapaakalaka mapa sümüin kachoinjatüin shia (1 Sam. 1:19, 20; 2:21).

8, 9. ¿Jamüshii woʼunuinjanakaʼa sünain tü outkajawaakat saashin Hebreokana 10:24, 25? (Piirakaa sümüin tü ayaakuaakat).

⁸ Tü watüjakat sünainjee sukuwaʼipa Ana. ¿Alatüsüche pümüin maaʼulu wanee kasa piʼyalajaka atuma? Eeshijaʼa nünaajaale wanee püpüshi jee niale wanee paʼaleewain. Eesüjaʼa nnojorüle anain paaʼin sünain namawaa na waneinnua. Müle pukuwaʼipa, soto paaʼin sukuwaʼipa Ana. Oʼunusü shia suluʼumüin tü aʼwaajüleekat Jehová, nütütüleʼeraka Jehová saaʼin. Puʼunule sünain tü outkajawaakat, nütütüleʼereerü paaʼin Jehová, jaʼitairü mojuin maʼin paaʼin jee matchin paaʼin (paashajeʼera Hebreokana 10:24, 25). Aküjünüsü wamüin sünain tü outkajawaakat pütchi suluʼujeejatka tü  Bibliakat atütüleʼeraka waaʼin. Müle shia watuma nükaalinjeena waya Jehová süpüla nnojoluin jülüjain waaʼin kasa mojusü. Aneerü waaʼin jaʼitairü nnojoluin anoutaamaatüin tü alatakat wamüin.

⁹ Namülialüin waaʼin na wawalayuukana woʼunule sünain tü outkajawaakat otta naküjain wamüin alin waya napüla, atütülaasü waaʼin sutuma tia namakat wamüin (1 Tes. 5:11, 14). Anuu nünüiki wanee wawala anaajaakai aʼwayuuse, pürekutsoot pesiaat nia: «Aʼyalajayüiya taya süchiirua taʼwayuuse, eeshi taikalaale sutuʼupaʼa miichikat jee taʼyalajüle maʼin yala. Atütülaapejeʼe taaʼin toʼunule sünain tü outkajawaakat, jimatüsü taaʼin sutuma tü namakat tamüin na tawalayuukana, anasü maʼin nanüiki tamüin. Wanaa sümaa toʼunuin tepialuʼujee, mojusü maʼin taaʼin, shiasaʼa tantapa suluʼumüin tü outkajaaleekat anasü taaʼin». Nükaalinjeena waya Jehová nakajee na wawalayuukana müleka woʼunule sünain tü outkajawaakat.

10. ¿Kasa waaʼinrajatka süpüla washatüin sukuwaʼipa Ana mojule maʼin waaʼin?

¹⁰ Anasü saaʼin Ana wanaa sümaa süküjain nümüin Jehová tü alatakat sümüin. Eesü süpüla paaʼinrüin tü sümakat 1 Pedro 5:7, püküjain nümüin Jehová süpüshuaʼa tü kasa alatakat pümüin jee piʼitaain paaʼin sünain naapeerüin pünüiki. Anuu sünüiki wanee wawala oʼutunakai aaʼin suʼwayuuse natuma na kaʼruwarannuukana: «Mojushaatasü maʼin taaʼin, müsü yüülakai taaʼin sümaa mojuu aaʼin». ¿Kasa akaalinjaka tia wawalakat? Anuu sünüiki: «Achuntusü taya nümüin Jehová chi Tashikai. Nümülialüin taaʼin toʼuraajawaipa nümüin. Eesü nnojorüle tatüjain saaʼu jamüinjatüin tanüiki nümüin, niyaawatapejeʼe saaʼu tü taküjeekat nümüin. Wanaa sümaa mojuin maʼin taaʼin jee shapaain maʼin taaʼin tachuntuin jimatüinjatüin taaʼin nutuma. Anasü taaʼin, jimatüsü taaʼin otta katchinsü taaʼin nutuma». Püküjale nümüin Jehová tü alatakat pümüin, niyaawatüin saaʼu jamüin paaʼin. Nütüjaa aaʼu tü alatakat pümüin otta niyaawatüin saaʼu jamüin paaʼin. Aneerü paaʼin otta jimateerü paaʼin nutuma Jehová, mayaainjeʼe nnojoluin süsünnaʼaleein puulia tü alatakat pümüin (Sal. 94:19; Filip. 4:6, 7). Naapeerü kasa anasü pümüin saaʼu püchecherüin paaʼin (Heb. 11:6).

PIʼYALAJÜLE SUTUMA TÜ KASA MOJUSÜ AAINJÜNAKAT PÜMÜIN

11. ¿Jamüsü naaʼin David sutuma tü kasa mojusü aainjünakat nümüin?

¹¹ Kataiwaʼaya noʼu David, wainma tü kasa mojusü alatakat nümüin niʼyalawaika atuma. Wainma na aʼürülaakana nia, eeshii na nüpüshikana jee naʼaleewainyuu aainjakana kasa mojusü nümüin otta nnojoliin waneepiain naya nümaa (1 Sam. 19:10, 11; 2 Sam. 15:10-14, 30). Anuu wanee pütchi nüshajaka David soʼu sülatüin wanee kasa nümüin: «Matsüinsat taaʼin sutuma miyoʼuin süsanalia taaʼin. Chutsü maʼin tooʼula sutuma taʼwüira saʼwai, maaʼatsü aka saaʼin wüin eekai palatüin». ¿Jamüsüche makaʼa naaʼin David? Anuu nünüiki: «Müshi moʼupaʼakai taaʼin natuma na müliakana atuma taaʼin» (Sal. 6:6, 7). Aʼyalajüshi maʼin David sutuma mojuin maʼin naaʼin saaʼujee tü kasa mojusü aainjünakat nümüin.

12. ¿Kasa niyaawataka maʼin aaʼu David saashin Salmo 56:8?

¹² Mayaainjeʼe niʼrüin maʼin müliaa David, nütüjaa aaʼu alin maʼin nia nüpüla Jehová. Nüküjain David naapeerüin Jehová tü niʼirakat (Sal. 6:8). Soʼu wanee kaʼi nüshajüin wanee pütchi anaka maʼin suluʼu Salmo 56:8 (paashajeʼera). Waashajeʼerapa tia pütchikat, wayaawata aaʼu maʼin alin waya nüpüla Jehová otta kapülain waya naaʼin. Nüküjain David  müin niʼitaakai saaʼin Jehová tü nüʼwüirakat suluʼu wanee maraaja otta suluʼu wanee karaloʼuta. Niyaawata aaʼu David nütüjaain saaʼu chi Nüshi iipünaajachikai tü alatakat nümüin jee jamüin naaʼin sutuma tia.

13. ¿Kasa atütüleʼereetka waaʼin mojule waaʼin sutuma wanee kasa mojusü aainjünaka wamüin? (Piirakaa sümüin tü ayaakuaakat).

¹³ Tü watüjakat sünainjee nukuwaʼipa David. ¿Mojusüche paaʼin sutuma pimeejünüin jee sutuma saainjünüin kasa mojusü pümüin? ¿Mojusüche paaʼin sutuma piamain nuʼupünaa wanee paʼaleewain? ¿Mojusüche paaʼin sutuma kawalaʼatain pia sutuma puʼwayuuse jee shiale suuʼulaain puulia pümüraajüin? ¿Yüülasüche paaʼin sutuma nuuʼulaain suulia aʼyatawaa nümüin Jehová wanee wayuu aikai püpüla? Anuu nünüiki wanee wawala kawalaʼatakai sutuma nuʼwayuuse: «‹¿Jamüsüche sülatakaʼa tamüin tia?›, maʼwaishi taya. Jashichiwaishi taya sümaa mojuin maʼin taaʼin, jülüjawaisü taaʼin nnojoluin kasain anain apüla taya». ¿Kasa atütüleʼereetka paaʼin mojule paaʼin sutuma wanee kasa mojusü aainjünaka pümüin? Anasü jülüjale paaʼin nnojoleechin nüpütüin pia Jehová pümüiwaʼa. Anuu süpüshi tü nümakat chi wawalakai: «Aisü maʼin nümüin wanee wayuu nimeejünüle sutuma wanee wayuu aika maʼin nüpüla». Nnojotpejeʼe naaʼinrüin Jehová tia. Nnojoleechi niyüülajüin chi wayuu waneepiakai nümaa (Sal. 37:28). Soto paaʼin sülanaʼaleein paalin nüpüla Jehová suulialeʼeya tü paalinkat nüpüla wanee wayuu. Mayaainjeʼe alin maʼin pümüin tü aainjünakat pümüin, ayatüshia kojutuin pia nümüin Jehová (Roma 8:38, 39). Nnojo motuin paaʼin alin maʼin pia nüpüla Jehová, jaʼitaichi mojutuin pia sümüin wayuu.

14. ¿Kasa watüjaaka aaʼu sünainjee tü sümakat Salmo 34:18?

¹⁴ Müliale paaʼin sutuma pimeejünüin, sütütüleʼereerü paaʼin tü nümakat David suluʼu Salmo 34:18 (paashajeʼera). Tü aküjüneekat sükajee tü pütchikat «na mojukana aaʼin», eeshii nayale «na nnojoliikana aʼatapajüin kasa anasü» saashin wanee karaloʼuta. ¿Kasa naaʼinraka Jehová napüleerua na wayuu makana aaʼin? Saashin Salmo 34:18, nnojoishi wattaluʼuin Jehová noulia na mojukana aaʼin sutuma nemeejünüin jee shiale sutuma saainjünüin kasa mojusü namüin. Müshi Jehová maʼaka naaʼin wanee wayuu amülialaakai naaʼin naalin nüchon, nüpataain nia jee nümülialüin naaʼin niʼrapa niʼyalajüin. Mojusü naaʼin Jehová niʼrüle müliain waya, nükaalinjeein jee nümülialeein waaʼin. Wachechera waaʼin soʼunnaa weʼrüin müliaa süka nüküjain wamüin Jehová tü kasa anasü naapeetkat wamüin mapeena (Is. 65:17).

 PIʼYALAJÜLE SUTUMA SHAPAAIN MAʼIN PAAʼIN

15. ¿Kasa alataka nümüin Ezequías niʼyalajaka maʼin atuma?

¹⁵ 39 nuuyase Ezequías chi aluwataashikai saaʼu Judá soʼu ayuulin nia. Nüküjain Jehová nümüin nükajee Isaías outajachin nia sutuma tia ayuuliikat (2 Rey. 20:1). Aʼyalajüshi maʼin Ezequías naapapa tü nümakat Jehová. Achuntushijeseʼe nia kaalinwaa nümüin Jehová (2 Rey. 20:2, 3).

16. ¿Jamüsü naaʼin Jehová otta kasa naaʼinraka nüpüleerua Ezequías naapapa nünüiki jee niʼrapa nia sünain niʼyalajüin maʼin?

¹⁶ Naapapa Jehová nünüiki Ezequías otta niʼrapa nia aʼyalajüin maʼin, amülialaasü naaʼin naalin. Anuuka nünüiki nükajee Isaías: «Taapüin pünüiki, teʼrüin pia sünain piʼyalajüin maʼin. Aawalaajeechi pia tatuma». Amülialaasü naaʼin Jehová naalin Ezequías. Nüküjain nümüin nnojolinjachin nia outuin otta nuʼtteʼerüinjanain na chejeʼewaliikana Jerusalén suulia jamajüin naya natuma na chejeʼewaliikana Asiria (2 Rey. 20:4-6).

17. ¿Kasa naaʼinraka Jehová süpüla naaʼinmajüin waya soʼunnaa ayuulin waya? (Salmo 41:3; piirakaa sümüin tü ayaakuaakat).

¹⁷ Tü watüjakat sünainjee nukuwaʼipa Ezequías. ¿Kasa eeka süpüla paaʼinrüin mepire tü ayuulii pünainkat? Püküja shia nümüin Jehová, jaʼitaichi aʼyalajüin maʼin pia nümüin. Saashin tü Bibliakat «nia kanainjeejachikai tü aliikalü apüla wayuu jee nia chi amülialakai saaʼin wayuu». Nümülialeerü waaʼin Jehová soʼunnaa tü kasa mojusü alatakat wamüin (2 Cor. 1:3, 4). Nnojoleerü nüsünneʼerüin woulia Jehová süpüshuaʼa tü kasa mojusü alatakat wamüin, watüjaapejeʼe saaʼu naaʼinmajeenain waya soʼunnaa ayuulin waya (paashajeʼera Salmo 41:3). Naapeerü wamüin tü nüpülainkat süpüla katchin waaʼin, süpüla kekiin maʼin waya otta süpüla jimatüin waaʼin (Prov. 18:14; Filip. 4:13). Nüküjainña wamüin najaʼttireerüin soʼu palitchoin kaʼi tü ayuuliikat (Is. 33:24).

18. ¿Jarat tü wetsiikulo atütüleʼerakat paaʼin soʼunnaa tü kasa mojusü alatakat pümüin? (Paashajeʼera tü pütchikat « Wetsiikulo atütüleʼereetka waaʼin»).

¹⁸ Amülialaasü naaʼin Ezequías sutuma tü nümakat Jehová nümüin, amülialaajeeria waaʼin maaʼulu sükajee tü nüküjakat wamüin Jehová suluʼu tü Bibliakat. Nüshajirala shia süpüla sütütüleʼerüin waaʼin soʼunnaa tü kasa mojusü alatakat wamüin (Roma 15:4). Eesü wanee wawala kepiaka chaa África Occidental, aʼyalajawaisü shia süka ayuulin shia sutuma cáncer. Anuu sünüiki: «Tü wetsiikulo atütüleʼerakat maʼin taaʼin shia Isaías 26:3. Mayaainjeʼe mepin wamaʼana tü ayuuliikat, jimateerü waaʼin nutuma Jehová otta wachechereerü waaʼin soʼunnaa ayuulin waya». ¿Jarat tü wetsiikulo atütüleʼerakat paaʼin soʼunnaa tü kasa mojusü alatakat pümüin jee soʼunnaa shapaain maʼin paaʼin?

19. ¿Kasa naapeetka wamüin Maleiwa wachecherüle waaʼin?

 ¹⁹ Alüʼütsü maʼin süpüla sajaʼttüin tü kasa mojusükat, müsüjeseʼe sülatüin kasa mojusü wamüin maaʼulu yaa waʼyalajaka atuma. Niʼrüin Jehová wamüliala soʼu waʼyalajüin otta amülialaasü naaʼin waalin maʼaka sümülialaain naaʼin saalin Ana, naalin David otta naalin Ezequías, chi aluwataashikai. Nütüjaa aaʼu Jehová süpüshuaʼa tü kasa alatakat pümüin, tü piʼyalajawaikalü atuma. Sülatapa kasa mojusü pümüin, püküja shia nümüin Jehová. Nnojo pükayalaain noulia na wawalayuukana, miyoʼu maʼin paalin napüla. Ayataʼaya pikirajaain sünain tü Bibliakat süpüla nümülialüin paaʼin Jehová, aneerü pukuwaʼipa nutuma ayatüleʼeya püchecherüin paaʼin. Meerü nülaʼajaakai saaʼin Maleiwa waʼwüira soʼu palitchoin kaʼi (Apoc. 21:4). Suluʼupa waya tü mma jeketüinjatkat, nnojoleena waya aʼyalajüin sutuma kasa mojusü, aʼyalajeena waya sutuma talataa aaʼin.