EKIRAJAAYA 50
JAYEECHI 135 «Kekii maʼin pia tachonchee», müshi Jeʼwaa pümüin
Naaʼinrajatka na kachonshiikana süpüla kooʼomüin nanoula nachonnii
«[Jiyaawata] saaʼu anain maʼin tü nüchekakat Maleiwa, aneerü sukuwaʼipa wayuu sutuma jee loteerü maʼin sukuwaʼipa» (ROMA 12:2).
TÜ WATÜJEETKAT
Wekirajaajeerü anain sünain ekirajaayakat tüü tü naaʼinrajatkat na kachonshiikana süpüla naashajaain namaa nachonnii nüchiki Maleiwa otta süchiki tü sümakat tü Bibliakat, nakaalinjainjana naya süpüla kooʼomüin nanoula.
1, 2. ¿Kasa naaʼinrajatka na kachonshiikana nasakinnüle natuma nachonnii süchiki tü nanoujakalü anain?
EESHII na makana aʼyatawaain maʼin kachonle wanee wayuu. Kachonle pia pikirajüinja maʼin püchon süpüla kooʼomüin nunoula, talatüshi Jehová sümaa tia (Deut. 6:6, 7). Eeshijaʼa nüsakireechire pia püchon süchiki tü junoujakalü anain otta jamüin wayaawatüinjatkaʼa saaʼu tü anakat nümüin Jehová otta tü kasa mojukat nümüin.
2 Eesüjaʼa wainmajüle paaʼin nasakirüle pia püchon sünain tü junoujakalü anain. Choʼujaapejeʼe nasakirüinjanain na tepichikana süpüla kooʼomüin nanoula (1 Cor. 13:11). Nasakirüle pia püchon süchiki tü junoujakalü anain, nnojo wainmajüin paaʼin, pikiraja nia süpüla jülüjain naaʼin tü nümakat Maleiwa otta tü sümakat tü Bibliakat.
3. ¿Kasa wekirajaajeetka anain sünain ekirajaayakat tüü?
3 Wekirajaajeerü anain sünain ekirajaayakat tüü tü naaʼinrajatkat na kachonshiikana süpüla kanoulain nachonnii, süpüla nayaawatüin saaʼu tü anakat nümüin Jehová jee tü mojukat nümüin otta süpüla natüjain asoutaa saaʼu nanoula. Wekirajaajeerü anainña jamüin anaka nasakirüle na tepichikana otta süchiki waneirua kasa eeka süpüla jaaʼinrüin yootiraapa jia namaa jüchonnii süchiki tü junoujakalü anain.
PIKIRAJA NAYA SÜPÜLA KANOULAIN NAYA
4. ¿Kasa nasakirawaika anain na tepichikana otta jamüshii nasakirawaikaʼa sünain tia?
4 Nnojoishii kanoulain neʼe na tepichikana sünainjee kanoulain pia. Nnojoishii naya joʼuujiraain sümaa tia. Müshiijeseʼe nasakirüin sünain tüü: «¿Shiimainchejeʼe eein chi Maleiwakai? ¿Anasüche süpüla tanoujain sünain tü sümakat tü Bibliakat?». Süküjain tü Bibliakat jülüjainjatüin waaʼin wanee kasa otta wekirajaainjanain sünain süpüla watüjaain saaʼu shiimainrejeʼeya shia (Roma 12:1; 1 Tes. 5:21). ¿Kasa paaʼinrajatka süpüla pukooʼomüinrüin nanoula püchonnii?
5. ¿Kasa paaʼinrajatka süpüla nanoujain püchonnii sünain tü sümakat tü Bibliakat süka naaʼin namüiwaʼa? (Roma 12:2).
5 Pikiraja naya süpüla nachajaain pütchi nayaawateetka atuma shiimain tü sümakat tü Bibliakat (paashajeʼera Roma 12:2). Nasakirüle pia püchonnii pikiraja naya süpüla nachajaain tü pütchi natüjaweekalü aaʼu suluʼu tü karaloʼuta eekat wamaʼana maʼaka saaʼin Índice sünüliamaajatü karaloʼuta sukumajaka Watch Tower jee shiale Nachajaayainjatü pütchi na aküjaliikana pütchi nüchiki Jehová. Jikiraja naya süpüla nekirajaain sünain jamüin nümaʼanajeejatkat Jehová tü Bibliakat. Jüchajaa namaa tü pütchikat «Tü Bibliakat» otta «Nüshajirala Maleiwa» tü makat suluʼu tü karaloʼutakat Nachajaayainjatü pütchi na aküjaliikana pütchi nüchiki Jehová (1 Tes. 2:13). Anashii nekirajaale süchiki Nínive suluʼu tü karaloʼutairua eekat wamaʼana. Tia shia wanee pueulo sümaiwajatü chajatka Asiria. Sümaiwa paala naküjain na ekirajaakana süchiirua sukuwaʼipa tü Bibliakat nnojoluin eejatüin Nínive. Ousütünapejeʼe anain süchikanain Nínive, tia soʼunnaajatü tü juyakat 1850. Shiyaawatünaka aaʼu shiimain maʼin tü ashajünakat suluʼu tü Bibliakat (Sof. 2:13-15). Eeshiʼiya süpüla nekirajaain püchonnii süchiki tü pütchi aküjünatüjütkalia suluʼu tü Bibliakat süchiki sajaʼttinnajatüin Nínive otta nachajaain shia suluʼu tü pütchikat «Pütüjaa aaʼu tüü» ojuʼitaka suluʼu Aapiria Wayuu nowienpüroʼu soʼu 2021. Pikiraja püchonnii süpüla naʼwanaajireʼerüin tü pütchi nekirajaakalü anain suluʼu tü karaloʼutairua eekat wamaʼana sümaa tü ashajünakat suluʼu waneirua karaloʼuta kojutuka sümüin wayuu. Müle shia natuma akooʼomüinraajeerü nanoula sünain tü sümakat tü Bibliakat.
6. ¿Kasa jaaʼinrajatka süpüla nayaawatüin saaʼu jüchonnii süka naaʼin namüiwaʼa pansaain tü sümakat tü Bibliakat? (Piirakaa sümüin tü ayaakuaakat).
6 Pikiraja naya süpüla nayaawatüin saaʼu jamüin pansaaka tü sümakat tü Bibliakat. Eeshii süpüla naashajaʼawalin na kachonshiikana namaa nachonnii süchiki tü sümakat tü Bibliakat otta süchiki tü nanoulakat nünain Maleiwa. Pümaapa püchonnii eere süpünajünüin wunuʼulia suluʼu wanee museo jee shiale suluʼu Weteet eere shiiʼiyatünüin wanee kasa, anasü paashajaale namaa süchiki tü kasa akooʼomüinreetkat nanoula. Puʼunule suluʼu wanee museo eere shiiʼiyatünüin waneirua kasa sümaiwajannuu otta eere süküjünüin süchiki sukuwaʼipapala wayuu sümaiwa jee shiale piʼrüin tia suluʼupünaa internet, püküja namüin püchonnii jamüin pansaaka tia sümaa tü sümakat tü Bibliakat. ¿Natüjaa aaʼuche püchonnii süshajünüin nünülia Maleiwa sünain wanee ipa kanüliaka piedra moabita? Eetaasü maʼaka 3.000 juya sukumajünüin tia. Chasü tia ipakat suluʼu tü Museo Louvre chakat París (Francia). Achajaanüsü wanee ipa meematsü akaʼa saaʼin tia süpüla shiʼitaanüin suluʼu tü museo chakat eere sukumajünüin waʼyataain chaa Warwick (Nueva York). Sünain tia ipakat ashajünüsü nüchiki Mesá chi aluwataakai saaʼu Moab. Eʼrüijaashi nia wayumüin nümüin chi aluwataakai saaʼu Israel. Pansaasü tia sümaa tü sümakat tü Bibliakat (2 Rey. 3:4, 5). Akooʼomüinraajeerü nanoula püchonnii nayaawatüle saaʼu süka naaʼin namüiwaʼa shiimain otta pansaain tü sümakat tü Bibliakat (anasü paashajeʼerüle 2 Crónicas 9:6).
Pikiraja püchonnii sükajee tü kasa jiʼrakat suluʼu wanee museo süpüla nayaawatüin saaʼu süka naaʼin namüiwaʼa pansaain shia sümaa tü sümakat tü Bibliakat. (Paashajeʼera tü pütchikat 6).
7, 8. (1) ¿Kasa wayaawataka sünainjee anain maʼin sukumajia tü kasakalüirua? Püküja süchiki wanee kasa anaka maʼin sukumajia (piirakaa sümüin tü ayaakuaakat). (2) ¿Kasa eeka süpüla püsakirüin anain püchonnii süpüla nanoujain maʼin nünain Maleiwa?
7 Pikiraja naya süpüla jülüjain naaʼin tü kasa nukumalakat Jehová. Puwaraijaapa namaa püchonnii eere wüittuulin mmapaʼakat jee shiale jüpünajüin, piiʼiyata namüin sukuwaʼipa sukumajia wanee kasa anaka maʼin. Sutuma tia nayaawata aaʼu kekiin maʼin chi kakumalakai süpüshuaʼa tia. Ekirajaashii na científicokana süchiki sünoʼu tü kasa akumajünakat saaʼu tü mmakat. Naashin wanee científico kanüliakai Nicola Fameli ayaawajünawaisü sünoʼu wanee kasa akumajünaka, leeyaasü süpünoʼu tü sünacheinkat, la suceción de Fibonacci münüsü tia. Wainma tü kasa nukumalakat Maleiwa eere weʼrüin leeyaain sunoʼu tü sünakat maʼaka saaʼin tü kanüliakat galaxia, süta tü kanüliakat nautilo, eesü shia sünain süpana wunuʼu otta sünain tü kanüliakat girasol. a
8 Nekirajünapa na tepichikana suluʼu koleejia, ekirajüneena naya sünain anain maʼin sukumajia waneirua kasa. Jamüsüjaʼa sukumajia suuʼulia tü wunuʼuliakalüirua, anasü maʼin shia. Eweetayaa müsü tü sütünakat sünainjee tü suuʼuliakat. Eweetayaa müsü waneirua sütünachein sünainjee tü sütünakat, fractal münüsü tia. Müsia sukuwaʼipa sukumajia waneirua kasa eeka yaa saaʼu tü mmakat. ¿Jaraiche chi keʼitaalakai müinjatüin sukuwaʼipa? ¿Jaraiche chi anakai maʼin atuma sukuwaʼipa sukumajia tü kasa eekat saaʼu tü mmakat? Nasakirüle waneepia püchonnii sünain kasa eekai müin aka saaʼin tia, eesüjaʼa nayaawateerüle saaʼu nukumajalain Maleiwa süpüshuaʼa tü kasakalüirua (Heb. 3:4). Püsakira naya sünain tüü: «Nukumajaraleje Maleiwa waya, ¿talateetche waaʼin sünainjee waaʼinrüin tü nuluwataakalü anain waya?». Süchikijee tia eesüjaʼa püküjeerüle namüin suluʼuin tü Bibliakat tü yootokalü achiki jia.
NASA, ESA, and the Hubble Heritage (STScl/AURA)-ESA/Hubble Collaboration
Anasü maʼin sukumajia tü kasa chakalü iipünaa otta tü kasa yaakat saaʼu tü mmakat, ¿jaraiche chi Kakumalakai shia? (Paashajeʼera tü pütchikat 7 otta 8).
PIKIRAJA NAYA SÜPÜLA NAYAAWATÜIN SAAʼU TÜ ANAKAT NÜMÜIN JEHOVÁ OTTA TÜ MOJUKAT NÜMÜIN
9. ¿Jamüsü wainmajakaʼa naaʼin na tepichikana saaʼu tü sümakat tü Bibliakat?
9 Jülüjale naaʼin püchonnii jalouijeerüle namüin tü sümakat Bibliakat, piyaawata saaʼu jamüin jülüjaka naaʼin tia. Püsakira paaʼin sünain tüü: «¿Wainmajüsüche naaʼin tachonnii süka nnojoluin anain namüin tü sümakat tü Bibliakat süchiki tü kasa eekai anain otta eekai mojuin? ¿Shiataapa wainmajüin atuma naaʼin süka nnojoluin natüjaain saaʼu tü nanüikinjatkat nasakinnapa süchiki nanoula?». Wanee kasa kojuteetka atuma namüin tü sümakat tü Bibliakat süchiki tü anakat jee tü mojukat nümüin Maleiwa shia nekirajaale sünain tü karaloʼutakat Anainjatka atuma pukuwaʼipa waneepia. b
10. ¿Kasa paaʼinrajatka süpüla aleewain püchonnii nümaa Jehová?
10 Pükaalinja püchonnii süpüla aleewain naya nümaa Jehová. Sümaʼainruʼu pikirajaain sünain tü Bibliakat namaa püchonnii, püsakira naya sünain tü asakinnakalü anain suluʼujee tü karaloʼutakat Anainjatka atuma pukuwaʼipa waneepia otta pikiraja naya sükajee waneirua kasa suluʼujeejatka tia karaloʼutakat (Prov. 20:5). Suluʼu ekirajaayakat 8, aküjünüsü müin Jehová maʼaka naaʼin wanee waʼaleewain aküjakai wamüin tü waaʼinrajatkat suulia sülatüin wamüin kasa mojusü otta süpüla anain wakuwaʼipa. Süchikijee paashajeʼerüin tü sümakat 1 Juan 5:3 püsakira naya sünain tüü: «Süka niain Jehová wanee waʼaleewain aika apüla waya, ¿jamüshi woonooinjanakaʼa sümaa tü nümakat wamüin?». Eesüjaʼa mapüleere saaʼin pümüin tü püsakirakalü anain naya, nayaawateetpejeʼe aaʼu püchonnii alin naya nüpüla Jehová sünainjee nüchiaain naya (Is. 48:17, 18).
11. ¿Kasa paaʼinrajatka süpüla kojutuin namüin püchonnii tü sümakat tü Bibliakat? (Proverbios 2:10, 11).
11 Yooto pia namaa süchiki tü kasa anasü neʼreetkat naaʼinrüle tü sümakat tü Bibliakat. Paashajeʼerapa tü Bibliakat namaa püchonnii jee shiale tü aashajeʼennawaikat wattaʼa maalü, püküja namüin jamüin jalouika jümüin tü sümakat tü Bibliakat. Püküja namüin püchonnii jamüin aneetka nakuwaʼipa naʼyataaliire jee naküjale tü shiimainkat (Heb. 13:18). Püküja namüin nnojoleenain ayuulin maʼin naya otta talateerüin naaʼin noonoole sümaa tü sümakat tü Bibliakat (Prov. 14:29, 30). Müle shia putuma, kojuteerü namüin püchonnii tü sümakat tü Bibliakat (paashajeʼera Proverbios 2:10, 11).
12. ¿Kasa naaʼinraka wanee wayuu sümaa nuʼwayuuse süpüla kojutuin nümüin nachon tü sümakat tü Bibliakat?
12 Nüküjain Steve sümaa nuʼwayuuse tü naaʼinrakat süpüla niyaawatüin saaʼu chi nachon jimaʼaikai alin waya nüpüla Jehová sünainjee nüchiaain waya. Anuu nünüiki: «Wasakirüin nia sünain tüü: ¿Jamüsü nuchuntakaʼa wamüin Jehová kojutuinjatüin wamüin pütchikat tüü? ¿Jamüsü watüjaakaʼa saaʼu alin waya nüpüla Jehová sünainjee pütchikat tüü? ¿Kaseerü alataka pümüin nnojorüle paaʼinrüin shia?». Sünainjee müin tü nasakirakalü anain Ethan chi nachonkai, keeʼireeitpa naaʼin naaʼinrüin tü nümakat Jehová. Anuu nünüiki Steve: «Tü keeʼireekat waaʼin shia niyaawatüin saaʼu Ethan sülanaʼaleein maʼin sujutu tü sümakat tü Bibliakat suulialeʼeya tü sümakat wayuu».
13. ¿Kasa naaʼinrajatka na kachonshiikana süpüla naaʼinrüin nachonnii tü sümakat tü Bibliakat? Püküja süchiki wanee sukuwaʼipa.
13 Pikiraja püchonnii süpüla naaʼinrüin tü sümakat tü Bibliakat. Eesü suchuntunule namüin na tepichikana suluʼu koleejia naashajeʼerüinjatüin wanee karaloʼuta. Eesüjaʼa anale maʼin atumawaa tü münakat nachiki na aashajaanakana achiki suluʼu tia karaloʼutakat. Mayaainjeʼe naʼluwajiraain nakuwaʼipa otta katkaaraliin naya, eesüjaʼa anale maʼin atumawaa tü aküjünakat nachiki. Eeshii pümeenale amüin püchonnii naʼwanaajireʼerai tia aküjünakat sümaa tü sümakat tü Bibliakat (Prov. 22:24, 25; 1 Cor. 15:33; Filip. 4:8). Müle shia putuma aküjeena pütchi püchonnii namüin na ekirajakana naya suluʼu koleejia otta namüin na koleejiajiraakana namaa.
PIKIRAJA NAYA SÜPÜLA NASOUTUIN SAAʼU NANOULA
14. ¿Kasa kapüleeka nümüin wanee jintüi süpüla nüküjain namüin na waneinnua?
14 Eeshii mmorüle na tepichikana seema naküjain namüin na waneinnua süchiki tü nanoujakalü anain. Eesü kapüleere namüin yootuin naya namaa na waneinnua süchiki tü evoluciónkot. Mmotshii naya seema naküjain tia süka shiimain tü evoluciónkot naashin na wayuu ekirajakana suluʼu koleejia. ¿Kasa paaʼinrajatka süpüla shiimainjatüin namüin püchonnii tü nanoujakalü anain?
15. ¿Kasa naaʼinrajatka na tepichikana süpüla shiimainjatüin namüin tü nanoujakalü anain?
15 Pikiraja püchonnii süpüla shiimainjatüin namüin tü nanoujakalü anain. Nnojoishii japülinjanain na tepichikana saaʼu nanoujain nünain Maleiwa (2 Tim. 1:8). Wainma na científico ayaawatakana saaʼu nnojoluin sukumajaasüin neʼe sümüiwaʼa tü kasakalüirua. Nayaawata aaʼu eein chi kakumajalakai tü kasakalüirua süka anain maʼin sukumajia. Müshiijeseʼe nnojoluin nanoujain sünain tü kanüliakat evolución, tü ekirajünakalü maʼin anain suluʼu koleejia sainküin mmakat. Wanee kasa eeka süpüla naaʼinrüin na tepichikana shia nekirajaain maʼin süpüla nayaawatüin saaʼu jamüin shiimainkaʼa namüin sukumajuushin tü kasakalüirua. Müle shia natuma, katchinjeerü nanoula jee meimmoluinjeena naya saaʼu naküjain süchiki tia. c
16. ¿Kasa naaʼinrajatka na kachonshiikana süpüla nasoutuin nachonnii saaʼu nanoujain nünain Maleiwa? (1 Pedro 3:15; piirakaa sümüin tü ayaakuaakat).
16 Pikiraja püchonnii süpüla nasoutuin saaʼu nanoujain nünain Maleiwa (paashajeʼera 1 Pedro 3:15). Pikirajaa namaa sünain tü kanüliakat «¿Creación o Evolución?» suluʼuka jw.org sünain tü kanüliakat «Los Jóvenes preguntan» (alijunaikiruʼusü). Püsakira naya jameerüin nanüiki süpüla nanoujirüin na waneinnua sünain eein chi Maleiwakai otta juuʼulakaja jameerüin sukuwaʼipa jutuma. Püküja namüin nnojoliinjanain naaʼayajiraain namaa na waneinnua. Eere wanee wayuu achekakai tü pütchikat püma namüin mapüleeinjatüin nanüiki nümüin. Anuu tü eekat süpüla nümüin wanee wayuu: «Shia tanoujakalü anain tü kasa teʼrakat, nnojoishi teʼrüichin chi Maleiwakai». Anuuka joo tü eekat süpüla nümüin wanee jintüi anoujashi: «Jülüjataa paaʼin chale pia saʼaka mojuui. Piʼrüle wanee ishi akumajuushika süka ipa sümaa kaluʼuin shia wüin, ¿jülüjeetche paaʼin sukumajaasüin sümüiwaʼa tia ishikat? ¿Eetaapa chi kakumalakai shia?». Eerejeʼe chi akumajakai tia ishikat shialeekajaʼa tü kasakalüirua süpüshuaʼa, eeshijaʼa chi kakumalakai shia.
Nüküjapa pütchi chi jintüikai namüin na koleejiakana nümaa, anasü mapüleere nutuma süküjia tü pütchikat. (Paashajeʼera tü pütchikat 16 otta 17). d
17. ¿Kasa naaʼinrajatka na kachonshiikana süpüla naküjain pütchi nachonnii namüin na waneinnua? Püküja süchiki wanee kasa eeka süpüla naaʼinrüin wanee jintüi nüküjapa pütchi nümüin wanee wayuu.
17 Pikiraja püchonnii süpüla naküjain namüin na waneinnua tü sümakat tü Bibliakat (Roma 10:10). Nüküjainjachipa pütchi wanee jintüi nuuʼulakajüinjatü palajana tü nünüikinjatkat maʼaka nuuʼulakajüin nüshawajüin wanee joʼuu süpüla nukoyojüin. Shia anaka aluʼu yootule nia süka pütchi eekai mapüleein. Anuu tü eekat süpüla yootuin achiki wanee jintüi nümaa wanee wayuu: «Wainma na ingeniero akumajakana wanee kasa sünainjee nashatüin sukuwaʼipa tü kasa eekat saaʼu tü mmakat, ¿aashin müin? Anuu wanee video aashajaaka süchiki tia». Eesüjaʼa niiʼiyateerüle wanee video eekat suluʼu tü kanüliakat «¿Akumajaasüche kasa sümüiwaʼa? ¿Eetaapa chi kakumajalakai shia?». Süchikijee tia eeshi süpüla nüsakirüin chi wayuukai mayaa: «Nütüjale maʼin wanee científico süpüleerua nukumajüin wanee kasa sünainjee nüshatüin sukuwaʼipa tü kasa eekat saaʼu tü mmakat, ¿jarai chi kojutuleeinjachikai maʼin sünainjee tü kasa eekat saaʼu tü mmakat? ¿Chi ashatüshikai neʼe, niataapa chi kakumalakai shia?». Müle sukuwaʼipa nutuma chi jintüikai keeʼireejeerü naaʼin chi wayuu nüküjakai amüin pütchi nütüjain sooʼomüin.
AYATAʼAYA PIKIRAJÜIN NAYA SÜPÜLA KOOʼOMÜIN NANOULA
18. ¿Kasa naaʼinrajatka na kachonshiikana süpüla kooʼomüin nanoula nachonnii?
18 Wainma wayuu manoujainka nünain Jehová maaʼulu yaa (2 Ped. 3:3). Pikirajapa püchonnii sünain tü Bibliakat, pikiraja naya süpüla kojutuin namüin Nünüiki Maleiwa otta süpüla nayaawatüin saaʼu tü kasa anakat nümüin otta tü kasa mojukat nümüin. Püma namüin jülüjai naaʼin tü kasa nukumajalakat Jehová süpüla nayaawatüin saaʼu wanee kasa. Pikiraja naya süpüla nayaawatüin saaʼu tü pütchi süküjatüjütkalia tü Bibliakat, tü ekeraajüitpakat. Puʼuraaja namaa püchonnii otta puchunta napüleerua. Nükaalinjeena Jehová na kachonshiikana süpüla kooʼomüin nanoula nachonnii (2 Crón. 15:7).
JAYEECHI 133 Waʼyataa nümüin Jeʼwaa tepichiiwaʼaya waya
a Pütüjeere sooʼomüin, pünaja suluʼu jw.org tü videokot Las maravillas de la creación revelan la gloria de Dios (alijunaikiruʼusü).
b Sajaʼttüitpale nutuma püchon tü karaloʼutakat Anainjatka atuma pukuwaʼipa waneepia, pikiraja nia nüchikuaʼa sünain süpüshi tü ekirajaaya suluʼukat shiʼipa 3 otta 4. Aashajaasü tia süchiki tü kasa anakat nümüin Maleiwa otta tü kasa mojukat nümüin.
c Paashajeʼera tü pütchikat «Por qué creemos que hay un Creador», ojuʼitaka suluʼu ¡Eeja waaʼin!, settienpüroʼu 2006 otta suluʼu tü poyeetokot El origen de la vida, cinco cuestiones dignas de análisis (alijunaikiruʼusü). Pünaja waneirua video suluʼu jw.org suluʼu tü kanüliakat Tü münakat süchiki jamakuwaʼipalüin kasakalüirua süpüshuaʼa.
d SÜCHIKI TÜ AYAAKUAAKAT: Wanee jintüi anoujashi eeʼiyataka nümüin wanee jintüi kamalainkai amüin dron wanee video suluʼuka tü kanüliakat «¿Akumajaasüche kasa sümüiwaʼa? ¿Eetaapa chi kakumajalakai shia?».
