Anuu tü nüshajakat Pablo nümüin Timoteo, wanee laülaashi suluʼu tü outkajaaleekat wanaa nümaa: «Taluwataain pia nuʼupala Maleiwa, nuʼupala Cristo Jesús jee noʼupala na aapiee aneekuushikana ayatajatüin paaʼinrüin tü aluwataanakalü anain pia sümaa nnojoluin pülerajüin wayuu jee koʼuin pukuwaʼipa sümüin» (1 Tim. 5:21). ¿Jaralii na aapiee aneekuushikana?

Wekirajaa palajana na nnojoliikana naʼakain naya aapieekana. Nnojoishii nayain na 144.000 anoujashii chainjanakana iipünaamüin. Wanaa sümaa nüshajüin Pablo nümüin Timoteo, nnojotyülia asoʼiraain naaʼin na 144.000 anoujashii chainjanakana aluwatawaa nümaa Jesús. Nnojotyülia aʼwanajaain nakuwaʼipa na aluwataaushikana otta na waneinnua anoujashii kepiakana nakalioʼu süpüla meʼrujushiinjanain naya (1 Cor. 15:50-54; 1 Tes. 4:13-17; 1 Juan 3:2).

Nnojoishii nayain na aapiee eʼrüliikana wayumüin soʼujatka tü juya miyoʼushaatakat soʼu nükalia Noé. Süka naaʼinrüin tü keeʼireekat naaʼin Satanás yolujaashii naya otta nüʼünüüshii naya Jesús (Gén. 6:2 TNM; Luc. 8:30, 31; 2 Ped. 2:4). Asürünneena naya nutuma Jesús mapeena suluʼu wanee ishi soʼu miit juya jee najaʼttireena naya wanaa nümaa Satanás (Jud. 6; Apoc. 20:1-3, 10).

Wanaa sümaa nüshajüin Pablo suluʼu 1 Timoteo 5:21 nachiki na aapiee aneekuushikana, nuchuntuinña Maleiwa otta Jesús. Na aapiee aneekuushikana naya napüshi na aapiee waneepiakana nümaa Maleiwa chaa iipünaa, aʼyanaajiiraashii naya nümaa Maleiwa otta Jesús.

Watta naalii na aapiee waneepiakana nümaa Jehová (Heb. 12:22, 23). Naatayaa müsü tü aʼyatawaa naapakat Jehová namüin (Apoc. 14:17, 18). Nuluwataain Jehová wanee aapiee süpüla nuʼutuin naaʼin 185.000 surulaat asirio (2 Rey. 19:35). Naashin Jesús eejeena waneinnua aapiee ajütüneenaka süpüla nasünneʼerüinjatüin tü kaainjalakalü atuma wayuu otta na wayuu aainjakana kasa mojusü. Alateerü tia nuluwataapeena Maleiwa (Mat. 13:39-41). Eetaashii joo na aapiee outkajeʼereenaka na aneekuushi chainjanakana iipünaamüin (Mat. 24:31). Eeshii joo na aluwataanakana süpüla naaʼinmajüin waya maa aka süküjain Salmo 91:11 (Mat. 18:10; anasü paashajeʼerüle Mateo 4:11 otta Lucas 22:43).

Na aapiee saashajaakana achiki 1 Timoteo 5:21, eeshii nayale na aapiee aapünakana amüin aʼyatawaa süpüla jülüjain naaʼin na anoujashii eekana suluʼupünaa tü outkajaaleekat. Süpülapünaa tü nümakat Pablo suluʼu 1 Timoteo 5:21, aashajaashi nia nachiki na laülaashiikana jee nüküjain namüin na wawalayuukana kojutuinjanain naya namüin. Akaʼaya na laülaashiikana, ayatüinjatü naaʼinrüin tü aluwataanakalü anain naya, nnojoluinjatü nalerajüin wayuu jee nnojoluinjatü koʼuin nakuwaʼipa sümüin wayuu otta nnojoliinjana ashapajaajaain naneekajatpa wanee kasa. ¿Jamüsü naaʼinrajatkaʼa tia na laülaashiikana? Shia süka nakaalinjain na wawalayuukana nuʼupala Maleiwa, nuʼupala Cristo jee noʼupala na aapiee aneekuushikana. Neʼrüin tü naaʼinrakat chaa iipünaajee. Wayaawatüitpa aaʼu saapünüin aʼyatawaa namüin na aapieekana maʼaka saaʼin naaʼinmajüinjanain na anoujashiikana, jülüjainjatüin naaʼin tü aküjaakat pütchi jee naküjainjatüin nümüin Jehová tü neʼrakat (Mat. 18:10; Apoc. 14:6).