¿Sotusüche paaʼin tü pütchi ojuʼitakat suluʼu Aapiria Wayuu soʼujatka 2024? Pusouta shiʼipajee pütchikat tüü:

¿Kasa naaʼinraka Jehová süpüla kojutuin nümüin na jieyuukana?

Nnojotsü koʼuin nukuwaʼipa namüin na jieyuukana, kojutushii maʼin nümüin Jehová na tooloyuu jee na jieyuu kanoulakana nünain. Naapajüin nanüiki, jülüjasü naaʼin jamüin naaʼin jee tü alatakat namüin. Nütüjaa aaʼulu eein süpüla anain natuma tü naʼyataainkat (w24.01, süpana 15 otta 16).

¿Kasa waaʼinrajatka süpüla woonooin sümaa pütchikat tüü: «Anakajaʼa nnojorüle wanaawain jaaʼin namaa»? (Éfeso 5:7).

Nüchiaain Pablo waya suulia waʼaleewajaain namaa na wayuu mojukana akuwaʼipa shiiʼiree nnojoliin woonooin nümaa Jehová. Eeshiijaʼa waʼaleewajaale namaa naya wayuukana suluʼupünaa redes sociales. Eejüinjatü waaʼin suulia tia (w24.03, süpana 22 otta 23).

¿Kasa waaʼinrajatka süpüla nnojoluin mojuin wakuwaʼipa sutuma tü pütchi alawaakat?

Eeshii nayale aküjain wamüin tü pütchi alawaakat wanee waʼaleewain, nnojotsü naaʼinjeein tia, shiajaʼa neʼe nnojoluin nüsakirüin palajana shiimainrejeʼeya tü nüküjakat. Eesiaʼaya suluwataanüle wamüin sükajee correo nnojotka wachuunajalain jee eesü naküjale tia alawaakat wamüin na wayuu aküjakana alawaa nüchiki Jehová (w24.04, süpana 12).

¿Kasa watüjaaka aaʼu otta tü nnojotkalü watüjaain aaʼu süchiki tü naaʼinrajatkat Jehová kasalajanapeena nutuma naainjala Salomón, naainjala na wayuu kepiapuʼukana Sodoma otta Gomorra jee naainjala na wayuu kepiapuʼukana nükalioʼu Noé?

Nnojotsü watüjaain aaʼu müleka najaʼttirüle naya Jehová süpüla kaʼikat süpüshuaʼa, watüjaapejeʼe saaʼu niʼrüin Jehová tü suluʼukat saaʼin wayuu otta tü shikiiruʼukat jee niain wanee Maleiwa amüliajüikai wayuu (w24.05, süpana 3 otta 4).

¿Kasa watüjaaka aaʼu nüchiki Jehová sünainjee tü pütchikat: «Müshi pia maʼaka saaʼin ipa miyoʼu»? (Deut. 32:4).

Naaʼinmajüin waya Jehová soʼunnaa müliaa. Nikeraajeerü waneepia nünüiki. Matüjainsat aʼwanajawaa nukuwaʼipa, nnojotsü süpüla shiiʼiratünüin tü keeʼireekat naaʼin (w24.06, süpana 26 otta 28).

¿Kasa waaʼinrajatka süpüla anain waaʼin namaa na wawalayuukana wakolojoopa?

Jülüja waaʼin nükaalinjain waya Jehová maʼaka nükaalinjain na aʼyataapuʼukana nümüin sümaiwa, nnojo waʼwanaajireʼerüin nakuwaʼipa na wawalayuukana, waaʼinra kasa namaa otta weʼraaja naya süpüla aleewain waya namaa (w24.07, süpana 26-28).

¿Kasa watüjaaka sünainjee apünüinsü kasa naashajaaka achiki Jesús suluʼu Mateo kapiitulo 25?

Sünainjee tü naaʼinrakat na wayuu makana aka saaʼin sukuwaʼipa anneerü otta kaaʼula, wayaawata aaʼu waneepiainjanain waya nümaa Jehová. Sünainjee tü naaʼinrakat na polooshiikana majayünnüü, wayaawata aaʼu eejüinjatüin waaʼin otta yapainjana waya mapeena. Sünainjee tü naaʼinrakat na achepchiee eʼitaanakana ajapuluʼu nneerü «talento», wayaawata aaʼu tütüinjanain waya sünain tü waʼyataainkat nümüin Jehová (w24.09, süpana 20-24).

¿Jeʼra sajaʼapüin iipünaamüin tü kasa akumajünakat soʼuluʼujee supuettoʼuse tü aʼwaajülee nukumajirakat Salomón?

Suluʼu waneirua sukoopiain tü Bibliakat sümaiwajatka ashajünüsü «120 sajaʼapüin iipünaamüin» suluʼu 2 Crónicas 3:4, tia müsü aka saaʼin wanee torre kajaʼapüinka 53 meetüro iipünaamüin. Suluʼu waneirua sukoopiain tü Biblia sümaiwajatkat, ashajünüsü «20 codo», 9 meetüro tia, pansaasü tia sümaa tü sukuwaʼipakat sukumajia süsepü tü aʼwaajüleekat, eesü maʼaka 2,7 meetüro sülaüttain (w24.10, süpana 31).

¿Kasa aküjüneeka sükajee tü pütchikat «waneesüinjatü naʼwayuuse» na neʼipajanakana na laülaashiikana? (1 Tim. 3:12).

Shiainjatü nuʼwayuuseka neʼe chi wawalakai wanee jierü. Nnojotsü nukumajüinjatüin sukuwaʼipa süpüla nuʼluwajiraain nukuwaʼipa. Nnojotsü alaayaainjatüin naaʼin sooʼomüin waneirua jieyuu nnojotka nuʼwayuusein (w24.11, süpana 19).

¿Nüikaleʼerüinche Jesús sukuwaʼipa tü aainjünajatkat soʼu tü Ekawaa Aipaʼajatkat nutuma wanaa sümaa nüküjain tü sümakat Juan 6:53?

Nüküjain Jesús tü nümakat suluʼu Juan 6:53-56 noʼupala wainma judío chaa Galilea soʼu tü juyakat 32. Soʼu nüküjain Jesús namüin tia, nnojotsü nanoujain sünain. Tü nümakat Jesús wane juya süchikijee tia, soʼu tü Ekawaa Aipaʼajatkat nutuma namüinjatü palitchon wayuu, na aluwataainjanakana nümaa chaʼayaa iipünaa (w24.12, süpana 10 otta 11).