Joʼuushi taya soʼu juyakat 1927 chaa suluʼu wanee pueulo pejeka sünain Chicago (Illinois, Estados Unidos). Jaʼraishii süchonnii tü teikat nümüin chi tashikai. Tü epayaakat shia Jetha, süchikijee nia Don, tayaka joʼuuin nüchikijee, joʼuuka mapa Karl jee shiaka sajaʼttiain Joy. Aʼyataweeshii maʼin waya nümüin Jehová süka süpüshuaʼa waaʼin. Oʼunusü Jetha sünain tü piantuakat ekirajawaa sutuma tü Ekirajaaleekat Galaad soʼu juyakat 1943. Ounejaanüshii na wane tawalayuukana süpüla aʼyatawaa suluʼu tü Weteet chajatkat Brooklyn (Nueva York). Ounejaanüshi Don soʼu juyakat 1944, Karl soʼu 1947 otta Joy soʼu 1951. Saaʼujee anain maʼin nakuwaʼipa na kachooinkana taya jee na tawalayuukana, takooʼomüinreein taʼyataain nümüin Jehová.

Kamalainpuʼusü namüin na kachooinkana taya aashajeʼeraa tü Bibliakat jee aishi Maleiwa napüla. Nekirajüin waya sünain tia. Oʼunushi chi tashikai chaa Europa sünain tü kanüliakat Primera Guerra Mundial. Nnojotsü kasajatüin nümüin tü iküleesiakalüirua nüleʼejapa. Talatüsü maʼin saaʼin tü teikat süka nüleʼejüin nüchikuaʼa. «Karl, jooʼuya wamaa sünain outkajawaa eere tü iküleesiakat maʼaka waaʼinrapuʼuin shia», sümaka nümüin. «Teʼikajaajeena neʼe jia, nnojoipejeʼe taya ekeroluinjachin», nümaka sümüin. «¿Jamüshi nnojoikaʼa pikerotüinjachin?», sümaka nümüin. «Wanaa sümaa chajachin taya sünain tü atkawaakat, teʼrüin waneinnua shikiipüʼü iküleesia oʼuraajüin napüleerua na surulaatkana, naaʼinrüinña tia na wane shikiipüʼükana tü iküleesiakalüirua mayaainjeʼe wanaawain tü nanoujakalü anain. ¿Jaraliiche na nükaalinjeenakana Maleiwa?», nümaka sümüin.

Chapa tü teikat suluʼu tü iküleesiakat, antüshii piamashii aküjalii pütchi nüchiki Jehová wepialuʼumüin. Naapaka nümüin chi tashikai tü piamasükat karaloʼuta kanüliaka Luz. Aküjünüsü suluʼu tia karaloʼutakalüirua süchiki Apocalipsis, tü karaloʼuta suluʼujeejatkat tü Bibliakat. Naapaaka chi tashikai tia karaloʼutakalüirua, shiʼrapa tü teikat tia, saashajeʼeraka shia. Saashajeʼeraka sünain wanee periódico süchiki suunejaanüin wayuu sünain wanee outkajawaa eere shikirajünüin wayuu sünain tü Bibliakat sükajee tia karaloʼutakat jee suʼunaka sünain. Eejatü wanee wayuu jaʼapüirü süntapa chaʼayaa, shiiʼiyataka tü teikat tia karaloʼutakalüirua sümüin tia wayuukot: «¿Ekirajünüsüche wayuu sükajee tüü yaʼayaa?», sümaka sümüin. «Aa pikerota tachonchee», sümaka tü wayuukot sümüin. Wanee semaana süchikijee tia, sümaaka taya namaa na tawalayuukana. Nnojoishii waya ooʼulaain suulia outkajawaa soʼujeʼereeya tia.

Ekirajüshi wanee wawala sünain wanee outkajawaa jee nuchuntaka tamüin taashajeʼerüin Salmo 144:15  eere sümüin: «Talatüsü naaʼin na aʼyataakana nümüin Jehová». Kamalainsü tamüin tia pütchikat sümaʼaleeya piamasü wetsiikulo: 1 Timoteo 1:11 otta Éfeso 5:1 eere sümüin niain Jehová chi Maleiwa talatakai aaʼin otta anain washatüle nukuwaʼipa. Tayaawata aaʼu talatüinjatüin taaʼin sünain aʼyatawaa nümüin Jehová otta kojutuinjatüin tamüin taaʼinrüin shia. Shiaʼaya taaʼinraka tia.

Tü outkajaalee pejekat sünain wepia chajatü shia Chicago, eetaasü maʼaka 32 kilómetro oʼunushi. Mayaainjeʼe kaʼyatüin shia ayatüshiʼiya waya outkajaain jee wainma kasa watüjaka sünainjee tü Bibliakat. Sotusü taaʼin tü alatakat soʼu wanee kaʼi, shiyalerüin sajapü Jetha süpüla susoutuin shiʼipajee tü asakinnakalü anain. «¿Jamüsüche nnojotkaʼa tayalerüin tajapü sümaa tatüjaain saaʼu tia süküjakat?», müshi taya taleʼeruʼu taapapa sünüiki. Ekirajaʼawaishi taya sünain tü ekirajaanajatkat sünain tü outkajawaakat jee asoutawaishi taya shiʼipajee tü asakinnakalü anain suluʼujeʼereʼeya tia. Akooʼomüinraasü tanoula namaʼaleeya na tawalayuukana. Woutiisaka taya soʼu juyaka 1941.

Sotusü taaʼin wanee outkajawaa miyoʼu aainjünakat soʼu juyakat 1942 chaa Cleveland (Ohio). Wainma na wayuu aapajakana tia pütchikat suluʼupünaa teleepono. Kepiashii naya suluʼu waneirua pueulo chakat Estados Unidos. Peje sünain eere saainjünüin tü outkajawaakat, nakumajüin na wawalayuukana eeinjanale natunkapünaain waneinnua wawalayuu. Yalajana waya makatüin namaa. Ayatayülia eein tü atkawaa kanüliakat Segunda Guerra Mundial soʼu tia. Aʼwainmalaashii na aʼürülaakana nanain na Aküjaliikana pütchi. Shiasaʼa saʼwai, nanaajaain nekemionse na wawalayuukana sümaa chain shiʼipapaʼa anooipaʼa natuma. Eejanaʼaya wawalayuu suluʼu tia kemionkalüirua süpüla jülüjain naaʼin süntüle wayuu wanainmüin. Sülatüle tia nachuwajaamaatüin suluusain tü kemionkat otta keeʼirasü natuma. Naaʼinrajatüle tia na wawalayuukana, oʼunamaatüshii waneinnua wawalayuu süpüla nakaalinjain waya. Jülüjaka taaʼin yapajüin na aʼyataashiikana nümüin Jehová sülatalaʼa sümüle wanee kasa. Nnojotpejeʼe kasain alatüin soʼu tia, jimatüsü taaʼin sünain atunkaa soʼu tia.

Maʼaka jeʼra juya süchikijee tia jülüjasü taaʼin nnojoluin mmoluin saaʼin otta shapaain saaʼin tü teikat sünain tia outkajawaakat miyoʼu, shiʼitaain maʼin saaʼin nünain Jehová otta nanain na wawalayuukana. Nnojoleerü motuin taaʼin tü saaʼinrakat.

Süpülapünaa tü outkajawaakat miyoʼu pürekutsootsü rekulaat tü teikat. Sünain tia outkajawaakat, jülüjawaisü saaʼin tü pütchi napülajatkat na aʼyataakana waneepia nümüin Jehová. Wopuluʼupa waya, «ayateesü pürekutsoolüin taya, ¿jamüinjatkaʼa sukuwaʼipa süpüla tekeraajüin tü kasa taaʼinrajatkat miichipaʼa?», müsü tü teikat. Süsakiraka waya eere süpüla wakaalinjain shia. «Aa», wamaka. Suluwataaka waya sünain epitajaa waneirua kasa miichipaʼa süpülapünaa wekaain watta maalü. Woʼunapa sünain koleejia, sünaʼlawalin wulere watuma tü miichipaʼakat jee sujuʼitaka mapa sünain aküjaa pütchi. Mayaainjeʼe wainmain tü kasa saaʼinrapuʼukat tü teikat, saaʼinmajüin waya waneepia. Waleʼejapa sünainjee koleejia, yalawaisü shia wamaa otta eeshii woʼunapuʼule sünain aküjaa pütchi sümaa. Wayaawatakalaka saaʼu tü naaʼinrajatkat na pürekutsootkana.

Pürekutsootshi taya poloopa aipiruamüin touyase. Manoujainsai chi tashikai soʼu tia, nütüjaweepejeʼe saaʼu jamüin takuwaʼipa sünain aküjaa pütchi. Taküjaka nümüin tachajaain maʼin sukuwaʼipa süpüla tekirajüin wayuu sünain tü Bibliakat, nnojotpejeʼe jaralüin tekirajüin. Yüütaka nia. «¿Ekirajaweeshi pia tamaa sünain tü Bibliakat?», tamaka nümüin mapa. Jülüjaa müsü naaʼin tü tamakat nümüin, «¿Jamataalainjachika nnojoika  tekirajaainjachin pümaa?», nümaka mapa tamüin. Niaichipaka chi tashikai chi palajachikai tekirajüin sünain tü Bibliakat. Talatüsü maʼin taaʼin sutuma.

Ekirajaashii waya sünain tü Bibliakat sükajee tü karaloʼutakat «La verdad os hará libres». Shiʼipaʼaya wekirajaain, tayaawata aaʼu nükaalinjain taya chi tashikai süpüla tatüjain ekirajaa otta müsia süpüla tatüjain ekirajawaa sünain tü Bibliakat. Anuu nünüiki soʼu wanee ai süchikijee naashajeʼerüin tü pütchikat: «¿Jamüsü süpüla piyaawatüin saaʼu shiimainreje tü sümakat türa karaloʼutakat?». Nnojotpejeʼe tatüjaain saaʼu nüsakirüinjachin taya sünain tia. «Isasü tachiki tü tanüikinjatkat pümüin jooluʼu. Taküjeerü pümüin tia wekirajaapeena wachikuaʼa», tamaka nümüin. Taaʼinraka tia, tousütüin sünain waneirua wetsiikulo pansaaka sümaa tü nüsakirakalü anain taya. Sutumajee tia, atüjashi taya ekirajawaa jee yapajüshi taya süpüla tekirajüin nia. Akooʼomüinraasü tanoula otta müsia nunoula chi tashikai. Naaʼinrüin süpüshuaʼa tü nikirajaakalü anain jee woutiisaka nia soʼu 1952.

Oʼunushi taya miichipaʼajee poloopa akaratshimüin touyase. Misioneerosü Jetha a wanaa maʼin sümaa tia otta ounejaanüshi Don süpüla niʼyataain suluʼu Weteet. Teʼrüin talatüin maʼin naaʼin sünain aʼyatawaa nümüin Jehová. Tepirajaka tü karaloʼuta süpülajatkat aʼyatawaa suluʼu Weteet otta tü karaloʼuta süpülajatkat tü Ekirajüleekat Galaad. Taʼatapajüin niain Jehová aneeküin jalainjachin taʼyataain nümüin. Touneejanaka mapa suluʼumüin Weteet soʼu 1946.

Soʼunnaa taʼyataain suluʼu Weteet, wainma tü kasa taaʼinrakat jee wainma tü kasa tatüjakalü apüleerua. Atüjashi taya süpüleerua eʼinprimiijaa karaloʼuta otta aʼyatawaa sünain tü kanüliakat contabilidad otta ekirajünüshi taya sünain ayaʼlajaa waneirua kasa choʼujaaka sümüin Weteet otta sünain taluwataain waneirua kasa suluʼumüin waneirua mma. Ekirajünüshi taya sutuma Weteet soʼunnaa 75 juya. Tü kojutukat maʼin tamüin shia tü tatüjakat sünainjee aʼwaajaa Maleiwa wattaʼa maalü otta sünainjee waneirua pütchi suluʼuka tü Bibliakat.

Wainma kasa tatüjaka nünainjee Karl chi temüliakai. Antüshi nia soʼu 1947 suluʼumüin Weteet, atüjashi maʼin nia süpüleerua ekirajawaa otta anasü maʼin nutuma nikirajia wayuu sünain tü Bibliakat. Soʼu wanee kaʼi ekirajüinjachi taya, tachuntaka kaalinwaa nümüin Karl. Taküjain nümüin wainmain tü pütchi tekirajaakalü anain, isapejeʼe tachiki jamüinjatüin süküjia tatuma. «Joel, ¿jarat tü pütchi anakat maʼin pikirajüinjatka anain?», nümaka tamüin. Tayaawatamaataka saaʼu tü nüküjeekat tamüin, nnojoluin choʼujaain tekirajüinjachin süpüshuaʼa tü pütchi tantakalü anain. Shia jülüjainjatka taaʼin tü pütchi pansaakat sümaa tü tekirajüinjatkalü anain. Nnojoleerü motuin taaʼin tü naaʼinrakat Karl tapüleerua.

Talateere waaʼin sünain aʼyatawaa nümüin Jehová suluʼu Weteet, waaʼinmaainjatü maʼin tü aküjaakat pütchi.  Müle shia watuma, eʼreena waya kasa anasü atütüleʼereetkat waaʼin. Sotusü taaʼin tü alatakat soʼu wanee kaʼi, tojuʼitüin sünain aküjaa pütchi aipaʼa chaa Bronx (Nueva York). Ouyantüshii waya sümaʼanamüin wanee wayuu aapaakat tü karaloʼutakat Aapiria Wayuu otta ¡Eeja waaʼin! «Ekirajüshii waya wayuu sünain tü Bibliakat», wamaka sümüin. «Pikerota maa paashajaainjachire tamaa süchiki tü Bibliakat», sümaka tamüin tü wayuukat. Waashajeʼeraka otta wekirajaka shia sünain kojuyasü pütchi suluʼujeejatka tü Bibliakat aashajaakat süchiki nuluwataainjachin Maleiwa otta süchiki tü Paʼaraiisükat. Wanee semaana süchikijee tia, wayaawata aaʼu kamalain sümüin tü waküjakat sümüin. Suunejaaka na süpüshikana süpüla naapajüin tü pütchikat sümaa. Aʼyataasü shia mapa nümüin Jehová namaʼaleeya na süpüshikana.

Taneeküin kaʼwayuuseinjachin taya, alatapejeʼe poloo juya süpüla teʼraajüin tü taʼwayuusekat. ¿Kasa taaʼinraka süpüla tantüin sünain tü wawala anakat süpüla taʼwayuusein? Tachuntuin nümüin Jehová nükaalinjain taya jee tasakireʼerüin taaʼin kasain taaʼinrajatka kaʼwayuusepa taya.

Süchikijee tü outkajawaa miyoʼu aainjünakat soʼu juyakat 1953 suluʼu tü Estadio Yankees münakat, teʼraajüin wanee wawala kanüliaka Mary Aniol. Chajatü shia sümaa tü tawalakat sünain tü Ekirajüleekat Galaad. Misioneeroshii naya suluʼu wanee pueulo. Süküjapuʼuin tamüin Mary talatüin saaʼin sümaa tü shiʼyataainkat nümüin Jehová chaa Caribe otta süküjapuʼuin tamüin nachiki na wayuu shikirajakana sünain tü Bibliakat. Shiʼipaʼaya weʼraajiraain wayaawata aaʼu waʼyataweein nümüin Jehová waneepia. Müliashi taya shiiʼiree otta müsia shiaka müliasü shia teeʼiree. Kasaatka waya aaʼuriiroʼu soʼu juyakat 1955. Müsü shia maʼaka saaʼin wanee nüsülajala Jehová tamüin jee anasü maʼin sukuwaʼipa tapüleerua. Talatüsü saaʼin sünain aʼyatawaa nümüin Jehová jaʼitasü naatain tü aʼyatawaa aapünakat sümüin. Tütüsü maʼin shia, kapülasü saaʼin nakuwaʼipa na waneinnua otta saaʼinmaain maʼin aʼyatawaa nümüin Jehová (Mat. 6:33). Alapalaapuʼushii waya naaʼu na wawalayuukana soʼunnaa apünüin juya. Soʼu juyakat 1958, ounejaanüshii waya süpüla waʼyataain suluʼu Weteet.

Wainma kasa tatüjaka sünainjee Mary. Jekenapa waya sünain kasaalüü, weʼitaain wapüleerua waashajeʼerawalin maʼaka 15 wetsiikulo soʼukaiwai suluʼujee tü Bibliakat. Eeshi tayale aashajeʼerüin tü Bibliakat jee shiale Mary. Süchikijee waashajeʼerüin tia wetsiikulokot waküjain tü kamalainkat wamüin otta süchiki tü waaʼinrajatkat süpüla woonooin sümaa tia pütchikat. Süküjapuʼuin tamüin Mary tü sütüjakat sünainjee tü ekirajawaakat Galaad otta sünainjee misioneeroin shia. Sükajee tü sümakat tamüin, atüjashi taya süpüleerua ekirajaa otta atütüleʼeraa naaʼin na wawalayuu jieyuukana (Prov. 25:11).

Anaajaasü Mary soʼu juyakat 2013. Taʼatapajüin maʼin teʼrüinjatüin shia süchikuaʼa suluʼu tü mma jeketüinjatkat. Sümaʼainruʼu taʼatapajüin tia, ayateechia taya ekirajaain nüchiki Jehová otta müsia teʼitaain maʼin taaʼin nünain (Prov. 3:5, 6). Talatüsü taaʼin jülüjapa taaʼin tü naaʼinrajatkat na aʼyataashiikana nümüin Maleiwa paʼaraiisüpa tü mmakat. Nikirajeena waya Jehová sünain wainma kasa soʼu tia otta wainmeerü kasa watüjaka nüchiki. Nikirajüin taya Jehová jee tayaawata aaʼu alin maʼin taya nüpüla. Saaʼujee wainmain tü kasa naaʼinrakat Jehová tapüleerua, nnojoleerü motuin taaʼin tü naaʼinrakat tapüleerua.