1. ¿Jamüsü saashajaanakaʼa maʼin achiki tü pankat suluʼu tü Bibliakat?

 NEKAPUʼUIN maʼin tü pankat na wayuu aashajaanakana achiki suluʼu tü Bibliakat (Gén. 14:18; Luc. 4:4). Aashajaana maʼin achikit tü pankat suluʼu tü Bibliakat, eesü pan sümüle sümüin tü eküütkat süpüshuaʼa (Mat. 6:11; Aluw. 20:7). Wainma kasa pülasü naainjaka Jesús maʼaka saaʼin wainmajaain nutuma tü pankat (Mat. 16:9, 10). Wekirajaajeerü anain tia suluʼu Juan kapiitulo 6 otta tü watüjakat sünainjee.

2. ¿Joujatü choʼujaain eküülü sümüin wainma wayuu?

² Soʼu wanee kaʼi mapüsajüshii maʼin na nikirajüinkana Jesús süchikijee naküjain pütchi. Nülatüinjeseʼe namaa tü palaakat Galilea suluʼu anuwa, nümaashii naya eere yüütüülin süʼütpaʼa tü pueulokot Betsaida, eemeraainjana naya (Mar. 6:7, 30-32; Luc. 9:10). Süntapaataka wainma wayuu nünainmüin Jesús, kamaneeshi Jesús namüin, nüküjaka namüin niainjachin aluwataain Maleiwa otta niiyajaka wayuu eekai ayuulin. Süka motsoin tü kaʼikat, jülüjasü naaʼin na nikirajüinkana Jesús kasainjatüin neküin naya wayuukana. Eeshii na alüʼüjakana neküin, wainmapejeʼe na ayaʼlajüinjanakana eküülü suluʼu wanee pueulo (Mat. 14:15; Juan 6:4, 5). ¿Kasa naaʼinraka Jesús napüleerua naya wayuukana?

WAINMAJAASÜ PAN NUTUMA JESÚS SHIKÜINJATÜ WAYUU

3. ¿Kasa naaʼinraka Jesús napüleerua na wayuukana? (Piirakaa sümüin tü ayaakuaa sünainkat süta tü rewiisütakat).

³ Anuu nünüiki Jesús namüin na aluwataaushikana: «Anashii makatüle naya, jüchajaa wanee kasa nayaaluʼu» (Mat. 14:16). Wainmapejeʼe na wayuu aapünüinjanakana amüin eküülü. Eeshii 5.000 tooloyuu, eejana jieyuu, tepichi, 15.000 nayakana  napüshuaʼa (Mat. 14:21). Anuujeseʼe nünüiki Andrés: «Anii wanee jintüi kamaʼanakai jaʼraisü pan aainjuushi süka cebada otta piamashiichen jime. Nnojoleetpejeʼe shia asetaain namaa na wayuukana» (Juan 6:9). Aainjuushi süka cebada tia pankat, shia shikaka maʼin wayuu soʼu tia otta jayasü maʼin shia. Eesüjaʼa shiʼichiijuushire tia jimekat. Nnojoleerü asetaain tia eküütkat namaa na wayuukana jama wainmain maʼin naya.

4. ¿Kasa watüjaka sünainjee tü aküjünakat suluʼu Juan 6:11-13? (Piirakaa sümüin tü ayaakuaakat).

⁴ Kapülasü naaʼin Jesús nakuwaʼipa na wayuukana, nuluwataainjeseʼe naya sünain naikaajaainjanain saaʼu tü alamakat sümaa yaawawalin naya (Mar. 6:39, 40; paashajeʼera Juan 6:11-13). Saashin tü Bibliakat naapüin Jesús analuʼutkat nümüin chi Nüshikai saaʼujee tü pankat otta tü jimekat. Naaʼinrüin tia süka niain Maleiwa kaapajalain tü eküütkat. Washatüinjatü tü nukuwaʼipakat Jesús, oʼuraajüinjana waya süpülapünaa weküin jaʼitainna wamüiwaʼain jee sümaain wayuu waya. Süchikijee tü naaʼinrakat Jesús nuluwataain na nikirajüinkana sünain neitajüinjatüin tü eküütkat namüin na wayuu jutkatakana. Eküshii na wayuukana jee emirashii naya, apütaapejeʼe süpüshi tia eküütkat, nükotchojiraka shia Jesús süpüla nnojoluinjatüin amülain shia, eesüjaʼa shikünüinjatüle joo tia mapa. Anasü tü nukuwaʼipakat Jesús wapüleerua, weisattüinjatüin tü kasa eekat wamaʼana. Eeshii süpüla nekirajüin nachonnii na wayuu kachonshiikana süpüla noʼuraajüin süpülapünaa neküin, kapülainjatüin naaʼin nakuwaʼipa na waneinnua jee nasülajüliinjanain.

5. ¿Kasa naaʼinreeka na wayuukana sükajee naaʼinrüin Jesús kasa pülasü otta kasakaʼa naaʼinrüin Jesús?

 ⁵ Ponusü maʼin saaʼin wayuu nikirajia Jesús otta niiyajüin wayuu eekai ayuulin. Natüja aaʼu nüküjainkain Moisés nüntajachin wanee nünüikimaajachikai Maleiwa, niayaa Jesús chi nüküjakai achiki Moisés naaʼinruʼu naya wayuukana (Deut. 18:15-18). Eesüjaʼa jülüjale naaʼin na wayuukana nnojoluin kapüleein nümüin Jesús naapüin eküülü namüin napüshuaʼa na judíokana, müshiijeseʼe nasaajeein nia süpüla naikaleʼerüin nia sünain aluwatawaa (Juan 6:14, 15). Naaʼinrüleje Jesús tü namakat naya wayuukana sünainpünaashijeʼe nia política maʼaka naaʼin na judío naluwataakana aaʼu na chejeʼewaliikana Roma, nnojotpejeʼe naaʼinrüin Jesús tia. Saashin tü pütchikat oʼunushi nia nüchikuaʼa nümüiwaʼa saaʼumüin tü uuchikat. Nnojoishi nia sünainpünaain política mayaainjeʼe nüpüleeruaanüin aaʼin. Anakatche maʼin süpüla washatüin nukuwaʼipa Jesús.

6. ¿Kasa waaʼinrajatka süpüla washatüin nukuwaʼipa Jesús? (Piirakaa sümüin tü ayaakuaakat).

⁶ Nnojoleerü achuntunuin wamüin wainmajaain pan watuma otta weiyajüin wayuu eekai ayuulin. Nnojoleena asaajünüin waya süpüla waikaleʼennüin sünain aluwatawaa. Süpüleeruaajeetpejeʼe waaʼin wayuu süpüla wawotaajüin otta namaain waya na wayuu anouteʼerajanakana sukuwaʼipa tü kasakat naashin. Anasü maʼin süpüla washatüin nukuwaʼipa Jesús, nnojoishi nia sünainpünaain política. Anuu nünüiki: «Aneekünüshi taya süpüla aluwatawaa, nnojoipejeʼe taya shiʼinaajalain wayuu  süpüla taluwataainjachin» (Juan 17:14; 18:36). Anasü waaʼinrüle tü naaʼinrakat Jesús otta jülüjale waaʼin tü jülüjakat naaʼin. Nümaashii waya Maleiwa süka niainjachin aluwataain, waküja süchiki tia otta wachunta nümüin nuluwataainjachin saaʼu tü mmakat (Mat. 6:10). Wekirajaa sooʼomüin tü watüjakat sünainjee wainmajaain tü pankat nutuma Jesús.

TÜ NIKIRAJEEKALÜ ANAIN NAYA WANAA SÜMAA WAINMAJAAIN TÜ PANKAT NUTUMA

7. Püküja süchiki tü wane kasa pülasü naaʼinrakat Jesús otta jamakaʼa nanüiki na nikirajüinkana (Juan 6:16-20).

⁷ Süchikijee nikirüin Jesús wainma wayuu, nuluwataain na nikirajüinkana naleʼejüinjanain nachikuaʼa suluʼu anuwa chaa Capernaúmmüin. Nuʼunakalaka saaʼumüin tü uuchikat suulia nüikaleʼennüin süpüla aluwatawaa (paashajeʼera Juan 6:16-20). Chapa na nikirajüinkana suluʼu tü anuwakat, aʼitüsü wanee juya, katchinsü maʼin joutai, wawaimaajatü, jashichisü maʼin tü palaakat. Nuʼunakalaka Jesús nanainmüin na nikirajüinkana sümaa waraittüin nia sooʼopünaa tü palaakat. Nuunejaka Pedro süpüla waraittüinjachin nia sooʼopünaa tü palaakat (Mat. 14:22-31). Noʼotoopa Jesús suluʼu tü anuwakat eimalaasü tü wawaikat. Namakalaka na nikirajüinkana sümaa ponuin maʼin naaʼin tia: «Shiimainjaʼaya maʼin Nüchoin pia Maleiwa» (Mat. 14:33). a Ponusü maʼin naaʼin na nikirajüinkana Jesús tü neʼrakat, nnojotpejeʼe ponuin maʼin naaʼin tü naaʼinrakat paala soʼu wainmajaain tü pankat nutuma. Anuujeseʼe nünüiki Marcos süchiki tia: «Nnojotsü natüjaain aaʼu tü nikirajeekalü anain naya wanaa sümaa wainmajaain tü pankat nutuma. Ayatüsia neʼe süttüin nekii, nnojotsü kasain nayaawatüin aaʼu» (Mar. 6:50-52). Nnojotsü nayaawatüin aaʼu na nikirajüinkana Jesús naaʼinrüin kasa pülasü sükajee tü nüpülainkat Jehová. Süchikijee tia aashajaajeechi Jesús nüchikuaʼa süchiki wainmajaain pan nutuma. Nikirajaka waya sünain wanee kasa waaʼinrajatka.

8, 9. ¿Kasa nachajaaka eeʼiree Jesús na wayuukana? (Juan 6:26, 27).

⁸ Tü keeʼireekat naaʼin na wayuu nikirakana Jesús shia emirainjanain neʼe naya. Waneemüin kaʼi süchikijee tia neʼrapa Jesús oʼunuin namaa na aluwataaushikana, oʼunushii naya suluʼu wanee anuwa sejetü Tiberíades, chainjana naya Capernaúmmüin, nachajaainjachi achiki Jesús (Juan 6:22-24). ¿Shiache keeʼireeka naaʼin naapajüinjatüin tü nümakat Jesús süchiki nuluwataainjachin Maleiwa? Nnojo, tü keeʼireekat naaʼin shia neküinjanain neʼe. ¿Jamüsü watüjaakaʼa saaʼu tia?

⁹ Jülüjaa waaʼin tü nümakat Jesús namüin naya wayuukana soʼu nüntiraain namaa chaa süʼütpaʼa Capernaúm. Nüküjain Jesús namüin shiain keeʼireein naaʼin neküinjanain neʼe. Nüküjain Jesús namüin emirain neʼe naya sutuma tü eküülü amojujaakat neʼe. Anuu nünüiki namüin: «Shia jiʼyataa achiirua tü eküülü eekat waneepia, tü katakalü atuma soʼu wayuu waneepia» (paashajeʼera Juan 6:26, 27). Nüküjainña namüin niainjachin Jehová aapaka namüin tia eküütkat. Ponokojosoʼo maʼin naaʼin naya wayuukana jeʼtsüin tia eküülü katakalü atuma soʼu wayuu waneepia. ¿Jeʼtsüche tia eküütkat? ¿Kasache naaʼinrajatka süpüla nantüin sünain?

10. ¿Kasa naaʼinrüinjatka na judíokana naashin Jesús süpüla katüinjatüin noʼu waneepia?

¹⁰ Aainjüinjanayaa na judíokana naaʼinruʼu waneirua kasa süpüla saapünüin namüin tia eküütkat. Eesüjaʼa jülüjale naaʼin naaʼinrajatüin tü Pütchi Aapünakat nümüin  Moisés. Anuupejeʼe nünüiki Jesús namüin: «Anuu tü jaaʼinrüinjatkat naashin Maleiwa: kanoulainjana jia nünain chi wayuu nüjünalakai» (Juan 6:28, 29). Kanoulainjana na judíokana nünain chi nüjünalakai Maleiwa süpüla katüinjatüin noʼu waneepia. Aashajaashi Jesús paala süchiki tia (Juan 3:16-18, 36). Nüküjainña mapa süchiki tü waaʼinrajatkat süpüla katüinjatüin woʼu waneepia (Juan 17:3).

11. ¿Kasa wayaawataka anainjee shiain neʼe jülüjain naaʼin na judíokana tü pankat? (Salmo 78:24, 25).

¹¹ Nayoutuin na judíokana tü nikirajakalü anain Jesús süchiki tü kasa jeketü naaʼinrajatkat Maleiwa. Anuujeseʼe nanüiki nümüin: «Anashi paaʼinrüle wanee kasa pülasü woʼupala, wanoujeenaka pünain» (Juan 6:30). Naküjain nümüin Jesús saapünüin maná namüin na natuushinuukana nükalioʼu Moisés, aʼwanaajireʼennüsü tia sümaa tü pankat (Neh. 9:15; paashajeʼera Salmo 78:24, 25). Jayasü naaʼu na judíokana ayatüinña jülüjain naaʼin tü pankat, müshiijeseʼe nnojoluin nasakirüin Jesús wanaa sümaa naashajaain süchiki «tü pan shiimainsükajaʼaya iipünaajeejatüin», tü makalü aka saaʼin maná chejeejatkat iipünaajee kataka atuma soʼu wayuu (Juan 6:32). Shia neʼe jülüjaka naaʼin na judíokana tü eküütkat, nnojotsü jülüjain naaʼin tü nikirajakalü anain naya Jesús. ¿Kasa watüjaka sünainjee tia alatakat?

TÜ WAAʼINMAAINJATKAT MAʼIN

12. ¿Kasa waaʼinmaainjatka maʼin naashin Jesús?

¹² Wanee kasa watüjaka sünainjee tü sümakat Juan kapiitulo 6 shia waaʼinmaainjatüin maʼin woonooin sümaa nünüiki Maleiwa jee aleewain waya nümaa. Nüküjain paala tia Jesús wanaa sümaa nuuʼulakünüin aaʼin nutuma Satanás (Mat. 4:3, 4). Otta wanaa sümaa chajachin nia saaʼu wanee uuchi nüküjain wayaawatüinjatüin saaʼu choʼujaain chi Maleiwakai wamüin (Mat. 5:3). Wasakira waaʼin sünain tüü: «¿Jaʼyasüche taaʼu taaʼinmaain maʼin toonooin sümaa nünüiki Maleiwa jee aleewain taya nümaa suulialeʼeya tü eküütkat?».

13. (1) ¿Jamüsü nnojotkaʼa mojuin weküle? (2) ¿Jarat tü pütchi woonooinjatkalü amaa naashin Pablo? (1 Corinto 10:6, 7, 11).

¹³ ¿Jamüsü nnojotkaʼa mojuin wachuntule tü weküinjatkat nümüin Jehová jee weküle shia? (Luc. 11:3). Süküjain tü Bibliakat talatüin waaʼin weküle jee wasüle süka nümaʼanajeejatüin shia chi shiimainshikai suluʼu Maleiwain (Ecl. 2:24; 8:15; Sant. 1:17). Nnojotpejeʼe waaʼinmaainjatüin maʼin tü eküütkat. Shia nüshajaka achiki tia Pablo namüin na anoujashii eejanakana süpülapünaa sajaʼttinnüin tü pueulokot Jerusalén sümaʼaleeya tü aʼwaajüleekat. Nüshajüin namüin süchiki tü alatakat chayaa Israel süʼütpaʼa tü uuchikat Sinaí. Nüchiaain naya suulia nnojoluinjatüin suchuntaain naaʼin wanee kasa mojusü maʼaka suchuntaain naaʼin na israelitakana (paashajeʼera 1 Corinto 10:6, 7, 11). Suchuntaain naaʼin kasa mojusü süka shiain jülüjain maʼin naaʼin tü eküütkat (Núm. 11:4-6, 31-34). Naaʼinrüinña tia wanaa sümaa nekaain jee nasaain soʼu naʼwaajüin niyaakua wanee paaʼachon (Éx. 32:4-6). Sükajee tia nüchiaain Pablo na anoujashii eejanakana süpülapünaa sajaʼttinnüin Jerusalén soʼu tü juyakat 70 soʼu wakalia. Alüʼütsia maʼin maaʼulu süpüla sajaʼttinnüin tü kasa mojusükat, müshiijeseʼe oonooinjanain waya sümaa tü nümakat Pablo.

14. ¿Jamüsü sünüiki tü Bibliakat süchiki tü eküülü eeinjatkat saaʼu tü mmakat?

¹⁴ Wanaa sümaa nüküjain Jesús wachuntuinjanain nümüin Maleiwa tü weküinjatkat aashajaashia nia süchiki saainjüneerüin tü keeʼireekat naaʼin Maleiwa yaa mmapaʼa maʼaka saainjünüin chayaa iipünaa (Mat. 6:9-11). ¿Kaseetche eeka soʼu tia? Süküjain tü Bibliakat  jouluinjatüin eküülü saaʼupünaa tü mmakat. Aküjünüsü suluʼu Isaías 25:6-8 watteerüin saalii eküülü yaa saaʼu tü mmakat nuluwataapa Jehová. Suluʼu Salmo 72:16 aküjünüsü jouleerüin maʼin pünajüt saaʼu tü mmakat otta wainmaleejeeriain saaʼupünaa tü uuchikalüirua. Jülüjataa paaʼin püʼlakajaajeechin tü eküülü pikaajakat maʼin otta pikajataajeechin süchon püpünajüin (Is. 65:21, 22). Meeria nakuwaʼipa napüshuaʼa na wayuu kepiainjanakana saaʼu tü mmakat.

15. ¿Kasa ekirajünüinjanakana anain na asoʼiraainjanakana aaʼin? (Juan 6:35).

¹⁵ (Paashajeʼera Juan 6:35). ¿Kaseerü alataka namüin na ekakana tü pankat jee na ekakana tü jime wainmajaaka nutuma Jesús? Eeshiijaʼa weʼraajeenale noʼutku süsoʼiraapa naaʼin. Eesüjaʼa süsoʼiraajeerüle naaʼin jaʼitashii nnojoliin kanoulain naya paala nünain Jesús (Juan 5:28, 29). Nayaawateerü aaʼu tü nümakat Jesús, tü makat mayaa: «Taya chi pan katakai atuma soʼu wayuu, chi eekai nürütkaain tanainmüin nnojoleechi outuin jamü nüchikuaʼa». Kanoulainjana naya sünain naapajiraain nikii Jesús saaʼu naainjala, ekirajüneena na asoʼiraainjanakana aaʼin süpüla aleewain naya nümaa Jehová, jaʼitakajaʼa na eekana joʼuuin suluʼu tü Paʼaraiisükat ekirajüneena naya. Talataleejeeria maʼin waaʼin sutuma wekirajüin naya wayuukana, nnojoleerü müin aka saaʼin talataa aaʼin sünainjee ekaa eküülü suluʼu tü mma jeketüinjatkat.

16. ¿Kasa wekirajaajeetka anain sünain tü wane ekirajaayakat?

¹⁶ Wekirajaaitpa anain süpüshi tü nümakat Jesús suluʼu Juan kapiitulo 6, eepejeʼe waneirua kasa nüküjeekalü achiki wamüin Jesús süchiki katüinjatüin woʼu süpüla kaʼikat süpüshuaʼa. Choʼujaasü natüjaainjatüin saaʼu tia na judíokana, müshiʼiya wayakana choʼujaasü watüjaainjatüin saaʼu tia. Sünain tü wane ekirajaayakat ayateenaʼaya waya ekirajaain süchiki tü nümakat Jesús suluʼu Juan kapiitulo 6.